ཨེ་མཱ་རྫོན་གྱིས་ལས་མི་ ༡༨༠༠༠ ཡི་ལས་མཚམས་གཞག་རྒྱུ་ཡིན་འདུག

ཨེ་མཱ་རྫོན་གྱིས་དཔལ་འབྱོར་ཡོང་འབབ་དང་ཚོང་ལམ་སོགས་ངེས་གཏན་མེད་པའི་གནས་སྟངས་འོག་ལས་མི་ ༡༨༠༠༠ ཡི་ལས་མཚམས་གཞག་རྒྱུ་ཡིན་འདུག

རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། རྒྱལ་སྤྱིའི་དྲ་ལམ་ཁེ་གཉེར་ཁང་ཆེ་ཤོས་གྲས་ཡིན་པའི་ཨེ་མཱ་རྫོན་(Amazon)གྱིས། ད་ལྟའི་ཆར་དཔལ་འབྱོར་གྱི་གནས་བབ་དང་ཚོང་འབྲེལ་གནས་སྟངས་ངེས་གཏན་མེད་པ་དང་། འདས་པའི་ཏོག་དབྱིབས་གཉན་རིམས་སྐབས་ཀྱི་ལོ་གཉིས་ཀྱི་རིང་ལས་མི་མང་པོ་གསར་བསྡུ་བྱས་པ་སོགས་ལ་བརྟེན་ནས། ད་ལྟ་ཨེ་མཱ་རྫོན་གྱིས་ད་ཡོད་ལས་བྱེད་ཁྲོད་ཀྱི་ལས་མི་ཁྱོན་ ༡༨༠༠༠ ཡི་ལས་མཚམས་གཞག་རྒྱུ་ཡིན་པའི་གསལ་བསྒྲགས་བྱས་ཡོད་པ་རེད།

ཨེ་མཱ་རྫོན་གྱི་སྤྱི་གཉེར་བ་ཨན་ཌེ་ཇའེ་སིས་ (Andy Jassy) ཀྱིས། ང་ཚོས་ལས་མི་ཁྱོན་ ༡༨༠༠༠ ལྷག་གི་ལས་མཆམས་འཇོག་གི་ཡིན། ལས་མཚམས་འཇོག་ཡུལ་གྱི་སྡེ་ཚན་ནི། ཨ་མཱ་རྫོན་གྱི་ནང་གསེས་ཅ་དངོས་ཚོང་མཁན་དང་དེ་འབྲེལ་གྱི་ལས་མི་དག་ཡིན། ཞེས་དང་། ང་ཚོས་ལས་མི་རྣམས་ལས་མཚམས་འཇོག་དགོས་པའི་ཐག་གཅོད་ལེན་པར་དཀའ་ཁག་བྱུང་བ་མ་ཟད། ལས་མི་རྣམས་ལ་དཀའ་ངལ་ཡོད་ཡོད་པ་རེད་ལ། ང་ཚོས་ཐག་གཅོད་འདི་བསམ་བློ་མ་བཏང་བར་བླངས་པ་ཞིག་མིན། ཞེས་བརྗོད་ཡོད་པ་དང་། འདས་ལོའི་ཕྱི་ཟླ་ ༡༡ ནང་ཨེ་མཱ་རྫོན་གྱིས་ལས་མི་ཁྲི་གཅིག་གི་ལས་མཚམས་འཇོག་རྩིས་བྱས་ཡོད་ཀྱང་། ད་སྔ་བར་ལས་མཚམས་འཇོག་དགོས་པའི་ལས་མིའི་གྲངས་འབོར་སོགས་ཡོངས་གྲགས་ཐོག་ནས་ཕྱིར་བསྒྲགས་མེད་པ་རེད།

རོའུ་ཊར་གསར་ཁང་གི་གནས་ཚུལ་ལྟར་ན། ལས་མཚམས་འཇོག་མཁན་གྱི་ཁྲོད་དུ་ཡུ་རོབ་ཀྱི་ཨེ་མཱ་རྫོན་གྱི་ལས་མི་ཁག་ཅིག་ཡོད་པ་དང་། ཟླ་འདིའི་ཕྱི་ཚེས་ ༡༨ ཉིན་ནས་ལས་མཚམས་དངོས་སུ་མཚམས་འཇོག་དགོས་པའི་སྲིད་ཇུས་ལག་བསྟར་བྱ་རྒྱུ་ཡིན་པ་རེད་ལ། ཨེ་མཱ་རྫོན་ངོས་ནས་ལས་མཚམས་འཇོག་མཁན་གྱི་ལས་མི་རྣམས་ལ་འཕྲོད་བསྟེན་གྱི་ཁེ་ཕན་དང་ལས་མཚམས་བཞག་པར་དམིགས་བསལ་གླ་ཆ་ཞིག་དང་། ཕྱི་ནས་ལས་ཀ་འཚོལ་བར་རྒྱབ་སྐྱོར་བྱ་རྒྱུ་ཡིན་སྐོར་སོགས་བརྗོད་ཡོད་པ་རེད།

