བོད་མིའི་སྒྲིག་འཛུགས་ནས་བོད་ནང་བོད་ལུགས་གསོ་རིག་སྨན་དང་སྨན་ཞབས་པ་གཏང་བར་གྲ་སྒྲིག་ཨང་གསར་ཡོད་པའི་གསལ་བསྒྲགས་གནང་།

བོད་ནང་ཏོག་དབྱིབས་གཉན་རིམས་དང་འབྲེལ་བའི་དཀའ་ངལ་ཧ་ཅང་ཆེན་པོ་འཕྲད་བཞིན་ཡོད་པའི་སྐབས་འདིར་བོད་མིའི་སྒྲིག་འཛུགས་ནས་ང་ཚོས་བོད་ནང་ཏོག་དབྱིབས་གཉན་རིམས་འགོག་ཐབས་སླད་བོད་ཀྱི་གསོ་རིག་སྨན་དང་སྟོབས་སྐྱེད་སྨན། སྨན་བཅོས་ཡོ་བྱད། སྨན་ཞབས་པ། དྭང་བླངས་པ་སོགས་ཀྱི་མཐུན་རྐྱེན་སྦྱོར་རྒྱུར་གྲ་སྒྲིག་ཨང་གསར་ཡོད་ཅེས་ཡོངས་ཁྱབ་ཐོག་གསལ་བསྒྲགས་སྤེལ་གནང་འདུག

འདི་ལོའི་ཕྱི་ཟླ་ ༨ པ་ཙམ་ནས་བཟུང་བོད་རང་སྐྱོང་ལྗོངས་ཟེར་བའི་ནང་དུ་གཙོ་བོར་གྱུར་བའི་བོད་ཀྱི་ས་ཆ་མང་པོའི་ནང་ཏོག་དབྱིབས་གཉན་རིམས་ཁྱབ་གདལ་བྱུང་སྟེ། ད་ལྟའི་ཆར་བོད་རང་སྐྱོང་ལྗོངས་ཟེར་བ་གཅིག་པུའི་ཟུར་བཀག་ཁང་ཁག་ཏུ་ཉུང་མཐར་མི་གྲངས་ ༥༣༠༧༦ ཙམ་ཟུར་བཀག་ཏུ་ཡོད་པ་མ་ཟད། ཟུར་བཀག་ཁང་གི་སྨན་བཅོས་མཐུན་རྐྱེན་དང་བཟའ་བཏུང་སོགས་འཚོ་བའི་མཐུན་རྐྱེན་ཧ་ཅང་ཞན་པའི་ཁར། གོང་རིམ་གྱི་བཀའ་རྒྱར་མ་ཉན་པའི་ཉེས་མིང་འོག་རྡུག་རྡེག་དང་བཙན་གནོན་གཏོང་བཞིན་ཡོད་པའི་རྐྱེན་གྱིས། བོད་མི་མང་པོས་སྤྱི་ཚོགས་དྲ་ལམ་ནས་སྲིད་གཞུང་ལ་ངོ་རྒོལ་སྐྱོན་བརྗོད་བྱེད་བཞིན་པ་དང་། འུ་ཐུག་ཐབས་ཟད་ཀྱིས་བོད་མི་རེ་ཟུང་ནས་རང་ཤི་བརྒྱབ་ཡོད་པའི་ཛ་དྲག་གནས་སྟངས་ཐད་བཀའ་ཤག་ནས་ཡོངས་ཁྱབ་གསལ་བསྒྲགས་སྤེལ་གནང་འདུག

