རྒྱ་ནག་གཞུང་གི་ཉེན་རྟོག་པས་ས་གནས་གཞན་ནས་ཡོང་བའི་ཡ་ཆེན་དགོན་གྱི་གྲྭ་བཙུན་རྣམས་ཕྱིར་ཕུད་གཏོང་མུས་ཡིན་འདུག
རྒྱ་ནག་ཝུ་ཧན་ནས་ཐོག་མར་མཆེད་པའི་ཏོག་དབྱིབས་རིམས་ནད་དེ་བོད་ནང་དུ་ཁྱབ་གདལ་ཤུགས་ཆེན་ཕྱིན་ནས། བོད་ཀྱི་རྒྱལ་ས་ལྷ་ས་གཙོས་བོད་ཁུལ་མང་པོ་ཞིག་ཏུ་ཐེམ་སྤང་བཀག་རྒྱ་བསྡམས་ནས་ཟླ་བ་གཅིག་ལྷག་འགྲོ་མུས་ཡིན་པས། བོད་མི་རྣམས་ཀྱི་འགྲོ་འདུག་སོགས་ལ་དཀའ་ཁག་ཆེན་མོ་འབྱུང་མུས་ཡིན་པ་ལྟར། ཉེ་ལམ་དཔལ་ཡུལ་ཡ་ཆེན་སྒར་དུའང་ཐེམ་སྤང་བཀག་རྒྱ་བསྡམ་མུས་ཡིན་ཡང་། རྒྱ་ནག་གཞུང་གི་ཉེན་རྟོག་པས་ཏོག་དབྱིབས་རིམས་ནད་ལ་ཁ་གཡར་ནས། གྲྭ་བཙུན་རྣམས་ཀྱི་སྡོད་ཤག་ཞིབ་བཤེར་དང་མིང་ཐོ་སོགས་བསྡུ་རུབ་བྱས་ཏེ། ས་གནས་གཞན་ནས་ཡོང་བའི་གྲྭ་བཙུན་རྣམས་ཕྱིར་ཕུད་དང་འཇིགས་སྐུལ་བྱེད་བཞིན་ཡོད་འདུག
འདི་གའི་གསར་འགོད་པར་ཁུངས་ལྡན་གནས་ཚུལ་མཁོ་སྤྲོད་བྱས་པ་ལྟར་ན། བོད་ཁུལ་དུ་ཏོག་དབྱིབས་རིམས་ནད་ཁྱབ་གདལ་ཤུགས་ཆེན་འགྲོ་མུས་ཡིན་པས། དཔལ་ཡུལ་ཡ་ཆེན་སྒར་དུའང་ཐེམ་སྤང་བཀག་རྒྱ་བསྡམས་ཡོད་སྟབས། ཡ་ཆེན་སྒར་གྱི་གྲྭ་བཙུན་རྣམས་ཀྱིས་ཀྱང་གོང་རིམ་གྱི་བཀའ་བཞིན། རིམས་ནད་ཁྱབ་གདལ་མི་འགྲོ་བར་དོགས་ཟོན་ནན་མོ་བྱེད་མུས་ཡིན་ཡང་། ཉེ་ལམ་རྒྱ་ནག་གཞུང་གི་ཉེན་རྟོག་པ་དང་གཞུང་གི་ལས་བྱེད་མང་པོ་ཞིག་གིས་ཉིན་མཚན་གཉིས་སུ་གྲྭ་བཙུན་རྣམས་ཀྱི་སྡོད་ཁང་རེ་རེ་བྱས་ནས་ཞིབ་བཤེར་ནན་མོ་བྱེད་མུས་ཡིན་པ་མ་ཟད། ཞིབ་བཤེར་ཟིན་པའི་གྲྭ་བཙུན་དེ་དག་གི་མིང་ཐོ་སོགས་བསྡུ་རུབ་བྱེད་ཀྱི་ཡོད་སྟབས། ཡ་ཆེན་དགོན་དུ་ཕྱི་ནང་གི་མི་རྣམས་འགྲོ་སྐྱོད་གཏན་ནས་མི་ཆོག་ཀྱང་། ཉེན་རྟོག་པ་དང་ལས་བྱེད་གློ་བུར་དུ་ཡོང་ནས་ཞིབ་བཤེར་བྱེད་དུས། དེར་གནས་སྡོད་བྱེད་མུས་ཡིན་པའི་གྲྭ་བཙུན་རྣམས་ལའང་འཇིགས་སྣང་ཡོང་གི་ཡོད་སྐོར་འགྲེལ་བརྗོད་བྱས་སོང་།
