རྒྱང་ལྟ།
བོན་སྤྱི་སྨོན་ལམ་མཐར་ཕྱིན་དང་འབྲེལ་བའི་གནས་ཚུལ་ཚང་མས་མཁྱེན་གསལ་ལྟར། བསྐྱར་གླེང་བྱ་དགོས་མ་མཆིས། འདིར་དེ་དང་འབྲེལ་ནས་གྲོས་ཚོགས་ཚོགས་མ་ཐུབ་པའི་བྱས་ཉེས་སུ་ལ་ཡོད་མེད་སྐོར་གླེང་བར་འདོད། ཉེ་ལམ་དགེ་ལུགས་པའི་སྤྱི་འཐུས་གོ་ཕན་གྱིས་བང་ཆེན་གསར་ཁང་བརྒྱུད་ནས་མི་མང་ལ་བརྡ་ལན་འདི་འདྲ་ཞིག་སྤྲད་ཡོད། གྲོས་ཚོགས་ཚོགས་མ་ཐུབ་པར་ཉིན་བཞིའི་རྗེས་ཚོགས་གཙོ་སྦྲེལ་བོས་སྤྱི་འཐུས་རྒྱུན་ལས་བསྐངས་ནས་གྲོས་ཚོགས་ཕར་འགྱང་དང་། ཡང་ན་ཚོགས་ཐུབ་རྒྱུར་ཐབས་ལམ་གང་འདྲ་འདུག་ཅེས་གནད་དོན་གཉིས་ཐད་གྲོས་བསྡུར་བྱས་ཤིང་། སྤྱི་འཐུས་རྒྱུན་ལས་ཀྱིས་སྨོན་ཐར་དང་འབྲེལ་བའི་གནས་ཚུལ་”བརྒྱུད་ལམ་གཞན་ནས་བསླེབས་ཀྱི་ཡོད་ནའང་། ང་ཚོའི་བདེ་སྲུང་གི་ངོས་ནས་ཕྱག་སྦྲེལ་སྤྱི་འཐུས་ལ་བརྒྱུད་ལམ་དེ་ཚོས་དཔང་རྟགས་ཁ་གསལ་མ་ཡོང་བར་དོགས་གཞི་གང་ཡང་མེད་ཅེས་གསལ་བསྒྲགས་ཤིག་སྤེལ་པ་ཡིན་ན། གྲོས་ཚོགས་ཚོགས་ན་འགྲིག་གི་འདུག་”ཅེས་ཐབས་ལམ་བཏོན་སྐོར་བཤད་སོང་། ཧ་ཧ། སྐད་ཆ་འདི་ནི་ཧ་ཅང་གི་རྫབ་ཆེན་མིན་ནམ། ༸གོང་ས་མཆོག་གི་སྐུ་ཕྱཱ་དང་། བོད་མིའི་སྒྲིག་འཛུགས་ཀྱི་བདེ་འཇགས་ལ་རྒྱ་གར་གཞུང་གིས་འགན་ལེན་བྱེད་བཞིན་ཡོད། གནས་ཚུལ་ཡོང་ཁུངས་ནས་གནད་དོན་ལ་འགྱུར་བ་མི་འདུག་ཅེས་བདེ་སྲུང་བཀའ་བློན་གྱིས་གྲོས་ཚོགས་ནང་གསལ་བོར་གསུངས་བྱུང་། གལ་སྲིད་གནས་ཚུལ་སྤྲོད་མཁན་དེ་རྒྱ་གར་གཞུང་གསང་བའི་ལས་ཁུངས་ཡིན་ཚེ། ང་ཚོ་བདེ་སྲུང་ལས་ཁུངས་ཀྱིས་གསལ་བསྒྲགས་དེ་འདྲ་ཞིག་བྱས་ན། སུ་ལ་ཕོག་ཐུག་འགྲོ་རྒྱུ་གསལ་བོ་མིན་ནམ། དཔལ་ལྡན་བདེ་སྲུང་ལས་ཁུངས་ཀྱིས་གནས་ཡུལ་རྒྱ་གར་གཞུང་གསང་བའི་ལས་ཁུངས་དང་ཐད་ཀར་འགལ་བ་འགྲོ་གཞིའི་བྱ་བ་དེ་འདྲ་ཞིག་རྩོམ་སྲིད་དམ། གལ་སྲིད་བརྩམས་པ་ཡིན་ན། ༸གོང་ས་མཆོག་གི་སྐུ་ཕྱཱས་མཚོན་བོད་མིའི་སྒྲིག་འཛུགས་ཀྱི་བདེ་འཇགས་སྲུང་སྐྱོབ་ཐད། རྗེས་སོར་རྒྱ་གར་གཞུང་གསང་བའི་ལས་ཁུངས་དང་མཉམ་ལས་ཇི་ལྟར་བྱ་ཐུབ་བམ། དེ་ཁྱེད་ཚོས་མ་ཤེས་པ་ག་ལ་ཡིན་ཏེ་རྐང་བཙུགས་ནས་ཁྱེད་ཚོས་བཙན་བྱོལ་བོད་མིའི་སྒྲིག་འཛུགས་གནས་སྟངས་དེ་འདྲ་ཞིག་གི་ལམ་དུ་འདེད་ཀྱིན་མེད་དམ་སྙམ། དཔལ་ལྡན་བཀའ་ཤག་གི་བཀའ་ལན་ནི། ཧ་ཅང་གི་ཐབས་མཁས་དང་གནས་ལུགས་དང་མཐུན་པ་མ་ཟད། ཕྱོགས་གཉིས་ཀར་འགལ་བ་འགྲོ་གཞི་མེད་པ་སྟེ། ” འབྲེལ་ཡོད་བརྒྱུད་ལམ་ཁག་གི་གནས་ཚུལ་ལ་མཇུག་སྐྱོང་ཞུ་མུས་ཡིན། འཛིན་སྐྱོང་གི་ངོས་ནས་དོ་བདག་སྤྱི་འཐུས་ལ་སྐྱོན་འཛུགས་གང་ཡང་ཞུས་མེད། ” ཅེས་པ་དེ་རེད། དཔལ་ལྡན་བཀའ་ཤག་ལ་མཚོན་ན། དངོས་ཡོད་དང་གཟུར་གནས་ཀྱི་ལན་དེ་ལས་གཞན་ཞིག་རྒྱག་ཐབས་མེད་པ་གོང་བརྗོད་ལྟར་ཡིན།
ལར་ནས་གནད་དོན་འདིའི་ཐད་དཔལ་ལྡན་སྲིད་སྐྱོང་མཆོག་གི་གྲོས་ཚོགས་ར་བ་རང་ནས་གསལ་བོར་གསུངས་ཡོད། “མི་ཞིག་ལ་སྐྱོན་བརྗོད་བྱས་པ་ཙམ་གྱིས་ལམ་སང་ནག་པོ་ཆགས་པ་དེ་འདྲ་མ་རེད་པཱ། ཁྲིམས་ལ་གཏུགས་པ་འདྲ་ཞིག་ཡིན་ནའང་། ཁྲིམས་ཀྱིས་ཁུངས་སྐྱེལ་ཚར་ན་མ་གཏོགས་ནག་ཉེས་ཆགས་ཀྱི་མེད། ཁྲིམས་ལ་གཏུགས་པའི་ཉིན་མོ་དེ་ག་རང་ལ་ནག་ཉེས་ཆགས་ཀྱི་ཡོད་པ་མ་རེད། “ཅེས་གསལ་བོར་གསུངས་པ་འདི་ལས་ལྷག་པའི་གསལ་བསྒྲགས་ཤིག་ག་རེ་དགོས་སམ།
དགེ་ལུགས་སྤྱི་འཐུས་གོ་ཕན་གྱི་བརྡ་ལན་ལ་གསལ་བཤད།
དགེ་ལུགས་སྤྱི་འཐུས་གོ་ཕན་གྱིས་བོད་ཀྱི་བང་ཆེན་གསར་ཁང་བརྒྱུད་ནས་མི་མང་ལ་བརྡ་ལན་གཞན་ཞིག་འདི་ལྟར་སྤྲད་ཡོད། ” དཔལ་ལྡན་སྲིད་སྐྱོང་མཆོག་ཕྱི་ལོག་ཕེབས་པའི་ལས་རིམ་རྒྱུན་ལས་ནང་ཡོང་བསྡད་པ་རེད། ཨ་ཁ། དཔལ་ལྡན་སྲིད་སྐྱོང་མཆོག་གིས་མཉམ་རུབ་བྱས་མ་སོང་ཨ་བསམས་པ་ཞིག་དང་། ག་ཚོད་ཅིག་གྲོས་ཚོགས་ཚོགས་མ་ཐུབ་པར་འགྱངས་ཐུབ་ན་ཁོང་ཚོར་དགའ་ཚོར་ཡོད་ས་རེད་བསམ་པ་ཞིག “ཅེས་སོགས་བཤད་ཡོད། དེ་དངོས་འབྲེལ་ཡིན་ནམ། ད་ལྟ་མི་དམངས་རྣམས་གཉིད་སད་ཡོད། སྐད་ཆ་འདིས་བློ་དམན་རེ་ཟུང་གིས་བདེན་སྙམ་དུ་སྲིད་ཀྱང་། མི་དམངས་བྱིངས་ནས་གོ་ཕན་གྱིས་དཔལ་ལྡན་སྲིད་སྐྱོང་མཆོག་ལ་མ་ཉེས་ཁ་གཡོགས་བྱས་ཏེ། གྲོས་ཚོགས་ཚོགས་མ་ཐུབ་པའི་རང་སྐྱོན་གཞན་འགོར་གཡོག་ཐབས་བྱེད་བཞིན་པ་གསལ་བོར་མཐོང་ཐུབ།
གལ་སྲིད་དཔལ་ལྡན་སྲིད་སྐྱོང་མཆོག་ཁྱེད་ཀྱིས་བཤད་པ་ལྟར་ཡིན་ན། དཔལ་ལྡན་སྲིད་སྐྱོང་མཆོག་གིས་གྲོས་ཚོགས་མུ་མཐུད་ཚོགས་དགོས་རྒྱུར་འབོད་སྐུལ་འདི་ལྟར་ཞུ་སྲིད་དམ། དེ་ཡང་སྐབས་བཅུ་བདུན་པའི་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དྲུག་པའི་ལས་ཉིན་གསུམ་པའི་ཚོགས་ཐུན་བཞི་བའི་སྟེང་། དཔལ་ལྡན་མི་རྗེ་སྐུ་ངོ་སྲིད་སྐྱོང་མཆོག་གིས། “གནད་དོན་ཞིག་བྱུང་བ་དང་གྲོས་ཚོགས་ཚོགས་ཀྱི་མིན་ཟེར་ན། ང་ཚོ་འདིར་ག་རེ་བྱེད་དུ་ཡོང་བ་རེད། གྲོས་ཚོགས་སྐབས་བཅུ་བདུན་པ་ཕེབས་ནས་ལོ་གཉིས་ཙམ་འགྲོ་གྲབས་བྱེད་བཞིན་ཡོད། ད་དུང་ཁྲིམས་སྒྲིག་གཏན་འབེབས་ཐུབ་ཀྱི་མེད། ད་ལྟ་ལས་བསྡོམས་སྒང་ལ་འགྲོ་བཞིན་ཡོད། ལས་བསྡོམས་བགྲོ་གླེང་བྱེད་རྒྱུར་ཡང་གྲོས་ཚོགས་འཚོགས་ཀྱི་མིན་གསུངས་ན། ང་ཚོའི་བོད་མི་མང་སྤྱི་འཐུས་ལྷན་ཚོགས་ཀྱིས་ལས་ཀ་ག་རེ་བྱ་དགོས་པ་རེད། ང་ཚོ་འཛིན་སྐྱོང་གིས་སུ་ལ་འགན་འཁུར་དགོས་པ་རེད། དེ་ཚོར་དགོངས་པ་བཞེས་དགོས་ཀྱི་འདུག