བོད་དོན་ལ་རྒྱབ་སྐྱོར་ཤུགས་ཆེན་གནང་མཁན་ཨ་རིའི་གྲོས་ཚོགས་འོག་མའི་འཐུས་མི་སྐུ་ཞབས་ཇེམ་མེག་གྷོ་ཝན་(Jim McGovern)མཆོག་ལ་ནེའུ་ཡོག་དང་ནེའུ་ཇེར་སི་བོད་རིགས་མང་ཚོགས་ཀྱིས་ཆེས་མཐོའི་སྣེ་ལེན་གྱི་མཛད་སྒོ་འཚོགས་ཡོད་འདུག
ལྷོ་བྱང་ཨ་རིའི་བོད་མི་མང་སྤྱི་འཐུས་རྣམ་གཉིས་དང་ས་གནས་བོད་རིགས་ཚོགས་པའི་གོ་སྒྲིག་འོག ཨ་རིའི་ཕྱི་ཚེས ༢༩ ཉིན་གྱི་ཞོགས་པའི་ཆུ་ཚོད་ ༡༠ པའི་སྟེང་། ནེའུ་ཡོག་དང་ནིའུ་ཇེར་སི་བོད་རིགས་སྤྱི་མཐུན་ཚོགས་པའི་ཚོགས་ཁང་དུ། ཨ་རིའི་གྲོས་ཚོགས་འཐུས་མི་སྐུ་ཞབས་ཇེམ་མེག་གྷོ་ཝན་(Jim McGovern)མཆོག་ལ་ཆེས་མཐོའི་སྣེ་ལེན་གྱི་མཛད་སྒོ་འཚོགས་ཡོད་པ་དང་། མཛད་སྒོའི་ཐོག་ཏུ་སྐུ་མགྲོན་གཙོ་བོ་སྐུ་ཞབས་ཇེམ་མེག་གྷོ་ཝན་མཆོག་གི་དབུས་བྱང་ཨ་རིའི་སྐུ་ཚབ་དོན་གཅོད་རྣམ་རྒྱལ་མཆོག་གྲུབ་ལགས་དང་། བོད་མི་མང་སྤྱི་འཐུས་དོན་གྲུབ་ཚེ་རིང་ལགས་དང་བསྟན་འཛིན་འཇིགས་མེད་ལགས། རྒྱལ་སྤྱིའི་བོད་དོན་རྒྱབ་སྐྱོར་ཚོགས་པའི་འགན་འཛིན་གཞོན་པ་བསྟན་ཆོས་རྒྱ་མཚོ་ལགས། ནེའུ་ཡོག་དང་ནིའུ་ཇེར་སི་བོད་རིགས་སྤྱི་མཐུན་ཚོགས་པའི་ཚོགས་གཙོ་ནོར་བུ་ཚེ་རིང་ལགས་བཅས་ས་གནས་ཚོགས་པ་ཁག་གི་སྐུ་ཚབ་དང་མི་མང་བཅས་འཛོམས་ཡོད་འདུག
མཛད་སྒོའི་ཐོག་བྱང་ཨ་མེ་རི་ཁའི་སྐུ་ཚབ་དོན་གཅོད་རྣམ་རྒྱལ་མཆོག་སྒྲུབ་ལགས་ཀྱིས། ༧གོང་ས་རྒྱལ་བ་རིན་པོ་ཆེ་མཆོག་དང་བོད་མིའི་སྒྲིག་འཛུགས་ཀྱི་འཐུས་མི་ཞིག་གི་ངོས་ནས་ཁྱེད་ལ་འཚམས་འདྲི་ཞུ་ཡི་ཡོད། ཁྱེད་ཀྱིས་འགྲོ་བ་མིའི་རིགས་ཀྱི་ཆེད་དུ་རླབས་ཆེན་གྱི་བྱ་བཞག་གནང་བཞིན་པར་ཡི་རངས་ཞུ། ཁྱེད་ནི་མང་ཚོགས་ཀྱིས་ཆེས་བཀུར་འོས་པའི་འཐུས་མི་ངོ་མ་ཞིག་དང་། རང་དབང་། དམངས་གཙོ། འགྲོ་བ་མིའི་རིགས་ཀྱི་རིན་ཐང་དོན་དུ་གཉེར་བའི་རླབས་ཆེན་གྱི་མི་སྣ་ཞིག་ཡིན་པ་རེད། ཁྱེད་ཀྱི་ཆབ་སྲིད་ལམ་སྟོན་བཟང་པོའི་འོག་ནས་བོད་དང་བོད་མིའི་རང་དབང་འཐབ་རྩོད་སོགས་ཀྱི་ཐད་ལ་རོགས་འདེགས་རླབས་ཆེན་གནང་ཡོད། ད་ལྟ་རྒྱ་ནག་