ཨོ་གླིང་གི་གཞུང་འབྲེལ་གནད་ཡོད་མི་སྣ་ཉི་ཤུ་ཙམ་གྱིས་བོད་དོན་གླེང་སློང་ཞེས་པའི་ཚོགས་འདུ་འཚོགས་ཏེ་བོད་ཀྱི་གནས་སྟངས་སྐོར་ལ་གླེང་སློང་བྱས་ཡོད་འདུག
བོད་མིའི་སྒྲིག་འཛུགས་ཀྱི་དབྱིན་ཡིག་དྲ་རྒྱར་བཀོད་པའི་གནས་ཚུལ་ལྟར་ན། ཟླ་འདིའི་ཕྱི་ཚེས་ ༡༡ ཉིན་བོད་མིའི་སྒྲིག་འཛུགས་ཀྱི་ཕྱི་དྲིལ་ལས་ཁུངས་དང་ཨོ་གླིང་བོད་དོན་འབྲེལ་མཐུད་ཁང་། ཨོ་གླིང་གི་རྒྱལ་སའི་བོད་རིགས་ཚོགས་པ་བཅས་ཐུན་མོང་གི་མཐུན་འགྱུར་འོག ཨོ་གླིང་རྒྱལ་ཡོངས་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པས། བོད་དོན་གནད་གླེང་ཞེས་པའི་ཚོགས་འདུ་ཞིག་ཚོགས་ཏེ། ཨོ་གླིང་གི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་བ་གསར་པ་རྣམས་ལ་བོད་ཀྱི་ལོ་རྒྱུས་དང་ད་ལྟའི་གནས་བབ་སོགས་ཀྱི་སྐོར་ལ་ངོ་སྤྲོད་བྱས་ཡོད་པ་རེད།
ཚོགས་འདུའི་ཐོག་ཨོ་གླིང་རྒྱལ་ཡོངས་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་མི་དང་། གྲོས་ཚོགས་འཐུས་མི་དང་འབྲེལ་ཡོད་གཞུང་འབྲེལ་ལས་བྱེད་སོགས་གནད་ཡོད་མི་སྣ་ཁྱོན་ ༢༠ ཙམ་འཛོམས་ཡོད་པ་དང་། སྐབས་དེར་ཨོ་གླིང་གི་གྲོས་ཚོགས་འོག་མའི་ཚོགས་གཙོ་གཞོན་པ་ (Sharon Claydon) ལགས་དང་གྲོས་ཚོགས་འོག་མའི་འཐུས་མི་ལྕམ་སའོ་སན་རེ་ཡེ (Susan Raye Templeman) ལགས། གྲོས་ཚོགས་གོང་མའི་འཐུས་མི་ལྕམ་ཇའེ་ནེ་ཊི་ཨེ་ལི་ཛེ་བྷེ་ཐི་ (Janet Elizabeth Rice) ལགས། དེ་བཞིན་གྲོས་ཚོགས་འོག་མའི་གྲོས་ཚོགས་འཐུས་མི་ལྕམ་སོ་ཧྥེ་ཨན་ནཱ་ (Sophie Anna Scamps) ལགས་བཅས་ཀྱིས། རང་ཉིད་ཉེ་ལམ་བཞུགས་སྒར་དྷ་སར་༧གོང་ས་མཆོག་ལ་མཇལ་འཕྲད་དང་། བོད་མིའི་སྒྲིག་འཛུགས་དང་བོད་མི་མང་སྤྱི་འཐུས་ལྷན་ཁང་སོགས་སུ་གཟིགས་སྐོར་དུ་ཕེབས་ཏེ། བཙན་བྱོལ་བོད་མི་སྐྱབས་བཅོལ་བའི་གནས་བབ་དང་བོད་དོན་སྐོར་ལ་གོ་རྟོགས་ཟབ་མོ་བྱུང་བ་སོགས་ཀྱི་ཉམས་མྱོང་དང་འབྲེལ་བའི་གསུང་བཤད་གནང་ཡོད་པ་རེད།
དེ་བཞིན། ཨོ་གླིང་དོན་གཅོད་ཀརྨ་སེངྒ་ལགས་ཀྱིས་ཚོགས་ཐོག་ཏུ། ད་ལྟའི་ཆར་བོད་ནང་གི་གནས་སྟངས་ཉིན་རེ་བཞིན་ཛ་དྲག་ཏུ་གྱུར་དང་འགྱུར་བཞིན་པ་སོགས་ཀྱི་སྐོར་ནས་གཏམ་བཤད་གནང་བ་དང་སྦྲགས། ཚོགས་ཐོག་ཏུ་ཞུགས་པའི་ཨོ་གླིང་གི་གྲོས་ཚོགས་འཐུས་མི་དང་འབྲེལ་ཡོད་གཞུང་འབྲེལ་གནད་ཡོད་མི་སྣ་ཡོངས་ནས་བོད་དོན་ལ་ཁ་ཞེ་གཉིས་ཀྱིས་རྒྱབ་སྐྱོར་གནང་བར་ཐུགས་རྗེ་ཞུས་ཡོད་པ་མ་ཟད། འདི་ལོའི་ཕྱི་ཟླ་ ༦ པའི་ནང་སྲིད་སྐྱོང་སྤེན་པ་ཚེ་རིང་མཆོག་ཨོ་གླིང་ནང་གཞུང་འབྲེལ་ཕྱོགས་ཕེབས་གནང་འཆར་ཡོད་པའི་སྐོར་སོགས་སྙན་གསེང་ཞུས་ཡོད་འདུག