གཙང་མ་ཆགས་རྒྱུ་དེ་དུས་ཚོད་བསླེབས་དུས་གཙང་མ་ཆགས་ཡོང་གི་རེད། ཐག་གཅོད་མ་བྱུང་བར་ལས་རིམ་མུ་མཐུད་འགྲོ་བཞག་ན། མི་མང་ལ་ཡིན་ནའང་ང་ཚོས་འགན་ཏག་ཏག་འཁུར་ཡོད་པ་དང་། འཛམ་བུའི་གླིང་སྤྱི་ཚོགས་གཞན་པ་ཚོའི་ནང་ལའང་། ང་ཚོས་དམངས་གཙོ་ཚད་ལྡན་ཞིག་ཡོད་ཟེར་ནས་ལབ། ད་རེས་གྲོས་ཚོགས་ཚོགས་དུས་ཀྱང་ཚོགས་ཐུབ་མ་སོང་ཞེས་ང་ཚོས་ག་འདྲ་སེ་འགྲེལ་བཤད་རྒྱག་གམ། རྩ་དོན་ག་འདྲ་སེ་རྩོད་དམ། དེ་འདྲ་སོང་ཙང་དེ་ཚོ་ཚང་མར་དགོངས་པ་བཞེས་རོགས། “ཞེས་ཧ་ཅང་སེམས་ཚོར་ཆེན་པོའི་ཐོག་གྲོས་ཚོགས་མུ་མཐུད་འཚོགས་རྒྱུར་འབོད་སྐུལ་ཞུས་བྱུང་།
འབོད་སྐུལ་དེའི་རྒྱབ་གནོན་དུ་སླར་ཡང་དཔལ་ལྡན་ཚོགས་གཙོ་མཆོག་གིས་འདི་ལྟར། ” དཔལ་ལྡན་སྲིད་སྐྱོང་མཆོག་གིས་གསུངས་པ་ལྟར་རེད། དཀའ་ངལ་རེ་འཕྲད་ཡོང་དུས་གྲོས་ཚོགས་འཚོགས་ཐུབ་ཀྱི་མེད། ལས་རིམ་འགྲོ་ཐུབ་ཀྱི་མ་རེད། མཉམ་དུ་སྡོད་ཀྱི་མིན། དེ་འདྲ་ཡང་སེ་གསུང་ཡོང་གི་འདུག ང་ཚོས་དགོངས་པ་བཞེས་དགོས་པ་དེ་གལ་ཆེན་པོ་རེད། ང་ཚོར་ལས་རིམ་གལ་པོ་ཆེ་ཞེ་བོ་ཡོད་པ་རེད། ད་ལྟ་བར་ཆོས་རིག་ལས་ཁུངས་ཀྱི་ལས་བསྡོམས་མ་གཏོགས་འགྲོ་ཐུབ་མེད། ལྷན་ཁང་གཞན་དག་ཚང་མ་ལྷག་ཡོད་པ་རེད། དེ་ནང་བཞིན་ལས་དོན་གལ་ཆེན་པོ་མང་པོ་ཡོད་པ་རེད། དེ་ཚོའི་ཐོག་ལ་གྲོགས་ཚོགས་ཀྱིས་འགན་འཁུར་ནས་ལས་རིམ་འགྲོ་ཐུབ་དགོས་པ་དེ་གལ་ཆེན་པོ་ཞིག་རེད། ཚོགས་གཙོ་གཞོན་གཉིས་ཀྱིས་ལས་རིམ་བསྒྲིག་གི་ཡིན་ ” ཞེས་གྲོས་ཚོགས་མུ་མཐུད་འཚོགས་དགོས་པར་ནན་གྱིས་གསུངས་ཡོད།
གྲོས་ཚོགས་མུ་མཐུད་ཚོགས་རྒྱུ་མཚམས་འཇོག
གོང་བརྗོད་ལྟར་དཔལ་ལྡན་སྲིད་སྐྱོང་མཆོག་དང་། དཔལ་ལྡན་ཚོགས་གཙོ་མཆོག་གཉིས་ཀས་ཚོགས་དུས་དྲུག་པའི་ལས་ཉིན་གསུམ་པའི་ཚོགས་ཐུན་བཞི་པར་གྲོས་ཚོགས་མུ་མཐུད་འཚོགས་དགོས་རྒྱུར་འབོད་སྐུལ་ནན་ཏན་ཞུས་ཡོད་ཀྱང་། ཆོས་བརྒྱུད་སྤྱི་འཐུས་དགུ་དང་མདོ་སྟོད་སྤྱི་འཐུས་བཅུ་ཡིས་བཙན