བཞུགས་སྒར་དྷ་རམ་ས་ལ་སོགས་སུ་བོད་མི་དང་བོད་དོན་རྒྱབ་སྐྱོར་བ་སྟོང་ཕྲག་མང་པོ་འདུ་འཛོམས་བྱས་ཏེ་༧གོང་ས་རྒྱལ་བ་རིན་པོ་ཆེ་མཆོག་དགུང་གྲངས་ ༨༧ ཕེབས་པའི་༧སྐུའི་འཁྲུངས་སྐར་སྲུང་གཙི་ཞུས།
དེ་རིང་སྔ་དྲོར་དྷ་ས་ཐེག་ཆེན་གཙུག་ལག་ཁང་གི་ཆོས་རའི་ནང་དུ། ༧གོང་ས་རྒྱལ་བ་རིན་པོ་མཆོག་དགུང་གྲངས་ ༨༧ ཕེབས་པའི་འཁྲུངས་སྐར་གཞུང་འབྲེལ་ཐོག་སྲུང་གཙི་ཞུས་སོང་བ་དང་། མཛད་སྒོའི་ཐོག་སྐུ་མགྲོན་གཙོ་བོ་ཧི་མ་ཅལ་མངའ་སྡེའི་སྤྱི་ཁྱབ་བློན་ཆེན་རྗེ་རམ་ཐ་གོར་( Jai Ram Thakur)མཆོག་དྲ་ལམ་ནས་མཉམ་ཞུགས་གནང་ཡོད་པ་དང་། དམིགས་བསལ་སྐུ་མགྲོན་བོད་དོན་རྒྱབ་སྐྱོར་གློག་བརྙན་འཁྲབ་སྟོན་པ་གྲགས་ཅན་རི་ཆའ་ཌི་གྷེ་རི་( Richard Gere)ལགས་དང་། ཧི་མ་ཅལ་མངའ་སྡེའི་ཤིང་ནགས་བློན་ཆེན་མཆོག དེ་བཞིན་དགའ་ལྡན་ཁྲི་རིན་པོ་ཆེ་མཆོག་དང་། ཇོ་ནང་རྒྱལ་ཚབ་རིན་པོ་མཆོག་སོགས་ཆེད་ཕེབས་གནང་ཡོད་པ་དང་། དེ་བཞིན་དྷ་སར་ཡོད་པའི་སེར་སྐྱ་མི་མང་འཕོན་ཆེན་བཅས་འདུ་འཛོམས་ཀྱིས་གཞས་སྣ་འཁྲབ་སྟོན་སོགས་བྱས་ཏེ་དགའ་སྟོན་ལ་རོལ་སོང་།
མཛད་རིམ་གྱི་ཐོག་མར་དྲ་ལམ་བརྒྱུད་ཧི་མ་ཅལ་མངའ་སྡེའི་སྤྱི་ཁྱབ་བློན་ཆེན་ཐ་གོར་མཆོག་གིས། དེ་རིང་༧གོང་ས་རྒྱལ་བ་རིན་པོ་ཆེ་མཆོག་ནས་དགུང་གྲངས་ ༨༧ བཞེས་པའི་སྐུའི་འཁྲུངས་སྐར་ལ་འཚམས་འདྲི་དང་། མགོན་པོ་གང་ཉིད་སྐུ་ཚེ་ཡུན་རིང་བརྟན་ཞིང་ང་ཚོས་༧མགོན་པོ་གང་ཉིད་ཡང་ཡང་མཇལ་ཐུབ་པའི་སྨོན་འདུན་ཞུ་ཡི་ཡོད། ༧གོང་ས་མཆོག་ནས་མུ་མཐུད་བྱམས་བརྩེ་དང་སྙིང་རྗེ་གོང་སྤེལ་ཆེད་སྐུ་ལས་སྐྱོན་མུས་ཡིན་ལ། མགོན་པོ་མཆོག་གི་མཛད་འཕྲིན་ལ་གེགས་བར་ཁྱད་མི་ཡོང་བའི་སྨོན་ལམ་ཞུ་ཡི་ཡོད། ༧གོང་ས་རྒྱལ་བ་རིན་པོ་མཆོག་དགུང་གྲངས་བགྲེས་པོར་ཕེབས་ཡོད་ཀྱང་། ཁོང་གི་ཞུམ་མེད་ཀྱི་སྙིང་