སྤྱི་འཐུས་ཚོགས་གཞོན་མཆོག་གིས་རྒྱལ་སྤྱིའི་གྲོས་ཚོགས་འཐུས་མིའི་མཉམ་འབྲེལ་ལྷན་ཚོགས་སུ་བོད་དོན་གསུང་བཤད་གནང་།  

བོད་མི་མང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་མཆོག་གིས་ཅེག་སྤྱི་མཐུན་རྒྱལ་ཁབ་ཀྱི་རྒྱལ་སར་འཚོགས་པའི་རྒྱལ་ཁབ་ ༣༠ ཙམ་གྱི་རྒྱལ་སྤྱིའི་གྲོས་ཚོགས་འཐུས་མིའི་མཉམ་འབྲེལ་ལྷན་ཚོགས་སུ་མཉམ་ཞུགས་གནང་སྟེ་བོད་དོན་གསུང་བཤད་གནང་འདུག

 ཟླ་འདིའི་ཕྱི་ཚེས་ ༡ ནས་ཉིན་གྲངས་གཉིས་རིང་ཅེག་སྤྱི་མཐུན་རྒྱལ་ཁབ་ཀྱི་རྒྱལ་ས་པི་རག་ཏུ་རྟེན་གཞི་བྱས་པའི་ཅེག་གྲོས་ཚོགས་གོང་འོག་གཉིས་སུ། རྒྱལ་སྤྱིའི་གྲོས་ཚོགས་འཐུས་མིའི་མཉམ་འབྲེལ་ཚོགས་པའི་(Inter-Parliamentary Alliance on China (IPAC)ལྷན་ཚོགས་འཚོགས་ཡོད་པ་ལྟར། བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཞོན་སྒྲོལ་མ་ཚེ་རིང་མཆོག་མཉམ་ཞུགས་གནང་ཡོད་པ་མ་ཟད། ཁུལ་དེའི་གནད་ཡོད་མི་སྣ་རྣམས་ལ་མཇལ་ཕྲད་གནང་སྟེ་བོད་དོན་ཞུ་སྐུལ་གནང་ཡོད་འདུག

ཐེངས་འདིའི་ལྷན་ཚོགས་སྟེང་རྒྱལ་ཁབ་མི་འདྲ་བ་ ༣༠ ཙམ་གྱི་གྲོས་ཚོགས་འཐུས་མི་གྲངས ༥༠ ལྷག་མཉམ་ཞུགས་གནང་སྟེ། རྒྱལ་སྤྱིའི་གྲོས་ཚོགས་འཐུས་མིའི་མཉམ་འབྲེལ་ཚོགས་པའི་འདས་ལོའི་ནང་གི་ལས་དོན་ཐོག་གྲུབ་འབྲས་ཇི་བྱུང་དང་། གདོང་ལེན་ཇི་བྱས་ཐོག་བསམ་ཚུལ་བརྗེ་ལེན། དེ་བཞིན་རྒྱ་ནག་དམར་གཞུང་གིས་རྒྱ་སྐྱེད་རིང་ལུགས་ཀྱི་སྲིད་ཇུས་ཐོག་ནས་རྒྱལ་སྤྱིའི་ནང་གི་ཁྲིམས་དང་ཞི་བདེ། བདེ་འཇགས། རང་དབང་། དམངས་གཙོ་བཅས་ལ་ཉེན་ཁ་འདྲ་མིན་བཟོས་དང་བཟོ་བཞིན་པར་གདོང་ལེན་བྱེད་ཕྱོགས་ཀྱི་ཐབས་ཇུས་ཐོག་བགྲོ་གླེང་གནང་ཡོད་འདུག

བོད་མི་མང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་མཆོག་གིས། འཛམ་གླིང་རྒྱལ་ཁབ་ཁག་གིས་བོད་ཀྱི་ལོ་རྒྱུས་སོགས་ལ་གོ་རྟོགས་མེད་པའི་ཐོག་ནས་རྒྱ་ནག་གཞུང་གི་ལོག་འགྲེལ་ལ་ཡིད་ཆེས་བྱས་པ་དེས། རྒྱ་ནག་གཞུང་གིས་དངོས་ཡོད་ཀྱི་ལོ་རྒྱུས་ལ་འཁྱོག་བཤད་བྱས་ཏེ། རྒྱ་ནག་གཞུང་གིས་བོད་ཀྱི་ཁྱིམ་མཚེས་རྒྱལ་ཁབ་ཁག་གི་ས་ཁོངས་སུ་ཧམ་བཟུང་དང་བཙན་འཛུལ་བྱེད་པར་ནུས་ཤུགས་སྤྲོད་ཀྱི་ཡོད་སྐོར་དང་། རྒྱལ་སྤྱིའི་མགོ་ཁྲིད་རྣམས་ཀྱིས་བོད་མཐོ་སྒང་གི་ཁོར་ཡུག་གི་གལ་གནད་ཤེས་དགོས་པ་མ་ཟད། མཉམ་འབྲེལ་རྒྱལ་ཚོགས་ཀྱིས་བོད་ཀྱི་ཁོར་ཡུག་གི་གལ་གནད་དང་། ཤུགས་རྐྱེན་ཐོག་ཚན་རིག་དང་མཐུན་པའི་ཉམས་ཞིབ་གནང་དགོས་པའི་འབོད་སྐུལ་ཞུས་འདུག་ལ། དེ་བཞིན་ཁོང་མོས། འཛམ་གླིང་ཞི་བདེ་དང་། རང་དབང་། ཁྲིམས་སྒྲིག་ཚད་ལྡན་སླད། རྒྱ་ནག་དམར་ཤོག་གཞུང་གི་མགོ་ཁྲིད་ཚོར་འགན་ཁུར་གྱི་འདུ་ཤེས་གོང་མཐོར་གཏོང་བཅུག་དགོས། དེ་ནི་རྒྱ་ནག་གཞུང་གི་བཙན་གནོན་འོག་ལུས་པའི་བཙོན་པ་གཅིག་པུའི་ཁེ་ཕན་ཞིག་གཏན་ནས་མིན་པར། རྒྱ་རིགས་དང་། རྒྱ་ནག་གི་ཁེ་ཕན་ཡིན་སྐོར་སོགས་གསུངས་འདུག 

ཚོགས་གཞོན་མཆོག་གིས་ཚོགས་འདུ་ཡི་ཞོར་དུ། ཅེག་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་པེ་རིམ་སིལ་ར་བྷ་སེ་( Premysl Rabas) ལགས་དང་། ཚོགས་མི་གྲོས་ཚོགས་འོག་མའི་འཐུས་མི་ཧ་ཡ་ཊོ་ཇོ་སིབ་ཨོ་ཀ་མུ་ར་(Hayato Josef Okamura)ལགས། དྲུང་ཆེ་གྲོས་ཚོགས་གོང་མའི་འཐུས་མི་ཀེ་ཊི་རི་ནཱ་ ཇེ་ཁུ་སི་ ( Katerina Jacques)ལགས། བོད་དོན་རྒྱབ་སྐྱོར་བ་སྐུ་ཞབས་མར་ཊིན་ བྷུར་སིག་(Mr. Martin Bursik)ལགས། བོད་དོན་རྒྱབ་སྐྱོར་བ་ཨི་ཌི་ཊ་ཀེ་ལེག་ཀེ་རོ་ཝ(Edita Kleckerova )ལགས། བོད་དོན་རྒྱབ་སྐྱོར་བ་གྷ་བྷེ་རི་ལ་གྷ་ཛ་ཌི་ཀོ་ཝ་( Gabriela ) ལགས་བཅས་དང་མཇལ་ཕྲད་གནང་སྟེ། བོད་ནང་གི་ད་ལྟའི་ཛ་དྲག་གནས་སྟངས་སྐོར་ངོ་སྤྲོད་དང་གླེང་སློང་གནང་ཡོད་འདུག 

གསར་འགོད་པ་དཔལ་ལྡན་གྱིས་བོད་མིའི་སྒྲིག་འཛུགས་ཀྱི་དྲ་རྒྱ་ལས་བཏུས།