ཡང་ཁོང་གིས། ཡ་ཆེན་སྒར་དུ་སྔོག་བཤེར་དང་མིང་ཐོ་བསྡུ་རུབ་བྱེད་པ་དང་བསྟུན། སྔོན་མ་རྒྱ་ནག་གཞུང་ལ་ཡ་ཆེན་སྒར་དུ་གནས་སྡོད་བྱེད་མཁན་གྱི་གྲྭ་བཙུན་རྣམས་ཀྱི་མིང་ཐོ་ཞིག་སྤྲད་པའི་ནང་དུ་ཚུད་མེད་པའི་ལྷ་ས་དང་། འབྲི་རུ། ནག་ཆུ། མདོ་སྨད་སོགས་ཀྱི་ཕྱོགས་ནས་ཡོང་བའི་གྲྭ་བཙུན་རྣམས་ལ་སྐད་ཆ་བཤད་དབང་དང་། མཐའ་ན་རང་གི་གྱོན་གོས་སོགས་ཀྱང་བསྡུ་གསོག་བརྒྱག་རྒྱུའི་དུས་ཚོད་མི་སྟེར་བར། རང་རང་གི་ཐོབ་ཐང་ལག་ཁྱེར་དུ་ཁོད་པའི་ས་གནས་སུ་བསྐྱལ་དང་སྐྱེལ་མུས་ཡིན་སྐོར་དང་། དེ་སྔ་ཕྱི་ལོ་ ༢༠༡༩ ཙམ་ནས་རྒྱ་ནག་གཞུང་གིས་ཡ་ཆེན་སྒར་གྱི་བདེ་འཇགས་སྲུང་སྐྱོབ་ཆེད་དུ་ཡིན་ལུགས་བཤད་ནས། དགོན་པའི་ནང་དུ་ལྟ་སྲུང་དམག་མི་དང་ལས་བྱེད་མང་པོ་ཞིག་འགྲེམས་འཇོག་བྱས་ཡོད་པ་མ་ཟད། ད་ལན་གློ་བུར་དུ་ཏོག་དབྱིབས་རིམས་ནད་ལ་ཁ་གཡར་ནས་ཡ་ཆེན་ཆོས་སྒར་དུ་དམག་མི་དང་ལས་བྱེད་སོགས་འགྲེམས་འཇོག་བྱས་ནས་ཞིབ་བཤེར་བྱེད་མུས་ཡིན་སྐོར་སོགས་འགྲེལ་བརྗོད་བྱས་སོང་།
ད་ལྟ་བོད་ཀྱི་རྒྱལ་ས་ལྷ་ས་སོགས་སུ་ཏོག་དབྱིབས་རིམས་ནད་ཁྱབ་གདལ་གྱི་དབང་གིས་ཐེམ་སྤང་བཀག་རྒྱ་བསྡམས་ནས་ཟླ་གཅིག་ལྷག་འགྲོ་མུས་ཡིན་པའི་ཁར། ཁ་སང་བར་དུ་རྒྱ་ནག་གཞུང་གིས་དབྱེ་བགོས་བྱས་པའི་བོད་རང་སྐྱོང་ལྗོངས་ཟེར་བ་གཅིག་པུའི་ནང་ནད་པ་གྲངས་ ༡༦།༡༥༧ ལྷག་བྱུང་ཡོད་ཅིང་། དྲ་ལམ་ཁག་ཏུ་རྒྱ་ནག་གཞུང་གི་རིམས་ནད་འགོག་སྲུང་མི་སྣ་ཟེར་བས་རིམས་ནད་འགོས་པའི་ནད་པ་གཙོས་བོད་མི་མང་པོ་ཞིག་ས་གནས་གཞན་དང་ཚོམས་ཆེན་སོགས་སུ་ཟུར་བཀག་ཏུ་བཞག་པ་ལས། ནད་རྟགས་ཐོན་པའི་རིགས་ལ་སྨན་བཅོས་དང་ཟ་མ་སོགས་མི་སྟེར་བར། བོད་མི་རྣམས་ལ་དཀའ་ངལ་འཕྲད་མུས་ཡིན་པའི་བརྙན་ཐུང་མང་པོ་ཞིག་ཀྱང་མཐོང་རྒྱུ་ཡོད་འདུག
གསར་འགོད་པ། དཔལ་ལྡན།