ཏོག་དབྱིབས་གཉན་རིམས་ཀྱི་སྐབས་སུ་ཨེ་མཱ་རྫོན་གྱི་དྲ་ཐོག་ཅ་དངོས་མངག་ཉོ་བྱེད་མཁན་ཧ་ཅང་མང་བས། ཕྱི་ལོ་ ༢༠༢༠ ནས་ ༢༠༢༢ ལོ་མགོའི་བར་ཨ་མཱ་རྫོན་གྱིས་རྒྱལ་སྤྱིའི་ལས་བྱེད་ཀྱི་གྲངས་འབོར་ཇེ་མང་དུ་བཏང་ཡོད་པ་རེད། འོན་ཀྱང་། ད་ལྟ་ཁེ་གཉེར་ཁང་དེའི་དཔལ་འབྱོར་གྱི་གནས་བབ་དང་ཚོང་འབྲེལ་སོགས་ངེས་གཏན་མེད་པར་བརྟེན། ལས་མི་མང་པོ་ཞིག་ལས་མཚམས་འཇོག་བཅུག་གི་ཡོད་པ་ཡིན་འདུག་ལ། ད་ལྟ་ཨེ་མཱ་རྫོན་ལ་འཛམ་གླིང་ཁྱོན་ཡོངས་སུ་ལས་མི་ས་ཡ་ ༡།༥༤ ཡོད་པ་དང་། དེའི་ནང་གུང་གསེང་སྐབས་དང་དུས་ཚིགས་དབྱེ་བགོ་བྱས་པའི་ལས་མི་དག་ཚུད་ཀྱི་མེད་པ་རེད།

རྒྱལ་སྤྱིའི་ཁེ་གཉེར་ཁང་ཁག་གི་དཔལ་འབྱོར་གནས་བབ་དབྱེ་ཞིབ་བྱེད་པའི་(statista.com) དྲ་རྒྱའི་སྟེང་གི་གནས་ཚུལ་ལྟར་ན། ཕྱི་ལོ་ ༢༠༢༢ ལོར་ཨེ་མཱ་རྫོན་ནི་དཔལ་འབྱོར་ཡོང་འབབ་ཆེས་ཆེ་བའི་འཛམ་གླིང་གི་ཁེ་ལས་ཁང་ཨང་གསུམ་པ་དེ་ཡིན་པ་དང་། ཨང་དང་པོ་ཨ་རིའི་ (Walmart) ཁེ་ལས་ཁང་དང་ཨང་གཉིས་པ་ (Saudi Aramco) ཁེ་ལས་ཁང་བཅས་ཡིན་པ་རེད།

ཡང་ཨེ་མཱ་རྫོན་ནང་བཞིན། འདས་ལོའི་ཕྱི་ཟླ་ ༡༡ ནང་འཛམ་གླིང་གི་སྤྱི་ཚོགས་བརྒྱུད་ལམ་ཆེ་ཤོས་ངོ་དེབ་ཀྱིས། ལས་མི་ ༡༡༠༠༠ ཡི་ལས་མཚམས་བཞག་པའི་གསལ་བསྒྲགས་སྤེལ་བ་དང་། སི་ནེ་པུ་ཆ་ཊི་(Snapchat) འབྲེལ་མཐུད་བརྒྱུད་ལམ་ཁང་གིས། ལས་བྱེད་བརྒྱ་ཆ་ ༢༠ ལས་མཚམས་འཇོག་བཅུག་ཡོད་ལ། དེ་བཞིན། འདས་ལོའི་ཕྱི་ཟླ་ ༡༠ ནང་འཛམ་གླིང་གི་ཕྱུག་བདག་ཆེན་མོ་ཨེ་ལཱོན་མཱོ་སིག་ (Elon Musk) གིས་ཊུ་ཝེ་ཊར་དྲ་ཚིགས་ཉོས་པ་དང་དྲ་ཚིགས་དེའི་ལས་བྱེད་ ༧༥༠༠ ལྷག་གི་ལས་མཚམས་བཞག་ཡོད་པ་རེད།