བོད་མི་ཚུལ་ཁྲིམས་ལ་ལོ་གཉིས་ཀྱི་བཙོན་འཇུག་ཁྲིམས་ཐག་བཅད།

རྒྱ་ནག་གཞུང་གིས་བོད་མི་ཚུལ་ཁྲིམས་ལགས་ཀྱིས་༧གོང་ས་རྒྱལ་བ་རིན་པོ་ཆེ་མཆོག་གི་སྐུ་པར་ཉར་བ་དང་ཁ་བྲལ་ལ་ངན་འབྲེལ་བྱས་པའི་ཉེས་མིང་གཡོགས་ནས་གསང་སྟབས་ཀྱིས་ལོ་གཉིས་ཀྱི་བཙོན་འཇུག་ཁྲིམས་ཐག་བཅད་ཡོད་འདུག

  འདས་ལོའི་ཕྱི་ཟླ་ ༧ པའི་ནང་རྒྱ་ནག་གཞུང་གིས་བོད་རྔ་བ་ཁྱུང་མཆུ་རྫོང་ཚ་རུ་མ་ཡུལ་ཚོ་ནས་ཡིན་པའི་བོད་རིགས་ན་གཞོན་ཚུལ་ཁྲིམས་ལགས་ཀྱིས་ཁ་པར་ནང་དུ་༧གོང་ས་རྒྱལ་བ་རིན་པོ་ཆེ་མཆོག་གི་སྐུ་པར་ཉར་བའི་རྐྱེན་གྱིས་འཛིན་བཟུང་བཀག་ཉར་ཟླ་གཉིས་ལྷག་བྱས་མཐར། འདི་ལོའི་ཕྱི་ཟླ་ ༤ པའི་ནང་རྔ་བ་རྫོང་མི་དམངས་ཁྲིམས་ཁང་ཟེར་བས་ཁོང་ལ་གསང་སྟབས་ཀྱིས་༧རྒྱལ་བ་རིན་པོ་ཆེ་མཆོག་གི་སྐུ་པར་ཉར་བ་དང་ཁ་བྲལ་བར་ངན་འབྲེལ་བྱས་པའི་ནག་ཉེས་གཡོགས་ནས་ལོ་གཉིས་ཀྱི་བཙོན་འཇུག་ཁྲིམས་ཐག་བཅད་དེ། ད་ལྟར་སི་ཁྲོན་ཞིང་ཆེན་གཡག་རྔ་བཙོན་ཁང་(雅安监狱)དུ་བཅུག་ཡོད་འདུག 

 འབྲེལ་ཡོད་བོད་མི་ཞིག་གིས་འདི་གའི་གསར་འགོད་པར། ཚུལ་ཁྲིམས་ཀྱིས་རང་ཉིད་ཀྱི་འཕྲིན་ཕྲན་རྒྱབ་ལྗོངས་སུ་༧གོང་ས་རྒྱལ་བ་རིན་པོ་ཆེ་མཆོག་གི་སྐུ་པར་ཞིག་སྤེལ་བར་བརྟེན།  ཕྱི་ལོ་ ༢༠༢༢ ཟླ་༧ ནང་ཁྱུང་མཆུ་རྫོང་ཉེན་རྟོག་པས་ཁོང་འབོད་འགུག་དང་འདྲི་གཅོད་མང་པོ་བྱས་ནས་ཁ་པར་སྔོག་སྐབས། ཁ་པར་ནང་དུ་༧གོང་ས་རྒྱལ་བ་རིན་པོ་ཆེ་མཆོག་གི་སྐུ་པར་ཉར་ཡོད་པས། ཁོ་རང་ཁ་བྲལ་བར་འབྲེལ་བ་འདུག་ཟེར་ནས་དུས་ཡུན་ཟླ་གཉིས་རིང་བཀག་ཉར་འདྲི་གཅོད་བྱས་སྐོར་དང་།  ཕྱི་ལོ་༢༠༢༣ ལོའི་ལོ་སར་ཚེས་༣ ཉིན་རྒྱ་ནག་གཞུང་གི་ཉེན་རྟོག་པས་བསྐྱར་དུ་བཀག་ཉར་བྱས་ཏེ། ཕྱི་ལོ་ ༢༠༢༣ ཟླ་ ༤ ནང་རྔ་བ་རྫོང་མི་དམངས་ཁྲིམས་ཁང་ཟེར་བས། ཁོ་ལ་༧རྒྱལ་བ་རིན་པོ་ཆེ་མཆོག་གི་སྐུ་པར་ཉར་བ་དང་ཁ་བྲལ་བར་ངན་འབྲེལ་བྱས་པའི་ཉེས་འཛུགས་འོག་མི་ལོ་གཉིས་ཀྱི་བཙོན་འཇུག་ཁྲིམས་ཐག་བཅད་ཡོད་ཀྱང་། དེང་སྐབས་བོད་ནང་དུ་དམ་དྲག་ཧ་ཅང་ཆེ་བའི་ཁར། ཕྱི་སྡོད་བོད་མི་རྣམས་ལ་འབྲེལ་བ་བྱ་རྒྱུ་དམ་དྲག་ཆེན་པོ་ཡིན་པས། གནས་ཚུལ་ཕྱིར་བསྒྲགས་བྱ་རྒྱུ་མ་བྱུང་སྐོར་འགྲེལ་བརྗོད་གནང་བྱུང་།

