རྒྱ་ནག་དང་རྒྱལ་སྤྱིའི་ཆབ་སྲིད་ཀྱི་འགྱུར་ལྡོག རེ་བ་དང་གདོང་ལེན་གྱི་ཚོགས་འདུ་དབུ་འབྱེད་ཐོག་སྲིད་སྐྱོང་སྤེན་པ་ཚེ་རིང་མཆོག་གིས་རྒྱལ་སྤྱིའི་ཆབ་སྲིད་ཀྱི་འགྱུར་འགྲོས་དང་ལྷག་པར་རྒྱལ་ཁབ་གཞན་དག་གིས་རྒྱ་ནག་ལ་འཛིན་པའི་ལྟ་ཕྱོགས་འགྱུར་མུས་ཡིན་སྟབས། ང་ཚོས་དེ་དག་གི་ཐད་ལ་ཡིད་འཇོག་དང་དཔྱད་ཞིབ། ཐབས་ཇུས་སོགས་བཏིང་ནས། དུས་སྐབས་དང་བསྟུན་ཏེ་མཉམ་རུབ་ཀྱི་ཐོག་ནས་ནུས་པ་གདོན་རྒྱུ་གལ་ཆེན་པོ་ཡིན་སྐོར་གསུངས་སོང་།
དེ་རིང་སྔ་དྲོའི་ཆུ་ཚོད་ ༩།༣༠ ཐོག་གངས་སྐྱིད་སྲིད་སྐྱོང་ཚོགས་ཁང་དུ། བོད་ཀྱི་སྲིད་བྱུས་ཉམས་ཞིབ་ཁང་གི་གོ་སྒྲིག་འོག ཉིན་གསུམ་རིང་<<རྒྱ་ནག་དང་རྒྱལ་སྤྱིའི་ཆབ་སྲིད་ཀྱི་འགྱུར་ལྡོག-རེ་བ་དང་གདོང་ལེན།>> ཞེས་པའི་ཚོགས་འདུ་དབུ་འཛུགས་ཀྱི་མཛད་སྒོ་འཚོགས་སོང་བ་དང་། མཛད་སྒོའི་ཐོག་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གི་དབུས་རྒྱ་ནག་སྐམ་ས་ཆེན་མོ་དང་། ཐའེ་ཝན། སོག་པོ། ཡུ་གུར། ཧོང་ཀོང་བཅས་ནས་ཕེབས་པའི་མཁས་པ་དང་ལས་འགུལ་བ། རྒྱ་རིགས་ནོ་སྦེལ་ཞི་བདེའི་གཟེངས་རྟགས་ཐོབ་མཁན་ལུའུ་ཞའོ་པའོ་དམ་པའི་སྐུ་ཟླ་ལུའུ་ཞཱ་སོགས་མི་གྲངས་ ༦༠ མ་ཟིན་ཙམ་འཛོམས་འདུག
མཛད་སྒོའི་ཐོག་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས། དེ་རིང་འདིར་ཕེབས་པའི་མི་རིགས་མི་འདྲ་བའི་འཐུས་མི་ཁག་གི་རྒྱལ་ཁབ་རྣམས་ལ་རྒྱ་ནག་གཞུང་གིས་བཙན་བཟུང་དང་དམ་དྲག་བྱེད་མུས་ཡིན་པ་རེད་ལ། མི་རིགས་རྣམས་ཀྱི་ལུགས་སྲོལ་དང་། གོམས་གཤིས་སོགས་ལ་དམིགས་ནས་དམ་དྲག་དང་དྲག་གནོན་བྱེད་སྟངས་མི་འདྲ་བ་ཙམ་ལས། སྤྱི་ཡོངས་ནས་འདིར་འདུས་པའི་མི་རིགས་རྣམས་ལ་དྲག