བོད་མིའི་སྒྲིག་འཛུགས་ཀྱི་ལྟེ་གནས་གངས་ཅན་སྐྱིད་གཤོངས་ནས་བོད་འབྲོག་པའི་འཚོ་བར་དངོས་སུ་རོལ་མྱོང་བྱས།

དྷ་རམ་ས་ལའི་གངས་ཅན་སྐྱིད་གཤོངས་སུ་བོད་འབྲོག་པའི་སྦྲ་ནག་ཅིག་ཕུབ་སྟེ་ལ་དྭགས་བོད་ཁྱིམ་གྱི་དགེ་སློབ་ཚོས་ཉིན་རེའི་འཚོ་བའི་བྱེད་སྒོ་འཁྲབ་སྟོན་དང་བོད་འབྲོག་པའི་ཡོ་ཆས་སོགས་འགྲེམས་སྟོན་བྱས་སོང་།

དེ་རིང་སྔ་དྲོའི་ཆུ་ཚོད་ ༡༠ ཙམ་ལ་བོད་མིའི་སྒྲིག་འཛུགས་ཕྱི་དྲིལ་བོད་ཀྱི་འགྲེམས་སྟོན་ཁང་དང་བོད་ཁྱིམ་སློབ་གྲྭ་ཐུན་མོང་གི་གོ་སྒྲིག་འོག  གངས་ཅན་སྐྱིད་གཤོངས་ཀྱི་ལྟེ་གནས་སུ་བོད་ཀྱི་འབྲོག་པའི་སྦྲ་དང་བཅས་དངོས། ཉིན་རེའི་འཚོ་བའི་བྱེད་སྒོ་རྣམ་བཞག་དང་ཐུན་མོང་མ་ཡིན་པའི་གླུ་སོགས་ཀྱི་སྐོར་ནས་དུས་ཐུང་འགྲེམས་སྟོན་དང་འཁྲབ་སྟོན་གནང་སོང་ལ། ལ་དྭགས་བོད་ཁྱིམ་གྱི་དགེ་ལས་སློབ་ཕྲུག་ཚོས་རྐང་འགན་འཁུར་ཏེ་འགྲེམས་སྟོན་དང་དངོས་འཁྲབ་སྟོན་གནང་བཞིན་འདུག་ལ། མ་འོངས་པར་འགྲེམས་སྟོན་སྐོར་སྐྱོད་ཀྱང་གནང་འཆར་ཡོད་འདུག

འགྲེམས་སྟོན་གྱི་ཐོག་མར་བོད་ཀྱི་འགྲེམས་སྟོན་ཁང་གི་འགན་འཛིན་བསྟན་འཛིན་སྟོབས་ལྡན་ལགས་ཀྱིས། བོད་ཀྱི་འབྲོག་པ་དེ་ལོ་སྟོང་ཕྲག་སྔོན་གྱི་ལུགས་སྲོལ་དང་། བོད་ཆོལ་ཁ་གསུམ་ལ་ཁྱབ་པའི་བོད་ས་མཐོ་འབྱུང་ཁམས་དང་དམིགས་བསལ་ཁྱད་ཆོས་ལྡན་པའི་ལུགས་སྲོལ་ཆགས་ཀྱི་འདུག དེ་སྔ་ཕྱི་ལོ་ ༡༩༥༩ གོང་ལ་བོད་ཀྱི་འབྲོག་པའི་མི་འབོར་ཉམས་ཞིབ་བྱས་པ་ཡིན་ན། བོད་ཀྱི་འབྲོག་པའི་མི་འབོར་དེ་ཧ་ལམ་ས་ཡ་ ༣ དང་འབུམ་ ༢ ལྷག་ཙམ་ཡོད་པའི་ཁྲོད། ས་ཡ་ ༢ དང་འབུམ་ ༢ ལྷག་ཙམ་ནི་འབྲོག་པ་ཡིན་པ་དང་ས་ཡ་ ༡ ལྷག་ཙམ་ནི་ས་མ་འབྲོག་ཡིན་པས། བོད་པའི་མི་འབོར་གྱི་ཆ་ནས་བཤད་ན་བརྒྱ་ཆ་ ༥༠ ལྷག་ཙམ་ཞིག་འབྲོག་པ་ཆགས་ཀྱི་འདུག