ཆུ་ལོག་རྒྱུག་ནས་པ་ཀི་སི་ཐན་གྱི་མི་གྲངས་ ༡༠༠༠ ལྷག་རྐྱེན་འདས་སུ་ཕྱིན།

འདི་ལོའི་ཆར་ཞོད་ཀྱི་རྐྱེན་གྱིས་ལྷོ་ཨེ་ཤ་ཡའི་རྒྱལ་ཁབ་པ་ཀི་སི་ཐན་དུ་ཆུ་ལོག་རྒྱུག་ནས་མི་ ༡༠༠༠ ལྷག་རྐྱེན་འདས་དང་མི་གྲངས་ས་ཡ ༣༣ ལྷག་གི་འཚོ་གནས་ལ་གནོད་འཚེ་ཚབས་ཆེན་ཐེབས་ཡོད་འདུག

In the last 24 hours, nine members of a family drowned.

འདི་ལོར་རྒྱ་གར་དང་པ་ཀི་སི་ཐན་སོགས་སུ་ཆར་ཤུགས་ཆེ་བའི་རྐྱེན་གྱིས་ཆུ་ལོག་རི་ཉིལ་བྱུང་སྟེ་མི་རྒྱུ་གཉིས་ལ་གནོད་འཚེ་ཆེན་པོ་ཐེབས་ཀྱི་ཡོད་པ་ལྟར། འདི་ལོའི་ཕྱི་ཟླ ༧ ཚེས ༡༤ ནས་ད་བར་པ་ཀི་སི་ཐན་གྱི་རྫོང་ཁག་ ༡༡༦ ལྷག་ནང་ཆུ་ལོག་ཐེངས་མང་རྒྱུག་སྟེ། མི་གྲངས་ ༡༠༠༠ ལྷག་རྐྱེན་འདས་སུ་ཕྱིན་ཡོད་པ་དང་། མི་གྲངས་ས་ཡ་ ༣༣ ཙམ་གྱི་འཚོ་གནས་ལ་གནོད་འཚེ་ཆེན་པོ་ཐེབས་བཞིན་ཡོད་འདུག་ལ། དེ་ནི་མི་ལོ་ ༡༠ ལྷག་གི་རྗེས་སུ་པ་ཀི་སི་ཐན་དུ་བྱུང་བའི་ཆུ་ལོག་གི་གནོད་འཚེ་ཆེ་ཤོས་དེ་ཡིན་འདུག

དེའི་ཐད་པ་ཀི་སི་ཐན་གྱི་གནམ་གཤིས་བརྟག་དཔྱད་ཁང་གི་འགན་འཛིན་ཤི་རི་རཱ་མེན (sherry Rehman)གྱིས། པ་ཀི་སི་ཐན་དུ་མི་ལོ་བཅུ་ཕྲག་གཅིག་ལྷག་གི་རྗེས་སུ་ཆེས་གནོད་འཚེ་ཆེ་བའི་རང་བྱུང་གི་གོད་ཆག་ཅིག་བྱུང་བ་མ་ཟད། པ་ཀི་སི་ཐན་གྱི་ལྷོ་རྒྱུད་དུ་ཆུ་ལོག་གི་གནོད་འཚེ་ཆེན་པོ་ཐེབས་ཏེ། མི་གྲངས་མང་པོ་ཞིག་གནས་སྤོར་བྱ་དགོས་ཁེལ་ཡོད་སྟབས། རས་གུར་ས་ཡ་གཅིག་ལྷག་ཕུབ་ནས་རོགས་སྐྱོར་བྱེད་མུས་ཡིན་སྐོར་དང་། པ་ཀི་སི་ཐན་གྱི་བློན་ཆེན་ལས་ཁུངས་ཀྱིས། པ་ཀི་སི་ཐན་གྱི་ལྷོ་ཕྱོགས་ཀྱི་བྷ་ལུ་ཆུ་སི་ཐན( Balochistan) ཞིང་ཆེན་ཚུད་པའི་ལྷོ་ཕྱོགས་ཀྱི་ས་ཁུལ་ཁག་ཏུ་མྱུར་སྐྱོབ་མི་སྣ་འགྲེམས་འཇོག་བྱས་ཡོད་པ་མ་ཟད། ཆུ་ལོག་གིས་གནོད་འཚེ་ཐེབས་པའི་ས་ཁུལ་དུ་སྐྱེལ་འདྲེན་དང་། ཟས་དགོས་གནས་མལ་སོགས་ཀྱིས་རོགས་འདེགས་བྱེད་ཀྱི་ཡོད་སྐོར་འགྲེལ་བརྗོད་བྱས་ཡོད་འདུག

