ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་སྐུ་ནེན་སི་པི་ལོ་སི་མཆོག་ཐའེ་ཝན་དུ་ཕེབས་འཆར་ཡོད་པ་དེར་རྒྱ་ནག་གཞུང་གིས་འགོག་རྒོལ་ནན་པོ་བྱ་རྒྱུའི་གྲ་སྒྲིག་ཨང་གསར་ཡོད་སྐོར་བསྒྲགས་ཡོད་འདུག
འདི་ལོའི་ཕྱི་ཟླ ༨ པའི་ནང་ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་སྐུ་ནེན་སི་པི་ལོ་སི (Nancy Pelosi) མཆོག་གཞུང་འབྲེལ་གྱི་ཐོག་ནས་ཐའེ་ཝན་ནང་འཚམས་གཟིགས་སུ་ཕེབས་འཆར་ཡོད་པ་ལྟར། ཁ་སང་རྒྱ་ནག་གཞུང་ཕྱོགས་ནས་འཚམས་གཟིགས་དེ་ལ་མོས་མཐུན་གཏན་ནས་མེད་པས་རྒྱ་ནག་ཕྱོགས་ནས་འགོག་རྒོལ་ནན་པོ་བྱེད་པར་གྲ་སྒྲིག་ཨང་གསར་ཡོད་པའི་ཉེན་བརྡ་བཏང་ཡོད་འདུག
འདི་ལོའི་ཕྱི་ཟླ་ ༤ པའི་ནང་ལྕམ་སྐུ་ནེན་སི་པི་ལོ་སི་མཆོག་ནས་ཐའེ་ཝན་ནང་གཟིགས་སྐོར་གནང་འཆར་ཡོད་ཀྱང་། ཁོང་མོར་ཏོག་དབྱིབས་རིམས་ནད་འགོས་པའི་རྐྱེན་གྱིས་ཐོག་མའི་འཆར་གཞི་ལྟར་བྱུང་མེད་པ་རེད། ད་ལྟའི་ཆར་ཨ་རིའི་གཞུང་ཕྱོགས་ནས་འཚམས་གཟིགས་དེའི་སྐོར་ཡོངས་ཁྱབ་གསལ་བསྒྲགས་གནང་མེད་ཀྱང་། འདི་ལོའི་ཕྱི་ཟླ་ ༨ པའི་ནང་ཕེབས་འཆར་ཡོད་པ་དང་། དེ་ནི་ཏག་ཏག་རྒྱ་ནག་བཅིངས་གྲོལ་དམག་གི་རྒྱལ་ཡོངས་དམག་སྟོན་ཟླ་བར་ཁེལ་ཡོད་པ་མ་ཟད། ཨ་རིའི་སྲིད་འཛིན་བྷའེ་ཌིན་མཆོག་དང་རྒྱ་ནག་གི་མགོ་འཁྲིད་ཞི་ཅིན་ཕིང་གཉིས་ནས་ཕྱི་ཟླ་བརྒྱད་པ་དགུ་པའི་ནང་དུ་བརྙན་ལམ་བརྒྱུད་རྒྱལ་དོན་ཚོགས་འདུ་ཞིག་ཀྱང་བསྡུ་འཆར་ཡོད་པ་རེད།
གསར་འགོད་པས་སྲིད་འཛིན་བྷའེ་ཌིན་མཆོག་ལ་ལྕམ་སྐུ་མཆོག་གི་གཟིགས་སྐོར་ཐད་བཀའ་འདྲི་ཞུས་པར་ཁོང་གིས། ཨ་རིའི་དམག་ཕྱོགས་ནས་ད་ལན་གྱི་གཟིགས་སྐོར་དེ་བསམ་འཆར་ཡག་པོ་ཞིག་མིན་པའི་ངོས་འཛིན་བྱེད་ཀྱི་ཡོད་ཀྱང་། དེའི་སྐོར་ལ་སྔར་གྱི་གནས་སྟངས་མཁྱེན་རྟོགས་མེད་སྐོར་གསུངས་འདུག་ལ། ལྕམ་སྐུ་ནེན་སི་པི་ལོ་སི་མཆོག་གིས། སྲིད་འཛིན་མཆོག་གི་སྐད་ཆ་དེའི་ནང་དོན་ནི། ཨ་རིའི་དམག་ཕྱོགས་ནས་ང་ཚོའི་གནམ་གྲུར་རྒྱ་ནག་གིས་གཏོར་རྒོལ་དང་ཡང་ན་དེ་རིགས་ཀྱི་གནས་ཚུལ་བཟོ་སྲིད་པའི་སེམས་འཚབ་གནང་གི་ཡོད་པ་གསུངས་པ་ཡིན་ཡང་། ད་ལྟའི་ཆར་སྲིད་འཛིན་མཆོག་ནས་དེའི་སྐོར་ལ་ཁོང་མོར་གོ་བསྡུར་གནང་མེད་སྐོར་གསུངས་འདུག