་བྱོལ་བོད་མིའི་སྒྲིག་འཛུགས་ཀྱི་ཆབ་སྲིད་དབུ་ཁྲིད་མཐོ་ཤོས་དཔལ་ལྡན་སྲིད་སྐྱོང་མཆོག་དང་། བཙན་བྱོལ་བོད་མིའི་གྲོས་ཚོགས་ཀྱི་གནས་རིམ་མཐོ་ཤོས་དཔལ་ལྡན་ཚོགས་གཙོ་མཆོག་གི་འབོད་སྐུལ་དང་ཐུགས་རེ་སྣང་མེད་དང་རྩིས་འཇོག་མ་བྱས་སྟབས། ཕྱི་ཚེས་ ༢༢ ཉིན་སྐབས་བཅུ་བདུན་པའི་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དྲུག་པའི་ལས་ཉིན་བཞི་པའི་ཚོགས་ཐུན་དང་པོ་དབུ་འཛུགས་སྐབས། དཔལ་ལྡན་ཚོགས་གཙོས། འབྲེལ་ཡོད་སྤྱི་འཐུས་ཁག་ཅིག་ཚོགས་གཙོ་གཞོན་སར་བཅར་ནས། བདེ་སྲུང་ལས་ཁུངས་ཀྱིས་གནད་དོན་འདི་གཙང་མར་མ་བཟོས་པའི་བར་དུ་གྲོས་ཚོགས་ནང་ལ་ཆ་ཤས་ལེན་གྱི་མིན་ཞེས་བཤད་བྱུང་། གྲོས་ཚོགས་ཀྱི་རྩ་འབོར་གྱི་གསུམ་ཆ་གཉིས་མ་ལོངས་ན་ལས་དོན་བརྩམ་མི་ཆོག་པས་ནམ་ལོངས་སོང་ན་ཚོགས་བརྡ་ཕུལ་ཆོག་ཅེས་བཤད་ནས་གྲོས་ཚོགས་གྲོལ་དགོས་བྱུང་ཡོད། དེ་ཡང་ཚོགས་ཞུགས་མ་བྱས་པའི་སྤྱི་འཐུས་རྣམས་ནི། ཆོས་བརྒྱུད་ཁོངས་ནས་སྤྱི་འཐུས་དགུ་དང་མདོ་སྟོད་ཁོངས་སྤྱི་འཐུས་བཅུ་དེ་ཡིན་པ་རེད།
ད་ལྟ་དགེ་ལུགས་སྤྱི་འཐུས་གོ་ཕན་གྱིས་རང་གིས་བྱས་ཉེས་གཞན་ལ་འགེབས་རྩིས་བྱེད་པ་ནི། “འཛམ་བུ་གླིང་གི་རྒྱལ་ཁབ་གང་འདྲ་ཞིག་ཡིན་ཡང་ནང་ལོག་ལ་དཀའ་ངལ་ཡོད་དུས་སྲིད་བློན་དང་སྲིད་འཛིན་དེ་ཚོ་ཕྱི་ལོག་ལ་འགྲོ་ཡི་ཡོད་པ་མ་རེད། དཔེར་ན། ཉེ་ལམ་རྒྱ་གར་ལྡི་ལིར་ G20 ཚོགས་འདུའི་སྐབས་ཀྱང་། ནང་ལོག་ལ་དཀའ་ངལ་ཡོད་མཁན་གྱི་དཔོན་པོ་དེ་ཚོ་ཡོང་གི་ཡོད་པ་མ་རེད། ཡིན་ནའང་ང་ཚོའི་སྒྲིག་འཛུགས་ནང་ལོག་ལ་དཀའ་ངལ་དེ་འདྲ་ཞིག་ཕྲད་ཡོད། འཛིན་སྐྱོང་གི་ངོས་ནས་སྣེ་འཁྲིད་མཁན་དཔལ་ལྡན་སྲིད་སྐྱོང་ཆགས་ཀྱི་ཡོད། སང་ཉིན་ནས་བཟུང་ཟླ་བ་གཅིག་རིང་ཕྱི་ལོག་ལ་འགྲོ་བཞིན་ཡོད་རེད། གྲོགས་ཚོགས་འཚོགས་རྒྱུར་འདོད་པ་མེད་པ་དེ་ཡིས་མཚོན་ཐུབ་ཀྱི་འདུག”ཅེས་ཧམ་བཤད་བྱས་ཡོད། ཁོའི་དཔེ་མཚོན་གཞག་ས་རྒྱ་གར་ལྡི་ལིར་ཚོགས་པའི་ G20 ཚོགས་འདུར་མ་ཕེབས་པའི་དཔོན་རིགས་ནི། རྒྱ་ནག་གི་སྲིད་འཛིན་ཞི་ཅིན་ཕིན་དང་། རཱ་ཤི་ཡའི་སྲིད་འཛིན་ཕུ་ཊིན་གཉིས་རེད། ཁྱེད་ཚོས་ལྟོས་དང་། རྒྱ་ནག་གི་སྲིད་འཛིན་ཞི་ཅིན་ཕིན་རྒྱ་གར་ལྡི་ལིར་ཚོགས་པའི་ G20 ཚོགས་འདུར་མ་བཅར་པ་ནི། ཚོགས་འདུ་དེ་མ་ཚོགས་སྔོན་ཙམ་ལ་རྒྱ་ནག་གཞུང་གིས་རྒྱ་གར་མངའ་ཁོངས་སུ་ཡོད་པའི་ལ་དྭགས་དང་ཨ་རུ་ནཱ་ཅལ་གྱི་ས་ཆ་མང་པོ་ཞིག་རྒྱ་ཁོངས་སུ་བཅུག་སྟེ་ས་ཁྲ་བཀྲམས། གནད་དོན་དེ་རྒྱ་གར་གཞུང་དང་རྒྱ་ནག་གཞུང་གཉིས་དབར་སྐབས་དེར་ཚོར་བ་རྣོ་ཤོས་ཀྱི་གླེང་རྙོག་ཆགས་པ་རེད། དེར་བརྟེན་རྒྱ་ནག་གི་སྲིད་འཛིན་ཞི་ཅིན་ཕིན་གྱིས་རྒྱ་གར་ལ་གདོང་བསྟན་མ་ཕོད་པ་མ་ཟད། འཛམ་གླིང་གི་སྟོབས་ཆེན་རྒྱལ་ཁབ་ཉི་ཤུའི་དབུ་ཁྲིད་ཚོའི་མདུན་ལའང་བཅར་མ་ཕོད་སྐོར། སྐབས་དེར་རྒྱལ་སྤྱིའི་བརྒྱུད་ལམ་ཚང་མའི་ནང་གནས་ཚུལ་སྤེལ་ཡོད། གཞན་དེ་རཱ་ཤི་ཡའི་སྲིད་འཛིན་ཕུ་ཊིན་རེད། ཕུ་ཊིན་གྱིས་ཡུ་ཁུ་རན་ལ་བཙན་འཛུལ་བྱས་ནས་འཛམ་གླིང་སྟོབས་ཆེན་རྒྱལ་ཁབ་ཚོའི་ནང་ལྟ་ཕྱོགས་ཇི་འདྲ་ཞིག་ཡོད་པ་བརྗོད་ཅི་ལ་དགོས། རྒྱལ་སྤྱིའི་ཁྲིམས་ཁང་གིས་འཛིན་བཟུང་བྱ་དགོས་པའི་ཉེན་བརྡ་བཏང་ཡོད་པ་ཞིག་ལྡི་ལིར་ཚོགས་པའི་ G20 ཚོགས་འདུར་བཅར་ཕོད་དམ། རྒྱ་ནག་དང་རཱ་ཤི་ཡའི་སྲིད་འཛིན་ལྡི་ལིའི་ G20 ཚོགས་འདུར་མ་བཅར་པ་ནི། ནང་ཁུལ་མ་འཆམས་པའི་རྙོག་གླེང་ཞིག་མ་ཡིན་པར། རྒྱལ་ཁབ་དང་རྒྱལ་ཁབ་བར་གྱི་རྩོད་གླེང་དང་དེ་རྒྱལ་སྤྱིའི་གནད་དོན་ཅན་དུ་གྱུར་པས་རེད། ཁྱེད་ཀྱིས་ཆེས་མཐོང་དང་ཡིད་སྨོན་ཤོར་ས་སྟེ། ལྡི་ལིའི་ G20 ཚོགས་འདུར་མ་བཅར་མཁན་གྱི་དཔོན་རིགས་ནི། རྒྱ་ནག་གི་སྲིད་འཛིན་ཞི་ཅིན་ཕིན་དང་རཱ་ཤི་ཡའི་སྲིད་འཛིན་ཕུ་ཊིན་གཉིས་རེད་པཱ། ལར་ནས་དཔལ་ལྡན་སྲིད་སྐྱོང་མཆོག་གི་རྒྱལ་དོན་ཕྱི་བསྐྱོད་དེ་གྲོས་ཚོགས་འཚོགས་རྒྱུར་གཡོལ་བ་ཞིག་ཡིན་ནམ། དཔལ་ལྡན་སྲིད་སྐྱོང་མཆོག་གིས་རྒྱལ་དོན་ཕྱི་བསྐྱོད་དེ་བཞིན་གྲོས་ཚོགས་མུ་མཐུད་ཚོགས་པ་ཡིན་ན། གྲོས་ཚོགས་གྲོལ་བའི་རྗེས་ཏེ་ཕྱི་ཚེས་ ༢༩ ཉིན་ཡིན་པ་དང་། དེ་ཡང་ལོ་གཅིག་གི་སྔོན་ནས་འཆར་གཞི་བསྒྲིགས་ཡོད་སྐོར་དཔལ་ལྡན་ཚོགས་གཙོ་མཆོག་གིས་གསུངས་མི་འདུག་གམ། དེས་ན་དཔལ་ལྡན་སྲིད་སྐྱོང་མཆོག་གིས་ཕྱི་བསྐྱོད་ལས་རིམ་དེས་གྲོས་ཚོགས་འཚོགས་འདོད་མེད་པ་ཇི་ལྟར་བསྒྲུབ་ཐུབ་བམ། ལུས་ལ་གྲྭ་ཆས་གྱོན་པ་ཞིག་གིས་བློ་གཟུ་བོར་མ་གནས་པའི་གཏམ་འདི་འདྲ་བཤད་སྟབས་ཁྱིམ་པ་སུན་འབྱིན་གྱི་ཡོད་པ་རེད།
དཔལ་ལྡན་སྲིད་སྐྱོང་མཆོག་གིས་རྒྱལ་དོན་ཕྱི་བསྐྱོད་ཁྲོད་གནད་ཡོད་མི་སྣར་ཐུག་འཕྲད་སོགས་ཀྱིས་མཚོན་ལས་དོན་མང་པོ་ཞིག་གི་ཐད། ལོ་གཅིག་གི་གོང་ནས་འཆར་གཞི་བསྒྲིགས་ཟིན་ཡོད་པ་མ་ཟད། ཕྱོགས་བསྐྱོད་ཕར་ཚུར་ཀྱི་ལམ་གྲོན་སོགས་ཕྱོགས་མང་པོ་ཞིག་སྔོན་ཚུད་ནས་བཀོད་བསྒྲིགས་བྱས་ཟིན་ཡོད་སྟབས། དེ་དག་ལ་འགྱུར་བ་གཏང་ཆོག་ཆོག་ཅིག་མེད་པ་དང་། གལ་སྲིད་འགྱུར་བ་བཏང་ན། དཔལ་འབྱོར་དང་། ལས་དོན་མང་པོ་ཞིག་གི་ཐད་ང་ཚོར་གྱོང་གུད་ཕོག་གི་ཡོད་པ་མ་རེད་པེ། འོ་ན་གྱོང་གུད་དེ་ཁྱེད་རང་ཚོར་དགོས་རྒྱུ་དེ་ཡིན་ནམ།
མཆན། གོང་བཀོད་རྩོམ་ཡིག་དེ་རྩོམ་པ་པོའི་དགོངས་ཚུལ་ཡིན་པ་ལས་འདི་ག་གསར་ཁང་གི་ལྟ་ཚུལ་ཡིན་པས་མ་ཁྱབ།
