རྒྱ་ནག་གིས་ཕྱི་ཕྱོགས་སུ་གནས་ཚུལ་མཁོ་སྤྲོད་བྱས་པའི་ཉེས་མིང་འོག་དཀར་མཛེས་ནས་བོད་མི་ཐུབ་བསམ་ཞུ་བ་ཞིག་ལ་ལོ་གཉིས་ཀྱི་བཙོན་འཇུག་ཁྲིམས་ཐག་བཅད་འདུག
རྒྱ་ནག་གཞུང་གིས་དབྱེ་བའི་ཟི་ཁྲོན་ཞིང་ཆེན་དཀར་མཛེས་ཁུལ་སེར་ཤུལ་རྫོང་འབུམ་སྙིང་སྡེ་བ་ནས་ཡིན་པའི་ལོ་ན་ ༢༨ ཙམ་ལ་སོན་པའི་བོད་མི་གཞོན་སྐྱེས་ཐུབ་བསམ་ཞུ་བ་ཞིག་གིས་ཕྱི་ཕྱོགས་རྒྱལ་ཁབ་ལ་གནས་ཚུལ་མཁོ་སྤྲོད་བྱས་པའི་ཉེས་མིང་འོག་ནས། ཕྱི་ཟླ་ ༡༡ ཚེས་ ༢༡ ཉིན་དཀར་མཛེས་རྫོང་འབྲིང་རིམ་མི་དམངས་ཁྲིམས་ཁང་ཟེར་བས། ཐུབ་བསམ་ལགས་ལ་དུས་ཡུན་ལོ་ངོ་གཉིས་ཀྱི་བཙོན་འཇུག་ཁྲིམས་ཐག་བཅད་ཡོད་པའི་གནས་ཚུལ་འབྲེལ་ཡོད་བོད་མི་ཞིག་གིས་མཁོ་སྤྲོད་གནང་བྱུང་།
དེ་ཡང་གནས་ཚུལ་མཁོ་སྤྲོད་པས། འདི་ལོའི་ཕྱི་ཟླ་ ༥ ཚེས་ ༣ ཉིན་ཐུབ་བསམ་ལགས་དཀར་མཛེས་ཀྱི་ཟ་ཁང་ཞིག་ནས་ཉེན་རྟོག་པས་འཛིན་བཟུང་བྱས་འདུག ཁོང་འཛིན་བཟུང་བྱེད་དགོས་དོན་ནི་ཁོང་གིས་འདི་ལོའི་ཕྱི་ཟླ་ ༥ པ་ནས་བཟུང་ཕྱི་ཕྱོགས་ཡོ་རོབ་དང་རྒྱ་གར་སོགས་ལ་འབྲེལ་བ་བྱས་ཏེ་སྐད་འཕྲིན་བརྒྱུད་ས་གནས་ཀྱི་གནས་ཚུལ་མང་པོ་ཞིག་ཕྱི་ཕྱོགས་ལ་མཁོ་སྤྲོད་བྱས་པའི་ཉེས་འཛུགས་བྱས་འདུག་ཅེས་འགྲེལ་བརྗོད་གནང་བྱུང་།
ཁོ་འཛིན་བཟུང་བྱས་ནས་ཟླ་བ་ལྔ་ལྷག་བཀག་སྐྱིལ་ཁང་ཞིག་ལ་བཅུག་ནས་འདྲི་ཞིབ་དང་རྡུང་རྡེག་མང་པོ་བཏང་ཡོད་པ་དང་། ཕྱི་ཟླ་ ༡༡ ཚེས་ ༢༡ ཉིན་དཀར་མཛེས་ཁུལ་འབྲིང་རིམ་མི་དམངས་ཁྲིམས་ཁང་ཟེར་བས་ཁོང་གི་སྤུན་མཆེད་དང་བཟའ་ཟླ་ཁྲིམས་ཁང་དུ་སྐད་བཏང་ནས་ཐུབ་བསམ་གྱིས་རྒྱལ་ཁབ་ཁ་བྲལ་དང་གསང་བ་ཕྱིར་བསྒྲགས་དང་རྒྱལ་ཁབ་ཀྱི་བདེ་འཇགས་ལ་གནོད་འཚེ་བཏང་བའི་ཉེས་མིང་འོག་དུས་ཡུན་ལོ་གཉིས་ཀྱི་བཙོན་འཇུག་ཁྲིམས་ཐག་བཅད་འདུག་ཅེས་འགྲེལ་བརྗོད་གནང་ཡོད་འདུག
ཐུབ་བསམ་ལགས་ནི་ལོ་ན་ ༢༨ ཙམ་ཡིན་པ་དང་ཟི་ཁྲོན་ཞིང་ཆེན་དཀའ་མཛེས་ཁུལ་སེར་ཤུལ་རྫོང་འབུམ་རྙིང་སྡེ་བ་ནས་ཡིན་ཞིང་། ནམ་རྒྱུན་བཟོ་རིགས་ལ་མཁས་པ་ཞིག་ཡིན་སྟབས། ཁོང་གིས་ལག་ཤེས་ལ་རྟེན་ནས་ནང་མིའི་འཚོ་བ་རོལ་གྱི་ཡོད་ཅིང་། ཁོང་གི་ཁྱིམ་དུ་ཕ་མ་གཉིས་དང་སྤུན་མཆེད་ ༡། བཟའ་ཟླ་དང་ལོ་ན་ལྔ་ཅན་ཀྱི་བུ་མོ་ཞིག་བཅས་ཡོད་པ་རེད་འདུག
