གངས་ལྗོངས་དཔལ་འབྱོར་ཞབས་ཞུ་ཁང་གི་གནས་སྟངས་སྐོར་གྱི་ཞིབ་འཇུག་སྙན་ཐོ་བཏོན་ཡོད་འདུག

གངས་ལྗོངས་དཔལ་འབྱོར་ཞབས་ཞུ་ཁང་གི་ཁེ་ཉེན་གྱི་གནས་སྟངས་ཇི་ཆགས་སྐོར་གྱི་ཞིབ་འཇུག་སྙན་ཐོ་གྲུབ་སྟེ། འཚོག་ལ་ཉེ་བའི་སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བཞི་བའི་སྟེང་སྙན་གསེང་ཞུ་གཏན་འཁེལ་ཡོད་འདུག

ཁ་སང་ཕྱི་ཚེས་ ༥ ཉིན་བོད་མི་མང་སྤྱི་འཐུས་ལྷན་ཚོགས་ཀྱི་དྲ་རྒྱའི་སྟེང་སྤེལ་བའི་གནས་ཚུལ་ལྟར་ན། བོད་མི་མང་སྤྱི་འཐུས་སྐབས་ ༡༧ པའི་གྲོས་ཚོགས་ཚོགས་དུས་གསུམ་པའི་གྲོས་ཆོད་ཨང་ ༢༠༢༢།༡༧།༣།༢༦ དང་། ཡིག་ཆ་ཨང་ ༢༦ པའི་དགོངས་དོན་གཞིར་བཟུང་།  གངས་ལྗོངས་དཔལ་འབྱོར་ཞབས་ཞུ་ཁང་གི་ཁེ་ཉེན་གྱི་གནས་སྟངས་ཇི་ཆགས་སྐོར་ལ་རྟོག་ཞིབ་ཆེད། དཔལ་ལྡན་ཚོགས་གཙོ་སྦྲེལ་པོ་མཆོག་གིས་ཞིབ་འཇུག་ཚོགས་ཆུང་ཞིག་བསྐོ་འཛུགས་གནང་ཡོད་པའི་མི་འགྲོར། སྤྱི་འཐུས་ཟླ་བ་ཕུན་སྐྱིད་མཆོག་དང་། སྤྱི་འཐུས་གསེར་རྟ་ཚུལ་ཁྲིམས་མཆོག སྤྱི་འཐུས་དཀོན་མཆོག་ཡང་འཕེལ་མཆོག སྤྱི་འཐུས་ཀརྨ་དགེ་ལེགས་མཆོག དཔལ་འབྱོར་རིག་པའི་མཁས་དབང་སྐུ་ཞབས་རཱ་ཧུལ་ཇོ་ཤི་ (Rahul Joshi, Financial Expert) མཆོག་བཅས་བསྐོ་གཞག་གནང་ཡོད་པ་ལྟར། ཚོགས་ཆུང་དེས་ཕྱི་ལོ་ ༢༠༢༢ ཟླ་ ༦ ཚེས་ ༢ ཉིན་ནས་དབུ་འཛུགས་ཀྱིས་ད་བར་གངས་ལྗོངས་དཔལ་འབྱོར་ཞབས་ཞུ་ཁང་གི་ཁེ་ཉེན་གྱི་གནས་སྟངས་ཇི་ཆགས་ཐོག་ཞིབ་འཇུག་གནང་སྟེ། ཁ་སང་ཕྱི་ཚེས་ ༥ དེ་རིང་ཚོགས་ཆུང་དེས་ཞིབ་འཇུག་གི་ལས་དོན་ཡོངས་རྫོགས་གྲུབ་རྗེས།  ཉིན་གུང་ཚོགས་ཆུང་གི་ཚོགས་གཙོ་སྤྱི་འཐུས་ཟླ་བ་ཕུན་སྐྱིད་མཆོག་དང་། དྲུང་ཆེ་སྤྱི་འཐུས་གསེར་རྟ་ཚུལ་ཁྲིམས་མཆོག ཚོགས་མི་སྤྱི་འཐུས་དཀོན་མཆོག་ཡང་འཕེལ་མཆོག ཚོགས་མི་སྤྱི་འཐུས་ཀརྨ་དགེ་ལེགས་མཆོག་བཅས་ཀྱིས་ཚོགས་གཙོའི་ལས་ཁུངས་སུ་དཔལ་ལྡན་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་། ཚོགས་གཞོན་སྒྲོལ་མ་ཚེ་རིང་མཆོག་རྣམ་གཉིས་མཇལ་འཕྲད་ཀྱིས་ད་བར་གྱི་ལས་དོན་ཇི་བྱས་སྐོར་སྙན་སེང་ཞུས་ཡོད་པ་དང་། དེ་བཞིན་ཚོགས་ཆུང་གི་སྙན་ཐོ་དང་། དཔལ་འབྱོར་རིག་པའི་མཁས་དབང་སྐུ་ཞབས་རཱ་ཧུལ་ཇོ་ཤི་མཆོག་གིས་ཞིབ་འཇུག་གནང་བའི་སྙན་ཐོ། འབྲེལ་ཡོད་མི་སྣར་བཅའ་འདྲི་ཞུས་པའི་ཚིག་ཐོ་ཁག་བཅས་ཡིག་སྣོད་ཁྱོན་ ༡༩ ལྡན་པའི་ཞིབ་འཇུག་སྙན་ཐོ་ཞིག་ཚོགས་གཙོ་སྦྲེལ་པོར་ཕུལ་གནང་ཡོད་པ་མ་ཟད། སྙན་ཐོ་གྲོས་ཚོགས་ཚོགས་དུས་ ༤ པའི་ཐོག་སྙན་སེང་ཞུ་གཏན་འཁེལ་ཡོད་འདུག