སྟོབས་སོགས་ནི་ཆེས་བསྔགས་འོས་པ་ཞིག་ཡིན་པ་མ་ཟད། ཁོང་ནས་བོད་མི་ཚོས་བོད་མི་བཟང་མོ་ཞིག་བྱེད་དགོས་པའི་ལམ་སྟོན་དང་སྐུལ་མ་གནང་གི་ཡོད་པ་རེད། ཁོང་ཉིད་དྷ་སར་བཞུགས་ཡོད་ཀྱང་། འཛམ་གླིང་ཞི་བདེ་ཡོང་བའི་བཀའ་སློབ་སྩལ་མུས་ཡིན་སྟབས། བོད་མི་གཙོས་རྒྱ་གར་བ་ཡོངས་ལ་སེམས་ཤུགས་འཕར་མ་ཞིག་གནང་གི་ཡོད་པ་རེད། ༧གོང་ས་མཆོག་ཆེས་གཉན་འཕྲང་གི་དུས་དེར་རྒྱ་གར་དུ་ཕེབས་ཀྱང་། ཁོང་གི་ཐུགས་ནས་བོད་དང་བོད་མི་རྣམས་ནམ་ཡང་མ་དོར་བར་ད་ལྟའང་བོད་མི་རྣམས་ཀྱི་སླད་དུ་སྐུ་ལས་སྐྱོན་མུས་ཡིན་སྐོར་སོགས་གསུངས་སོང་།
མཛད་སྒོའི་ཐོག་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བའི་ལས་ཚབ་ཀརྨ་དགྲ་འདུལ་མཆོག་གིས་བོད་ཀྱི་ཟློས་གར་ཚོགས་པས་དཔར་སྐྲུན་བྱས་པའི་བོད་ཀྱི་ཨ་ཅེ་ལྷ་མོའི་ཁྱད་ཚོས་དང་ལོ་རྒྱུས་ཞེས་པའི་དཔེ་དེབ་ཅིག་དབུ་འབྱེད་གནང་བ་དང་། བོད་མིའི་སྒྲིག་འཛུགས་ཆོས་རིག་ལས་ཁུངས་ཀྱི་ཁྱབ་ཁོངས་སུ་ཡོད་པའི་བོད་ཀྱི་རིས་མེད་དགོན་སྡེ་ཁག་གི་གཞུང་ཆེན་རིག་གཅིག་རྐང་འཛིན་ཉམས་ཞིབ་ཀྱི་བསླབ་པ་མཐར་སོན་གྱི་དགེ་འདུན་པ་རྣམས་ལ་ལག་ཁྱེར་གནང་སོང་། དེ་ནས་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱི་སྒྲིག་ཞུགས་མ་ཡིན་པའི་ཉམས་ཞིབ་པ་རྡོ་རྗེ་རིན་ཆེན་ལགས་སུ་ཉམས་ཞིབ་མཐར་སོན་བྱུང་བའི་ལག་ཁྱེར་དང་། སྐུའི་བླ་སྨན་པ་ཚེ་བརྟན་རྡོ་རྗེ་ལགས་དང་། སྨན་པ་ཚེ་དབང་རྟ་མགྲིན་ལགས་གཉིས་ཀྱིས་བཙན་བྱོལ་བོད་མིའི་སྤྱི་ཚོགས་སུ་འཕྲོད་བསྟེན་དང་འབྲེལ་བའི་སྤྱི་ཚོགས་ཀྱི་ལས་དོན་ལ་ནུས་པ་ཆེན་པོ་བཏོན་དང་འདོན་མུས་ཡིན་པར་ཆེད་བསྟོད་གཟེངས་རྟགས་ཕུལ་སོང་། དེ་བཞིན་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས། ཞབས་ལོ་ ༢༥ སོན་པའི་བོད་མིའི་སྒྲིག་འཛུགས་ཀྱི་ལས་བྱེད་བཞི་ལ་གཟེངས་བསྟོད་བཅས་གནང་སོང་།
བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ནས་བཀའ་ཤག་གི་གསུང་འཕྲིན་སྒྲོགས་སྦྱང་གནང་བའི་ནང་། དེ་རིང་གི་ཉིན་མོ་འདི་ནི་གངས་ཅན་པ་ཙམ་དུ་མ་ཟད། འདོད་རྔམ་དང་འགྲན་རྩོད་ཀྱི་ཡོ་ལང་རྒོད་པའི་འཇིག་རྟེན་འདིར་བྱམས་བརྩེ་དང་ཞི་བདེའི་གདམ་ངག་སྩོལ་མཁན་བྱང་ཆུབ་སེམས་དཔའ་ཆེན་པོ་ཞིག་དངོས་སུ་བྱོན་པའི་དུས་ཚེས་རྩ་ཆེན་ཞིག་ཡིན་སྟབས། གོ་སྐབས་འདི་བརྒྱུད་ནས་སྐལ་ལྡན་གྱི་སྐྱེ་འགྲོ་སྤྱི་དང་། བྱེ་བྲག་ཏུ་༸མགོན་པོ་གང་ཉིད་ཀྱི་རྗེས་འཇུག་པ་དང་། རང་རིགས་གཞིས་བྱེས་སྤུན་ཟླ་ཡོངས་ལ་དུས་ཆེན་འདིར་མཛའ་བརྩེའི་འཚམས་སྨོན་དང་བཀྲ་ཤིས་བདེ་ལེགས་ཞུ་རྒྱུ་ཡིན། སྤྱི་ནོར་༸གོང་ས་༸སྐྱབས་མགོན་ཆེན་པོའི་འཁྲུངས་ལྷ་དབྱར་གསོལ་གྱི་དུས་ཆེན་སྲུང་བརྩི་ཞུ་སྐབས། རང་ཅག་བཙན་བྱོལ་བ་རྣམས་ལ་༸མགོན་པོ་མཆོག་གིས་བཀའ་དྲིན་མཐའ་ཡས་པ་བསྐྱངས་པའི་རྣམ་ཐར་གྱི་ཆ་ཕྲ་མོ་ཙམ་ཤེས་དགོས་པ་གལ་ཆེན་པོ་ཡིན་ཞིང་། དྲིན་ཤེས་ན་དྲིན་དྲན་ཐུབ་པ་དང་། དྲིན་དྲན་པ་ཡིན་ན་དྲིན་ཆེན་ལ་དྲིན་ལོག་མི་བྱེད་པའི་ཡ་རབས་ཀྱི་སྤྱོད་པ་བསྟེན་ཐུབ་པའི་ཁར། དྲིན་འཇལ་བའི་ཐབས་ཚུལ་ཡག་ཤོས་ཏེ། བླ་མའི་ལུགས་ཟུང་བཀའ་སློབ་བསླབ་བྱ་ཚུལ་བཞིན་ཉམས་སུ་བླངས་པའི་སྒོ་ནས་མི་ཚེ་དོན་ལྡན་སྐྱེལ་བར་མངོན་དུ་ཕྱོགས་ཐུབ་པ་ཡིན། ཞེས་དང་། ཡང་ཁོང་གིས། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༡༡༣ ལྷག་འཚོ་བཞུགས་གནང་རྒྱུ་ཚད་མའི་ལུང་གིས་ཟིན་པ་མ་ཟད། ༸མགོན་པོ་མཆོག་ཉིད་ཀྱིས་ཀྱང་སྔ་རྗེས་སུ་ཡང་ཡང་ཞལ་གྱིས་བཞེས་ཡོད་པས། རང་ཅག་ལས་ཀྱི་སྣེ་མོ་བ་རྣམས་དང་། མང་ཚོགས་ཐུན་མོང་ནས་སྤྱི་མཐུན་བསོད་ནམས་གསོག་པ་དང་། ༸རྒྱལ་བ་དགྱེས་པའི་མཆོད་སྤྲིན་དུ་༸གོང་ས་མཆོག་ཐུགས་འཚབ་དང་ཐུགས་བསུན་འབྱུང་གཞིའི་གཏམ་སྤྱོད་མཐའ་དག་རྒྱང་དུ་དོར་ཏེ། ཐུགས་སྐྱེད་དམ་བཅའ་བཞི་གཙོ་འགྱུར་གྱིས་བཀའ་དགོངས་བཞིན་རྣམ་དཀར་དགེ་བའི་ལས་ལ་གཞོལ་ཞིང་། སྤྱི་དོན་ཐོག་ནུས་པ་མཉམ་སྤུངས་ཡོང་བའི་འབོད་སྐུལ་ཞུ་རྒྱུ་དང་། སྐབས་ ༡༦ པའི་བཀའ་ཤག་གི་ངོས་ནས་ལས་དོན་བྱེད་སྒོ་མཐའ་དག་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་སློབ་ལམ་སྟོན་གཞིར་བཟུང་འབད་སྒྲུབ་ཞུ་མུས་ཡིན་ཞིང་། མ་འོངས་པར་ཡང་༸མགོན་པོ་མཆོག་གི་དགོངས་གཞི་བསྒྲུབ་རྒྱུའི་དམ་བཅའ་བརྟན་བཟུང་ཡིན་ཞུ་རྒྱུ། ཞེས་གསུངས་སོང་།
དེའི་རྗེས་སྤྱི་འཐུས་མཁན་པོ་བསོད་ནམས་བསྟན་འཕེལ་མཆོག་གིས་བོད་མི་མང་སྤྱི་འཐུས་ལྷན་ཚོགས་ཀྱིས་གསུང་འཕྲིན་སྒྲོགས་སྦྱང་གནང་བའི་ནང་། མགོན་པོ་གང་གི་འདས་པའི་ལོ་ངོ་བཅུ་ཕྲག་དུ་མའི་རིང་བླ་ན་མེད་པའི་ཆོས་སྲིད་གཉིས་ཀྱི་མཛད་བཟང་ཕྱོགས་ཐམས་ཅད་ནས་ཀློང་དུ་བརྡོལ་བས། ངེས་པ་དོན་གྱིས་འཇིག་རྟེན་གྱི་ཕན་བདེ་འབྱུང་བའི་སྒོ་གཅིག་པུར་གྱུར་བ་དེས་འཛམ་གླིང་ནང་གཟུར་གནས་སྐྱེ་བོ་མང་པོའི་ཡིད་དབང་འཕྲོག་སྟེ་བསྔགས་བརྗོད་ཀྱི་མེ་ཏོག་འཐོར་བཞིན་པ་མ་ཟད། ཨ་རི་དང་ཡུ་རོབ་གཉིས་ཀྱིས་གཙོས་འཛམ་གླིང་ཤར་ནུབ་རྒྱལ་ཁབ་མང་པོའི་གཞུང་སྒེར་ཚོགས་པ་ཁག་ནས་༸གོང་ས་༸སྐྱབས་མགོན་ཆེན་པོ་མཆོག་ལ་ཕྱི་ལོ་ ༡༩༨༩ ལོར་ནོ་སྦེལ་ཞི་བདེའི་གཟེངས་རྟགས་ (Nobel Peace Prize) དང་། ཕྱི་ལོ་ ༢༠༠༧ ལོར་ཨ་རིའི་གྲོས་ཚོགས་ཀྱི་གསེར་གྱི་གཟེངས་རྟགས། (Congressional Gold Medal) ཕྱི་ལོ་ ༢༠༡༢ ལོར་ཨིན་ཡུལ་གྱི་ཇོན་ཊེམ་པེལ་ཊོན་གཟེངས་རྟགས་ (John Templeton Prize) སོགས་ཀྱིས་མཚོན་ཆེ་བསྟོད་གཟེངས་རྟགས་མང་པོ་འབུལ་བཞེས་མཛད་ཡོད། ཉེ་ཆར་རང་བོད་མི་མང་སྤྱི་འཐུས་ལྷན་ཚོགས་ཀྱི་གོ་སྒྲིག་འོག་ཕྱི་ལོ་ ༢༠༢༢ ཟླ་ ༦ ཚེས་ ༢༢ དང་ ༢༣ ཉིན་གཉིས་རིང་རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་ཐེངས་བརྒྱད་པ་དེ་བཞིན་ཨ་རིའི་རྒྱལ་ས་ཝ་ཤིང་ཊོན་དུ་བསྐོང་ཚོགས་བྱས་ཤིང་ཨ་རིའི་གྲོས་ཚོགས་གོང་མའི་ཕྱི་སྲིད་ལས་དོན་ཚོགས་ཆུང་གི་མཐུན་འགྱུར་འོག་ཚོགས་ཆེན་གྱི་དབུ་འབྱེད་ (Capitol Hill) གྲོས་ཚོགས་ར་བའི་ཚོགས་ཁང་ནང་དང་། དབུ་འབྱེད་ཀྱི་ཚོགས་མགོན་དུ་ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་སྐུ་ནེན་སི་པི་ལོ་སི་ (Nancy Pelosi) མཆོག་ཆེད་ཕེབས་གནང་སྟེ། ཨ་རིའི་གཞུང་ནས་བོད་དོན་ཐོག་མུ་མཐུད་རྒྱབ་སྐྱོར་གནང་རྒྱུ་ཡིན་སྐོར་སོགས་ཀྱི་གསུང་བཤད་གནང་། དེ་བཞིན་༸གོང་ས་༸སྐྱབས་མགོན་ཆེན་པོ་མཆོག་གི་བརྙན་ལམ་བརྒྱུད་བཀའ་སློབ་གསུང་བཤད་གནང་བ་བཅས་ནི་ཆེས་རྨད་དུ་བྱུང་བ་དང་རིན་ཐང་བྲལ་བའི་བོད་དོན་ཐད་ཀྱི་གསུང་བཤད་ཆགས་ཡོད། སྐབས་དེར་ཨ་རིས་གཙོས་རྒྱལ་ཁབ་ཁག་མི་འདྲ་བ་ ༢༨ ཀྱི་གྲོས་ཚོགས་འཐུས་མི་དང་། ཕྱི་ནང་གི་མཁས་དབང་། མི་རིགས་འདྲ་མིན་གྱི་ལས་འགུལ་བ་སོགས་ཚོགས་བཅར་བ་ཁྱོན་མི་གྲངས་ ༡༠༠ ལྷག་ཙམ་དངོས་སུ་ཆེད་ཕེབས་ཀྱི་མཉམ་ཞུགས་གནང་ཡོད་པ་མ་ཟད། གྲོས་ཚོགས་འཐུས་མི་ཁག་ཅིག་གིས་དྲྭ་ཐོག་ནས་ཀྱང་ལྷན་ཞུགས་གནང་བ་བྱུང་ཡོད། ཚོགས་ཆེན་ཐོག་ཚོགས་བཅར་བ་རྣམས་ཀྱིས་བོད་དོན་ཐོག་རྒྱབ་སྐྱོར་ཤུགས་ཆེ་གནང་བའི་རྣམ་པ་གསལ་པོར་སྟོན་གནང་ཡོད། ཚོགས་ཆེན་ཐོག་ནས་ཝ་ཤིང་ཊོན་སྤྱི་བསྒྲགས་ (Washington Declaration) དང་། མ་འོངས་པའི་ཝ་ཤིང་ཊོན་ལག་བསྟར་འཆར་གཞི་ (Washington Action Plan) བཅས་གཏན་འབེབས་གནང་ཐུབ་པ་མ་ཟད། ཚོགས་ཆེན་ཐོག་རྒྱལ་སྤྱིའི་གྲོས་ཚོགས་འཐུས་མིའི་བོད་དོན་འབྲེལ་མཐུད་ཚོགས་པ་ (INPaT) ཡང་སླར་གསོ་ཐུབ་པ་བྱུང་ཡོད། ཚང་མས་མཁྱེན་གསལ་ལྟར། ང་ཚོས་ལས་དོན་ཇི་འདྲ་ཞིག་བསྒྲུབས་ཀྱང་། དོན་དངོས་སུ་གྲུབ་འབྲས་དེ་དག་གི་ཐོག་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེའི་འོད་ཟེར་གྱི་བྱིན་རླབས་དང་བཀའ་དྲིན་གྱིས་མ་ཁྱབ་པ་མེད་པ་བཞིན། ད་རེས་ཀྱི་རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་ཐེངས་བརྒྱད་པ་དེ་ཡང་། བོད་མིའི་བླ་ན་མེད་པའི་དབུ་འཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལོ་མང་རིང་སྐུ་ལས་བསྐྱོན་པའི་འབྲས་བུ་ལས་བྱུང་བའི་བོད་དང་བོད་མིའི་བློས་ཐུབ་ཀྱི་རྒྱབ་སྐྱོར་བ་སྙན་གྲགས་ཅན་ཨ་རིའི་གྲོས་ཚོགས་འོག་མའི་ཚོགས་གཙོ་མཆོག་དང་། གྲོས་ཚོགས་ཀྱི་འཐུས་མི་མང་པོ་ཞིག་གི་རྒྱབ་སྐྱོར་ལ་བརྟེན་ནས་ལོ་རྒྱུས་རང་བཞིན་ལྡན་པའི་གྲོས་ཚོགས་བོད་དོན་རྒྱབ་སྐྱོར་ཚོགས་ཆེན་ཐེངས་བརྒྱད་པ་དེ་བཞིན་ཨ་རིའི་རྒྱལ་ས་ཝ་ཤིང་ཊོན་དུ་རྒྱལ་ཁའི་ངང་བསྐོང་ཚོགས་གནང་ཐུབ་པ་བྱུང་བ་ཞིག་ལ་ངོས་འཛིན་ཞུ་བཞིན་ཡོད། དེ་རིང་གི་ཉིན་མོར། གཞིས་བཞུགས་རང་རིགས་སྤུན་ཟླ་རྣམ་པ་དང་། འཛམ་གླིང་ཡུལ་གྲུ་གང་སར་གནས་པའི་བོད་མིས་གཙོས་ཞི་བདེ་ལ་དགའ་བའི་འཛམ་གླིང་མི་མང་ཡོངས་ཀྱིས། དགའ་དད་སྤྲོ་གསུམ་ངང་༸སྐུའི་འཁྲུངས་སྐར་སྲུང་བརྩི་ཞུ་བའི་ལམ་ནས་མགོན་པོ་གང་གི་ཡོངས་གྲགས་ཐུགས་བསྐྱེད་མཛད་འགན་བཞི་དང་། དུས་རྟག་ཏུ་འཛམ་གླིང་ཀུན་ཁྱབ་མཛད་འཕྲིན་རྣམས་ཀྱི་བཀའ་དྲིན་རྗེས་སུ་དྲན་ཞིང་། ཡ་རབས་བཟང་སྤྱོད་དང་བྱམས་བརྩེ་ལྡན་པའི་བོད་མི་ཞིག་ཡོང་ཐབས་ཆེད་ཉམས་ལེན་ཞུ་རྒྱུའི་དམ་བཅའ་བསྐྱར་ནན་ཞུ་རྒྱུ་ནི་༸སྐུའི་འཁྲུངས་སྐར་སྲུང་བརྩི་ཞུ་རྒྱུའི་དགོས་དོན་སྙིང་པོ་དེ་ཆགས་ཡོད་པས་བོད་མི་ཡོངས་ཀྱི་ཉིན་རེའི་འཚོ་བའི་ནང་ལག་བསྟར་ཉམས་ལེན་