རྒྱ་ནག་གཞུང་གིས་གཞས་ཚིག་རྩོམ་པ་པོ་ཞིག་འཛིན་བཟུང་བཀག་ཉར་བྱེད་མུས་རེད་འདུག

རྒྱ་ནག་གཞུང་གིས་བོད་མགོ་ལོག་ཁུལ་གྱི་གླུ་བ་བདེ་རབ་ལགས་དང་ཁོང་གི་གཞས་ཚིག་རྩོམ་པ་པོ་སོགས་བོད་མི་ན་གཞོན་ལྔ་འཛིན་བཟུང་བྱས་ཏེ་འདྲི་རྩད་བྱས་རྗེས་གཞན་རྣམས་ཀློད་གྲོལ་བཏང་ཡོད་ཀྱང་གཞས་ཚིག་རྩོམ་པ་པོ་དང་རམ་དཀྲོལ་བ་ན་གཞོན་དེ་མུ་མཐུད་བཀག་ཉར་བྱེད་མུས་ཡིན་འདུག

འདི་གའི་གསར་འགོད་པར་ཁུངས་ལྡན་གནས་ཚུལ་འབྱོར་བ་ལྟར་ན།  ཟླ་འདིའི་ཕྱི་ཚེས་ ༡༣ ཉིན་གྱི་དགོང་མོར་བོད་ནང་དུ་མགྱོགས་འཕྲིན་ཐད་གཏོང་བརྒྱུད་གླུ་གཞས་འགྲན་སྡུར་གྱི་དགོང་ཚོགས་ཤིག་བསྡུས་ཡོད་པ་དང་། སྐབས་དེར་མགོ་ལོག་ཁུལ་ནས་ཡིན་པའི་འགྲན་ཞུགས་པ་ན་གཞོན་གླུ་བ་བདེ་རབ་ལགས་ཀྱིས་“རྗེ་བླ་མ་དང་པོ་བོད་ནས་འཁྲུངས།། སྐུ་འགྲོ་དོན་ས་མཐའི་ཡུལ་ནས་མཛད།། བྱམས་སྙིང་རྗེ་ལྡན་པའི་བླ་མ་ཁོང་།། སྐུ་མྱུར་དུ་ཕེབས་པའི་སྨོན་ལམ་འདེབས།།”ཞེས་པའི་བླ་མར་བསྟོད་པའི་གཞས་ཤིག་བླངས་པར་བརྟེན། རྒྱ་ནག་གཞུང་གི་ཉེན་རྟོག་པས་ཁོང་དང་ཁོང་གི་གླུ་གཞས་རྩོམ་པ་པོ་དང་རམ་དཀྲོལ་བ། དེ་མིན་ཐད་གཏོང་ནང་གི་རོགས་པ་གསུམ་བཅས་འཛིན་བཟུང་བཙན་ཁྲིད་བྱས་ཡོད་པ་མ་ཟད། གླུ་གཞས་དང་འབྲེལ་བའི་འདྲི་རྩད་མང་པོ་བྱས་རྗེས་ཉིན་དེ་རང་ལ་གླུ་བ་བདེ་རབ་ལགས་དང་རོགས་པ་གཞན་གསུམ་ཀློད་ཡོད་ཀྱང་། བསྟོད་གླུའི་གཞས་ཚིག་རྩོམ་པ་པོ་དང་རམ་དཀྲོལ་བ་ན་གཞོན་དེ་མུ་མཐུད་འཛིན་བཟུང་བཀག་ཉར་བྱེད་མུས་ཡིན་འདུག

འདི་གའི་གནས་ཚུལ་མཁོ་སྤྲོད་པས། གླུ་བ་བདེ་རབ་ལགས་དང་རོགས་པ་གསུམ་ཀློད་ཡོད་ཀྱང་། རྗེས་ཕྱོགས་བདེ་རབ་ལགས་གླུ་གཞས་འགྲན་ཚོགས་སོགས་གང་དུའང་འཛུལ་ཞུགས་བྱ་མི་ཆོག་པའི་ཁས་ལེན་ཡི་གེ་འབྲི་རུ་བཅུག་ཡོད་སྐོར་དང་། ཉེ་ལམ་ནས་བོད་ནང་དུ་དམ་དྲག་ཆེ་བ་དང་། ལྷག་པར་ཚོགས་ཆེན་ ༢༠ པ་འཚོག་གྲབས་ཡོད་པས་ལྟ་སྲུང་ནན་མོ་བྱེད་བཞིན་ཡོད་སྟབས། བསྟོད་གཞས་དེའི་རྩོམ་པ་པོ་དང་རམ་དཀྲོལ་བའི་མིང་སོགས་བཤད་ན་སྟབས་བདེ་མིན་སྐོར་བརྗོད་བྱུང་།