གངས་ལྗོངས་དཔལ་འབྱོར་ཞབས་ཞུ་ཁང་དེ་ཐོག་མར་ཕྱི་ལོ་ ༢༠༡༥ ལོར་བཙན་བྱོལ་བོད་མིའི་སྤྱི་ཚོགས་ཀྱི་དཔལ་འབྱོར་གནས་བབ་མཐོར་འདེགས་དང་རང་ཁ་རང་གསོའི་ཆེད་དུ་ཆེད་འཛུགས་གནང་བ་ཞིག་ཡིན་ཞིང་། ཕྱི་ལོ་ ༢༠༡༧ ལོའི་ཟླ་ ༡༡ ཚེས་ ༢༨ ཉིན་ཁེ་ཡོད་ཀྱི་ཚོགས་པའི་ངོ་བོར་དེབ་སྐྱེལ་བྱས་ཡོད་པ་མ་ཟད། ཕྱི་ལོ་ ༢༠༡༨ ཟླ་ ༡༢ ཚེས་ ༡༣ ཉིན་དངོས་སུ་རྒྱ་གར་དབུས་དངུལ་ཁང་ཆེན་མོ་ (Reserve Bank of India) ནས་དངུལ་ཁང་ལྟ་བུའི་ངོ་བོར་(Non-Banking Finance Company) དེབ་སྐྱེལ་ལག་ཁྱེར་ཐོབ་སྟེ་དངོས་སུ་བུ་ལོན་གཡར་གཏོང་བྱེད་འགོ་བརྩམས་ཡོད་པ་རེད།

དེ་ཡང་འདི་ལོའི་ཕྱི་ཟླ་ ༣ ཚེས་ ༣༡ ཉིན་བོད་མི་མང་སྤྱི་འཐུས་ལྷན་ཚོགས་སྐབས་ ༡༧ པའི་གྲོས་ཚོགས་ཚོགས་དུས་གསུམ་པའི་ཐོག་སྲིད་སྐྱོང་དང་དཔལ་འབྱོར་བཀའ་བློན་གཅིག་ལྕོགས་སྤེན་པ་ཚེ་རིང་མཆོག་གིས། གངས་ལྗོངས་དཔལ་འབྱོར་ཞབས་ཞུ་ཁང་གི་ད་ལྟའི་གནས་སྟངས་དང་ས་གནས་ཁྲིམས་སྒྲིག་གི་ཐོག་ནས་ལས་དོན་གཉེར་ཕྱོགས་ཐད་དཀའ་ངལ་ཡོད་པ་དང་། ཁེ་གྱོང་གི་ཆ་ནས་མ་འོངས་པར་ཁུངས་འཁྱོལ་ཐབས་མེད་པའི་གནས་སྟངས་ཆགས་ཡོད་སྐོར་འགྲེལ་བརྗོད་གནང་བ་དང་འབྲེལ། སྤྱི་འཐུས་ལྷན་ཚོགས་ངོས་ནས་གངས་ལྗོངས་དཔལ་འབྱོར་ཞབས་ཞུ་ཁང་གི་གནས་སྟངས་དང་མ་འོངས་རྒྱུན་གནས་ཡོང་ཐུབ་མིན་སོགས་ཀྱི་ཐོག་ལ་ཞིབ་འཇུག་ཚད་ལྡན་དགོས་པའི་རེ་སྐུལ་ཞུས་པ་ལྟར། བོད་མི་མང་སྤྱི་འཐུས་ལྷན་ཚོགས་ནས་ཞིབ་འཇུག་ཚོགས་ཆུང་ཆེད་འཛུགས་ཀྱིས་རྟོག་ཞིབ་གནང་དགོས་པའི་མང་མོས་གྲོས་ཆོད་བཞག་གནང་ཡོད་པ་རེད། གཞུང་འབྲེལ་གྲོས་གཞི་གྲོས་འཆར་དོན་ཚན་གསུམ་ཅན་དེའི་ནང་། ཚོགས་གཙོ་སྦྲེལ་པོས་ཚོགས་མི་ལྔ་ལས་གྲུབ་པའི་ཞིབ་འཇུག་ཚོགས་ཆུང་ཞིག་འཛུགས་དགོས་པ་དང་། ཚོགས་ཆུང་དེས་གངས་ལྗོངས་དཔལ་འབྱོར་ཞབས་ཞུ་ཁང་དེ་ཁེ་ཉེན་གྱི་གནས་སྟངས་ཇི་ཆགས་ཐད་རྟོག་ཞིབ་དགོས་པ་དང་། ཚོགས་ཆུང་ནས་གནས་ཡུལ་གཞུང་གི་ཁྲིམས་ལུགས་དང་། མ་འཛུགས་བྱ་ཕྱོགས། གངས་ལྗོངས་དཔལ་འབྱོར་ཞབས་ཞུ་ཁང་གི་ད་ལྟའི་གནས་བབ། མ་འོངས་དམིགས་ཡུལ་གཞིར་བཟུང་ཡོང་ཐུབ་མིན་གྱི་སྙན་ཐོ་ཁ་གསལ་ཞིག་འདོན་དགོས་པ་དང་། སྙན་ཐོ་གཞིར་བཟུང་གྲོས་ཚོགས་ཀྱི་ཐག་གཅོད་ཁ་གསལ་མ་བྱུང་བར་དུ་གངས་ལྗོངས་དཔལ་འབྱོར་ཞབས་ཞུ་ཁང་གི་ལས་དོན་རྣམས་མུ་མཐུད་བྱ་དགོས་སྐོར་འཁོད་ཡོད་པ་རེད།

གསར་འགོད་པ། སྐལ་བཟང་སྦྱིན་པ།