ཁ་སང་རྒྱ་ནག་ཕྱི་སྲིད་ལས་ཁུངས་ཀྱི་མགྲིན་ཚབ་པ་ཀྲོ་ལི་ཅན་( Zhao Lijian) གྱིས་གསར་འགོད་པའི་དྲི་བར་ལན་འདེབས་བྱེད་སྐབས། རྒྱ་ནག་གཞུང་ཕྱོགས་ནས་ལྕམ་སྐུ་ནེན་སི་པི་ལོ་སི་མཆོག་ཐའེ་ཝན་དུ་ཕེབས་འཆར་ཡོད་པར་མོས་མཐུན་གཏན་ནས་མེད་པ་མ་ཟད། གལ་ཏེ་ཨ་རིའི་གཞུང་འབྲེལ་མི་སྣ་རྣམས་ཐའེ་ཝན་ལ་དངོས་སུ་ཕེབས་ཚེ། རྒྱ་ནག་ཕྱོགས་ནས་ས་ཁོངས་བདག་དབང་གི་ཐད་ནས་འགོག་སྲུང་ནན་མོ་བྱ་རྒྱུ་ཡིན་པ་མ་ཟད། ཨ་རིའི་གཞུང་གིས་གནད་དོན་དེའི་ཐད་ནས་འགན་ཆ་ཚང་བླང་དགོས་སྐོར་བརྗོད་འདུག
དེ་བཞིན། ཟླ་འདིའི་ཕྱི་ཚེས་ ༢༡ ཉིན་རྒྱ་ནག་གཞུང་གི་མགྲིན་ཚབ་པ་ཝང་ཝིན་པེན( Wang Wenbin) གྱིས། ལྕམ་སྐུ་ནེན་སི་པི་ལོ་སི་མཆོག་ཐའེ་ཝན་དུ་ཕེབས་ཚེ། དེས་རྒྱ་ནག་གཅིག་གི་ལམ་ལུགས་ལ་རྩིས་མེད་རྡོག་རོལ་བཏང་ཡོད་པ་མ་ཟད། རྒྱ་ནག་གི་ས་ཁོངས་བདག་དབང་ལ་གཏོར་བརླག་གཏོང་གི་ཡོད་སྟབས། ཨ་རྒྱ་གཉིས་ཀྱི་ཆབ་སྲིད་ཀྱི་འབྲེལ་ལམ་ལ་ཕོག་ཐུག་གཏོང་བ་དང་། ཐའེ་ཝན་རང་བཙན་དུ་འདོད་མཁན་རྣམས་ལ་བརྡ་ལན་ངན་པ་ཞིག་ཀྱང་སྤྲོད་ངེས་ཡིན་པས། རྒྱ་ནག་གཞུང་ཕྱོགས་ནས་འགོག་རྒོལ་ནན་མོ་བྱ་རྒྱུ་ཡིན་སྐོར་འགྲེལ་བརྗོད་བྱས་ཡོད་པ་རེད།
ཕྱི་ལོ་ ༡༩༩༧ ལོར་སྐབས་དེའི་ཨ་རིའི་གྲོས་ཚོགས་འོག་མའི་ཚོགས་གཙོ་སྤྱི་མཐུན་ཚོགས་པའི་འཐུས་མི་ནེའུ་ཊི་རྗིན་རིག་(Newt Gingrich)ལགས་ཀྱང་ཐའེ་ཝན་ནང་ཕེབས་མྱོང་ཡོད་པ་དང་། ཁ་སང་ཕྱི་ཚེས་ ༢༥ ཉིན་ཧྥོག་སི་གསར་ཁང་(Fox News) གིས་ནེའུ་ཊི་རྗིན་རིག་ལགས་སུ་དེའི་སྐོར་བཅར་འདྲི་ཞུ་སྐབས། རྗིན་རིག་ལགས་ནས་ལྕམ་སྐུ་མཆོག་གི་གཟིགས་སྐོར་དེ་ཁོང་མོ་རང་ནས་ཐག་གཅོད་གནང་རྒྱུ་ཞིག་ཡིན་སྟབས། དེའི་ཐད་སྲིད་འཛིན་བྷའེ་ཌིན་གྱི་སྲིད་གཞུང་སོགས་ནས་བྱུས་གཏོགས་མེད་སྐོར་གསུངས་འདུག