་གནོན་ཤུགས་ཆེན་བྱེད་སྟངས་དེ་གཅིག་མཚུངས་ཡིན་པས། མི་རིགས་འདི་དག་གིས་རྒྱ་ནག་གཞུང་གི་སྲིད་ཇུས་དང་དམ་དྲག་སོགས་ལ་གདོང་ལེན་བྱེད་སྟངས་མི་འདྲ་བ་རེ་ཡོད་སྲིད་ཀྱང་། སྤྱི་ཡོངས་ནས་འདིར་ཡོད་ཚང་མ་རྒྱ་ནག་གཞུང་གི་བཙན་བཟུང་འོག་ཡོད་པས་ཁ་གཏད་ས་གཅིག་མཚུངས་ཡིན་པར་བརྟེན། ཚང་མས་མཉམ་རུབ་ཀྱི་ནུས་པ་གདོན་རྒྱུ་ནི་གལ་ཆེན་ནང་གི་དོན་ཆེན་ཡིན་སྐོར་དང་། འདས་པའི་མི་ལོ་ལྔ་བཅུ་དྲུག་ཅུ་ལྷག་གི་ལོ་རྒྱུས་ཀྱི་འཕེལ་རིམ་ཁྲོད་དུ། དབུས་བོད་མིའི་སྒྲིག་འཛུགས་ཀྱིས་ལྷོ་སོག་དང་ཡུ་གུར། རྒྱ་རིགས་དམངས་གཙོ་དོན་གཉེར་བ་སོགས་དང་མཉམ་འབྲེལ་བྱས་ཏེ་ལས་དོན་བསྒྲུབས་ཡོད་ལ། རྒྱ་ནག་གཞུང་གི་བཙན་གནོན་གྱི་འོག་ཏུ་ཡོད་པའི་མི་རིགས་དག་གིས་ཀྱང་མཐུན་སྒྲིལ་བྱས་ཏེ། མཉམ་རུབ་ཀྱི་ནུས་པ་གསལ་སྟོན་བྱ་རྒྱུ་ནི་གལ་ཆེན་ཡིན་སྐོར་སོགས་གསུངས་སོང་།
ཡང་སྲིད་སྐྱོང་མཆོག་གིས། འདས་པའི་མི་ལོ་ཉི་ཤུ་ལྷག་གི་རིང་ལ་བོད་མི་མང་སྤྱི་འཐུས་དང་ཚོགས་གཙོ་གནང་བ་དང་། མི་ལོ་གཉིས་རིང་སྲིད་སྐྱོང་གི་ལས་འགན་ཁུར་ནས་འཛམ་གླིང་སྤྱི་ཡོངས་ལ་སྐོར་སྐྱོད་བྱེད་སྐབས། གཙོ་བོ་༧གོང་ས་རྒྱལ་བ་རིན་པོ་ཆེ་མཆོག་གི་བཀའ་དྲིན་ཁོ་ན་ལ་བརྟེན་ནས། རྒྱལ་སྤྱིའི་ཚོགས་པ་དང་སྒྲིག་འཛུགས་རྣམས་ཀྱིས་བོད་དང་བོད་མི་རྣམས་ལ་རྒྱབ་སྐྱོར་གནང་མུས་ཡིན་སྐོར་དང་། འདས་པའི་ལོ་ཤས་རིང་རྒྱ་ནག་གི་བཙན་གནོན་འོག་ཡོད་པའི་རྒྱལ་ཁབ་དག་གིས་སོ་སོའི་མི་རིགས་ཀྱི་གནད་དོན་གཅིག་པུར་མགོ་འཁོར་ནས། མི་རིགས་གཞན་གྱི་གནས་སྟངས་ལ་དེ་ཙམ་ཐེ་གཏོགས་བྱས་མེད་པས། མི་རིགས་དེ་དག་གིས་རྒྱ་ནག་གཞུང་གིས་བཙན་གནོན་ཇི་ལྟར་བྱེད་ཀྱི་ཡོད་སྐོར་ཕན་ཚུན་གླེང་