ཡང་འབྲེལ་ཡོད་བོད་མི་གཞན་ཞིག་གིས། ཚུལ་ཁྲིམས་ལགས་ཀྱི་ནང་མི་དང་སློབ་གྲོགས་ཁ་ཤས་ལྟ་རུ་ཕྱིན་ཡོད་ཀྱང་ཁོང་ཚོ་ཐུག་འཕྲད་བྱེད་དུ་བཅུག་མེད་སྐོར་དང་། ཚུལ་ཁྲིམས་ལགས་བོད་ཡིག་དང་། དབྱིན་ཡིག རྒྱ་ཡིག་བཅས་ཡག་པོ་ཡོད་པའི་ན་གཞོན་ཤེས་ཡོན་ཅན་ཞིག་ཡིན་པ་མ་ཟད། རྒྱུན་དུ་ནས་སྐད་འཕྲིན་རྒྱབ་ངོས་སུ་༧གོང་ས་རྒྱལ་བ་རིན་པོ་ཆེ་མཆོག་གི་སྐུ་པར། དབུ་མའི་ལམ་སྐོར་བརྒྱུད་སྤེལ་བྱེད་མཁན་ཞིག་ཀྱང་ཡིན་སྐོར་འགྲེལ་བརྗོད་གནང་སོང་། 

  བོད་རིགས་ན་གཞོན་ཚུལ་ཁྲིམས་ལགས་ནི་ཟི་ཁྲོན་ཞིང་ཆེན་རྔ་བ་ཁུལ་ཁྱུང་མཆུ་རྫོང་ཚ་རུ་མ་ཡུལ་ཚོ་ནས་ཡིན་ཞིང་། ཕ་མིང་ལ་ཨ་སྤེན་དང་མ་མིང་ལ་ཨ་ཁོ་མ་ཡིན་འདུག ཁོང་གིས་བོད་ཡིག་གི་རྩོམ་རིག་ཆེད་སྦྱོང་གནང་བ་མ་ཟད། རྒྱ་ཡིག་དང་དབྱིན་ཡིག་ཀྱང་ཡག་པོ་ཤེས་ཀྱི་ཡོད་འདུག་ལ། སྐད་འཕྲིན་གཙོས་ཤེས་ཡོན་པའི་སྡེ་ཁག་སོགས་སུ་རྩོམ་རིག་གི་སྐོར་ནས་གཏམ་བཤད་མང་པོ་སྤེལ་མྱོང་ཡོད་འདུག 

གསར་འགོད་པ། དཔལ་ལྡན། 

རྩོམ་སྒྲིག་པ། པདྨ་མཚོ།