རྒྱ་ནག་གཞུང་ནས་ཐའེ་ཝན་ནི་རྒྱ་ནག་གཞུང་གི་ཆ་ཤས་སུ་གྱུར་བའི་གླིང་ཕྲན་ཞིག་ཡིན་པར་ངོས་འཛིན་བྱེད་མུས་ཡིན་པ་མ་ཟད། ཐའེ་ཝན་གྱི་མཁའ་ཁུལ་དུ་རྒྱ་ནག་གཞུང་གི་དམག་དོན་གནམ་གྲུ་རྒྱུན་ཆད་མེད་པར་ཆེད་གཏོང་བྱས་ཏེ། འཇིགས་སྐུལ་ཡང་ཡང་བྱེད་མུས་ཡིན་པ་ལྟར། ད་ལན་ལྕམ་སྐུ་མཆོག་ཐའེ་ཝན་ནང་ཕེབས་པ་ཡིན་ན། རྒྱ་ནག་གཞུང་གིས་གནམ་གྲུ་མངག་གཏོང་བྱས་ཏེ་འགོག་རྐྱེན་བཟོ་སྲིད་པ་མ་ཟད། རྒྱ་ནག་གཞུང་གིས་ཐེངས་འདིའི་འཚམས་གཟིགས་ལ་འགོག་རྐྱེན་བཟོ་ཆེད་ཐའེ་ཝན་གྱི་མཁའ་ཁུལ་དུ་འཕུར་སྐྱོད་མི་ཆོག་པའི་གསལ་བསྒྲགས་སྤེལ་ཉེན་ཡོད་འདུག་ལ། ཡང་གནད་དོན་དབྱེ་ཞིབ་པ་ཁག་ཅིག་གིས། གལ་སྲིད་ལྕམ་སྐུ་མཆོག་ཐའེ་ཝན་ནང་ཕེབས་ཚེ། ཕྱི་ལོ་ ༡༩༩༦ ལོའི་ཐའེ་ཝན་མཚོ་འགག་གི་དམག་དོན་ཛ་དྲག་གི་གནས་བབ་བྱུང་རྗེས་ལས་ཉེན་ཚབས་ཆེ་བའི་གནས་སྟངས་ཤིག་འབྱུང་སྲིད་སྐོར་ཡང་རྗོད་ཀྱི་འདུག
ད་ལན་གྱི་གཞུང་འབྲེལ་ཕྱོགས་སྐྱོད་སྐབས་ལྕམ་སྐུ་མཆོག་གིས་ཐའེ་ཝན་གཅིག་པུ་ཙམ་མིན་པར་ཉི་ཧོང་དང་། སིངྒ་པུར། ཨིན་ཌོ་ནེ་ཤི་ཡ། མ་ལི་ཤེ་ཡ་སོགས་སུ་ཕེབས་འཆར་ཡོད་འདུག་ལ། གལ་སྲིད་ཐའེ་ཝན་ནང་ཕེབས་ཐུབ་པ་བྱུང་ཚེ་དེ་ནི་མི་ལོ ༢༥ རྗེས་ཀྱི་ཨ་རི་གཞུང་གི་ཆེས་མཐོའི་དབུ་འཁྲིད་ཅིག་གཞུང་འབྲེལ་ཐོག་ཐའེ་ཝན་དུ་ཕེབས་པ་དང་པོ་ཆགས་ཡོད་འདུག མི་གྲངས་ས་ཡ་ ༢༣ ལྷག་ལས་མེད་པའི་ཐའེ་ཝན་མཚོ་འགག་ནི་ཨ་རྒྱ་གཉིས་འཐབ་རྩོད་ཁྲོད་ཧ་ཅང་གནད་འགག་ཅན་ཞིག་ཆགས་ཡོད་ཅིང་། ཐའེ་ཝན་མཚོ་འགག་ཁུལ་དུ་དབང་ཤུགས་རྒྱ་སྐྱེད་ཐུབ་པ་ཡིན་ན། ནུབ་ཞི་བདེ་རྒྱ་མཚོའི་ཁུལ་དུ་འགུལ་སྐྱོད་བྱེད་པར་སྟབས་བདེ་བ་མ་ཟད། ནུབ་ཞི་བདེ་རྒྱ་མཚོའི་ཁུལ་དུ་ཡོད་པའི་གྷུ་ཝམ (Guam ) མཚོ་གླིང་དང་ཨ་རིའི་ཧཱ་ཝའེ་( Hawaii) མངའ་སྡེར་ཡོད་པའི་ཨ་རིའི་དམག་སྒར་ལ་དམག་རྒོལ་བྱ་བདེ་བོ་ཡོད་པ་སོགས། མཚོ་གླིང་དེ་ཨ་རྒྱ་གཉིས་ཀྱི་བར་དམག་དོན་དང་རྒྱལ་སྲུང་བདེ་འཇགས། ཚོང་དོན། ཆབ་སྲིད་སོགས་ཀྱི་ཐོག་ནས་ཧ་ཅང་གནད་འགག་ཅིག་ཆགས་ཡོད་འདུག
གསར་འགོད་པ། དཔལ་ལྡན།