རེས་བྱེད་མུས་ཡིན་ཡང་། རྒྱ་ནག་གཞུང་གིས་མི་རིགས་དེ་དག་ལ་བཀོལ་བའི་ཐབས་ཇུས་ནི་ཧ་ལམ་གཅིག་མཚུངས་ཡིན་པས། ཕན་ཚུན་གྱི་གནས་སྟངས་སྐོར་གླེང་སློང་བྱེད་མཚམས་བཞག་ནས། མཉམ་རུབ་ཀྱི་ནུས་པ་ཇི་ལྟར་གོང་དུ་སྤེལ་ནས་གདོང་ལེན་ཇི་ལྟར་བྱ་དགོས་པའི་སྐོར་གླེང་སློང་བྱ་དགོས་པའི་ཁར། རྒྱལ་སྤྱིའི་ཆབ་སྲིད་ཀྱི་འགྱུར་འགྲོས་དང་ལྷག་པར་རྒྱལ་ཁབ་གཞན་དག་གིས་རྒྱ་ནག་ལ་འཛིན་པའི་ལྟ་ཕྱོགས་འགྱུར་མུས་ཡིན་སྟབས། ང་ཚོས་དེ་དག་གི་ཐད་ལ་ཡིད་འཇོག་དང་དཔྱད་ཞིབ། ཐབས་ཇུས་སོགས་བཏིང་ནས། དུས་སྐབས་དང་བསྟུན་ཏེ་མཉམ་རུབ་ཀྱི་ཐོག་ནས་ཞུ་གཏུག་ལས་འགུལ་སོགས་སྤེལ་གལ་ཆེན་པོ་ཡིན་སྐོར་སོགས་གསུངས་སོང་།
ད་ལྟ་ཨ་རིའི་ནང་གནས་སྡོད་རྒྱ་རིགས་དགེ་རྒན་ཆེན་མོ་ཞ་མིན་ལགས་ཀྱི
ཐའེ་ཝན་ནས་ཡིན་པའི་དམངས་གཙོ་དོན་གཉེར་བ་སྐུ་ཞབས་ལིས་ཡུག་ཐན་ལགས་ཀྱིས་། གསར་འགོད་པ་ཚོ་དྷ་རམ་ས་ལ་སླེབས་ཀྱང་གསར་འགྱུར་འགོད་མི་ཐུབ། ༸གོང་ས་མཆོག་ནས་གསུངས་པ་བཞིན་གསར་འགོད་པ་ཚོས་ཀྱང་གནས་ཚུལ་དྲང་བདེན་ཐོག་འགོད་རྒྱུ་གལ་ཆེན་ཡིན། སྐྱབས་མགོན་རིན་པོ་ཆེ་མཆོག་ནས་གསུང་བཤད་གནང་སྐབས་འཛུམ་མདངས་སྟོན་སྟངས་ནི་དམིགས་བསལ་ཞིག་རེད། དེ་མགོ་ཁྲིད་སུས་ཀྱང་སྟོན་ཐུབ་ཀྱི་མི་འདུག ཁོ་རང་དྷ་སར་སླེབས་དུས་ཀྱི་ཚོར་བ་དམིགས་བསལ་བ་ཞིག་རེད། རྒྱ་ནག་གི་གདུག་རྩུབ་ཅན་གྱི་སྲིད་ཇུས་ཀྱིས་ཐའེ་ཝན་དུའང་གནོན་ཤུགས་སྤྲོད་བཞིན་ཡོད་པ་རེད། སྲིད་ཇུས་དེ་འདྲ་རྒྱལ་ཁབ་གང་གིས་ཀྱང་བེད་སྤྱོད་བྱེད་ཀྱི་མེད། རྒྱ་གར་ལ་མཚོན་ན་སེམས་ཅན་དང་མིའི་ཐོབ་ཐང་གཅིག་པ་ཡོད་པ་རེད། རྒྱལ་ཁབ་གང་ཞིག་ལ་མཚོན་ནའང་མི་རིགས་ཀྱི་ཐོབ་ཐང་གཅིག་པ་དགོས་པ་གལ་ཆེན་རེད། ཐའེ་ཝན་གྱི་དམངས་གཙོའི་ཐད་ཚོགས་འདུ་མང་པོ་ཞིག་འཚོགས་པའི་སྐབས་སུ། ཚང་མས་དམངས་གཙོ་ཡར་རྒྱས་གཏོང་རྒྱུ་བྱས་ཡོད། རྒྱ་ནག་གི་རྒྱུད་གཅིག་ལམ་གཅིག་གི་སྲིད་ཇུས་འོག་རྒྱལ་ཁབ་མང་པོར་གནོན་ཤུགས་སྤྲོད་ཀྱི་ཡོད། རྒྱ་ནག་གིས་དྲག་གནོན་གྱི་ཐོག་ནས་གནོན་ཤུགས་སྤྲོད་ཀྱི་ཡོད་ཀྱང་། ཐའེ་ཝན་དམངས་གཙོའི་ལམ་ལུགས་བརྟན་པོ་ཡོད་པའི་རྒྱལ་ཁབ་ཅིག་ཡིན་པས་ཅིའང་བྱེད་ཐུབ་ཀྱི་མེད། རྒྱ་ནག་གིས་མི་རིགས་ཚོང་བསྒྱུར་བྱེད་བཞིན་པའི་གནས་ཚད་མཐོ་པོར་སླེབས་ཡོད། མ་འོངས་པར་རྒྱ་ནག་གི་ལམ་ལུགས་དམངས་གཙོ་ཅན་དུ་འགྲོ་དགོས་པ་ཞིག་རེད། སྒེར་གཅོད་ཀྱི་རྒྱལ་ཁབ་ཅིག་གི་མ་འོངས་པའི་ལམ་ཁར་ཉེན་ཁ་ཡོང་གི་ཡོད་པ་ལྟར། རྒྱ་ནག་གི་སྲིད་ཇུས་ལ་འགྱུར་བ་མ་ཐེབས་པ་ཡིན་ན། ཐའེ་ཝན་ནང་དུ་རྒྱ་ནག་གིས་དྲག་ཤུགས་བེད་སྤྱོད་བྱེད་ནས་འགྱུར་བ་འགྲོ་རྒྱུ་མིན་པ་རེད། ༸གོང་ས་མཆོག་གིས་འཛམ་གླིང་ལ་བཟང་སྤྱོད་ཀྱི་ཐོག་ནས་དབུ་ཁྲིད་ཀྱི་ཡོད་ལ། བཙན་བྱོལ་བོད་མིའི་སྒྲིག་འཛུགས་ཀྱང་དེ་ལྟར་འགྲོ་བཞིན་ཡོད། བྱ་དང་བྱིའུ་ཞིག་ཡིན་རུང་རང་དབང་གི་འཕུར་གྱི་ཡོད་མོད། བོད་ནང་གི་བོད་མི་རྣམས་ད་དུང་སྡུག་བསྔལ་འོག་ཏུ་གནས་ཡོད་ཅེས་སོགས་བརྗོད་སོང་།
ཡུ་གུར་མི་རིགས་ཀྱི་ལས་འགུལ་བ་སྐུ་ཞབས་ཐར་ཁིན་ཌིབ་ལེ་ཋི་ལགས་ཀྱིས། ཡུ་གུར་བའི་སྤྱི་ཚོགས་ནང་དུ་ལས་འགུལ་མང་པོ་སྤེལ་བཞིན་ཡོད། རྒྱ་ནག་གི་མགོ་ཁྲིད་ཁྲིན་ཆིན་གོ་ཡུ་གུར་ས་ཁུལ་དུ་སླེབས་པ་ནས་བཟུང་མི་རིགས་ཀྱི་གནས་སྟངས་སྡུག་ཏུ་ཕྱིན། རྒྱལ་སྤྱིའི་ཐོག་ཏུ་གནས་སྟངས་དེའི་དབང་གིས་ཡུ་གུར་མི་རིགས་ཀྱི་སྨྲ་བརྗོད་རང་དབང་སྡུག་ཏུ་ཕྱིན་པ་དོ་སྣང་བྱུང་བ་ཞིག་རེད། བོད་དང་ཡུ་གུར་གྱི་