བཀའ་ཤག་གིས་གསལ་བསྒྲགས་ནང་དུ། བོད་ནང་ཏོག་དབྱིབས་གཉན་རིམས་ཁྱབ་གདལ་འགྲོ་སྐབས་རྒྱ་ནག་གཞུང་གིས་ཏོག་དབྱིབས་གཉན་རིམས་མེད་པ་བཟོ་རྒྱུའི་ཏོག་དབྱིབས་གཉན་རིམས་ཀླད་ཀོར་གྱི་སྲིད་བྱུས་ཞེས་པ་ལག་བསྟར་བྱ་རྒྱུར་གདུག་རྩུབ་ཆེ་བའི་ཐབས་ལམ་སྤྱད་པའི་རྐྱེན་གྱིས་བོད་མིར་ཕན་པ་ལས་གནོད་ཚབས་ཆེ་བ་བྱུང་ཡོད། བོད་ནང་གཉན་རིམས་ཁྱབ་གདལ་འགོག་ཐབས་སུ་སྟངས་འཛིན་ཚུལ་བཞིན་མ་ཐུབ་པ་དེས་རྒྱ་གཞུང་གི་ཏོག་དབྱིབས་གཉན་རིམས་ཀྱི་སྲིད་བྱུས་ལམ་ལྷོངས་བྱུང་མེད་པ་གསལ་སྟོན་བྱུང་ཡོད་པ་དང་། དེ་ལ་བརྟེན་ནས་བོད་མི་མང་པོའི་ཚེ་སྲོག་ཉེན་ཁའི་གནས་སུ་ལྷུང་ཡོད། རྒྱ་གཞུང་ནས་ཏོག་དབྱིབས་གཉན་རིམས་འགོག་ཐབས་ཐད་མིག་དཔེ་བསྟན་རྒྱུའི་འབད་རྩོལ་བྱེད་སྐབས་སྨན་བཅོས་མཐུན་རྐྱེན་དང་ལྟ་སྐྱོང་དགོས་པའི་བོད་མི་རྣམས་ཀྱི་ཉེན་སེལ་དང་བདེ་འཇགས་ལ་སྣང་ཆུང་བཏང་ཞིང་། དེ་ལྟ་བུའི་ཉམ་ང་བའི་ཐེམ་སྤངས་བཀའ་རྒྱའི་དམ་དྲག་ལ་བརྟེན་བོད་མི་རྣམས་ལ་དངོས་ཐོག་དཀའ་ངལ་འཕྲད་པ་དྲ་ཐོག་ནས་མངོན་གསལ་ཇེ་དོད་དུ་གྱུར། བོད་མི་རྣམས་ཀྱིས་ཏོག་ནད་ཟུར་འཇོག་ཁང་ནང་འཚང་ཁ་ཆེ་བ་དང་། ཟས་བཅུད་དང་སྨན་སྦྱོར་མཐུན་རྐྱེན་དཀོན་པ། ཁོར་ཡུག་བཙོག་པ་ཡོད་སྐོར་འགྲེལ་བརྗོད་བྱས་ཡོད་པ་མ་ཟད། བོད་མི་འགའ་ཤས་ཀྱིས་གནས་སྟངས་དེ་ནི་བཙོན་ཁང་ལས་ཚབས་ཆེ་བ་ཡོད་པའི་འགྲེལ་བརྗོད་བྱས་ཡོད། ཅེས་དང་། ད་ལྟའི་ཆར་བོད་རང་སྐྱོང་ལྗོངས་ཟེར་བ་ཁོ་ནའི་ནང་མི་གྲངས་ ༥༣༠༧༦ ཟུར་འཇོག་ཁང་དུ་བཞག་ཡོད་པའི་ཚོད་དཔག་དང་། དེ་བཞིན་བོད་མདོ་སྟོད་སྨད་གཉིས་ཀྱི་ས་ཁུལ་དུའང་ཉིན་རེ་བཞིན་ཏོག་དབྱིབས་ནད་པ་ཇེ་མང་དུ་འགྲོ་བཞིན་ཡོད་སྐོར་གསུངས་འདུག

