བོད་ཀྱི་སྲིད་བྱུས་ཉམས་ཞིབ་ཁང་གིས་ཉིན་གྲངས་གཉིས་རིང་བོད་ཀྱི་མཐོ་སློབ་ཁག་གི་དགེ་རྒན་ཆེན་མོ་གསུམ་ཆེད་དུ་གདན་འདྲེན་ཞུས་ཏེ་གཞུང་ས་དགའ་ལྡན་ཕོ་བྲང་སྐབས་བོད་ཀྱི་ལོ་རྒྱུས་གནས་བབ་བསྐྱར་ཞིབ་འཆད་ཁྲིད་ཅིག་འཚོག་བཞིན་འདུག
ནོར་ཝེ་རླུང་འཕྲིན་ཁང་གི་པར། ༡༤།༠༩།༢༠༢༣
དེ་རིང་ནས་ཉིན་གཉིས་རིང་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀམ་པུ་ཌར་སྡེ་ཚན་གྱི་ཚོགས་ཁང་དུ། བོད་ཀྱི་སྲིད་བྱུས་ཉམས་ཞིབ་ཁང་གི་གོ་སྒྲིག་འོག གཞུང་ས་དགའ་ལྡན་ཕོ་བྲང་སྐབས་བོད་ཀྱི་ལོ་རྒྱུས་གནས་བབ་བསྐྱར་ཞིབ་འཆད་ཁྲིད་འཚོག་བཞིན་འདུག མཛད་སྒོའི་ཐོག་བོད་མིའི་སྒྲིག་འཛུགས་ཀྱི་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་དང་། སྲིད་བྱུས་ཉམས་ཞིབ་ཁང་གི་འགན་འཛིན་ཟླ་བ་ཚེ་རིང་ལགས། རིག་གནས་སློབ་དཔོན་བསོད་ནམས་རྒྱལ་མཚན་ལགས། ལོ་རྒྱུས་སློབ་དཔོན་གཙང་ཕྲུག་སྟོབས་ལགས། ལོ་རྒྱུས་དང་ཞིབ་འཇུག་རིག་པའི་སློབ་དཔོན་གཉན་ཐར་ལགས་བཅས་ཀྱི་གཙོས་བོད་མིའི་སྒྲིག་འཛུགས་ཀྱི་སྲི་ཞུ་བ་དང་སློབ་གཉེར་བ་ཁག་ཅིག་མཉམ་ཞུགས་གནང་འདུག་ལ། སྲིད་བྱུས་ཉམས་ཁང་གིས་པར་སྐྲུན་བྱས་པའི་བོད་ཀྱི་སྤྲུལ་སྐུའི་ལམ་ལུགས་སྐོར་གྱི་དཔྱད་རྩོམ་ཕྱོགས་སྒྲིག་གི་དེབ་ཅིག་ཀྱང་དབུ་འབྱེད་གནང་སོང་།
འདི་གའི་གསར་འགོད་པས་སཱ་ར་མཐོ་སློབ་ཀྱི་ལོ་རྒྱུས་སློབ་དཔོན་གཙང་ཕྲུག་སྟོབས་ལགས་ཀྱི་འཆད་ཁྲིད་སྐོར་ལ་བཅར་འདྲི་བྱས་པར་ཁོང་གིས། ཕྱི་ལོ་ ༢༠༡༧ ལོར་བོད་ནང་དུ་བོད་ལྗོངས་སློབ་གྲྭ་ཆེན་མོའི་དགེ་རྒན་ནོར་བུ་བསམ་འཕེལ་ལགས་ཀྱིས་སྡེ་བ་གཞུང་གི་ལོ་རྒྱུས་ཉིན་བྱེད་སྣང་བ་ཞེས་པའི་ཕྱག་དེབ་ཞིག་བཏོན་ཡོད། དེབ་དེའི་ནང་དུ་ལོ་རྒྱུས་དངོས་དང་མ་མཐུན་པའི་གནས་ཚུལ་གང་ལ་གང་འཚམ་འདུག