གནས་སྟངས་གཅིག་པ་རེད། དྲང་བདེན་ཆེད་དུ་ངོ་རྒོལ་བྱེད་མཁན་མང་པོ་བཙོན་དུ་བཅུག་ཡོད་ཅིང་། རྒྱ་ནག་གཞུང་གིས་ད་དུང་ཡུ་གུར་མི་རིགས་ཀྱི་རིགས་རྒྱུད་རྩ་མེད་བཟོ་བའི་ཐབས་ཤེས་བྱེད་བཞིན་ཡོད། རྒྱལ་སྤྱིའི་སྟེང་དུ་མིའི་རིགས་ཀྱི་རང་དབང་ཐོབ་ཐང་དང་། རིགས་རྒྱུད་རྩ་མེད་བཟོ་མཁན་རྒྱ་ནག་གཞུང་མ་གཏོགས་མེད། ང་ཚོས་ཀྱང་རྒྱ་ནག་གི་གདུག་རྩུབ་ཅན་གྱི་སྲིད་ཇུས་གདོང་ལེན་བྱེད་ཀྱི་ཡོད་ལ། ད་དུང་མུ་མཐུད་ནས་གདོང་ལེན་བྱེད་དགོས། ཞེས་བརྗོད་སོང་།
ལྷོ་སོག་གི་ལས་འགུལ་བ་སྐུ་ཞབས་པོ་ཐི་ཀི་ཆི་ལགས་ཀྱིས། རྒྱ་ནག་གཞུང་གིས་སོག་པོའི་སྐད་ཡིག་སྦྱོང་བར་བཀག་འགོག་བྱས་ཡོད། མི་རིགས་ཤིག་གི་སྐད་ཡིག་རྩ་མེད་བཟོས་ན་མི་རིགས་རྩ་མེད་བཟོས་པ་རེད་དྲན་གྱི་ཡོད་ལ། སོག་པོའི་འབྲོག་པ་རྣམས་འབྲོག་པའི་འཚོ་བ་ཡང་སྐྱེལ་འཇུག་གི་མེད། སོག་པོའི་འབྲོག་པ་རྣམས་ཀྱིས་ངོ་རྒོལ་བྱེད་བཞིན་ཡོད་ཀྱང་། གནས་ཚུལ་དེ་དག་ཕྱི་ལོག་ནས་གོ་ཐུབ་ཀྱི་མེད། ཆོས་ལུགས་རྩ་མེད་གཏོང་བའི་སྲིད་ཇུས་ལག་བསྟར་བྱེད་ཀྱི་ཡོད་པས་སེམས་ནད་མང་པོའང་འབྱུང་བཞིན་འདུག ད་ལྟའི་ཆར་སོག་པོའི་མི་མང་སོག་པོའི་ས་ཆར་འཚོ་སྡོད་བྱེད་ཆོག་གི་མེད་པ་རེད། དེ་ནི་རིག་གནས་གསར་བརྗེ་ལས་ཀྱང་ཉེན་ཁ་ཆེ་བ་ཞིག་རེད། ནང་སོག་མང་ཚོགས་ཀྱིས་ངོ་རྒོལ་གྱི་ལས་འགུལ་མང་པོ་སྤེལ་ཡོད་ཀྱང་། ང་ཚོས་མཉམ་འབྲེལ་གྱི་ཐོག་ནས་ངོ་རྒོལ་ལས་འགུལ་སྤེལ་ཐུབ་ན་ཤུགས་རྐྱེན་ཆེན་པོ་ཐེབས་རྒྱུ་རེད། ཅེས་བརྗོད་སོང་།
