རྒྱལ་ཚོགས་ཀྱི་ཡུ་གུར་གནད་དོན་དང་འབྲེལ་བའི་སྙན་ཐོ་གཞི་ནས་ཕྱིར་བསྒྲགས་བྱས།

རྒྱལ་ཚོགས་འགྲོ་བ་མིའི་ཐོབ་ཐང་ལྷན་ཚོགས་ཀྱི་འགན་འཛིན་མི་ཤེལེ་བྷ་ཤེ་ལེཌིའི་ལས་ཡུན་རྫོགས་པའི་ཉིན་མོ་དང་བསྟུན་འདི་ལོའི་ཕྱི་ཟླ་ ༥ པའི་ནང་ཡུ་གུར་མི་རིགས་རང་སྐྱོང་ཁུལ་ནང་གཟིགས་ཞིབ་ཏུ་ཕྱིན་པའི་སྙན་ཐོ་གཞི་ནས་ཕྱིར་བསྒྲགས་བྱས་ཡོད་འདུག

A person stands in a tower on the perimeter of the No. 3 Detention Center in Dabancheng in western China’s Xinjiang Uyghur Autonomous Region on April 23, 2021.

ཁ་སང་ཕྱི་ཚེས་ ༣༡ ཉིན་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱིས། འདི་ལོའི་ཕྱི་ཟླ་ ༥ པའི་ནང་བདུན་ཕྲག་གཅིག་ཙམ་རིང་ཡུ་གུར་མི་རིགས་རང་སྐྱོང་ཁུལ་ཟེར་བའི་ནང་གཟིགས་ཞིབ་ཏུ་ཕེབས་པ་དང་འབྲེལ་བའི་ཤོག་གྲངས་ ༤༥ ཅན་གྱི་སྙན་ཐོ་ཞིག་བཏོན་ཡོད་ཀྱང་། སྙན་ཐོའི་ནང་དེ་སྔོན་ཡོངས་གྲགས་ཆགས་པའི་གནས་ཚུལ་ཙམ་ལས་མེད་པ་མ་ཟད། ཡུ་གུར་མི་རིགས་རྩ་མེད་ཅེས་པའི་ཚིག་དེ་བེད་སྤྱོད་བྱས་མེད་འདུག

སྙན་ཐོའི་སྐོར་ལ་རྒྱལ་ཚོགས་འགྲོ་བ་མིའི་ཐོབ་ཐང་ལྷན་ཚོགས་ཀྱིས། སྙན་ཐོ་དེ་ནི་འགྲོ་བ་མིའི་ཐོབ་ཐང་ལྷན་ཚོགས་སུ་མཁོ་སྤྲོད་བྱས་པའི་ཡིག་ཆ་དག་ལ་བསྐྱར་ཞིབ་ནན་མོ་བྱས་ཤིང་། འགྲོ་བ་མིའི་གཞི་རྩའི་ཁེ་དབང་སྲུང་སྐྱོབ་ཀྱི་ཁྲིམས་ལྟར་ཐག་གཅོད་བྱུང་བ་ཞིག་ཡིན་སྐོར་དང་། རྒྱ་ནག་གི་ཁྲིམས་ལུགས་དང་། ཆབ་སྲིད། ཡིག་ཚགས་བཅས་ལ་དམིགས་བསལ་དོ་ནན་ཞིབ་བསྡུར་བྱས་ཡོད་པ་མ་ཟད། གོ་རིམ་མང་པོ་བརྒྱུད་ནས་རྒྱ་ནག་དང་མཉམ་དུ་གྲོས་མོལ་དང་ཐབས་ཇུས་བརྗེ་རེས་བྱེད་པའི་དགོས་འདུན་ཡང་བཏོན་ཡོད་ཚུལ་བསྒྲགས་ཡོད་ཀྱང་། སྙན་ཐོའི་ནང་རྒྱ་ནག་གཞུང་གིས་ཡུ་གུར་ནང་ཁྲིམས་འགལ་བྱ་སྤྱོད་སྤེལ་བཞིན་ཡོད་པ་ཙམ་ལས། རྒྱལ་སྤྱིའི་ཐོག་ཡོངས་ཁྱབ་ཏུ་བེད་སྤྱོད་གཏོང་བཞིན་པའི་ཡུ་གུར་མི་རིགས་རྩ་མེད་གཏོང་བ་ཞེས་པའི་ཚིག་དེ་བེད་སྤྱོད་བྱས་མེད་འདུག ཡང་རྒྱལ་ཚོགས་ཀྱི་སྙན་ཐོ་དེའི་ནང་དུ། རྒྱ་ནག་གཞུང་གིས་ཁྲིམས་མེད་ལུགས་མེད་ཀྱིས་བཀག་ཉར་འཛིན་བཟུང་བྱས་ཡོད་པའི་ཡུ་གུ་བ་རྣམས་འཕྲལ་མར་ཀློད་གྲོལ་གཏང་དགོས་པ་མ་ཟད། རང་ཁྱིམ་མུ་མཐུད་རྟོག་ཞིབ་དང་མི་རིགས་དབྱེ་འབྱེད་རིགས་བྱེད་མི་ཆོག་པའི་འབོད་སྐུལ་བྱས་འདུག