དེབ་དེའི་ནང་དཔེར་ན་བོད་སྡེ་བ་གཞུང་གི་ལོ་ཚིགས་གང་ནས་གང་བར་དུ་ཡིན་པ་དང་། ལྷག་པར་ཕྱི་ལོ་༡༦༤༢ ལོར་དགའ་ལྡན་ཕོ་བྲང་གི་སྲིད་དབང་དབུ་ཚུགས་དུས། རྒྱལ་དབང་སྐུ་ཕྲེང་ལྔ་བ་དང་། གུ་ཤྲི། སྡེ་སྲིད་བསོད་ནམས་ཆོས་འཕེལ་གསུམ་གྱི་ནང་ནས་ཆབ་སྲིད་ཀྱི་དབང་ཆ་ངོ་མ་སུ་ལ་ཡོད་པའི་སྐོར་བཤད་སྐབས། བོད་ཆོལ་ཁ་གསུམ་གྱི་ཆབ་སྲིད་དབང་ཆ་ཧོ་ཤོད་རྒྱལ་ཁང་ལ་ཡོད་པ་དང་། ཧོ་ཤོད་རྒྱལ་ཁང་གི་ཆབ་སྲིད་ཀྱི་མི་སྣ་གཙོ་བོ་གུ་ཤྲི་ཡིན་པ། ཆོས་ལུགས་ཀྱི་མི་སྣ་གཙོ་བོ་རྒྱལ་དབང་ལྔ་བ་ཡིན་པར་བཤད་ཡོད། འདི་གཉིས་ཀྱི་གཅིག་དེ་ཨ་མདོའི་ཕྱོགས་དང་། གཞན་དེ་དགའ་ལྡན་ཕོ་བྲང་གི་འོག་ཏུ་དབུས་གཙང་གི་ཕྱོགས། ཁམས་ཀྱི་ལྷོ་ངོས་ས་ཁུལ་ཁག་ཡོད་པའི་ལྟ་བ་དེ་འདྲ་ཞིག་བཤད་ཀྱི་འདུག ལྟ་བ་དེ་ནི་ང་ཚོའི་ལོ་རྒྱུས་དངོས་དང་མཐུན་གྱི་མི་འདུག་པས། རྒྱལ་དབང་ལྔ་བའི་རང་རྣམ་གཙོས་བོད་གཞུང་གི་ཐམ་དེབ་དང་། ཁྲིམས་ཡིག་བཅས་ཀྱི་གནས་དོན་ཐོག་ནས་རྒྱལ་དབང་ལྔ་བའི་ཆོས་སྲིད་གཉིས་ཀྱི་དབུ་ཁྲིད་པའི་འོག་ཏུ། གུ་ཤྲི་དང་སྡེ་སྲིད་གཉིས་ཀྱིས་ཆབ་སྲིད་མཉམ་འབྲེལ་བྱེད་བཞིན་ཡོད་པ་དང་། སྐབས་དེར་གུ་ཤྲི་རྒྱུད་དང་བཅས་པར་གཞུང་སོག་ཞེས་པ་མ་གཏོགས་ཧོ་ཤོད་རྒྱལ་ཁང་ཡོད་པ་མ་རེད། གཞུང་སོག་ནི་བོད་གཞུང་འོག་གི་སོག་པོར་ལབ་ཀྱི་ཡོད་པ་རེད། བོད་གཞུང་གི་འོག་ཏུ་བོད་པ་དང་སོག་པོའི་མི་རིགས་གཉིས་ཀྱི་མཉམ་འབྲེལ་རེད་མ་གཏོགས། སོག་པོ་དེ་ལས་དབང་ཆ་མེད་པའི་ཐོག་ནས་བཤད་ཀྱི་ཡོད་ཅེས་འགྲེལ་བརྗོད་གནང་བྱུང་།