པ་ཀི་སི་ཐན་དུ་ལོ་ལྟར་ཟླ་བ་ ༨ རིང་ཆར་པ་བབ་ཀྱི་ཡོད་པ་ལྟར། འདས་པའི་ཆུ་ཚོད་ ༢༤ རིང་ཆུ་ལོག་གི་རྐྱེན་གྱིས་མི་གྲངས ༡༡༩ རྐྱེན་འདས་སུ་ཕྱིན་ཡོད་པ་དང་། མི་གྲངས ༧༡ ལ་རྨས་སྐྱོན་ཚབས་ཆེན་ཐེབས། དེ་བཞིན་ཟླ་འདིའི་ཕྱི་ཚེས ༢༥ ཉིན་གཅིག་པུར་པ་ཀི་སི་ཐན་གྱི་ལྷོ་རྒྱུད་ཁུལ་དུ་གཞུང་ལམ་སྤྱི་ལེ་ ༩༣ ལྷག་དང་དུད་ཚང་ ༨༢༠༠༠ ལྷག་གི་ཁང་པ་རྩ་མེད་དུ་ཕྱིན་འདུག་ལ། འདི་ལོའི་ཆར་ཞོད་རྐྱེན་གྱིས་པ་ཀི་སི་ཐན་གྱི་མི་འབོར་བརྒྱ་ཆ་ ༡༥ ལྷག་ལ་ཆུ་ལོག་གི་གནོད་འཚེ་ཐེབས་ཡོད་འདུག

Displaced people wade through a flooded area in Peshawar, Khyber Pakhtunkhwa, Pakistan on Saturday.

དེ་རིང་བྷི་བྷི་སི་གསར་ཁང་གིས་གནས་ཚུལ་སྤེལ་བ་ལྟར་ན། ཡུལ་སྐོར་སྤྲོ་འཆམ་པའི་ས་ཚིགས་སུ་གྱུར་བའི་པ་ཀི་སི་ཐན་ནུབ་བྱང་ཁུལ་གྱི་མན་ནུན( Manoor ) ལུང་གཤོངས་སུ་ཆུ་ལོག་གི་རྐྱེན་གྱིས་བྱིས་པ་དང་བུད་མེད་ཚུད་པའི་མི་གྲངས ༡༥ ལྷག་རྐྱེན་འདས་སུ་གྱུར་ཡོད་པ་དང་། ལུང་གཤོངས་དེར་འགྲོ་སའི་ཟམ་པ་གཉིས་ཆུས་འཁྱེར་ཡོད་སྟབས། གནས་དེར་ཡོད་པའི་མི་མང་གིས་གཞུང་སྒེར་ཁག་གི་རོགས་རམ་དང་། ཟས་གོས་གནས་མལ་གྱི་རོགས་རམ་ཡོང་བར་རེ་སྒུག་བྱེད་ཀྱི་ཡོད་འདུག ཁོང་ཚོས་གཞུང་འབྲེལ་མི་སྣ་དང་ཆབ་སྲིད་པ་མང་པོ་ཞིག་གནས་དེར་ཡོང་ཡོད་ཀྱང་། པར་དང་བརྙན་སོགས་བླངས་ནས་ཕྱིར་ལོག་པ་ལས་རོགས་འདེགས་བྱས་མེད་སྐོར་འགྲེལ་བརྗོད་བྱས་འདུག

འདི་ལོའི་ཕྱི་ཟླ ༧ ནས་པ་ཀི་སི་ཐན་དུ་ཆར་ཞོད་ཀྱི་རྐྱེན་གྱིས་ཆུ་ལོག་མང་པོ་རྒྱུག་སྟེ་མི་གྲངས་ ༡༠༠༠ ལྷག་རྐྱེན་འདས་སུ་གྱུར་ཡོད་པ་དང་། གཞུང་ལམ་སྤྱི་ལེ་ ༣༠༠༠ ལྷག་ལ་གས་ཆག་ཤོར་ཏེ་ཟམ་པ་ ༡༣༠ རྩ་མེད་དུ་གྱུར་ཡོད་པ་མ་ཟད། དུད་ཁྱིམ ༤༩༥༠༠༠ ལྷག་གི་ཁང་པ་རྩ་མེད་དུ་གྱུར། ཁྱོན་མི་གྲངས་ས་ཡ་ ༣༣ ལྷག་གི་འཚོ་གནས་ལ་དོ་ཕོག་ཆེན་པོ་བྱུང་བའི་ཁྲོད། མི་གྲངས་འབུམ ༡ དང་ཁྲི ༨ ལྷག་གི་སྡོད་གནས་སོགས་སུ་གཏོར་སྐྱོན་ཚབས་ཆེན་ཐེབས་ཏེ། ངལ་སེལ་ལྟེ་གནས་སུ་རས་གུར་ཕུབ་ནས་བསྡད་ཡོད་འདུག

གསར་འགོད་པ། དཔལ་ལྡན།