རྒྱ་ནག་གཞུང་གིས་བོད་ཧིན་མཐའ་མཚམས་སུ་མྱུར་སྐྱོད་གཞུང་ལམ་རྒྱག་འཆར་འདུག

རྒྱ་ནག་གཞུང་གིས་བོད་ཧིན་མཐའ་མཚམས་སུ་རྟོག་ཞིབ་དང་དམག་ཆས་དབོར་འདྲེན་སྟབས་བདེ་སོགས་ལ་དམིགས་ཏེ་བོད་ལྷུན་རྩེ་རྫོང་ནས་ཤིན་ཅང་གི་མཱ་ཛ་བར་གྱི་སྤྱི་ལེ་འབུམ་བཞི་ལྷག་གི་མྱུར་སྐྱོད་གཞུང་ལམ་གསར་པ་ཞིག་རྒྱག་འཆར་ཡོད་འདུག

ཕྱི་ལོ་ ༢༠༢༠ ལོར་བོད་ཧིན་མཐའ་མཚམས་སུ་ཁེལ་བའི་ལ་དྭགས་གྷལ་ཝན་ལུང་གཤོངས་ (Galwan Valley) སུ་རྒྱ་དཀར་ནག་གཉིས་བར་གདོང་ཐུག་དྲག་པོ་བྱུང་རྗེས་ཡུལ་གཉིས་ཀྱི་འབྲེལ་བ་སྔར་ལས་ཇེ་སྡུག་ཏུ་ཕྱིན་ཡོད་པ་དང་། ཕྱོགས་གཉིས་ནས་གྲོས་མོལ་ཐེངས་མང་བྱས་ཡོད་ཀྱང་མུ་མཐུད་ནས་མཐའ་མཚམས་སུ་སྲུང་སྐྱོབ་དང་དམག་རྒྱག་གི་གྲ་སྒྲིག་བྱེད་བཞིན་ཡོད་པ་ལྟར།  དེ་རིང་རྒྱ་གར་གྱི་གསར་འགྱུར་བརྒྱུད་ལམ་ཁག་ནས་གནས་ཚུལ་སྤེལ་བ་ལྟར་ན། ཉེ་སྔོན་རྒྱ་ནག་གཞུང་གིས་རྒྱ་གར་བྱང་ཤར་ཨ་རུ་ན་ཅལ་མངའ་སྡེའི་བོད་ཧིན་ས་མཚམས་སུ་ཁེལ་བའི་བོད་ལྷུན་རྩེ་རྫོང་ནས་ཤིན་ཅང་གི་མཱ་ཛ་ ( Mazha) བར་སྤྱི་ལེ་ ༤༦༡༠༠༠ ཡོད་པའི་མཐའ་མཚམས་ཀྱི་མྱུར་སྐྱོད་གཞུང་ལམ་ G695 ཟེར་བ་ཞིག་གསར་རྒྱག་གི་ལས་གཞི་སྤེལ་རྒྱུ་ཡིན་འདུག་ལ། གཞུང་ལམ་དེ་ནི་རྒྱ་གར་བྱང་ཕྱོགས་འབྲས་ལྗོངས་ཀྱི་མཐའ་མཚམས་སུ་ཁེལ་བའི་བོད་གམ་པ་རྫོང་དང་། རྒྱ་གར་དང་བལ་ཡུལ་གཉིས་ཀྱི་མཐའ་མཚམས་སུ་ཁེལ་བའི་སྐྱིད་གྲོང་རྗོང་བརྒྱུད་ནས་གསར་རྒྱག་བྱ་རྒྱུ་ཡིན་པའི་ཚོད་དཔག་བྱེད་མུས་ཡིན་ཡང་། ལས་གཞི་དེ་ཕྱི་ལོ ༢༠༣༥ བར་ལེགས་འགྲུབ་ཡོང་བའི་འཆར་གཞི་ཡོད་པ་ཙམ་ལས་ད་ལྟའི་ཆར་ཞིབ་ཕྲའི་གནས་ཚུལ་ཤེས་རྟོགས་ཐུབ་ཀྱི་མེད་པ་རེད།