ཧོང་ཀོང་གི་དམངས་གཙོ་དོན་གཉེར་བ་སྐུ་ཞབས་ཆན་ཀྲི་ཅིན་ལགས་ཀྱིས། ཧོང་ཀོང་གི་དམངས་གཙོའི་སྣེ་འཁྲིད་པ་ཁོང་གི་གྲོགས་པོ་སློབ་དཔོན་ཆེན་མོ་ཌ་ནི་ཐའེ་(Benny Tai)ལགས་དང་ཀུ་ཤུ་གསར་ཁང་གི་སྦྱིན་བདག་ཇའེ་མེ་ལའེ་(Jimmy Lai)ལགས་གཉིས་བཙོན་འཇུག་འོག་ཡོད་པ་དང་། ད་ལྟའི་ཆར་ཁོང་གཉིས་ལྟ་བུའི་ཧོང་ཀོང་གི་དམངས་གཙོ་དོན་གཉེར་བ་མི་སྒེར་དང་ཚོགས་པ་བཅས་ཚང་མ་བཙན་གནོན་འོག་བཅུག་ཡོད་ལ། དཀའ་སྡུག་དེ་ཧོང་ཀོང་ཙམ་མིན་པར་བོད་དང་སོག་པོ། ཡུ་གུར་སོགས་ཀྱིས་ཀྱང་མྱོང་བཞིན་ཡོད་སྟབས། ཁོང་ད་ལན་ཉིན་གྲངས་གསུམ་རིང་གི་ཚོགས་འདུའི་ཐོག་བཅར་ཏེ་གནས་ཚུལ་མང་པོ་ཞིག་ལ་སློབ་སྦྱོང་བྱེད་ཐུབ་སྐོར་དང་། མ་འོངས་པར་ང་ཚོ་ཚང་མས་ནུས་པ་མཉམ་དུ་སྤུངས་ནས་རྒྱ་ནག་གི་བཙན་གནོན་ལ་གདོང་ལེན་བྱེད་དགོས་སྐོར་བརྗོད་སོང་།
ཐེངས་འདིའི་ཚོགས་འདུའི་སྐོར་ལ་བཅར་འདྲི་ཞུ་སྐབས་སྲིད་སྐྱོང་སྤེན་པ་ཚེ་རིང་མཆོག་གིས། སྔོན་མ་སོག་པོ་དང་། ཡུ་གུར། བོད་པ་བཅས་ལ་མཐུན་གྲོགས་ཀྱི་ཚོགས་པ་ཞིག་བཙུགས་ཡོད་ཀྱང་། དེ་རིམ་བཞིན་ནུས་ཤུགས་མེད་པ་ཆགས་པ་རེད། དེའི་རྗེས་སུ་མཉམ་འབྲེལ་རྒྱལ་ཚོགས་ཀྱི་ནང་དུ་མ་ཚུད་པའི་སྒྲིག་འཛུགས་ཆེན་པོ་ཆགས་པ་རེད། ད་ལྟའི་དུས་སུ་ང་ཚོས་རེ་བ་བཞིན་ནུས་པ་ལྡན་པ་ཞིག་ཆགས་ཡོད་མེད་ཐེ་ཚོམ་གྱི་གནས་སྟངས་སུ་ལྷུང་ཡོད་པ་རེད། བར་སྐབས་ནས་རྒྱ་རིགས་ཡང་ཅན་ལི་ཡིས་མགོ་ཁྲིད་ནས་བོད་པ་དང་། རྒྱ་རིགས། ཡུ་གུར། སོག་པོ་བཅས་ཀྱི་དམངས་གཙོ་དོན་གཉེར་བ་རྣམས་ལ་ཚོགས་འདུ་འཚོགས་པའི་ལུགས་སྲོལ་ཞིག་ཡོད་ཀྱང་། བར་ལམ་ཁོང་གི་ཡིག་ཆའི་དཀའ་ངལ་དང་ནད་ཡམས་ཀྱི་རྐྱེན་བྱས་ཏེ་ལོ་མང་འཛོམས་ཐུབ་ཡོད་པ་མ་རེད། དེ་རིང་སྲིད་བྱུས་ཉམས་ཞིབ་ཁང་གི་གོ་སྒྲིག་འོག་འཛོམས་པའི་ཐོག མ་འོངས་པར་མཉམ་རུབ་ཀྱི་ཐོག་ནས་ལས་འགུལ་སྤེལ་ནས་རྒྱ་གཞུང་ལ་ཁ་གཏད་ཇི་ལྟར་གཅོག་པར་ཞིབ་ཚགས་ཀྱི་བགྲོ་གླེང་བྱ་རྒྱུ་ཡིན་སྐོར་འགྲེལ་བརྗོད་གནང་བྱུང་།
