ཕྱི་ལོ་ ༡༩༥༩ ལོར་༧གོང་ས་རྒྱལ་བ་རིན་པོ་ཆེ་མཆོག་རྒྱ་གར་ནང་བཙན་བྱོལ་དུ་ཕེབས་པའི་སྐོར་སོགས་དང་འབྲེལ་བའི་དངོས་བྱུང་གློག་བརྙན་བོད་ནམ་ཡང་མ་བརྗེད་ཅེས་པ་དེ་དབྱིན་ཡུལ་དུ་གཟིགས་འབུལ་ཞུས་ཡོད་འདུག
དབྱིན་ཡུལ་སྐུ་ཚབ་དོན་གཅོད་ཕར་སི་བསོད་ནམས་ཚེ་རིང་ལགས་ཀྱིས་གློག་བརྙན་དང་འབྲེལ་བའི་གཏམ་བཤད་གནང་། བོད་མིའི་སྒྲིག་འཛུགས་ཀྱི་པར།
ཉིན་ཤས་གོང་དུ་༧གོང་ས་རྒྱལ་བ་རིན་པོ་ཆེ་མཆོག་གི་བཙན་བྱོལ་ནང་གི་སྐུ་ཚེའི་ལོ་རྒྱུས་དང་འབྲེལ་བའི་དངོས་བྱུང་གློག་བརྙན་བོད་ནམ་ཡང་མ་བརྗེད་ཅེས་པ་དེ་དབྱིན་ཡུལ་གྱི་རྒྱལ་ས་ལོན་ཊོན་དུ་གཟིགས་འབུལ་བྱས་ཡོད་ཅིང་། གློག་བརྙན་གཟིགས་འབུལ་གྱི་མཛད་སྒོའི་ཐོག སྐུ་ཚབ་དོན་གཅོད་ཕར་སི་བསོད་ནམས་ཚེ་རིང་ལགས་དང་། དམིགས་བསལ་སྐུ་མགྲོན་དྷི་པཀ་ཅོབ་ར་(Deepak Chopra) ལགས། གློག་བརྙན་འཁྲབ་ཁྲིད་པ་སྐུ་ཞབས་ཇེན་པོལ་མར་ཊི་ནེསི་(Jean-Paul Martinez)ལགས་བཅས་མཉམ་ཞུགས་གནང་ཡོད་འདུག
སྐབས་དེར་སྐུ་ཚབ་དོན་གཅོད་ཕར་སི་བསོད་ནམས་ཚེ་རིང་ལགས་ཀྱིས། ༧གོང་ས་རྒྱལ་བ་རིན་པོ་ཆེ་མཆོག་གིས་འགྲོ་བ་མིའི་རིགས་གཅིག་གྱུར་གྱི་འདུ་ཤེས་གོང་མཐོར་གཏོང་བའི་དགོངས་བཞེད་ཀྱི་སྐོར་དང་། མགོན་པོ་གང་ཉིད་ཀྱིས་རྒྱུན་དུ་ནས་འགྲོ་བ་མིའི་རིགས་ཁྱིམ་ཚང་གཅིག་གི་གཅེན་གཅུང་ལྟ་བུ་ཞིག་ཡིན་པས། ཚང་མས་གཅིག་གྱུར་གྱི་བསམ་བློའི་འདུ་ཤེས་གོང་མཐོར་གཏོང་བ་དང་། དམག་འཁྲུག་སོགས་འཚེ་བའི་རིགས་ནི་ཤེས་རིག་གི་དཔལ་ཡོན་དར་མེད་པའི་གདོད་མའི་ཆ་ལུགས་ཤིག་ཡིན་པའི་ཁར། ད་ལྟ་དམག་འཁྲུག་གི་དུས་ཡུན་འདས་ཟིན་པས། འགྲོ་བ་མིའི་རིགས་ཚང་མར་འཛམ་གླིང་ཞི་བདེ་དང་། བདེ་སྐྱིད་བསྐྲུན་རྒྱུར་འགན་འཁྲི་ཡོད་སྐོར་གྱི་བཀའ་སློབ་སྩལ་བཞིན་ཡོད་པ་སོགས་གསུངས་ཡོད་འདུག
དབྱིན་ཡུལ་དུ་བོད་ནམ་ཡང་མ་བརྗེད་ཅེས་པའི་གློག་བརྙན་གཟིགས་འབུལ་ཞུས། བོད་མིའི་སྒྲིག་འཛུགས་ཀྱི་པར།