དེར་བརྟེན་ང་ཚོས་འབྲོག་པའི་བསྟི་གནས་ནི་བོད་ཀྱི་ཆོས་དང་རིག་གཞུང་། ངོ་བོ་སོགས་བོད་ཀྱི་བསྟི་གནས་ཆེ་ཤོས་ཤིག་དང་བརྩི་བཀུར་ཞུ་དགོས་པ་ཞིག་ཆགས་ཀྱི་འདུག ད་དུང་བོད་ཀྱི་འབྲོག་པའི་འཚོ་བ་ནི་རང་ཁ་རང་གསོའི་འཚོ་བ་ཞིག་ལ་ངོས་འཛིན་བྱེད་ཐུབ་ཀྱི་ཡོད་སྐོར་དང་། ད་ལྟའི་ཆར་གོ་ལའི་གནམ་གཤིས་ལ་འགྱུར་ལྡོག་ཆེན་པོ་འགྲོ་ཡི་ཡོད་པས། ཚན་རིག་པ་དང་མཁས་པ་མང་པོས་ཁོར་ཡུག་སྲུང་སྐྱོབ་བྱ་རྒྱུ་གལ་ཆེན་ཡིན་པ་བཤད་ཀྱི་ཡོད་པ་རེད། འོན་ཀྱང་། འབྲོག་པའི་འཚོ་བའི་ནང་དུ་ལོ་ངོ་སྟོང་ཕྲག་སྔོན་ནས་ཤིང་ནགས་གཅོད་བྲེག་དང་མེར་སྲེག་གཏོང་གི་མེད་པ་དང་། ཆུ་མིག་དང་རྒྱུག་ཆུ་སོགས་སྦག་བཙོག་མི་བཟོ་བ་སོགས་ཁོར་ཡུག་སྲུང་སྐྱོབ་བྱས་དང་བྱེད་མུས་ཡིན་སྐོར། ད་ལྟའི་ཆར་རྒྱ་ནག་གཞུང་གི་སྲིད་ཇུས་ངན་པ་ལ་བརྟེན་ནས་བོད་ཀྱི་རིག་གཞུང་དང་སྐད་ཡིག་སོགས་ཉམ་ཆག་འགྲོ་བཞིན་ཡོད་པ་དང་། འབྲོག་པ་ཇེ་ཉུང་དུ་ཕྱིན་ཡོད་པ་དང་རིམ་པས་རྩ་བརླག་ཏུ་འགྲོ་ཉེན་ཆེ་བས། བོད་ཀྱི་འགྲེམས་སྟོན་ཁང་གིས་བོད་ཀྱི་འབྲོག་པའི་སྐོར་གྱི་དུས་ཐུང་འགྲེམས་སྟོན་དེ་མུ་མཐུད་དུ་གནང་རྒྱུ་དང་། མ་འོངས་པར་དུས་ཐུང་འགྲེམས་སྟོན་འདི་སྐོར་སྐྱོད་འགྲེམས་སྟོན་ལ་བསྒྱུར་རྒྱུའི་ཐབས་ལམ་སྒྲིག་བཞིན་ཡོད་ལ། ད་ལྟ་འབྲོག་པའི་མི་འབོར་ཇེ་ཉུང་དུ་འགྲོ་བཞིན་ཡོད་པས། མ་འོངས་པར་འབྲོག་པའི་རིག་གནས་ཉར་ཚགས་བྱ་རྒྱུ་དང་། དེའི་ཐོག་ལ་ཐབས་ལམ་གསར་པ་འཚོལ་རྒྱུའི་འབད་བརྩོན་གནང་གི་ཡོད་སྐོར་སོགས་བརྗོད་སོང་།

