ཐོག་མའི་ཕུགས་འདུན་སྣང་མེད་དང་དད་སེམས་ཡལ་བ་སོགས་ཀྱི་ཉེས་མིང་འོག་ཆབ་མདོ་གྲོང་ཁྱེར་འཐབ་ཕྱོགས་གཅིག་གྱུར་ཁང་གི་འགན་འཛིན་ཚེ་རིང་འགྱུར་མེད་ལས་གནས་ནས་གནས་དབྱུང་བཏང་སྟེ་ཞིབ་བཤེར་བྱེད་ཀྱི་ཡོད་འདུག
གཞུང་ཕྱོགས་ནས་ཟླ་འདིའི་ཕྱི་ཚེས་ ༢༤ ཉིན་དེ་འབྲེལ་གནས་ཚུལ་སྤེལ་བའི་ནང་། ཚེ་རིང་འགྱུར་མེད་ཀྱིས་ཞིབ་བཤེར་བྱེད་པར་ངོ་རྒོལ་བྱས་ཡོད་ལུགས་དང་། ཏང་ལ་བཅངས་བའི་ཐོག་མའི་བསམ་འདུན་ཉམས་པ། མི་སྒེར་གྱི་འབྲེལ་ཡོད་དོན་དག་སྦ་གསང་བྱས་ནས་ཡར་ཞུ་མི་བྱེད་པ། ད་དུང་ལྐོག་རྔན་བླངས་བའི་དོགས་པའང་ཡོད་ལུགས་སོགས་བརྗོད་དེ། དམར་ཤོག་གི་ཆབ་སྲིད་ཀྱི་སྒྲིག་ཁྲིམས་དང་རྩ་འཛུགས་ཀྱི་སྒྲིག་ཁྲིམས། སྤྱོད་གཙང་གི་སྒྲིག་ཁྲིམས། ལས་ཀའི་སྒྲིག་ཁྲིམས་ཟེར་བ་བཅས་དང་ཚབས་ཆེན་འགལ་ཡོད་པས། དམར་ཤོག་ཚོགས་པའི་སྐྱིད་སྡུག་དང་། སྲིད་གཞུང་གི་ལས་གནས་ནས་ཕྱིར་འབུད་གཏོང་རྒྱུ་དང་། ད་བར་གྱི་ཐོབ་ཆ་དང་འབྲེལ་ཡོད་རྒྱུ་ནོར་རྣམས་གཞུང་བཞེས་བྱ། དོགས་ཡོད་གནད་དོན་རྣམས་ཞིབ་དཔྱོད་ཁང་ལ་ཞིབ་བཤེར་ཆེད་རྩིས་སྤྲད་དེ་ཁྲིམས་ལ་སྦྱོར་རྒྱུ་ཡིན་ལུགས་བསྒྲགས་འདུག
བོད་རང་སྐྱོང་ལྗོངས་ཟེར་བའི་སྲིད་གཞུང་གི་མགོ་འཁྲིད་གཞོན་པ་ཀྲང་ཡོང་ཙི་དང་། དྲིལ་བསྒྲགས་ལྷན་ཁང་གི་རྒྱུན་ལྷན་ཚོགས་གཙོ་གཞོན་པ་ཝང་ནིན་ཧྲིན། བོད་རང་སྐྱོང་ཟེར་བའི་ཉེན་རྟོག་ཁང་གི་རྒྱུན་ལྷན་ཚོགས་གཙོ་གཞོན་པ་ཟུར་པ་ཡང་ཀང་མིན། དེ་བཞིན་བོད་ཀྱི་མཚོ་ཤར་དང་མཚོ་ནུབ་ཁུལ། སྐྱེ་རྒུ་མདོ་ཁུལ་སོགས་སུ་ལོ་ངོ་ ༣༣ ལྷག་ཙམ་རིང་མགོ་ཁྲིད་བྱས་མྱོང་བའི་རྒྱ་དཔོན་ཝུན་གོ་ཏུང་ཟེར་བ་སོགས། འདི་ལོ་གཅིག་པུར་བོད་ཁུལ་གྱི་དཔོན་རིགས་ཉུང་མཐར་ ༨ ཡས་མས་ལ་དབུས་གཞུང་གི་གཏན་འབེབ་དོན་ཚན་བརྒྱད་དང་འགལ་བ་དང་། དམར་ཤོག་ལ་བློ་མི་དཀར་བ། དད་སེམས་ཉམས་པ། ཕུགས་འདུན་བརླགས་པ། ལྐོག་རྔན་བླངས་བ། ལྐོག་ཟ་རུལ་སུངས་བྱས་པ་སོགས་ཀྱི་ཉེས་མིང་འོག་གནས་དབྱུས་བཏང་བ་དང་ཉེས་ཆད་ཕོག་ཡོད་འདུག
གསར་འགོད་པ། དཔལ་ལྡན།