རྒྱ་གཞུང་ནས་འཁོན་འཛིན་རྣམ་པ་འདྲ་མིན་ཐོག་ནས་སློག་མིན་ལ་མ་ལྟོས་པར་བོད་མི་རྣམས་ཀྱིས་སྤྱི་ཚོགས་དྲ་རྒྱའི་སྟེང་དཀའ་ངལ་གསལ་སྟོན་གྱིས་ས་གནས་དབང་འཛིན་པ་ཚོར་ནད་གཞི་ཡོད་མིན་ལ་མ་ལྟོས་པར་ཟུར་འཇོག་ཁང་དུ་བཞག་ཡོད་པའི་བོད་མི་རྣམས་ཀྱི་དགོས་མཁོ་འཕྲལ་དུ་བསྐོང་དགོས་པའི་འབོད་སྐུལ་ཞུས་ཡོད་པ་དང་། འཛིན་སྐྱོང་གི་ཡ་ང་སྙིང་རྗེ་མེད་པའི་བྱེད་སྟངས་ལ་མི་མང་པོས་ཡོངས་གྲགས་སུ་སྐྱོན་བརྗོད་བྱས་ཡོད་སྐོར་ལུང་འདྲེན་གནང་བ་དང་སྦྲགས། བོད་མི་རྣམས་ཀྱིས་འཕྲོད་བསྟེན་མཐུན་རྐྱེན་ཞན་པའི་གནས་སྟངས་ལ་ཞེ་སུན་གྱིས་སྐྱོན་བརྗོད་བྱས་པར་རྒྱ་ནག་གཞུང་ནས་ངོས་ལེན་དང་། གཞུང་ངོས་ནས་དོ་དམ་ཚུལ་བཞིན་མ་བྱུང་བར་མི་མང་གིས་བསམ་ཚུལ་བཤད་པར་འཁོན་ལན་སློག་སྲིད་པར་སྲུང་སྐྱོབ་དགོས་པའི་འབོད་སྐུལ་ཞུ་རྒྱུ་ཡིན། ཞེས་གསུངས་འདུག

གསལ་བསྒྲགས་ཀྱི་མཇུག་ཏུ། རྒྱ་གཞུང་ངོས་ནས་རྒྱལ་སྤྱིའི་ཁྲིམས་སྒྲིག་དགོངས་དོན་ལྟར་བོད་མི་རྣམས་ཀྱི་ཐོབ་ཐང་ལ་གུས་བརྩི་དགོས་པ་མ་ཟད། ཁོང་ཚོར་བརྩི་བཀུར་དང་ཏོག་དབྱིབས་གཉན་རིམས་གཙང་སེལ་གྱི་སྲིད་བྱུས་ནང་གསལ་ལྟར་འདང་ངེས་ཀྱི་སྨན་བཅོས་མཐུན་རྐྱེན་དང་གཞི་རྩའི་དགོས་མཁོ་མཁོ་སྤྲོད་གནང་དགོས། དཀའ་ཚེགས་ཆེ་བའི་དུས་སྐབས་འདིར་བོད་མིའི་སྒྲིག་འཛུགས་ཀྱིས་རྒྱ་ནག་གཞུང་ནས་ཏོག་དབྱིབས་གཉན་རིམས་ལ་གདོང་ལེན་ཆེད་བོད་མི་རྣམས་ལ་དུས་ཐོག་གི་སྨན་དང་གཞི་རྩའི་དགོས་མཁོ་ཅི་རིགས་ཀྱི་རོགས་སྐྱོར་གནང་མཁན་ཚོར་ཆོག་མཆན་གནང་རྒྱུའི་རེ་སྐུལ་ཞུ་རྒྱུ་ཡིན་པ་མ་ཟད། བོད་ནང་ཏོག་དབྱིབས་གཉན་རིམས་ཁྱབ་གདལ་འགོག་ཐབས་སུ་ཁོང་ཚོའི་ཉམས་མྱོང་དང་ཆེད་ལས་བེད་སྤྱོད་བྱེད་པར་རྒྱ་གཞུང་ནས་འགོག་རྐྱེན་མི་བཟོ་བའི་རེ་བ་ཡོད།  ང་ཚོས་བོད་ནང་ཏོག་དབྱིབས་གཉན་རིམས་འགོག་ཐབས་སླད་བོད་ཀྱི་གསོ་རིག་སྨན་དང་སྟོབས་སྐྱེད་སྨན། སྨན་བཅོས་ཡོ་བྱད། སྨན་ཞབས་པ། དྭང་བླངས་པ་སོགས་ཀྱི་མཐུན་རྐྱེན་སྦྱོར་རྒྱུར་གྲ་སྒྲིག་ཨང་གསར་ཡོད་ཅེས་གསུངས་འདུག

བྱམས་པ་ཚེ་རིང་གིས་བོད་མིའི་སྒྲིག་འཛུགས་ཀྱི་དྲ་རྒྱ་ལས་འདིར་དྲངས།