བོད་ཀྱི་འབྲོག་པའི་སྐོར་དང་འབྲེལ་ནས་དམིགས་བསལ་སྐུ་མགྲོན་ལ་དྭགས་བོད་ཁྱིམ་སློབ་གྲྭའི་འགན་འཛིན་བསྟན་འཛིན་རབ་བརྟན་ལགས་ཀྱིས། བོད་ཀྱི་འབྲོག་པའི་སྐོར་གྱི་འགྲེམས་སྟོན་དེ་ལོ་གཉིས་སྔོན་ནས་གྲ་སྒྲིག་བྱས་པའི་འགྲེམས་སྟོན་ཞིག་ཡིན། བོད་ཕྲུག་ཁྱིམ་སྡེའི་སྤྱི་ཁྱབ་ཡིག་ཚང་གི་གཙོ་འཛིན་དང་མཛད་གཙོ་རྣམ་པས་ང་ཚོར་མངག་བྱ་ནན་པོ་གནང་ཡོད་པ་རེད། དེ་ཡང་ལ་དྭགས་སུ་ལ་དྭགས་ཀྱི་སློབ་ཕྲུག་དང་འབྲོག་པར་འབྲེལ་བ་ཡོད་པར་བརྟེན། ཐེངས་འདིའི་བོད་ཕྲུག་ཁྱིམ་སྡེ་དབུ་བརྙེས་པའི་དུས་ཆེན་དང་བརྟན་བཞུགས་སྐབས། འབྲོག་གཞས་དང་འབྲོག་པའི་འཚོ་བ་སྐྱེལ་སྟངས་སྐོར་ལ་གྲ་སྒྲིག་གནང་དགོས་པའི་ལམ་སྟོན་གནང་བ་ལྟར། ལ་དྭགས་བོད་ཁྱིམ་སློབ་གྲྭའི་རིག་གཞུང་ཚོགས་ཆུང་གི་གོ་སྒྲིག་འོག་འབྲོག་པའི་སྐོར་ལ་ཉམས་ཞིབ་བྱེད་མཁན་གྱི་ཚོགས་ཆུང་བཙུགས་ཡོད་པས། རྒན་ལགས་རྣམ་པ་ཚོའི་བཀའ་དྲིན་གྱིས་དེ་རིང་ང་ཚོས་འབྲོག་པའི་སྐོར་གྱི་འགྲེམས་སྟོན་བྱེད་ཐུབ་སོང་། འགྲེམས་སྟོན་འདིའི་ནང་དུ་ང་ཚོས་བཟོ་བཅོས་བྱས་པ་གཅིག་ཀྱང་མེད་ལ། དོན་དངོས་སུ་འབྲོག་པས་ག་རེ་གནང་གི་ཡོད་པ་དེ་བསྟན་ཡོད། ལྷག་པར་དུ་འདིའི་ནང་དུ་མཉམ་ཞུགས་བྱེད་མཁན་གྱི་སློབ་ཕྲུག་ཕལ་ཆེ་བ་འབྲོག་པའི་ཕྲུ་གུ་ཡིན་པ་དང་། ཞིབ་འཇུག་གནང་མཁན་གྱི་དགེ་རྒན་དེ་དག་ཀྱང་འབྲོག་པ་ཡིན་ལ་ད་ལྟ་ལས་བྱེད་གནང་བཞིན་པ། ཡང་ན་འབྲོག་པའི་འཚོ་བའི་ནང་རྒྱུན་རིང་པོར་དུས་ཚོད་གཏོང་མཁན་ཡིན་པས། རྒན་ལགས་དེ་དག་གིས་ཞིབ་འཇུག་བྱས་ནས་ཕྲུ་གུར་བེད་སྤྱོད་གཏོང་སྟངས་དང་མིང་བསླབ་པ་སོགས་བརྒྱུད་ནས་སློབ་སྦྱོང་བྱས་ཏེ་འགྲེམས་སྟོན་བྱེད་རྒྱུའི་གོ་སྐབས་རག་སོང་། འབྲོག་པའི་གནས་སྟངས་སྐོར་དང་འབྲེལ་ནས་ཁོང་གིས། སྤྱིར་བཏང་ཕྱི་ལོ་ ༡༩༦༠ ལོར་བོད་མི་ཚོ་ལ་དྭགས་བྱང་ཐང་ཁུལ་ནས་བཙན་བྱོལ་དུ་ཡོང་བ་རེད། སྐབས་དེ་དུས་འབྲོག་པ་ཕལ་ཆེར་ ༥༠༠ ལྷག་ཡོད་ས་རེད། འོན་ཀྱང་། ད་ལྟའི་ཆར་འབྲོག་པ་ཇེ་ཉུང་དུ་ཕྱིན་ནས་འབྲོག་པ་ ༡༠༠ ཙམ་ལས་མི་འདུག ཞེས་བརྗོད་སོང་།

ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་གིས། ད་ལན་བོད་ཀྱི་འགྲེམས་སྟོན་ཚན་པ་ནས་དུས་ཐུང་གི་འགྲེམས་སྟོན་གོ་སྒྲིག་གནང་བ་དང་། དམིགས་བསལ་གྱིས་བོད་ནང་དུ་གནའ་རབས་ནས་ཡོད་པའི་ལོ་རྒྱུས་ལྡན་པའི་འབྲོག་པའི་རིག་གཞུང་དང་གོམས་སྲོལ། བྱེད་ཕྱོགས་བཅས་ཀྱི་ཐོག་ལ་ལ་དྭགས་བོད་ཁྱིམ་སློབ་གྲྭའི་སློབ་དགེ་དང་སློབ་ཕྲུག་རྣམ་པས་གནད་དོན་འདིའི་ཐོག་ལ་འགྲེམས་སྟོན་གནང་རྒྱུའི་འཁུར་བླངས་པར་ཡི་རངས་བསྔགས་བརྗོད་ཞུ་ཡི་ཡོད། རྒྱུ་མཚན་ནི་འགྲེམས་སྟོན་ཁང་ཟེར་བ་དེ་ཤེས་ཡོན་གྱི་བསྟི་གནས་ཁང་ཞིག་ཆགས་ཀྱི་ཡོད་པ་རེད། འགྲེམས་སྟོན་ཁང་གི་དམིགས་ཡུལ་གཙོ་བོ་ནི་བོད་ཀྱི་རྒྱལ་རབས་ལོ་རྒྱུས་དང་། བོད་ནང་གི་ཛ་དྲག་གི་གནས་སྟངས། ཆབ་སྲིད་ཀྱི་གནས་བབ། རིག་གཞུང་སྲུང་སྐྱོབ། དེ་བཞིན་ཁྱབ་བསྒྲགས། ད་ལྟ་དམིགས་བསལ་གྱིས་རྒྱ་ནག་གིས་བོད་ནང་དུ་སྲིད་ཇུས་ངན་པ་འཛིན་པ་དང་ལག་བསྟར་བྱེད་པའི་ཐོག་ནས། བོད་ནང་གི་བོད་མི་ཚོའི་འགྲོ་བ་མིའི་ཐོབ་ཐང་རྩ་མེད་རྡོག་རོལ་ག་འདྲ་གཏོང་གི་ཡོད་པ། དེ་བཞིན་རིག་གཞུང་སྲུང་སྐྱོབ་ཀྱི་ཐོག་ལ་དོ་ཕོག་འགྲོ་ཡི་ཡོད་པ། ད་དུང་རྒྱ་ནག་གིས་སྲིད་ཇུས་ལག་བསྟར་གྱི་ཐོག་ནས་ཁོར་ཡུག་ལ་གནོད་འཚེ་འབྱུང་གི་ཡོད་པ་དེ་དག་ཁྱབ་བསྒྲགས་བྱ་རྒྱུ་དང་གོ་རྟོགས་སྤེལ་རྒྱུ་ནི་གལ་ཆེན་ཞིག་ཡིན་པ་ངོས་འཛིན་ཞུ་ཡི་ཡོད་ལ། ང་ཚོའི་ངོས་ནས་རིག་གཞུང་སྲུང་སྐྱོབ་བྱ་རྒྱུ་གལ་ཆེན་ཡིན་པ་དང་། དམིགས་བསལ་གྱིས་བོད་རིགས་གཞོན་སྐྱེས་ཚོར་བོད་ཀྱི་གནས་སྟངས་དང་རྒྱལ་རབས་སོགས་ལ་སྦྱང་རྒྱུའི་གོ་སྐབས་དགོས་རྒྱུ་གལ་ཆེན་ཆགས་ཀྱི་ཡོད་པ་རེད། ད་ལན་གྱི་དུས་ཐུང་གི་འགྲེམས་སྟོན་འདི་དུས་ཚོད་ཐུང་ཐུང་ཞིག་གི་ནང་དུ་ཚགས་ཚུད་པོ་དང་གོ་སྒྲིག་ཞུ་ཕྱོགས་དེ་ཡག་པོ་ཞེ་དྲགས་བྱུང་འདུག