གསར་འགོད་པས་ཐེངས་འདིའི་ཚོགས་འདུའི་སྐོར་ལ་བཅར་འདྲི་བྱས་པར་སྲིད་བྱུས་ཉམས་ཞིབ་ཁང་གི་འགན་འཛིན་ཟླ་བ་ཚེ་རིང་ལགས་ཀྱིས། ང་ཚོས་ཀུན་སློང་དང་དམིགས་ཡུལ་དེ་འདྲ་བཟུང་ཡོད་ཀྱང་། མཐུན་རྐྱེན་རག་མ་རག་གི་རྐྱེན་གྱིས་ཡུ་གུར་བ་མང་པོ་སླེབས་ཐུབ་མ་བྱུང་། སོག་པོ་ཁ་ཤས་སླེབས་ཐུབ་མ་སོང་། ཐའེ་ཝན་པ་དང་། རྒྱ་རིགས་གང་འཚམ་སླེབས་ཐུབ་ཡོད། ཚོགས་འདུའི་སྐབས་སུ་རྒྱ་གར་དང་རྒྱ་ནག་གི་རྐྱེན་བྱས་ཏེ་ཚོགས་འདུ་ལ་ཏོག་ཙམ་དཀའ་ངལ་འཕྲད་བཞིན་ཡོད་ཀྱང་། ཞིས་ཅིན་ཕིང་གིས་ལོ་བརྒྱའི་ནང་དུ་འབྱུང་མི་སྲིད་པའི་འགྱུར་བ་མང་པོ་འགྲོ་ཡི་ཡོད་པ་རེད་ཟེར་བ་བཞིན་འཛམ་གླིང་འགྱུར་བ་འགྲོ་ཡི་ཡོད་པ་རེད། ཚོགས་འདུའི་བརྗོད་གཞིའི་ནང་དུ་བོད་པ་དང་། ཡུ་གུར། སོག་པོ། ཐའེ་ཝན། ཧོང་ཀོང་། རྒྱ་རིགས་བཅས་ཀྱི་ཅི་ཞིག་བྱེད་དགོས་པ་དང་། ཐུན་མོང་གི་ཅི་ཞིག་བྱེད་ཐུབ་མིན་སྐོར་ལ་བགྲོ་གླེང་བྱས་ནས་གཞི་མཐུན་གྱི་ལྟ་བ་འཛུགས་ཐུབ་མིན་དང་། མཉམ་འབྲེལ་གྱི་ལས་ཕྱོགས་ཅི་ཞིག་འཛིན་དགོས་མིན་ཐད་བགྲོ་གླེང་བྱ་རྒྱུ་ཡིན་ཞེས་དང་། ཡང་ཁོང་གིས་ང་ཚོའི་ངོས་ནས་རེ་བ་གཙོ་བོ་རྒྱ་ནག་གཞུང་ལ་སྡུག་བཤད་ཙམ་རྒྱག་རྒྱུ་མིན་པར། ང་ཚོར་དཀའ་ངལ་གཅིག་པ་འཕྲད་བཞིན་ཡོད་པ་དེར་ག་རེ་བྱ་རྒྱུ་ཡིན་པའི་ཐོག་བགྲོ་གླེང་བྱེད་རྒྱུར་རེ་བ་རྒྱག་གི་ཡོད་ལ། ཚོགས་ཞུགས་པ་མི་གྲངས་ལྔ་བཅུ་ལྷག་འབྱོར་ཡོད་པ་དང་། དཔྱད་རྩོམ་བཅུ་གསུམ་དང་གཏམ་བཤད། བསམ་ཚུལ་མང་པོ་འཁྱེར་ནས་སླེབས་འདུག ཚོགས་འདུའི་ཐོག་ནས་དོན་དག་ལ་ཕབ་པའི་ཐུབ་པའི་རེ་བ་འདུག ཅེས་བརྗོད་སོང་།
གསར་འགོད་པ། བྱམས་པ་ཚེ་རིང་།
