ཨོ་གླིང་རྒྱལ་ཡོངས་བོད་རིགས་སྤྱི་མཐུན་ཚོགས་པའི་འགན་འཛིན་ལྷན་ཚོགས་ཐོག་རྒྱ་ནག་གཞུང་གིས་གཉེན་འཕྲད་ལྟ་སྐོར་ལ་ཁ་གཡར་ནས་མགོ་སྐོར་གཏོང་བཞིན་པར་རང་རིགས་བོད་མི་ཡོངས་ནས་ལངས་ཕྱོགས་བརྟན་པོས་དོགས་ཟོན་དང་ཡིད་གཟབ་གནང་གལ་ཆེ་བའི་འབོད་སྐུལ་གནང་འདུག
ཟླ་འདིའི་ཕྱི་ཚེས་ ༡༤ དང་ ༡༥ ཉིན་ཨོ་གླིང་ཝཱ་གྷཱ་ཝཱ་གྷའམ་བོད་དགའ་བོད་རིགས་མཐུན་ཚོགས་ཀྱི་གོ་སྒྲིག་འོག ས་གནས་དེར་ཨོ་གླིང་རྒྱལ་ཡོངས་བོད་རིགས་སྤྱི་མཐུན་ཚོགས་པའི་འགན་འཛིན་ལྷན་ཚོགས་ཐེངས་བདུན་པ་འཚོགས་ཡོད་པ་དང་། ཚོགས་ཐོག་ཏུ་སྐུ་མགྲོན་གཙོ་བོ་ཨོ་གླིང་སྐུ་ཚབ་དོན་གཅོད་ཀརྨ་སེང་གེ་ལགས་དང་། བོད་མི་མང་སྤྱི་འཐུས་རྡོ་རིང་བསྟན་འཛིན་ཕུན་ཚོགས་ལགས་རྣམ་གཉིས་ཀྱི་དབུས་འགན་འཛིན་ལྷན་ཚོགས་ཀྱི་ཚོགས་མི་ ༡༥ མཉམ་ཞུགས་གནང་ཡོད་འདུག་ལ། ཐེངས་འདིའི་འགན་འཛིན་ལྷན་ཚོགས་ཐོག་རྒྱ་ནག་གཞུང་གིས་བྱེད་ཐབས་སྣ་ཚོགས་ཀྱི་ཐོག་ནས་བཙན་བྱོལ་བོད་མི་རྣམས་ལ་བསླུ་བྲིད་གཏོང་བཞིན་པ་དེའི་འོག་ཏུ་མི་ཚུད་པར་ཡིད་གཟབ་དགོས་པའི་གལ་ཆེའི་འབོད་སྐུལ་གསལ་བསྒྲགས་ཤིག་གནང་འདུག
ཨོ་གླིང་རྒྱལ་ཡོངས་བོད་རིགས་མཐུན་ཚོགས་ཀྱི་ཚོགས་གཙོ་རྔ་བ་ཆོས་འཛིན་ལགས་ཀྱིས་འདི་གའི་གསར་འགོད་པར། ཨོ་གླིང་རྒྱལ་ཡོངས་བོད་རིགས་སྤྱི་མཐུན་ཚོགས་པའི་ངོས་ནས་འདི་འདྲའི་གཞེན་སྐུལ་ཞུ་དགོས་པ་ཧ་ཅང་གལ་ཆེན་པོ་མཐོང་བཞིན་ཡོད་པས། སྤྱི་ཡོངས་ཀྱི་ཐོག་ནས་འབོད་སྐུལ་གསལ་བསྒྲགས་ཤིག་སྤེལ་དགོས་འཁེལ་བ་རེད། སྤྱིར་རྒྱལ་ཁབ་ཤོར་ནས་བཙན་བྱོལ་དུ་འབྱོར་ཡོད་པའི་མི་རིགས་ཤིག་ལ་མཚོན་ན། རང་ཉིད་ཀྱི་མི་རིགས་ལ་བཙན་འཛུལ་དང་གཉའ་གནོན་བྱས་པའི་ལོ་རྒྱུས་བརྒྱུད་རིམ་དང་། མ་འོངས་པར་སྲིད་ཇུས་གང་འདྲ་ལག་བསྟར་བྱས་ཏེ་དབང་བསྒྱུར་བྱེད་བཞིན་པ་ཤེས་རྟོགས་བྱུང་དགོས་པ་གལ་ཆེན་པོ་རེད། རྒྱ་ནག་གཞུང་གིས་དངོས་ཤུགས་བརྒྱུད་གསུམ་ནས་བོད་ཀྱི་སྐད་ཡིག་རིག་གཞུང་དང་བཅས་རྩ་མེད་གཏོང་བའི་སྲིད་ཇུས་ལག་བསྟར་བྱེད་བཞིན་པ་མངོན་གསལ་གྱི་གནས་སྟངས་ཤིག་ཡིན་པ་དང་། ད་ལྟའི་ཆར་ཕྱི་རྒྱལ་ཁག་ཏུ་རྒྱ་ནག་འཐབ་ཕྱོགས་གཅིག་གྱུར་ཁང་གིས་ཆེད་དམིགས་བོད་པའི་ཚོགས་སྡེ་ཁག་ལྟ་སྐོར་དུ་འཁྲིད་པའི་བསླུ་བྲིད་ཀྱི་གནས་སྟངས་ཤིག་འབྱུང་བཞིན་ཡོད་ཅིང་། བོད་པ་ཚང་མས་མགོ་བསྐོར་བསླུ་བྲིད་དེ་འདྲའི་རིགས་ནང་མ་ཚུད་པར་ལངས་ཕྱོགས་བརྟན་པོ་ཞིག་འཛིན་པའི་འོས་འགན་ཡོད་སྟབས། ཨོ་གླིང་རྒྱལ་ཡོངས་བོད་རིགས་སྤྱི་མཐུན་ཚོགས་པའི་ཁྱབ་ཁོངས་ཀྱི་མི་མང་རྣམས་རྒྱ་གཞུང་གི་བསླུ་བྲིད་ཀྱི་མགོ་བསྐོར་འོག་ཏུ་མི་ཚུད་པར་གསལ་བསྒྲགས་སྤེལ་བ་ཞིག་ཡིན། མ་འོངས་པར་མཐུན་ཚོགས་ཀྱི་ངོས་ནས་རྒྱ་གཞུང་གིས་བོད་ཐོག་ཏུ་ལག་བསྟར་བྱེད་བཞིན་པའི་སྲིད་ཇུས་ཁག་ལ་དུས་དང་སྐབས་ལ་བསྟུན་ནས་མི་མང་ལ་གོ་རྟོགས་སྤེལ་བའི་ལས་དོན་བྱེད་ཕྱོགས་ཤིག་འཛིན་བཞིན་ཡོད་ཅེས་འགྲེལ་བརྗོད་གནང་བྱུང་།
ཨོ་གླིང་རྒྱལ་ཡོངས་བོད་རིགས་སྤྱི་མཐུན་ཚོགས་པའི་འབོད་སྐུལ་ནང་དུ། ཕྱི་ལོ་ ༡༩༥༩ ལོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བཙན་བྱོལ་དུ་ཕེབས་རྗེས། རྒྱ་གར་འཕགས་པའི་ཡུལ་དུ་བཙན་བྱོལ་བོད་གཞུང་བཙུགས་ཏེ་བོད་དོན་བདེན་མཐའ་གསལ་ཐབས་དང་། བོད་མིའི་སྤྱི་ཚོགས་བདེ་དོན་བཅས་ལ་བློ་ཡུལ་དུ་ཤོང་དཀའ་བའི་བཀའ་དྲིན་བསྐྱངས་པ་མ་ཟད། བོད་མིའི་རྩ་དོན་ལ་འབད་པ་གནང་མཁན་ཆབ་སྲིད་བཙོན་ཟུར་དང་འབྲེལ་ཆགས་འབྲེལ་ཡོད་རྣམས་ལའང་དམིགས་བསལ་མཐུན་སྦྱོར་གནང་ཡོད་ཀྱང་། ད་ཆ་རྒྱ་ནག་གཞུང་གིས་ཆེད་དམིགས་བསླུ་བྲིད་ཀྱིས་ཚོགས་བཙུགས་དཔུང་བསྒྲིགས་བྱས་ཏེ་བོད་མི་ཁག་ཅིག་གཉེན་འཕྲད་ལྟ་སྐོར་ལ་ཁ་གཡར་ནས་མགོ་སྐོར་གཏོང་བཞིན་པར་རང་རིགས་སྤུན་ཟླ་ཡོངས་ནས་ལངས་ཕྱོགས་བརྟན་པོས་དོགས་ཟོན་དང་ཡིད་གཟབ་གནང་གལ་ཆེ་བའི་འབོད་སྐུལ་ནན་འདྲོངས་ཞུ་རྒྱུ་ཡིན་ཞེས་བརྗོད་འདུག