དེར་བརྟེན་འབྲེལ་ཡོད་ཚང་མར་བཀའ་དྲིན་ཆེ་ཞུ་ཡི་ཡིན། ཞེས་གསུངས་སོང་།

ཡང་བཀའ་བློན་མཆོག་ནས་དུས་ཐུང་གི་འགྲེམས་སྟོན་གོ་སྒྲིག་གནང་བ་འདི་དུས་ལ་འཚམས་པ་དང་རན་པོ་ཞེ་དྲགས་ཆགས་ཀྱི་འདུག ད་དུང་འགྲེམས་སྟོན་འདིའི་ནང་དུ་ལ་དྭགས་བོད་ཁྱིམ་སློབ་གྲྭའི་སློབ་ཕྲུག་ ༢༦ ཡོད་པ་དེ་དག་སོ་སོའི་རིག་གཞུང་ལ་དོ་དབྱིངས་ཆེན་པོ་ཡོད་པ་དང་སྤོབས་པ་ལྡན་པའི་འཁྲབ་སྟོན་གནང་བ་མཐོང་དུས་དགའ་ཚོར་ཆེན་པོ་བྱུང་། རྒྱུ་མཚན་ནི་རྒྱལ་ཁབ་ཀྱི་དོན་དུ་འཐབ་རྩོད་བྱ་རྒྱུ་དང་། སོ་སོའི་རིག་གཞུང་སྲུང་སྐྱོབ་དང་རྒྱུན་སྐྱོང་ཡོང་སླད། གཞོན་སྐྱེས་ཚོས་གང་ཐུབ་ཐུབ་ཀྱིས་མཉམ་ཞུགས་གང་མང་གནང་རྒྱུ་གལ་ཆེན་པོ་རེད། ད་ལྟ་གཞོན་སྐྱེས་རྣམས་ཀྱིས་དགའ་ཚོར་གྱི་ཐོག་ནས་མཉམ་ཞུགས་བྱས་པ་མཐོང་དུས། དགའ་པོ་ཞེ་དྲགས་བྱུང་། རྒྱལ་ཁབ་གཅིག་གི་ནང་དུ་རྒྱལ་ཁབ་དང་སྤྱི་ཚོགས་ཀྱི་ཁ་ཕྱོགས་ག་པར་འགྱུར་དང་མ་འགྱུར། རྒྱལ་ཁབ་དེའི་ཡར་རྒྱས་ཀྱི་ཚད་གཞི་ཇི་ཙམ་ཆགས་ཡོད་མེད་དེ་དག་གཞོན་སྐྱེས་ཚོར་རག་ལས་ཀྱི་ཡོད་པས། ད་ལན་གཞོན་སྐྱེས་ཀྱིས་མཉམ་ཞུགས་གང་མང་གནང་ཡོད་པ་དེ་ལ་བསྔགས་བརྗོད་ཞུ་ཡི་ཡོད། ཅེས་གསུངས་སོང་།

བོད་འབྲོག་པའི་སྐོར་གྱི་འགྲེམས་སྟོན་འདིའི་ནང་དུ་འབྲོག་པའི་སྦྲ་དང་འཐག ཐབ་ཆས། ཆས་གོས། དེ་བཞིན་ཐུན་མོང་མ་ཡིན་པའི་གླུ་གཞས་ལེན་བཞིན་བལ་རྩིད་འབྲེག་གསེད་བྱེད་པ་སོགས་དངོས་སུ་འཁྲབ་སྟོན་བྱས་ཏེ་ཀུན་གྱིས་དགའ་མོས་དང་དོ་དབྱིངས་ཆེན་པོ་བྱས་སོང་།

གསར་འགོད་པ། བསྟན་འཛིན་ཕུར་བུ།