རྒྱ་ནག་གཞུང་གི་ལས་གཞི་དེའི་ཐད་རྒྱ་གར་གཞུང་ནས་ཡོངས་གྲགས་ཐོག་དྲང་ལྡོག་གི་གླེང་སློང་གང་ཡང་བྱས་མེད་ཀྱང་། གནད་དོན་དབྱེ་ཞིབ་པ་རྣམས་ཀྱིས་ད་ལྟ་རྒྱ་ནག་གཞུང་གིས་གསར་རྒྱག་བྱ་འཆར་ཡོད་པའི་མྱུར་སྐྱོད་གཞུང་ལམ་དེ་ནི་ཧིན་བལ་གཉིས་ཀྱི་མཐའ་མཚམས་སུ་ཁེལ་བའི་བོད་མངའ་རིས་སྤུ་ཧྲེང་རྫོང་དང་རྩ་མདའ་རྫོང་བརྒྱུད་དུའང་གསར་རྒྱག་བྱེད་ཉེན་ཡོད་པ་མ་ཟད། རྒྱ་དཀར་ནག་གཉིས་བར་ཆེས་རྩོད་རྙོག་ཆེ་བའི་གྷལ་ཝན་ལུང་གཤོངས་( Galwan valley ) དང་།  བདེ་མཆོག་ (Demchok) ཁུལ། འདེབས་བཟང་(Depsang ) ཁུལ་དུའང་བརྒྱག་སྲིད་པའི་ཚོད་དཔག་བྱེད་ཀྱི་ཡོད་འདུག

རྒྱ་ནག་གཞུང་གིས་འདས་ལོའི་མཇུག་ཙམ་ལ་རྒྱ་ནག་གི་སྟངས་འཛིན་འོག་ཡོད་པའི་སྤང་གོང་མཚོའི་ལྷོ་བྱང་གཉིས་ཀྱི་བར་ལ་ཟམ་པ་ཞིག་བརྒྱབ་སྟེ། འདི་ལོའི་ཟླ་ ༤ ནང་ལེགས་གྲུབ་བྱུང་བ་བརྒྱུད། སྤང་གོང་མཚོ་ནས་བོད་མངའ་རིས་རུ་ཐོག་རྫོང་དུ་ཡོད་པའི་དམག་ཆས་མཛོད་ཁང་བར་ལ་གཞུང་ལམ་ཞིག་འཛུགས་སྐྲུན་བྱེད་མུས་ཡིན་འདུག་ལ། དམག་ཆས་མཛོད་ཁང་དེ་ནི་བོད་ནང་ཡོད་པའི་རྒྱ་ནག་གི་གོ་མཛོད་ཁང་ཆེ་ཤོས་དེ་ཡིན་འདུག དེ་བཞིན་འདི་ལོའི་ཟླ ༥ ནང་རྒྱ་ནག་གཞུང་གིས་སླར་ཡང་སྤང་གོང་མཚོ་ནས་བོད་རུ་ཐོག་རྫོང་དམག་ཆས་མཛོད་ཁང་ནས་མེ་སྒྱོགས་སོགས་དབོར་འདྲེན་བྱེད་མཁན་རླངས་འཁོར་ཆེ་གྲས་ཀྱང་འགྲོ་ཐུབ་པའི་དམག་སྤྱོད་ཟམ་པ་ཞིག་ཀྱང་རྒྱག་མུས་ཡིན་འདུག

ད་བར་རྒྱ་དཀར་ནག་གཉིས་ཀྱིས་མཐའ་མཚམས་ཀྱི་རྩོད་རྙོག་དང་འབྲེལ་ནས་གྲོས་མོལ་ཐེངས་ ༡༥ ལྷག་བྱས་ཡོད་ནའང་གྲུབ་འབྲས་དམིགས་བསལ་ཐོན་མེད་པ་ལྟར། ཟླ་འདིའི་ཕྱི་ཚེས་ ༡༧ ཉིན་རྒྱ་དཀར་ནག་གཉིས་ཀྱི་ཆེས་མཐོའི་དམག་དོན་མི་སྣས་ཐུགས་ཕྲད་ཐེངས་ ༡༦ པ་བྱས་ཏེ། མཐའ་མཚམས་གཉིས་ཀྱི་རྩོད་རྙོག་ཞི་འགྲིག་ཡོང་ཐབས་ལ་གླེང་སློང་བྱས་ཡོད་འདུག་ལ། རྒྱ་གར་གྱི་ཆེས་མཐོའི་དམག་དོན་མི་སྣས་རྒྱ་ནག་བཅིངས་གྲོལ་དམག་མིས་རྒྱ་གར་གྱི་བདེ་མཆོག་དང་འདེབས་བཟང་ཁུལ་དུ་སིམ་འཛུལ་དང་རྙོག་གླེང་མི་བྱ་རྒྱུའི་རེ་བ་བཏོན་ཡོད་འདུག

གསར་འགོད་པ། དཔལ་ལྡན།