རྒྱ་ནག་གཞུང་གིས་གྲྭ་རིན་ཆེན་ཚུལ་ཁྲིམས་ལགས་ཀྱི་ནང་མི་རྣམས་ནས་བཙོན་ཁང་གི་ཁང་པར་བརྒྱུད་དུས་ཡུན་སྐར་མ་བཅུའི་རིང་ཁ་བརྡ་བྱ་ཆོག་པར་བཟོས་ཡོད་ཀྱང་། བཙོན་ཁང་དུ་ཁོང་ལ་ངལ་རྩོལ་དང་ཆབ་སྲིད་སློབ་གསོ་ཟེར་བ་སོགས་མང་པོ་སྤྲོད་ཀྱི་ཡོད་འདུག
ཕྱི་ལོ་ ༢༠༡༩ ལོར་རྒྱལ་ཁབ་ཁ་བྲལ་དང་སྤྱི་ཚོགས་ཟིང་འཁྲུག་བསླངས་པའི་ཉེས་མིང་འོག་འཛིན་བཟུང་བྱས་ཏེ་དུས་ཡུན་ལོ་གཉིས་ཀྱི་རིང་ལ་ངེས་མེད་བཀག་བྱས་ཤིང་། ཕྱི་ལོ་ ༢༠༢༡ ལོར་ལོ་བཞི་དང་ཕྱེད་ཀའི་བཙོན་འཇུག་ཁྲིམས་ཐག་བཅད་པའི་གྲྭ་རིན་ཆེན་ཚུལ་ཁྲིམས་ལགས། ད་ལྟ་ཁྲིན་ཏུའུ་མེན་ཡང་བཙོན་ཁང་དུ་བཙོན་འཇུག་བྱས་ཡོད་པ་ལྟར། འདི་གའི་གསར་འགོད་པར་འབྲེལ་ཡོད་བོད་མི་ཞིག་གིས་ད་ལྟ་རྒྱ་ནག་གཞུང་གིས་གྲྭ་རིན་ཆེན་ཚུལ་ཁྲིམས་ལགས་དང་ནང་མིའི་བར་དུས་ཡུན་སྐར་མ་ ༡༠ རིང་ཁ་པར་བརྒྱུད་ཁ་བརྡ་བྱེད་པའི་ཆོག་མཆན་སྤྲད་ཡོད་སྐོར་བརྗོད་བྱུང་།
གནས་ཚུལ་མཁོ་སྤྲོད་པས། འདི་ལོའི་ཕྱི་ཟླ་ ༣ ཙམ་གྱི་ནང་ཁྲིན་ཏུའུ་མེན་ཡང་བཙོན་ཁང་ནས་ཀློད་གྲོལ་བཏང་བའི་བཙོན་རོགས་ཤིག་གིས་གྲྭ་ཚུལ་ཁྲིམས་ཀྱི་ནང་མིར་བརྗོད་པ་ལྟར་ན། དགེ་འདུན་པ་ཁོང་མེན་ཡང་བཙོན་ཁང་དུ་ཡོད་པ་དང་། ཁོང་བདེ་ཐང་ཡིན་པ་དང་ཕ་མ་གཉིས་ཀྱི་འདྲ་པར་རེ་བསྐུར་ཐབས་གནང་རོགས། དེ་མིན་གྱི་དངོས་པོ་གཞན་བསྐུར་ཡང་བཙོན་ཁང་ནས་ལེན་ཆོག་གི་མེད་པ་དང་། དུས་ཡུན་སྐར་མ་ ༡༠ ཙམ་རིང་བཙོན་ཁང་གི་ཁ་པར་བརྒྱུད་ནས་ནང་མིར་ཁ་བརྡ་བྱེད་པའི་ཆོག་མཆན་སྤྲད་པའི་སྐད་ཅིག་བསྐུར་འདུག ཅེས་བརྗོད་སོང་།
གནས་ཚུལ་རྒྱུས་ལོན་བྱུང་བ་ལྟར་ན། གོང་ཞུས་ཟླ་ཚེས་ཉིན་རྔ་བ་ཀིརྟི་དགོན་གྱི་དགེ་འདུན་པ་ཞིག་དང་མགོ་ལོག་གི་བོད་མི་ཚོང་པ་གཅིག་བཅས་བོད་རིགས་བཙོན་པ་གཉིས་མེན་ཡང་བཙོན་ཁང་ནས་ཀློད་གྲོལ་བཏང་ཡོད། འོན་ཀྱང་། བདེ་འཇགས་ཀྱི་ཆེད་དུ་བོད་མི་དེ་གཉིས་ཀྱི་མིང་དང་བཙོན་འཇུག་གི་ཉེས་དོན་དང་བཅས་ཞིབ་ཕྲའི་གནས་ཚུལ་བཀོད་མེད།
གནས་ཚུལ་མཁོ་སྤྲོད་པས་བརྗོད་པ་ལྟར་ན། གྲྭ་རིན་ཆེན་ཚུལ་ཁྲིམས་ལགས་ཉེས་མེད་བཙོན་འཇུག་བྱས་རྗེས། ད་བར་ནང་མིས་སྤྲད་པའི་ཟ་མ་དང་གྱོན་གོས་སོགས་ཅི་གང་ཡང་སྤྲོད་དུ་བཅུག་མེད་པ་དང་། བཙོན་ཁང་དུ་གྲྭ་རིན་ཆེན་ཚུལ་ཁྲིམས་ལགས་སུ་ཆབ་སྲིད་ཀྱི་སློབ་གསོ་ཟེར་བ་དང་ངལ་རྩོལ་གྱི་ལས་ཀ་ཤུགས་ཆེན་བྱེད་དུ་འཇུག་གི་ཡོད་ཀྱང་། ད་ལྟ་ཁོང་གི་འཕྲོད་བསྟེན་གྱི་གནས་སྟངས་དང་ངལ་རྩོལ་གྱི་ལས་ཀ་ཅི་ཞིག་ལས་ཀྱི་འཇུག་གི་ཡོད་ཤེས་རྟོགས་ཐུབ་ཀྱི་མེད་པ་རེད།