ཡང་གསར་འགོད་པས་ཏཱ་ལའི་བླ་མ་མཐོ་སློབ་ཀྱི་ལོ་རྒྱུས་དང་ཞིབ་འཇུག་རིག་པའི་སློབ་དཔོན་གཉན་ཐར་ལགས་ཀྱི་འཆད་ཁྲིད་སྐོར་ལ་བཅར་འདྲི་བྱས་པར་ཁོང་གིས། ཐེངས་འདིའི་འཆད་ཁྲིད་ཀྱི་བརྗོད་གཞི་ནི་གཞུང་ས་དགའ་ལྡན་ཕོ་བྲང་གི་དགེ་ལུགས་པའི་མ་ལག་གྲུབ་ཚུལ་དང་འགྱུར་བའི་སྐོར་ཡིན། བརྗོད་གཞི་འདི་གལ་ཆེན་ཡིན་པའི་རྒྱུ་མཚན་གཅིག་ནི་དགའ་ལྡན་ཕོ་བྲང་གི་སྲིད་གཞུང་གི་སྐོར་ལ་དེང་སང་ཆབ་སྲིད་གནས་སྟངས་ཐོག་ནས་མང་པོ་བཤད་ཀྱི་ཡོད་པ་རེད། གཞི་རྩའི་དགའ་ལྡན་ཕོ་བྲང་གི་གྲུབ་སྟངས་ནི་དགེ་ལུགས་པའི་དགོན་སྡེའི་མནའ་མཐུན་གྱི་སྤྱི་ཚོགས་ཤིག་ནས་གྲུབ་པ་ཞིག་རེད། འདིའི་རྩ་བའི་རྨང་གཞི་གྲུབ་སྟངས་ལ་གོ་བ་གསར་བ་དང་། དབྱེ་ཞིབ། ཉམས་ཞིབ་གསར་བ་བྱེད་དགོས་ཀྱི་འདུག ལོ་ངོ་སུམ་བརྒྱ་ལྷག་གི་ལོ་རྒྱུས་ཡོད་པའི་བོད་ཀྱི་སྤྱི་ཚོགས་རྨང་གཞི་གྲུབ་ཚུལ་དང་། ཆབ་སྲིད་ཀྱི་ཤུགས་རྐྱེན་ཐེབས་སྟངས་ཀྱི་གནད་དོན་སྐོར། དགེ་ལུགས་པའི་དགོན་སྡེའི་མ་ལག་གི་གྲུབ་ཆ་བཅས་གལ་གནད་དུ་མཐོང་ནས་བཤད་ཀྱི་ཡོད་ཅེས་འགྲེལ་བརྗོད་གནང་བྱུང་།
བོད་ཀྱི་སྤྲུལ་སྐུ་ལམ་ལུགས་ཀྱི་དཔེ་དེབ་ཕྱོགས་སྒྲིག་སྐོར་ལ་སྲིད་བྱུས་ཉམས་ཞིབ་ཁང་གི་འགན་འཛིན་ཟླ་བ་ཚེ་རིང་ལགས་ཀྱིས། རྒྱ་ནག་གཞུང་གིས་བོད་ཀྱི་ཐོག་བཙན་འགེལ་བྱས་པའི་གནས་ཚུལ་མང་པོ་ཡོད་པ་བཞིན་དུ། སྤྲུལ་སྐུའི་སྐོར་གྱི་དོན་ཚན་ ༢༩ ཡོད་པའང་རྒྱ་གཞུང་གིས་བཙན་འགེལ་བྱས་པ་ལས་ཁུངས་ལུང་གང་ཡང་མེད། དེའི་སྐོར་ལ་རྒྱ་གཞུང་གིས་དཔྱད་རྩོམ་མང་པོ་བྲིས་ཡོད། སྔོན་མ་ཐའེ་ཝན་གྱི་མཁས་པ་ཞིག་གིས་སྤྲུལ་སྐུའི་སྐོར་གྱི་དཔྱད་རྩོམ་ཞིག་བྲིས་ཀྱང་མཐའ་སྐྱོང་ཐུབ་མེད། རྒྱུ་མཚན་ནི་མཐའ་མའི་བཤད་ས་ནི་ཕྱོགས་གཅིག་ཏུ་འགྲོ་བཞིན་ཡོད་པ་རེད། སྤྲུལ་སྐུའི་ལམ་ལུགས་ཀྱི་མཐའ་མར་གསེར་བུམ་དཀྲུག་རྒྱུ་ཡིན་པ་དང་། གསེར་བུམ་དཀྲུག་རྒྱུའི་བཀའ་འཁྲོལ་རྒྱ་གཞུང་ནས་ལེན་དགོས་པའི་མཐའ་དོན་ཐོག་སླེབས་ཡོད་འདུག དེ་ནི་རྒྱ་གཞུང་གི་ལས་གཞི་ཆེན་པོ་ཞིག་རེད་འདུག་ཅེས་གསུངས་ཡོད། ད་ལན་དཔྱད་རྩོམ་ཕྱོགས་སྒྲིག་འདིའི་ནང་དུ་ཆོས་བརྒྱུད་ཁག་གི་འགྲོ་སྟངས་འདྲ་མིན་ཡོད་པ་ནང་པའི་ལྟ་གྲུབ་ཀྱི་ཐོག་ནས་གསལ་སྟོན་བྱས་ཡོད་ཀྱང་། རྒྱ་གཞུང་གིས་བཤད་བསྡད་པའི་སྤྲུལ་སྐུའི་ལམ་ལུགས་ནི་ནང་པའི་ལྟ་གྲུབ་དང་འབྲེལ་བ་གང་ཡང་མེད་པ་མ་ཟད། ཆབ་སྲིད་ཀྱི་ཆེད་དུ་བེད་སྤྱོད་བྱེད་བཞིན་ཡོད་སྐོར་སོགས་བརྗོད་བྱུང་།
དེ་རིང་སྔ་དྲོ་སཱ་ར་མཐོ་སློབ་ཀྱི་རིག་གནས་སློབ་དཔོན་སྤྱི་ཟུར་བསོད་ནམས་རྒྱ་མཚན་ལགས་ཀྱིས་རྒྱལ་དབང་བཅུ་གསུམ་པ་ཐེངས་གཉིས་ཉེན་གཡོལ་དུ་ཕེབས་པའི་བརྒྱུད་རིམ་ལ་ཞིབ་ལྟ་ཞེས་པའི་བརྗོད་གཞིའི་ཐོག་འཆད་ཁྲིད་གནང་ཡོད་པ་དང་། ཉིན་རྒྱབ་ལོ་རྒྱུས་སློབ་དཔོན་གཙང་ཕྲུག་སྟོབས་ལགས་ཀྱིས་སྡེ་པ་གཞུང་གི་ལོ་རྒྱུས་ཉིན་བྱེད་ལས་འཕྲོས་ཏེ་དགའ་ལྡན་ཕོ་བྲང་དང་ཧོ་ཤོད་རྒྱལ་ཁང་ཟེར་བའི་གནས་བབ་ལ་དཔྱད་པ་ཞེས་པའི་བརྗོད་གཞིའི་ཐོག་འཆད་ཁྲིད་གནང་འདུག སང་ཉིན་ཏཱ་ལའི་བླ་མ་མཐོ་སློབ་ཀྱི་ལོ་རྒྱུས་དང་ཞིབ་འཇུག་སློབ་དཔོན་གཉན་ཐར་ལགས་ཀྱིས་གཞུང་ས་དགའ་ལྡན་ཕོ་བྲང་སྐབས་ཀྱི་དགེ་ལུགས་པའི་དགོན་སྡེའི་མ་ལག་གྲུབ་ཚུལ་གྱི་འགྱུར་ལྡོག་གླེང་བ་ཞེས་པའི་ཐོག་འཆད་ཁྲིད་གནང་རྒྱུ་ཡིན་འདུག
གསར་འགོད་པ། བྱམས་པ་ཚེ་རིང་།
རྩོམ་སྒྲིག་པ། པདྨ་མཚོ།
