ད་ལྟ་སེམས་དང་སེམས་ཞེས་པའི་ཕྱག་དེབ་དེ་ཨེ་མཱ་རྫོན་(Amazon)གཙོ་བོར་གྱུར་བའི་རྒྱལ་སྤྱིའི་དཔེ་དེབ་ཚོང་ཁང་བདུན་གྱིས་ཚོང་འགྲེམས་བྱེད་ཀྱིན་འདུག
ཁ་སང་ཕྱི་ཚེས ༢༤ ཉིན་གྱི་དགོང་མོར་ཨ་རིར་རྟེན་གཞི་བྱས་པའི་ཧར་པར་ཁོ་ལིན་དཔེ་སྐྲུན་ཁང་(HarperCollins Publishers) གིས་༧གོང་ས་རྒྱལ་བ་རིན་པོ་ཆེ་མཆོག་དང་འགུལ་རིས་རི་མོ་བ་གྲགས་ཅན་པ་ཊིག་(Patrick McDonnell) གཉིས་ཀྱིས་བརྩམས་པའི་སེམས་དང་སེམས་(Heart To Heart ) ཞེས་པའི་ཕྱག་དེབ་དེ་དྲ་ལམ་ནས་ཚོང་འགྲེམས་བྱེད་མགོ་བཙུགས་སོང་།
དེའི་ཐད་༧གོང་ས་རྒྱལ་བ་རིན་པོ་ཆེ་མཆོག་གི་ངོ་དེབ་སྟེང་། ངོས་རང་གིས་དཔེ་དེབ་འདིས་ང་ཚོའི་ཁོར་ཡུག་ཏུ་བྱམས་བརྩེ་དང་གཞན་ཕན་གྱི་གལ་ཆེའི་རང་བཞིན་ཐོག་མི་མང་གི་སེམས་ཁམས་དང་མིག་ཟུང་ཕྱེ་ཐུབ་པའི་རེ་བ་ཡོད། ཅེས་གསུངས་འདུག་པ་དང་། ཡང་དེ་རིང་ང་ཚོས་༧གོང་ས་རྒྱལ་བ་རིན་པོ་ཆེ་མཆོག་དང་འགུལ་རིས་གྲགས་ཅན་པ་ཊིག་མེག་ཌོན་ནིལ་གཉིས་ཀྱི་བརྩམས་ཆོས་འདི་ལེགས་འགྲུབ་བྱུང་བར་རྟེན་འབྲེལ་ཞུ་ཡི་ཡོད། དཔེ་དེབ་འདིས་ཁྱེད་ལ་བློ་སྤོབས་སྩལ་ནས་ལག་ལེན་དངོས་ལ་གཞོལ་ཐུབ་པའི་རེ་བ་ཞུ། ཞེས་བརྗོད་ཡོད་འདུག
ད་ལྟ་རང་ལོ ༦༦ ཡིན་པའི་འགུལ་རིས་རི་མོ་བ་གྲགས་ཅན་སྐུ་ཞབས་པ་ཊིག་མེག་ཌོན་ནིལ་ (Patrick McDonnell) ལགས་ནི་ཨ་རིའི་ནེའུ་ཇར་སི་ (New Jersey )མངའ་སྡེའི་ཨེ་ལི་ཛེ་བྷེ་ཐི་(Elizabeth) གྲོང་ཁྱེར་ནང་འཚར་ལོངས་བྱུང་ཡོད་ཅིང་། ཁོང་གིས་གཞི་རིམ་གྱི་སློབ་གྲྭ་ཁག་མཐར་ཕྱིན་རྗེས། ཕྱི་ལོ་ ༡༩༧༨ ལོར་ཁོང་ཨ་རིའི་རྟོག་འཆར་རིག་པའི་སློབ་གྲྭ་(School of Visual Arts )ནས་སློབ་མཐར་ཕྱིན། ཁོང་ནི་ཨ་རིར་སྐད་གྲགས་ཡོད་པའི་འགུལ་རིས་རི་མོ་བ་དང་འཁྲབ་གཞུང་རྩོམ་པ་པོ། དེ་བཞིན་བྱིས་པའི་དཔེ་རིས་འབྲི་མཁན་གྲགས་ཅན་ཞིག་ཡིན་འདུག་ལ། ཁོང་ལ་ཨ་རིའི་དགོད་བྲོའི་འཁྲབ་གཞུང་(Comic Strip) གི་བྱ་དགའ་ཐེངས་བརྒྱད་དང་། ཨ་རིའི་རྒྱལ་ཡོངས་ཀྱི་འགུལ་རིས་བའི་སྤྱི་ཚོགས་ཀྱི་བྱ་དགའ་(National Cartoonists Society )བཞི་གཙོས། སྔ་རྗེས་སུ་བྱ་དགའ་གྲགས་ཅན་མི་འདྲ་བ་ ༡༠ ལྷག་ཐོབ་ཡོད་འདུག
གསར་འགོད་པ། དཔལ་ལྡན།
