བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་སྐུ་ཞབས་ཁེ་ཝིན་མེག་ཁཱར་ཐི་ (Kevin McCarthy) མཆོག་ཨ་རིའི་གྲོས་ཚོགས་འོག་མའི་ཚོགས་གཙོར་འདེམས་ཐོན་བྱུང་བར་འཚམས་འདྲི་གནང་བ་དང་སྦྲགས་མུ་མཐུད་བོད་དོན་ཐོག་རྒྱབ་སྐྱོར་གནང་བའི་འབོད་སྐུལ་ཞུས་འདུག
ཟླ་འདིའི་ཕྱི་ཚེས ༧ ཉིན་ཨ་རིའི་གྲོས་ཚོགས་འོག་མའི་སྤྱི་མཐུན་ཚོགས་པའི་འཐུས་མི་སྐུ་ཞབས་ཁེ་ཝིན་མེག་ཁཱར་ཐི་ (Kevin McCarthy) མཆོག་གྲོས་ཚོགས་འོག་མའི་ཚོགས་གཙོར་འདེམས་ཐོན་བྱུང་ཡོད་པ་ལྟར། ཟླ་འདིའི་ཕྱི་ཚེས ༩ ཉིན་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚ་ེརིང་མཆོག་གིས་སྐུ་ཞབས་ཁེ་ཝིན་མེག་ཁཱར་ཐི་མཆོག་ལ་འཚམས་འདྲི་གནང་བའི་ནང་། ཁྱེད་རང་ཨ་རིའི་གྲོས་ཚོགས་འོག་མའི་ཚོགས་གཙོ་སྐབས་ ༥༥ པར་འདེམས་ཐོན་བྱུང་བར། ངས་བོད་མིའི་སྒྲིག་འཛུགས་དང་བོད་མི་ཡོངས་ཀྱི་ཚབ་བྱས་ཏེ་ཁྱེད་ལ་འཚམས་འདྲི་ཞུ་ཡི་ཡོད། ཅེས་གསུངས་འདུག
ཡང་སྲིད་སྐྱོང་མཆོག་གིས་ཨ་རིའི་གྲོས་ཚོགས་སྤྱི་དང་ཡང་སྒོས་ལས་ཁྱུར་ཚོགས་གཙོ་ལྕམ་སྐུ་ནན་སི་པི་ལོ་སི་མཆོག་གི་དབུ་ཁྲིད་འོག་སྲིད་དོན་ཚོགས་པ་ཟུང་འབྲེལ་གྱི་གྲོས་ཚོགས་གོང་འོག་གཉིས་ཀྱིས། ལོ་ངོ་བཅུ་ཕྲག་དུ་མའི་རིང་བོད་དོན་ལ་རྒྱབ་སྐྱོར་གནང་བར་བཀའ་དྲིན་ཆེན་པོ་ཡིན་པ་མ་ཟད། བོད་ནང་གི་གནས་སྟངས་ཛ་དྲག་ཇེ་ཆེར་འགྲོ་མུས་ཡིན་པས། ཨ་རིའི་གྲོས་ཚོགས་ཀྱིས་བོད་མིའི་མངོན་འདོད་སྒྲུབ་ཆེད་རྒྱབ་སྐྱོར་ཤུགས་ཆེ་གནང་བ་དེས། བོད་མི་རྣམས་ལ་རེ་བ་དང་སེམས་ཤུགས་ཆེན་པོ་སྦྱིན་ཡོད་ཅིང་། ཁོང་གི་ཡང་དག་པའི་མགོ་ཁྲིད་འོག བོད་དོན་ལ་དོ་སྣང་དང་རྒྱབ་སྐྱོར་མུ་མཐུད་གནང་ཐུབ་པའི་རེ་བ་འཆང་མུས་ཡིན་སྐོར་སོགས་གསུངས་འདུག
གྲོས་ཚོགས་འོག་མའི་ཚོགས་གཙོ་སྐུ་ཞབས་ཁེ་ཝིན་མེག་ཁཱར་ཐི་ (Kevin McCarthy) མཆོག་ནི་ཕྱི་ལོ་ ༡༩༦༥ ལོར་ཨ་རིའི་མངའ་སྡེ་ཁ་ལི་ཧྥོ་ནེ་ཡའི་ (Bakersfield) གྲོང་ཁྱེར་ནང་སྐྱེས་ཤིང་། ཕྱི་ལོ་ ༡༩༨༩ ལོར་ཚོང་ལས་ཐོག་ཉེ་བའི་གཙུག་ལག་རབ་འབྱམས་པ་ཐོན་པ་དང་ཕྱི་ལོ་ ༡༩༩༤ ལོར་ཁ་ལི་ཧྥོ་ནེ་ཡ་མངའ་སྡེ་གཙུག་ལག་སློབ་ཆེན་ནས་དཔལ་འབྱོར་རིག་པའི་ཐོག་གཙུག་ལག་རབ་འབྱམས་པ་ཐོན། ཕྱི་ལོ་ ༡༩༩༠ ནང་ཐོག་མར་མངའ་སྡེ་ཁ་ལི་ཧྥོ་ནེ་ཡའི་སྤྱི་མཐུན་ཚོགས་པའི་འོས་མིར་ལངས་པ་དང་། ཕྱི་ལོ་ ༢༠༠༦ ལོར་ཨ་རིའི་གྲོས་ཚོགས་འོག་མའི་ནང་གི་སྤྱི་མཐུན་ཚོགས་པའི་འཐུས་མིར་གྱུར་བ་ནས་ད་བར་གྲོས་ཚོགས་འོག་མའི་ནང་ཕྱག་ལས་གནང་མུས་ཡིན་ཁར། ཟླ་འདིའི་ཕྱི་ཚེས་ ༧ ཉིན་གྲོས་ཚོགས་འོག་མའི་ཚོགས་གཙོར་བདམས་ཡོད་འདུག ཁོང་དང་བཟའ་ཟླ་ (Judy Wages) གཉིས་ལ་བུ་གཅིག་དང་བུ་མོ་གཅིག་ཡོད་འདུག
གསར་འགོད་པ། དཔལ་ལྡན།
