དེ་སྔོན་རྒྱ་ནག་གཞུང་གིས་ལོ་ ༦ བཙོན་འཇུག་ཁྲིམས་ཐག་བཅད་པའི་བྲག་མགོ་དགོན་གྱི་ཕྱག་མཛོད་དགེ་བཤེས་བསྟན་འཛིན་དཔལ་བཟང་ངམ་བསྟན་དགའ་ལགས་ནད་མནར་རྐྱེན་གྱིས་སྐུ་གྲོངས་ཡོད་འདུག
འདི་ག་བོད་ཀྱི་དུས་བབ་གསར་ཁང་ལ་ཁུངས་ལྡན་གནས་ཚུལ་མཁོ་སྤྲོད་གནང་བ་ལྟར་ན། ཟླ་འདིའི་ཕྱི་ཚེས་ ༡ ཉིན་གྱི་ཕྱི་དྲོའི་ཆུ་ཚོད་ ༥ པ་ཡས་མས་སུ། བྲག་མགོ་དགོན་པའི་ཕྱག་མཛོད་དགེ་བཤེས་བསྟན་འཛིན་དཔལ་བཟང་ངམ་བསྟན་དགའ་ལགས་ནད་མནར་རྐྱེན་གྱིས་སྐུ་གྲོངས་ཡོད་འདུག ཁོང་ཕྱི་ལོ་ ༢༠༡༨ ལོར་ཀློད་གྲོལ་བཏང་ཡོད་ཀྱང་བཙོན་ཁང་དུ་སྡུག་སྦྱོང་མནར་གཅོད་ཚད་མེད་བཏང་རྐྱེན་སྐུ་གཟུགས་གནས་སྟངས་ཛ་དྲག་ཆགས་ཏེ། ཕྱིས་སུ་ཁྲིན་ཏུའུ་སོགས་སུ་ཕྱིན་ནས་སྨན་པར་བསྟེན་གཏུག་བྱས་ཡོད་ཀྱང་ཕན་ཐོགས་བྱུང་མེད་འདུག
འབྲེལ་ཡོད་ཅིག་གིས་འདི་གའི་གསར་འགོད་པར། དགེ་བཤེས་བསྟན་དགའ་ལགས་ཕྱི་ལོ་ ༢༠༡༨ ལོར་ཀློད་གྲོལ་བཏང་ཡོད་ཀྱང་། དགོན་པར་ཕེབས་མི་ཆོག་པ་དང་། འགྲོ་འདུག་ལའང་རང་དབང་མེད་པའི་རྐྱེན་གྱིས་སྐབས་དེར་ཚད་ལྡན་སྨན་པར་བསྟེན་གཏུག་བྱེད་ཐུབ་མེད་པ་དང་། འདས་ལོར་རྒྱ་ནག་ཁྲིན་ཏུའུ་ཡི་སྨན་ཁང་ཞིག་ཏུ་ཕྱིན་སྐབས། སྨན་པས་ཁོང་གི་གློ་བའི་ནང་ནག་པོ་ཞིག་ཡོད་སྐོར་དང་། དེར་གཟབ་གཟབ་མ་བྱས་ཚེ་མགོའི་ནང་དུ་ཕྱིན་ན་གནས་སྟངས་ཛ་དྲག་པོ་ཆགས་ཀྱི་ཡོད་སྐོར་བརྗོད་ཡོད་པ་དང་། དེ་ནས་ཟླ་གཅིག་ཙམ་གྱི་རྗེས་ནས་བསྐྱར་དུ་སྨན་ཁང་དེར་ཕྱིན་ནས་བརྟག་དཔྱད་བྱེད་སྐབས་ན་ཚ་དེ་ཀླད་པའི་ནང་དུ་ཕྱིན་ཚར་འདུག སྨན་བསྟེན་ན་མ་གཏོགས་ཐབས་ཤེས་གཞན་གང་ཡང་མེད་སྐོར་བརྗོད་ཡོད་སྟབས། དགེ་བཤེས་ནས་སྨན་ཤུགས་ཆེན་པོ་ཟོས་ཡོད་འདུག སྨན་ཤུགས་ཆེན་ཟོས་རྐྱེན་མིད་པའི་ནང་ན་ཟུག་བྱུང་སྟེ་སྐད་ཆ་བཤད་མི་ཐུབ་པ་དང་ཁ་ལག་ཀྱང་ཡག་པོ་ཟ་མི་ཐུབ་པའི་དཀའ་ངལ་འཕྲད་པའི་ཐོག ཏོག་དབྱིབས་གཉན་རིམས་རྐྱེན་གྱིས་སྨན་ཁང་དུ་བསྟེན་གཏུག་བྱེད་ཁག་པོ་ཆགས་པ་སོགས་ཀྱིས་སྐུ་གྲོངས་ཡོད་སྐོར་བརྗོད་བྱུང་།
ཁོང་དང་མཉམ་དུ་བཙོན་འཇུག་མནར་གཅོད་མྱངས་བའི་བྲག་མགོ་དགོན་པའི་སློབ་དགེ་དགེ་བཤེས་ཚེ་དབང་རྣམ་རྒྱལ་ལགས་དང་། དགོན་པའི་རྩིས་པ་དང་དྲུང་ཡིག་གཅིག་ལྕོགས་དགྲ་ལྷ་ལགས། དེ་བཞིན་སྒོ་ཆེན་དགོན་པའི་སྤྲུལ་སྐུ་བློ་བཟང་བསྟན་འཛིན་ལགས་བཅས་ཀྱི་ད་ལྟའི་གནས་སྟངས་ག་འདྲ་ཆགས་ཡོད་དྲིས་པར་ཁོང་གིས། ཕྱི་ལོ་ ༢༠༡༨ ཟླ་ ༡ ནང་དགེ་བཤེས་ཚེ་དབང་རྣམ་རྒྱལ་ལགསཀློད་གྲོལ་གཏོང་སྐབས་རྐང་པ་གཉིས་ནད་པར་གྱུར་ནས་དཀའ་ངལ་ཆེན་པོ་འཕྲད་ཡོད་ཀྱང་། ད་ལྟ་ཏོག་ཙམ་དྲག་སྟེ་འཁར་རྒྱུག་འཁྱེར་ནས་འགྲོ་ཐུབ་ཙམ་ཡོད་པ་དང་། དགོན་པའི་རྩིས་པ་དང་དྲུང་ཡིག་གཅིག་ལྕོགས་དགྲ་ལྷ་ལགས་ལོ་ཆུང་ཆུང་ཡིན་པས་ད་ལྟ་ནད་པ་ཚབས་ཆེན་ཆགས་མེད་སྲིད་སྐོར་དང་། སྤྲུལ་སྐུ་བློ་བཟང་བསྟན་འཛིན་ལགས་ཀྱི་སྐུ་གཟུགས་གནས་སྟངས་གང་འདྲ་ཆགས་ཡོད་མེད་ཁ་གསལ་མེད་སྐོར་བརྗོད་བྱུང་།
གསར་འགོད་པས་ད་ལྟའི་ཆར་བྲག་མགོ་དགོན་པའི་གནས་སྟངས་གང་འདྲ་ཡོད་དྲིས་པར་ཁོང་གིས། དེ་སྔོན་རྒྱ་ནག་གཞུང་གིས་བྲག་མགོའི་སེར་སྐྱ་མི་མང་ལ་རྡུང་རྡེག་དང་འཛིན་བཟུང་བྱས་པ་དང་། བཙན་གྱིས་རྒྱའི་སློབ་གསོ་སྤྲོད་ཐབས་སོགས་བྱས་ཏེ་དཀའ་ངལ་ཆེན་པོ་འཕྲད་ཡོད་པ་དང་། ད་ལྟའི་དམ་དྲག་ཆེན་པོ་བྱེད་བཞིན་ཡོད་སྐོར་བརྗོད་བྱུང་།