གཞུང་གིས་བོད་ནང་དུ་བཙན་གནོན་བྱེད་མུས་ཡིན་པ་མ་ཟད། རྒྱ་ནག་གཞུང་གིས་བོད་མི་རྣམས་ཀྱིས་༧གོང་ས་རྒྱལ་བ་རིན་པོ་ཆེ་མཆོག་གི་སྐུ་པར་སྒྲིག་གཤོམ་བྱེད་པར་བཀག་སྡོམ་བྱེད་ཐུབ་ཡོད་སྲིད་ཀྱང་། རྒྱ་ནག་གཞུང་གིས་ནམ་ཡང་བོད་མིའི་ནང་སེམས་ཀྱི་༧གོང་ས་རྒྱལ་བ་རིན་པོ་ཆེ་མཆོག་ནག་གསུབ་གཏོང་མི་ཐུབ། གང་ཡིན་ཟེར་ན། ༧གོང་ས་རྒྱལ་བ་རིན་པོ་ཆེ་མཆོག་ནི་བོད་མི་རིགས་ཀྱི་བླ་སྲོག་ཡིན་པས་རེད། ད་ལྟ་༧གོང་ས་རྒྱལ་བ་རིན་པོ་ཆེ་མཆོག་གི་ཐུགས་བརྩེའི་འོག་ནས་བོད་མི་རྣམས་ཀྱིས་འཛམ་གླིང་གི་ཡུལ་གྲུ་གང་སར་རང་དབང་ངང་འཚོ་བ་རོལ་མུས་ཡིན་པའི་སྐོར་སོགས་གསུངས་སོང་།
རྒྱལ་སྤྱིའི་བོད་དོན་ལས་འགུལ་ཁང་གི་བར་བརྒལ་ཚོགས་གཙོ་བསྟན་ཆོས་རྒྱ་མཚོ་ལགས་ཀྱིས། ཕྱི་ལོ་ ༡༩༨༨ ནས་བཟུང་བོད་དོན་སླད་ཕྱག་ལས་གནང་མཁན་གྱི་ཚོགས་པ་དང་། འཛམ་གླིང་ཁྱོན་ཡོངས་ནས་ཚོགས་མི་འབུམ་ ༡ ལྷག་གིས་བོད་དོན་ཐོག་ཕྱག་ལས་གནང་ཡོད་པ་རེད། ངས་རྒྱལ་སྤྱིའི་བོད་དོན་ལས་འགུལ་ཁང་གི་ཚབ་ཞུས་ནས་ཨ་རིའི་གྲོས་ཚོགས་འོག་མའི་འཐུས་མི་སྐུ་ཞབས་ཇེམ་མེག་གྷོ་ཝན་ (Jim McGovern) མཆོག་གིས་བོད་དོན་བདེན་མཐའ་གསལ་བའི་ཆེད་དུ་ཕྱག་ལས་ཧུར་ཐག་གནང་བར་ཡི་རངས་དང་བཀའ་དྲིན་དྲན་གྱི་ཡོད། ཅེས་དང་། གྲོས་ཚོགས་འཐུས་མི་སྐུ་ཞབས་ཇེམ་མེག་གྷོ་ཝན་ལགས་ཀྱིས་བོད་དོན་སླད་གྲོས་ཚོགས་ནང་གྲོས་གཞི་མང་པོ་བཏོན་ཡོད་པ་དང་། ད་བར་དུ་ཁོང་གིས་དབུ་མའི་ལམ་གྱི་སྲིད་ཇུས་ལ་རྒྱབ་སྐྱོར་དང་། བོད་ནང་ཡོད་པའི་ཆབ་སྲིད་བཙོན་པའི་གནད་དོན་སོགས་ཀྱི་ཐོག་ལ་གླེང་སློང་གནང་བ་དང་། བོད་དོན་རྒྱབ་སྐྱོར་གནངས་དང་གནང་མུས་ཡིན་སྐོར་སོགས་གསུངས་སོང་།
ཨ་རིའི་གྲོས་ཚོགས་འཐུས་མི་ཇེམ་མེག་གྷོ་ཝན་ (James McGovern) མཆོག་གིས། འདས་ལོའི་ཕྱི་ཟླ་ ༤ ནང་ང་ཚོས་བོད་དང་ཡུ་གུར། སོག་པོ་སོགས་གྲངས་ཉུང་མི་རིགས་ཀྱི་སྐད་ཡིག་འཇིགས་ཉེན་ཆེ་བའི་སྐོར་གྱི་ཉན་ཞིབ་འཚོགས་ཡོད་པ་དང་། སྐབས་དེར་དཔང་མི་གཅིག་བཀྲས་མཐོང་ལྷ་སྒྲོན་ལགས་ཡིན། མོས་བོད་དོན་ལས་འགུལ་བསྟི་གནས་ཁང་གི་ཚབ་བྱས་ཏེ། རྒྱ་ནག་གཞུང་གིས་བོད་ནང་བཅའ་སྡོད་སློབ་གསོའི་ལམ་ལུགས་ལག་བསྟར་བྱེད་བཞིན་པའི་སྐོར་གླེང་སློང་བྱས་ཡོད། རྒྱ་ནག་གིས་བོད་ཀྱི་ཕ་མ་རྣམས་ལ་བཙན་སྐུལ་བྱས་ཏེ། བོད་ཕྲུག་རྣམས་སློབ་གྲྭར་བསྐྱལ་འཇུག་གི་ཡོད། དེ་ནི་ཧ་ཅང་ཉེན་ཚབས་ཆེ་བའི་གནད་དོན་ཞིག་ཡིན་པས། གྲོས་ཚོགས་འཐུས་མི་ (Jeff Merkley) ངེད་གཉིས་ནས་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ཚོགས་གཙོར་འབོད་སྐུལ་ཞུས་ཏེ། བོད་ནང་གི་བཅའ་སྡོད་སློབ་གྲྭའི་གནས་སྟངས་སྐོར་ལ་ཞིབ་འཇུག་བྱེད་དགོས་པ་དང་། ངས་རེ་བར་དེ་འབྲེལ་གྱི་ལས་དོན་ཁག་མུ་མཐུད་རྗེས་འདེད་རྒྱུན་སྐྱོང་ཡོང་གི་རེད་བསམ་གྱི་འདུག ཉེ་ཆར་ང་ཚོས་ (Thermo Fisher Scientific) འཕྲུལ་རིག་ཚན་རྩལ་བཟོ་ཚོང་ཁང་ལ་ཡི་གེ་བསྐུར་ཏེ། ཁོ་ཚོས་རྒྱ་ནག་གཞུང་ལ་རྒྱུ་རྫས་བརྟག་དཔྱད་གཏོང་བྱེད་ཀྱི་ཡོ་ཆས་བཙོང་སྟེ། བོད་ནང་གི་བོད་མིའི་རྒྱུ་རྫས་སམ་རིགས་རྫས་བསྡུ་ལེན་བྱེད་མཚམས་འཇོག་དགོས་པའི་འབོད་སྐུལ་ཞུས་ཡོད། ཅེས་དང་། ཕྱི་ལོ་ ༢༠༡༨ ལོར་སྐུ་ཞབས་ཁོང་གིས་ཨ་རིའི་གྲོས་ཚོགས་ནང་བོད་ནང་འགྲོ་འོང་འདྲ་མཉམ་གྱི་ཁྲིམས་འཆར་བཏོན་ཏེ། ལོ་དེའི་མཇུག་ཏུ་དངོས་སུ་ཁྲིམས་ལ་བསྒྱུར་ཐུབ་ཡོད་པ་དང་། ཡང་ལོ་དེའི་མཇུག་ཏུ་སྐུ་ཞབས་ཁོང་གིས་བཏོན་གནང་བའི་བོད་དོན་སྲིད་ཇུས་དང་རྒྱབ་སྐྱོར་ཁྲིམས་ཡིག་ལ་ཨ་རིའི་གྲོས་ཚོགས་ཀྱིས་རྒྱབ་སྐྱོར་ཐོབ་སྟེ། དངོས་སུ་ཨ་རིའི་གཞུང་འབྲེལ་ཁྲིམས་ཡིག་ཏུ་བསྒྱུར་ཐུབ་ཡོད་ཅིང་། ཁྲིམས་ཡིག་དེའི་ནང་༧གོང་ས་རྒྱལ་བ་རིན་པོ་ཆེ་མཆོག་གི་༧སྐུའི་ཡང་སྲིད་ཀྱི་གཙོས་པའི་བོད་མིའི་རང་དབང་དང་བོད་ཀྱི་ཁོར་ཡུག་སྲུང་སྐྱོབ། དེ་བཞིན་༧སྐུའི་ཡང་སྲིད་འདེམས་ཕྱོགས་ཐོག་ཇུས་གཏོགས་བྱེད་མཁན་གྱི་རྒྱ་ནག་དམར་ཤོག་ཚོགས་པའི་མགོ་ཁྲིད་ཁག་ཉེས་ཆད་གཅོད་རྒྱུ་ཡིན་པ་སོགས་འཁོད་ཡོད་སྐོར་གསུངས་འདུག
གསར་འགོད་པ། བྱམས་པ་ཚེ་རིང་།