དམིགས་བསལ་སྐུ་མགྲོན་དྷི་པཀ་ཅོབ་ར་(Deepak Chopra) ལགས་ཀྱིས། ༧གོང་ས་རྒྱལ་བ་རིན་པོ་ཆེ་མཆོག་ནི་འཛམ་གླིང་ཞི་བདེ་དང་། བྱམས་བརྩེ། ཤེས་རབ་ཀྱི་ཕོ་ཉ་ཞིག་ཡིན་ལ། བྱམས་བརྩེ་དང་། གཞན་ཕན། སྙིང་རྗེ་སོགས་ཀྱི་རང་གཟུགས་ཁོ་ན་དེ་ཡིན་པས། སེམས་ཅན་ཀུན་ལ་ཉེ་རིང་མེད་པར་བྱམས་བརྩེས་སྐྱོང་གི་ཡོད་པ་མ་ཟད། མགོན་པོ་གང་ཉིད་ནི་འགྲོ་བ་མིའི་ཐོབ་ཐང་དང་ཁོར་ཡུག་སྲུང་སྐྱོབ། ཆོས་ལུགས་མཐུན་སྒྲིལ། འཚེ་བ་མེད་པའི་དེད་དཔོན་ཆེན་པོ་ཞིག་རེད། ཅེས་གསུངས་ཡོད་འདུག
ཨ་རིའི་ཁྱབ་རྒྱ་ཆེ་བའི་ཧྥ་ཐོམ་ཨི་ཝེན་སི(Fathom events)གློག་བརྙན་དྲ་ཚིགས་སུ། བོད་ནམ་ཡང་མ་བརྗེད་ཅེས་པའི་དངོས་བྱུང་གློག་བརྙན་དེ་ནི་༧གོང་ས་རྒྱལ་བ་རིན་པོ་ཆེ་མཆོག་དང་། ཕྱི་ལོ་ ༡༩༥༩ ལོར་རྒྱ་གར་བྱང་ཤར་ཁུལ་གྱི་མཐའ་མཚམས་གཞུང་འཛིན་པ་སྐུ་ཞབས་ཧར་མན་དྷིར་སིང་(Har Mander Singh)ལགས་རྣམ་གཉིས་ཀྱིས། རྒྱ་ནག་གཞུང་གིས་བོད་ས་བཙན་བཟུང་བྱས་རྗེས། ༧གོང་ས་རྒྱལ་བ་རིན་པོ་ཆེ་མཆོག་བཙན་བྱོལ་དུ་ཕེབས་དགོས་བྱུང་བའི་སྐོར་གསུངས་པའི་དངོས་བྱུང་གློག་བརྙན་ཐོག་མ་དེ་ཡིན་པ་དང་། དེ་བཞིན་དེའི་ནང་། ལོ་རྒྱུས་རང་བཞིན་ལྡན་པའི་དངོས་བྱུང་གློག་བརྙན་དེས་འཛམ་གླིང་གི་ལོ་རྒྱུས་དང་། སྒྱུ་རྩལ། རིག་གཞུང་། བོད་བརྒྱུད་ནང་བསྟན་བཅས་ཀྱི་སྙིང་བཅུད་ལ་འཚོལ་ཞིབ་དང་གསལ་སྟོན་བྱས་ཡོད་སྟབས། བྱམས་དང་སྙིང་རྗེའི་ལམ་ནས་འཛམ་གླིང་གཅིག་གྱུར་ཡོང་བར་ཕན་ནུས་ལྡན་ཡོད་སྐོར་སོགས་འཁོད་འདུག
འདས་ལོའི་ཕྱི་ཟླ་ ༣ ཚེས་ ༣༡ ཉིན་༧གོང་ས་རྒྱལ་བ་རིན་པོ་ཆེ་མཆོག་རྒྱ་གར་ནང་བཙན་བྱོལ་དུ་ཕེབས་ནས་མི་ལོ་ ༦༣ འཁོར་བ་དང་བསྟུན་དངོས་བྱུང་གློག་བརྙན་དེ་ཨ་རི་དང་ཁེ་ན་ཌའི་གློག་བརྙན་ཁང་ ༨༠༠ ལྷག་ནང་གཟིགས་འབུལ་ཞུ་རྒྱུ་ཡིན་པའི་གསལ་བསྒྲགས་བྱས་ཡོད་པ་སོགས་མུ་མཐུད་ཡུལ་ལུང་གང་སར་གཟིགས་འབུལ་ཞུ་ཡི་ཡོད་འདུག དངོས་བྱུང་གློག་བརྙན་དེའི་འཁྲབ་ཁྲིད་པ་ནི་ཇེན་པོལ་མར་ཊི་ནེསི་(JeanPaul Mertinez)ལགས་ཡིན་ཞིང་། ༧གོང་ས་རྒྱལ་བ་རིན་པོ་ཆེ་མཆོག་གི་དངོས་བྱུང་གློག་བརྙན་དེ་ནི་ཁོང་གི་ལེགས་གྲུབ་བྱུང་བའི་གློག་བརྙན་བརྩམས་ཆོས་ཐོག་མ་དེ་ཡིན་འདུག གློག་བརྙན་དེའི་རོལ་མོ་བ་ཨེ་ནོ་ཤི་ཀ་ཤང་ཀར་ལགས་(Anouska Shankar)ལགས་ནི། རྒྱ་གར་གྱི་སྙན་གྲགས་ཆེ་བའི་རོལ་མོ་བ་རཱ་བི་ཤན་ཀར་(Sri Ravi Shankar)གྱི་བུ་མོ་ཡིན་པ་རེད།
གསར་འགོད་པ། དཔལ་ལྡན།