དགོས་པའི་འབོད་སྐུལ་ནན་པོ་ཞུ་རྒྱུ་ཡིན། བོད་དང་བོད་མིའི་རིག་གཞུང་ཐད་ལ་རྒྱ་གར་གཞུང་མང་གཉིས་ནི་ཧ་ཅང་གི་བཀའ་དྲིན་ཆེན་པོ་དང་། དེ་བཞིན་ཨ་རི་དང་ཡུ་རོབ་རྒྱལ་ཁབ་ཁག་གིས་གཙོས་བོད་དོན་ལ་རྒྱབ་སྐྱོར་གནང་མཁན་གྱི་རྒྱལ་སྤྱིའི་སྲིད་གཞུང་ཁག་དང་། དབུ་ཁྲིད་རྣམ་པ། ཚོགས་པ་དང་མི་སྒེར་བཅས་ཚང་མར་དེ་རིང་གི་དུས་བཟང་འདིར་བོད་མི་ཡོངས་ཀྱི་ཚབ་ཞུས་ཏེ་བཀའ་དྲིན་ཆེ་ཞེས་ཞུ་རྒྱུ་ཡིན།
དེའི་རྗེས་དམིགས་བསལ་སྐུ་མགྲོན་སྐུ་ཞབས་རི་ཆའ་ཌི་གྷེ་རེ་ ( Richard Gere) ལགས་ཀྱིས། ༧གོང་ས་རྒྱལ་བ་རིན་པོ་མཆོག་ནི་ཆེས་ཁྱད་འཕགས་ཀྱི་མི་སྣ་ཞིག་ཡིན་སྟབས། འདིར་ཕེབས་པའི་བོད་མི་ཚོས་དགའ་སྤོབས་བྱ་འོས་པ་ཞིག་རེད་ལ། ཁོང་ཉིད་ནི་བོད་མི་ཞིག་ཡིན་པ་རེད། ༧གོང་ས་རྒྱལ་བ་རིན་པོ་མཆོག་ནི་དུས་གཏན་དུ་འདིར་བཞུགས་ཀྱི་མེད་ཀྱང་། ཁོང་ཉིད་དགུང་ལོ་ ༡༡༣ དང་ཡང་ན། ཁོང་ཉིད་དགུང་གྲངས་༡༥༠ ལྷག་བཞུགས་པའི་རེ་བ་བྱེད་ཀྱི་ཡོད། བོད་མི་ཚོས་༧གོང་ས་རྒྱལ་བ་རིན་པོ་མཆོག་ལ་བརྟེན་ནས་གནས་རྒྱུ་མེད་པར། བོད་མི་ཚོས་ཕན་ཚུན་རོགས་འདེགས་བྱས་ཏེ། རེ་བ་དང་ཡིད་ཆེས་སོགས་མ་བརླག་པར་བོད་མི་རིགས་ཀྱི་འཐབ་རྩོད་ཀྱི་ལས་དོན་ལ་ཧུར་ཐག་བྱེད་དགོས་པ་དང་། ལྷག་པར་བཙན་བྱོལ་བོད་མིའི་སྤྱི་ཚོགས་ནི་སྐྱབས་བཅོལ་བའི་ཁྲོད་ཀྱི་ཆེས་གྲུབ་འབྲས་གཡུར་དུ་ཟ་བ་སྨིན་པའི་སྤྱི་ཚོགས་ཤིག་ཡིན་སྟབས། བོད་མི་ཚོས་བོད་ཀྱི་སྐད་ཡིག་དང་། ཆེས་ཁྱད་འཕགས་ཀྱི་རིག་གཞུང་བཅས་ཉར་ཚགས་དང་བདག་གཅེས་བྱེད་དགོས་ཤིང་། ༧གོང་ས་རྒྱལ་བ་རིན་པོ་མཆོག་གི་ཐུགས་རྗེ་བཀའ་དྲིན་འོག་ནས། ཚང་མའི་རིགས་རུས་ཀྱི་དབྱེ་འབྱེད་སོགས་གང་ཡང་མེད་པར་བྱམས་བརྩེ་དང་སྤྲོ་སྣང་ལྡན་པའི་འཚོ་བ་རོལ་མུས་ཡིན་སྐོར་སོགས་གསུངས་སོང་།
གསར་འགོད་པ། དཔལ་ལྡན།
