དྷ་སར་ཚོགས་པ་བཞིས་དྲང་བདེན་ཉིན་མོ་སྲུང་གཙི་བྱས།   

རྒྱལ་སྤྱིའི་དྲང་བདེན་ཉིན་མོར་བོད་ནང་གི་ཆབ་སྲིད་བཙོན་པ་ཚོ་ཀློད་གྲོལ་དགོས་པའི་བསྒྲགས་གཏམ་སྤེལ་སོང་།

དེ་རིང་སྔ་དྲོར་བོད་ཀྱི་བུད་མེད་ལྷན་ཚོགས་དང་བོད་རྒྱལ་ཡོངས་མང་གཙོ་ཚོགས་པ། དགུ་བཅུ་གསུམ་ལས་འགུལ་ཚོགས་པ། བོད་རང་བཙན་སློབ་ཕྲུག་ཚོགས་པ་བཅས་གཞུང་འབྲེལ་མ་ཡིན་པའི་ཚོགས་པ་ཁག་བཞི་ཐུན་མོང་གིས་རྒྱལ་སྤྱིའི་དྲང་བདེན་ཉིན་མོ་སྲུང་གཙི་དང་འབྲེལ་གསར་འགོད་བསྒྲགས་གཏམ་ཞིག་སྤེལ་སོང་བ་དང་། གཞུང་འབྲེལ་མ་ཡིན་པའི་ཚོགས་པ་བཞིས་སྤེལ་བའི་གསར་འགོད་བསྒྲགས་གཏམ་ནང་། རྒྱ་ནག་དམར་པོའི་གཞུང་གིས་ཕྱི་ལོ་ ༡༩༤༩ ལོ་ནས་བཟུང་བོད་ཀྱི་མདོ་སྟོད་སྨད་གཉིས་སུ་རིམ་བཞིན་ཞི་བ་དང་དྲག་པོའི་གཡོ་བྱུས་སོགས་ལ་བརྟེན་ནས་བཙན་འཛུལ་གྱིས་དཔུང་འཇུག་བྱས་པ་དང་། ཕྱི་ལོ་ ༡༩༥༩ ཟླ་ ༣ ཚེས་ ༡༠ ཉིན་བོད་མི་རྣམས་འུ་ཐུག་ཐབས་ཟད་ཀྱིས། རྒྱ་དམར་གྱི་དབང་བསྒྱུར་ལ་ངོ་རྒོལ་མི་བྱེད་ཀ་མེད་བྱུང་བ་དང་། དུས་དེ་ནས་བཟུང་བོད་ཀྱི་རྗེ་འབངས་རྣམས་གཞིས་བྱེད་གཉིས་ཀྱི་གནས་སུ་གྱེས་ཏེ། བོད་མི་འབུམ་ལྷག་འཛམ་གླིང་ཡུལ་གྲུ་གང་སར་གྱར་དགོས་བྱུང་སྐོར་འཁོད་འདུག

དེ་བཞིན་བསྒྲགས་གཏམ་ནང་མུ་མཐུད་གཞིས་བྱེས་བོད་མི་རྣམས་རང་གི་ཡུལ་དུ་བཞུགས་ཡོད་ཀྱང་འགྲོ་བ་མིའི་གཞི་རྩའི་ཐོབ་ཐང་སྨྲ་བརྗོད་རང་དབང་སོགས་དང་ཡོངས་སུ་བྲལ་ནས་རྡོ་ལེབ་སྐམ་པོའི་སྟེང་གི་གྲོག་མ་ལྟར་ཞི་བདེ་ལྷིང་འཇགས་ཀྱི་འཚོ་བ་གཏན་ནས་མེད་པར་གྱུར། དེ་ཡང་རང་གི་ལུས་ངག་ཡིད་གསུམ་གྱི་རང་དབང་མེད་པ་༧ཀུན་གཟིགས་པཎ་ཆེན་རིན་པོ་ཆེ་གཙོས་པའི་གར་སོང་ཆ་མེད་པ་རྣམས་དང་། ཆབ་སྲིད་བཙོན་པ། དེ་བཞིན་ཉེ་ཆར་འདས་གྲོངས་སུ་ཕྱིན་པའི་དཔའ་བོ་བླ་བྲང་འཇིགས་མེད་རྒྱ་མཚོ་ལགས་ཀྱིས་གཙོས་པའི་ཞི་བའི་ལས་འགུལ་བ་རྣམས་ལ་དྲང་བདེན་མ་ཡིན་པའི་སྡུག་སྦྱོང་མནར་གཅོད་ཚད་ལས་བརྒལ་བ་བཏང་དང་གཏོང་བཞིན་ཡོད་པར་བརྟེན། བོད་མི་བགྲེས་གཞོན་གྲངས་ ༡༥༩ ལྷག་གིས་རང་ལུས་མེར་བསྲེགས་ཀྱི་ཐོག་ནས་ཞི་བའི་ངོ་རྒོལ་གྱི་ལས་འགུལ་སྤེལ་གྱི་ཡོད་པ་རེད། ཅེས་བརྗོད་འདུག

མཇུག་ཏུ། རང་མི་རིགས་ཀྱི་སྐད་དང་ཡི་གེའི་ཐད་འདྲ་མཉམ་གྱི་རང་དབང་ཁོར་ཡུག་མེད་པ་རེད། དེ་ཡང་སྔོན་འགྲོའི་སློབ་གྲྭ་ཚུན་ཆད་ཀྱི་ནང་དུའང་རྒྱའི་སྐད་ཡིག་གཞི་རྩར་བྱས་པའི་སློབ་ཚན་རྣམས་མི་འདོད་བཞིན་དུ་སྦྱོང་དགོས་པ་དང་། རང་གི་དད་མོས་བྱ་ཡུལ་རྩ་བའི་བླ་མའི་སྐུ་པར་ཙམ་དད་རྟེན་དུ་ཉར་ཚགས་ཞུས་ཀྱང་འཛིན་བཟུང་བཙོན་འཇུག་བྱས་དང་བྱེད་མུས་ཡིན་ཞིང་། ཁོར་ཡུག་སྲུང་སྐྱོབ་ཀྱི་ལས་འགུལ་བ་ཀརྨ་བསམ་གྲུབ་ལགས་དང་ཨ་ཉག་སེང་སྒྲ་ལགས་ལ་སོགས་པའི་ཞི་བའི་ལས་འགུལ་བ་མང་དག་ཅིག་དྲང་བདེན་མ་ཡིན་པའི་སྡུག་སྦྱོང་འོག་མནར་གཅོད་མྱངས་དང་མྱོང་བཞིན་ཡོད་པ་རེད། མདོར་ན། བོད་ས་ཡོངས་སུ་དྲང་བདེན་མེད་པའི་སྡུག་སྦྱོང་མནར་གཅོད་བཏང་དང་གཏོང་བཞིན་པ་རྣམས་མྱུར་དུ་མཚམས་འཇོག་གིས། དྲང་བདེན་དང་འདྲ་མཉམ་སོགས་བདེ་སྐྱིད་ལྡན་པའི་ཞི་བདེའི་ཉི་མ་མྱུར་དུ་འདྲེན་དགོས་པའི་འབོད་སྐུལ་ཞུ་རྒྱུ་ཡིན། ཞེས་བརྗོད་སོང་།

གསར་འགོད་པ། བསྟན་འཛིན་ཕུར་བུ།