གནས་ལུགས་རྒྱུ་མཚན་ལྡན་པའི་རྩོམ་ཡིག་ཡག་པོ་ཞིག་བྲིས་འདུག་པས་ཐུགས་རྗེ་ཆེ་ཞུ་འདོད་བྱུང་། ང་རང་མི་རྒྱུད་ཁམས་པ་ཞིག་ཡིན། ཡིན་ནའང་། ད་ཡོད་ཆོས་རྒྱུད་དང་མདོ་སྟོད་ཆོལ་ཁའི་སྤྱི་འཐུས་དེ་ཚོའི་བྱེད་སྟངས་ནི་དངོས་གནས་ཧ་ལས་པའི་ཐབས་སྐྱོ་པོ་དང་ངོ་ཚ་དགོས་པ་ཞིག་རེད་འདུག དཀོན་མཆོག་གིས་མཁྱེན།
རྩོམ་ཡིག་འདི་དུས་ཐོག་ཆར་བ་རང་རེད། བཀའ་དྲིན་ཆེ། ཧ་ཅང་ཡག་པོ་བྲིས་འདུག
སྤྱི་འཐུས་འགའ་ཤས་དགེ་བཤེས་ཀྱི་ཤེས་ཚད་མཐོ་པོ་དང་བྱང་ཆུབ་སེམས་དཔའི་སྡོམ་པ་ཡོད་པ་ཡིན་ན་དེ་ཚོས་དམིགས་བསལ་ལྷན་ཁང་དེ་བཞིན་ཞི་མཐུན་ཞི་འཇམ་ཡོང་བའི་ཐབས་ལམ་བསྐྲུན་དགོས་པའི་ལམ་སྟོན་གནང་དགོས་པ་ཞིག་ཡིན་ན་ཡང་། རང་ཡང་གློ་བུར་གྱི་ཆགས་སྡང་ཕྱོགས་ལྷུང་གི་དབང་དུ་ཕེབས་ནས་ཕྱི་དགའ་ནང་སྡུག་རྒྱུའི་བཀའ་མོལ་རྒྱུ་མཚན་མེད་པ་མ་ཟད་དཀྲོག་གཏམ་འདྲ་གསུངས་ནས་སྤྱི་ཚོགས་ནང་ཟིང་ཆ་ཆེན་པོ་བཟོ་ཡི་འདུག་པ་དེ་འདྲ་གནང་བ་ནི་སྤྱི་འཐུས་ཀྱི་དམ་བཅའ་དང་རང་གི་སྡོམ་དང་འགལ་གྱི་ཡོད་པ་ཚང་མས་ཤེས་གསལ་རེད། དེ་བས་དགོངས་པ་ཡག་པོ་བཞེས་ཤེས་མཁན་ཡིན་ན་གཟབ་གཟབ་གནང་དགོས་འདུག །
ལྷག་པར་གནས་ཚུལ་གང་ཡིན་ལ་རྩད་གཅོད་མ་གནང་བར་རྒྱ་་དམར་གྱི་དཔོན་པོའི་ལས་སྟངས་ལ་བསྔགས་བརྗོད་དང་རང་གི་སྲིད་སྐྱོང་ལ་སྐྱོན་བརྗོད་གནང་བ་ཕྱི་ནང་དབྱེ་འབྱེད་མི་ཤེས་པ་དང་བཟང་ངན་ལ་མ་གཟིགས་པར་རང་ཡུལ་སྟོང་པར་བཞག་ནས་མི་ཡུལ་འོད་ཀྱིས་འགེང་པའི་གཏམ་མ་རེད་དམ། གང་ལྟར་སོ་སོའི་དམ་བཅའ་དང་སྡོམ་པ་དང་མ་འགལ་ཙམ་གནང་ན་སྤྱི་དང་གཞན་ལ་མ་ཕན་ནའང་རང་ལ་མི་གནོད་པའི་དགོས་པ་མེད་དམ་སྙམས།
རྩོམ་ཡིག་དཔེ་མེད་ཅིག་བྲིས་འདུག ཐུགས་རྗེ་ཆེ། རྩོམ་ཡིག་འདི་གོ་བོ་བློ་བཟང་ཕན་བདེ་དང་། རྒྱལ་གདོང་ཕུར་བ་རྡོ་རྗེ་སོགས་ཀྱིས་མ་བསམས་ཧམ་བརྗོད་བཤད་སྟངས་ལ། བདེན་པའི་ཚངས་ཐིག་ཅིག་རེད་འདུག