གླུ་བ་བདེ་རབ་ལགས་ཀྱིས་གླུ་གཞས་དེ་ལེན་སྐབས། ཐད་གཏོང་ནང་དུ་མི་ཞིག་གིས་ཁྱེད་ཀྱི་ཉེ་འགྲམ་དུ་སུ་ཡོད་ཅེས་འདྲི་རྩད་བྱས་པ་མ་ཟད། དེ་ནས་ཡུན་རིང་མ་འགོར་བར་ཉེན་རྟོག་པ་དང་དྲ་ལམ་བདེ་འཇགས་ལྟ་སྐུལ་བ་ཟེར་བས་ཐད་གཏོང་བྱེད་ཡུན་རིང་དྲགས་ལུགས་བསྙད་དེ། ཆུ་ཚོད་གཅིག་དང་ཕྱེད་ཙམ་ནས་ཐད་གཏོང་མཚམས་འཇོག་བྱེད་དུ་བཅུག་ཡོད་འདུག  དེའི་ཐད་འདི་གའི་གནས་ཚུལ་མཁོ་སྤྲོད་པས་སྤྱིར་བཏང་མགྱོགས་འཕྲིན་ནས་ཆུ་ཚོད་ཉེར་བཞིའི་རིང་ཐད་གཏོང་བྱས་བསྡད་ནའང་འགོག་མཁན་མེད་ཀྱང་ད་ལན་གྱི་གླུ་གཞས་འགྲན་ཚོགས་དེ་བཀག་ཡོད་སྐོར་བརྗོད་བྱུང་ལ། མགྱོགས་འཕྲིན་ཚོང་གཉེར་ཁང་གིས་མགྱོགས་འཕྲིན་ནང་གླུ་བ་བདེ་རབ་ལགས་ཀྱི་པར་དང་བརྙན་སོགས་བསུབས་ཡོད་པ་མ་ཟད། སྤྱི་ཚོགས་དྲ་ལམ་ཡོངས་རྫོགས་ནས་ཁོང་དང་འབྲེལ་བའི་གནས་ཚུལ་མཐོང་རྒྱུ་མེད་པར་གྱུར་ཡོད་འདུག

རྒྱ་ནག་གཞུང་གི་སྟངས་འཛིན་འོག་ཡོད་པའི་སྐད་འཕྲིན་དང་མགྱོགས་འཕྲིན་ཚོང་གཉེར་སོགས་ཀྱིས་ཐད་གཏོང་དྲ་ལམ་དུ་བོད་སྐད་བཤད་པ་དང་བོད་གླུ་བླངས་ཚེ། ཐད་གཏོང་འགགས་འགྲོ་བའམ་དྲ་ལམ་བདེ་འཇགས་ལྟ་སྐུལ་བ་ཟེར་བའི་སོ་ལྟ་བ་ཚོས་ཐད་ཀར་ཉེན་བརྡ་གཏོང་བ་ནི་རྒྱུན་ལྡན་ཞིག་ཏུ་གྱུར་ཡོད་པ་རེད། ཉེ་བའི་ལོ་ཤས་ནས་བཟུང་བཙན་བྱོལ་ནང་དུ་ཡོད་པའི་བོད་མི་ཚོས་བོད་ནང་གི་མི་ཞིག་ལ་ཐད་གཏོང་ནང་ཡུན་རིང་ཁ་བརྡ་བྱས་ཚེ་དྲ་ལམ་བདེ་འཇགས་ལྟ་སྐུལ་བ་ཟེར་བ་དེས། གྲོགས་པོ། ད་མཚམས་ཞོག ཁྱེད་ཀྱི་ཁ་བརྡའི་དུས་ཡུན་རྫོགས་སོང་ཟེར་བའི་ཉེན་བརྡ་གཏོང་གི་འདུག

རྒྱ་ནག་གི་ལས་གཞི་( the china project ) ཞེས་པས་གནས་ཚུལ་སྤེལ་བ་ལྟར་ན། དྲ་ལམ་བདེ་འཇགས་སྲུང་སྐྱོབ་དང་དྲ་ལམ་འཕེལ་རྒྱས། དྲ་ལམ་སྒྲིག་གཞི་སོགས་ལ་ཁ་གཡར་ཏེ། ཕྱི་ལོ་ ༢༠༡༩ ལོར་རྒྱ་ནག་གཞུང་གིས་དྲ་ལམ་སོ་ཉུལ་བ་མི་གྲངས་ ༢༠༠༠  ལྷག་ཆེད་དུ་བསྐོ་བཞག་བྱས་ཡོད་པ་དང་། ཕྱིས་སུ་དེའི་ཐོག་མི་གྲངས་ ༣༠༠༠ བསྣན་ཏེ་ཕྱོགས་ཡོངས་ནས་གྲངས་ཉུང་མི་རིགས་ས་ཁུལ་གཙོར་བཟུང་གིས་དྲ་ལམ་ནས་རྟོག་ཞིབ་བྱེད་བཞིན་ཡོད་པའི་གནས་ཚུལ་ཐོན་ཡོད་ཀྱང་། ཡོངས་གྲགས་སུ་རྒྱ་ནག་གཞུང་ནས་དྲ་ལམ་དུ་དྲ་དམག་འཇབ་རྒོལ་བ་དང་དམར་ཤོག་དྲིལ་སྒྲོག་པ་ས་ཡ་མང་པོ་མངག་གཏོང་བྱེད་ཀྱི་ཡོད་པའི་གནས་ཚུལ་ཐོན་གྱི་ཡོད་པ་རེད།

གསར་འགོད་པ། དཔལ་ལྡན།