ཕྱི་ལོ་ ༢༠༡༢ ལོའི་ཟླ་ ༡ ཚེས་ ༢༣ སྟེ་རྒྱ་ནག་གི་དཔྱིད་གསར་དུས་ཆེན་ཉིན། བྲག་མགོ་རུ་སེར་སྐྱ་མང་ཚོགས་ཀྱིས་རྒྱ་ནག་གཞུང་གི་བཙན་གནོན་ལ་ངོ་རྒོལ་བྱེད་སྐབས། རྒྱ་གཞུང་ཉེན་རྟོག་པས་མི་མང་ནང་གང་བྱུང་མེ་མདས་བརྒྱབ་སྟེ་བོད་མི་ཁག་ཅིག་དམར་གསོད་དང་རྨས་སྐྱོན་བཟོས་ཡོད་པ་དང་། དེ་ནས་ཉིན་ཤས་རྗེས་ཁྲིན་ཏུའུ་ནས་སྤྲུལ་སྐུ་བློ་བཟང་བསྟན་འཛིན་ལགས་དང་། བྲག་མགོ་དགོན་པའི་སློབ་དགེ་དགེ་བཤེས་ཚེ་དབང་རྣམ་རྒྱལ་ལགས། ཚོང་པ་འཕྲིན་ལས། རྩིས་པ་དགྲ་ལྷ། དེའི་རྗེས་བྲག་མགོ་དགོན་པའི་ཕྱག་མཛོད་རྒན་པ་དགེ་བཤེས་བསྟན་འཛིན་དཔལ་བཟང་ངམ་བསྟན་དགའ་ལགས་བཅས་ཞི་རྒོལ་དང་འབྲེལ་བ་ཡོད་པའི་ཉེས་མིང་འོག་འཛིན་བཟུང་བྱས་ཏེ་ཟླ་བ་མང་པོར་གར་སོང་ཆ་མེད་དུ་གྱུར་རྗེས། ཁྱིམ་མི་དང་རང་དབང་ཁྲིམས་རྩོད་པ་སོགས་གང་མེད་པར་སྒོ་ཆེན་དགོན་པའི་སྤྲུལ་སྐུ་བློ་བཟང་བསྟན་འཛིན་ལ་ལོ་༧ དང་། ཕྱག་མཛོད་དགེ་བཤེས་བསྟན་འཛིན་དཔལ་བཟང་ངམ་(བསྟན་དགའ་)དང་། སློབ་དགེ་དགེ་བཤེས་ཚེ་དབང་རྣམ་རྒྱལ་དང་རྩིས་པ་དགྲ་ལྷ་གཉིས་ལ་ལོ་ ༦ རེ། དེ་བཞིན་དགོན་པའི་ཚོང་པ་འཕྲིན་ལས་ལ་ལོ་ ༥ བཅས་ཀྱི་ཁྲིམས་ཐག་བཅད་ཡོད་པ་རེད།
དགེ་བཤེས་བསྟན་འཛིན་དཔལ་བཟང་ངམ་བསྟན་དགའ་ལགས་ནི། ཕྱི་ལོ་ ༡༩༦༥ ལོར་བྲག་མགོ་ནོར་བ་རུ་ཕ་དོན་འགྲུབ་བཀྲ་ཤིས་དང་མ་བདེ་དབང་གཉིས་སུ་སྐྱེས་ཤིང་། ཆུང་དུས་ས་གནས་སློབ་ཆུང་འགྲིམས་ཏེ་རྒྱ་ཡིག་དང་བོད་ཀྱི་སྐད་ཡིག་ཐོག་ལ་སློབ་སྦྱོང་གནང་རྗེས། བྲག་མགོ་དགོན་པའི་ཆོས་སྒོར་ཞུགས། ཕྱི་ལོ་ ༡༩༨༦ ལོར་རྒྱ་གར་ནང་བཙན་བྱོལ་དུ་ཕེབས་ཏེ་འབྲས་སྤུངས་བློ་གསལ་གླིང་གྲྭ་ཚང་གི་ཆོས་སྒོར་ཞུགས་ཏེ། སྔ་ཕྱིར་གཞུང་ཆེན་ཁག་ལ་སློབ་གཉེར་གནང་ཞིང་ཕྱི་ལོ་ ༢༠༠༩ ལོར་དགེ་བཤེས་ཀྱི་མཚན་སྙན་བཞེས། ལོ་དེར་ཕྱིར་རང་ཡུལ་དུ་ཕེབས་ཏེ་བྲག་མགོ་དགོན་པའི་ཕྱི་ནང་གི་ལས་དོན་མང་པོ་ཞིག་ལ་འགན་བཞེས་ཡོད་པ་དང་། དགོན་པའི་ཕྱག་མཛོད་རྒན་པའི་ཐུགས་འགན་བཞེས་ཡོད་འདུག
གསར་འགོད་པ། བསྟན་འཛིན་ཕུར་བུ།
