རྒྱ་ནག་གིས་བོད་ནང་དྲག་གནོན་བྱ་རྒྱུ་མཚམས་འཇོག་སླད་འཕྲལ་དུ་བོད་རྒྱ་གྲོས་མོལ་གནང་དགོས་སྐོར་བརྗོད་འདུག
ཨ་རིའི་ཕྱི་སྲིད་ལས་ཁུངས་ཀྱིས་ཕྱི་ལོ་ ༢༠༢༢ ལོའི་འཛམ་གླིང་གི་རྒྱལ་ཁབ་དང་ས་ཁུལ་ ༢༠༠ ལྷག་གི་འགྲོ་བ་མིའི་ཐོབ་ཐང་གི་གནས་སྟངས་དང་འབྲེལ་བའི་སྙན་ཐོ་བཏོན་པའི་ནང་། རྒྱ་ནག་གཞུང་གིས་བོད་ནང་གི་འགྲོ་བ་མིའི་ཐོབ་ཐང་ལ་རྡོག་རོལ་ཚབས་ཆེན་བཏང་བའི་སྐོར་གསལ་འདོན་བྱས་ཡོད་འདུག
དེ་རིང་དེ་འབྲེལ་ཐད་རྒྱལ་སྤྱིའི་བོད་དོན་ལས་འགུལ་ཁང་གིས། རྒྱ་ནག་གཞུང་གིས་བོད་ནང་གི་བོད་མི་རྣམས་ལ་འཇིགས་སུ་རུང་བའི་དྲག་གནོན་དང་ཐུབ་ཚོད་གཏོང་མུས་ཡིན་པ་དང་། ད་ལྟ་འཕྲལ་དུ་བོད་རྒྱ་དཀའ་རྙོག་སེལ་བའི་ཐག་གཅོད་ཅིག་དགོས་པ་སྙན་ཐོའི་ནང་གསལ་བོར་བསྟན་ཡོད་པ་མ་ཟད། རྒྱ་ནག་གཞུང་གིས་བོད་མིའི་ཆོས་དད་རང་དབང་བཀག་སྡོམ་དང་ཆབ་སྲིད་དང་འབྲེལ་ནས་ཁྲིམས་འགལ་ཐོག་བཙོན་འཇུག་དང་གསོད་ཀྱི་ཡོད་པ། བོད་མིའི་རང་ཐག་རང་གཅོད་ཀྱི་ཆེས་གཞི་རྩའི་འགྲོ་བ་མིའི་ཐོབ་ཐང་སོགས་རྡོག་རོལ་གཏོང་གི་ཡོད་པས། ༧གོང་ས་རྒྱལ་བ་རིན་པོ་ཆེ་མཆོག་གི་དམིགས་བསལ་སྐུ་ཚབ་དང་རྒྱ་ནག་གི་དཔོན་རིགས་ཚོའི་བར་ཞི་བའི་གྲོས་མོལ་གྱི་ལམ་ཁོ་ན་བརྒྱུད་བོད་རྒྱའི་དཀའ་རྙོག་སེལ་ཐུབ་པ་དང་། བོད་མི་རྣམས་བདེ་འཇགས་དང་རང་དབང་ཐོག་རང་ཡུལ་དུ་གནས་ཐུབ་རྒྱུ་ཡིན་སྐོར་སོགས་བརྗོད་འདུག
ཟླ་འདིའི་ཕྱི་ཚེས་ ༢༠ ཉིན་ཨ་རིའི་ཕྱི་སྲིད་ལས་ཁུངས་ཀྱིས་ཕྱི་ལོ་ ༢༠༢༢ ལོའི་འགྲོ་བ་མིའི་ཐོབ་ཐང་དང་འབྲེལ་བའི་སྙན་ཐོ་བཏོན་པའི་ནང་། རྒྱ་ནག་གཞུང་གིས་བོད་ནང་དུ་ཁྲིམས་འགལ་ཐོག་སྲོག་གཅོད་པ་དང་། ཆབ་སྲིད་བཙོན་པ་བཙོན་འཇུག སྨྲ་བརྗོད་རང་དབང་དང་གསར་འགོད་རང་དབང་མེད་པ། དྲ་རྒྱ་དང་དྲ་ཚིགས་བཀག་སྡོམ་སོགས་དམ་དྲག་ཤུགས་ཆེན་བྱེད་པ། ཆོས་དད་རང་དབང་མེད་པ་དང་འགྲོ་འོང་བཀག་སྡོམ། ཆབ་སྲིད་ཀྱི་ལས་དོན་ལ་མཉམ་ཞུགས་བྱེད་དུ་མི་འཇུག་པ། ལྐོག་ཟ་རུལ་སུངས། བཙན་གྱིས་མངལ་ཤོར་དུ་འཇུག་པ། ཡུལ་མི་ལ་དམིགས་ཏེ་འཚེ་བ་དང་འཇིགས་སྐུལ་སོགས་བྱས་ཏེ། བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཇེ་སྡུག་ཏུ་འགྲོ་མུས་ཡིན་སྐོར་དང་། བོད་མི་མང་པོ་ཞིག་གིས་ཆབ་སྲིད་དང་ཆོས་ལུགས་ཀྱི་ལས་དོན་དང་འབྲེལ་ནས་འཛིན་བཟུང་དང་དོ་དམ་ནན་པོ་བྱེད་བཞིན་ཡོད་སྐོར་སོགས་བཀོད་འདུག
ད་དུང་རྒྱ་ནག་གཞུང་གིས་ཕྱི་ལ་ཡོད་པའི་བོད་མི་ ༡༥༠༠༠༠ ཙམ་ལ་འཇིགས་སྐུལ་དང་། དྲ་ལམ་ནས་བསུན་གཙེར། དེ་བཞིན་སོ་ལྟ་བྱེད་བཞིན་ཡོད་པ་དང་། བོད་ནང་གི་བོད་མི་ཚོར་ཕྱི་རྒྱལ་དུ་ཡོད་པའི་རང་གི་ནང་མི་སྤུན་མཆེད་རྣམས་ཕྱིར་བོད་ལ་ལོག་ཏུ་འཇུག་དགོས་པའི་གནོན་ཤུགས་སྤྲོད་ཀྱི་ཡོད་པ་དང་། བོད་མི་རྣམས་ལ་འོས་བསྡུའི་རང་དབང་མེད་སྐོར་སོགས་བཀོད་འདུག
གསར་འགོད་པ། བསྟན་འཛིན་ཕུར་བུ།