རྒྱལ་ཚོགས་ཀྱིས་སྙན་ཐོ་དེ་ཕྱིར་བསྒྲགས་བྱས་ནས་ཆུ་ཚོད་འགའི་རྗེས་སུ། རྒྱ་ནག་ཕྱི་འབྲེལ་མགྲིན་ཚབ་པ་ཀྲའོ་ལི་ཅིན་དང་། རྒྱལ་ཚོགས་ནང་ཡོད་པའི་རྒྱ་ནག་གི་འཐུས་ཚབ་ཀྲང་ཅིན་ཐོང་ཟེར་བ་དེས། རྒྱལ་ཚོགས་ཀྱི་སྙན་ཐོ་དེར་མཐའ་གཅིག་ཏུ་ངོ་རྒོལ་བྱེད་ཀྱི་ཡོད་ལ། དེའི་ཐད་རྒྱ་ནག་གཞུང་གི་ལངས་ཕྱོགས་ཐེངས་མང་གསལ་སྟོན་བྱས་ཡོད་ལུགས་དང་། སྙན་ཐོ་དེ་ནི་ཨ་མེ་རི་ཁ་དང་ནུབ་ཕྱོགས་ཀྱི་རྒྱལ་ཁབ་ཉུང་ཤོས་ཤིག་གིས་ཇུས་འགོད་བྱས་པའི་གཞི་མེད་སྐྱོན་འཛུགས་ཤིག་ཡིན་ལ། རྒྱལ་ཚོགས་འགྲོ་བ་མིིའི་ཐོབ་ཐང་ལྷན་ཚོགས་ཀྱིས་སོ་སོའི་ཁྲིམས་སྒྲིག་ལ་རྡོག་རོལ་བཏང་སྟེ། ཚོགས་ཁོངས་རྒྱལ་ཁབ་ཀྱི་ནང་སྲིད་ལ་ཐེ་བྱུས་བྱས་ནས་ཡུ་གུར་གནད་དོན་ཞེས་པའི་མིང་ཐོག་ནས་རྒྱ་ནག་ལ་གཞི་མེད་སྐྱོན་འཛུགས་དང་། རྒྱ་ནག་གི་འཕེལ་རྒྱས་བརྟན་བརླིང་ལ་གཏོར་བརླག་གཏོང་ཐབས་བྱེད་བཞིན་ཡོད་སྐོར་བརྗོད་འདུག་པ་མ་ཟད། དེ་སྔོན་བཏོན་ཟིན་པའི་ཡུ་གུར་དང་འབྲེལ་བའི་ཡིག་ཆ་ཤོག་ངོས་ ༡༣༡ ལྷག་ཅན་དེ་བསྐྱར་བསྒྲགས་བྱས་ཡོད་འདུག

UN human rights commissioner Michelle Bachelet arrives in China for Xinjiang visit

རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་སྙན་ཐོ་དེ་ནི་ཕྱི་ལོ་ ༢༠༡༧ ལོ་ནས་བཟུང་ད་ལོའི་ཕྱི་ཟླ་ ༥ བར་གྱི་ཡུ་གུར་གྱི་གནད་དོན་སྐོར་གྱི་སྙན་ཐོ་ཞིག་ཡིན་པ་དང་། འདི་ལོའི་ཕྱི་ཟླ་ ༥ ཚེས་ ༢༣ ནས་ ༢༨ བར་རྒྱ་ནག་གཞུང་གི་གོ་སྒྲིག་འོག རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་འགན་འཛིན་ལྕམ་མི་ཤེལེ་བྷཤེ་ལེཌི་(Michelle Bachelet)ལགས་ཀྱིས་སྣེ་འཁྲིད་པའི་ཚོགས་ཆུང་ཞིག་ཡུ་གུར་མི་རིགས་རང་སྐྱོང་ཁུལ་ཟེར་བའི་ནང་ཆེད་དུ་གཟིགས་ཞིབ་ཏུ་ཕེབས་རྗེས་བཏོན་པ་ཞིག་ཡིན་ཡང་། གཟིགས་སྐོར་གྲུབ་རྗེས་དུས་ཐོག་ཏུ་སྙན་ཐོ་འདོན་ཐུབ་མེད་པར་བརྟེན། རྒྱལ་སྤྱིའི་འགྲོ་བ་མིའི་ཚོགས་སྡེ་ཁག་ནས་ལྕམ་མེ་ཤེལེ་ལགས་སུ་སྐྱོན་བརྗོད་མང་པོ་བྱས་ཡོད་པ་རེད། ཁོང་མོས་ཕྱི་ཟླ་ ༨ ཚེས་ ༣༠ ནས་འགན་འཛིན་གྱི་ལས་ཡུན་རྫོགས་ཀྱི་ཡོད་པས། དེའི་སྔོན་ལ་སྙན་ཐོ་ཕྱིར་བསྒྲགས་བྱ་རྒྱུ་ཡིན་པའི་ཁས་ལེན་བྱས་ཡོད་ཀྱང་། ཉེ་སྔོན་ཕྱི་ཟླ་ ༨ ཚེས་ ༢༥ ཉིན་གྱི་གསར་འགོད་གསལ་བསྒྲགས་ཐོག མི་ཤེལེ་ལགས་ཀྱིས་རྒྱ་ནག་དང་དེའི་ཕྱོགས་གཏོགས་རྒྱལ་ཁབ་ ༤༠ ལྷག་ནས་སྙན་ཐོ་དེ་འདོན་རྒྱུར་གནོན་ཤུགས་སྤྲད་ཡོད་སྐོར་བརྗོད་ཡོད་པ་རེད།

བྱམས་པ་ཚེ་རིང་།