རྒྱ་ནག་གཞུང་འབྲེལ་གྱི་གསར་ལམ་དུ་གནས་ཚུལ་སྤེལ་བ་ལྟར་ན། འདི་ལོའི་ཕྱི་ཟླ་ ༨ ཚེས་ ༣༡ ནས་ ༩ ཚེས་ ༣ བར་དུ་རྒྱ་ནག་གི་རྒྱལ་ས་པེ་ཅིན་དུ། ཕྱིར་ལོག་རང་མི་དང་ཕྱིར་སྡོད་རང་མིའི་ཁྱིམ་མིའི་འཐུས་མི་ཚོགས་ཆེན་ཐེངས་ ༡༡ པ་ཟེར་བ་ཞིག་བསྡུས་ཏེ། ཚོགས་ཐོག་ཏུ་ཆེས་ཕྱི་བོར་བཙུགས་པའི་བོད་རང་སྐྱོང་ལྗོངས་ཕྱིར་སྡོད་ཕྱི་འབྲེལ་ནུས་པ་དུས་སྐབས་གསར་པ་ཞིག་ཏུ་བསླེབས་ཡོད་སྐོར་གྱི་ཕྱོགས་བསྡོམས་བྱས་ཡོད་པ་མ་ཟད། འདས་པའི་ལོ་ལྔ་ཡི་ནང་རྒྱ་གར་དང་བལ་ཡུལ། ཨོ་གླིང་། ཨ་རི། སུད་སི་སོགས་ནས་བོད་རིགས་གཉེན་འཕྲད་པ་ ༡༢༠༠ ལྷག་ལ་སྣེ་ལེན་དང་མཛའ་འབྲེལ་ནུས་པ་རྒྱ་སྐྱེད་དེ། ཕྱི་རུ་ཕྱིན། ནང་དུ་བསུ་བའི་ནུས་པ་བཏོན་ཏེ་རྒྱལ་གཅེས་ཕྱིར་སྡོད་རང་མི་དུས་ཆེན་དགའ་སྟོན་ལ་མགྲོན་འབོད་དང་། འབྲེལ་ལམ་སྣ་ཚོགས་བརྒྱུད་དེ་ཕྱི་འབྲེལ་མཛའ་བརྩེའི་ལས་འགུལ་སྤེལ་བ། ཕྱི་རྒྱལ་དུ་ཚོགས་པ་གསར་འཛུགས་བྱེད་པར་རྒྱབ་སྐྱོར་དང་འབྲེལ། ཁོང་ཚོ་བརྒྱུད་ནས་བོད་ཀྱི་ལོ་རྒྱུས་ཡག་པོ་བརྗོད་པ་དང་། བོད་ཀྱི་གཏམ་སྙན་དྲིལ་བསྒྲགས་བྱེད་དུ་འཇུག་གི་ཡོད་པ་སོགས་ཕྱི་རུ་ཕྱིན་པ་ནང་དུ་བསུ་བའི་བྱ་བཞག་ནུས་པ་ལྡན་པ་སྤེལ་བཞིན་ཡོད་སྐོར་འགྲེལ་བརྗོད་བྱས་འདུག
ལོ་ལྟར་བལ་ཡུལ་དང་ཡོ་རོབ། ཨོ་གླིང་སོགས་སུ་རྒྱ་ནག་གཞུང་ཚབ་ཁང་གིས་ཕྱི་སྡོད་རང་མིའི་ལོ་སར་སྤྲོ་ཚོགས་ཟེར་བ་སོགས་བསྡུས་ཏེ་ས་གནས་ཀྱི་བོད་མི་དང་རྒྱ་རིགས་ལ་སྐད་གཏོང་གི་ཡོད་པ་ལྟར། བོད་མི་གང་ཙམ་རེ་མཉམ་ཞུགས་ཀྱང་བྱས་དང་བྱེད་བཞིན་ཡོད་ལ། དེ་བཞིན་བོད་ལ་གཉེན་འཕྲད་དུ་ཕྱིན་པ་རྣམས་ལའང་སྣེ་ལེན་དང་སྦྲགས་དོན་ཚན་ ༣༠ ཡས་མས་ལ་ལན་འདེབས་དང་ཁས་ལེན་བྱེད་དུ་འཇུག་པ་དང་། འཐབ་ཕྱོགས་གཅིག་གྱུར་ཁང་གི་སྤྲོ་ཚོགས་ལ་སྐད་གཏོང་བ་སོགས་དང་། གོང་གི་གཞུང་འབྲེལ་གསར་ལམ་དུ་སྤེལ་བའི་གནས་ཚུལ་ནང་གསལ་ལྟར། དངུལ་བཏང་ནས་ཕྱི་རྒྱལ་དུ་ཚོགས་པ་གསར་འཛུགས་བྱས་ཏེ་རྒྱ་ནག་དམར་ཤོག་གི་ལྟ་བ་དང་ཆབ་སྲིད་དྲིལ་བསྒྲགས་བྱེད་དུ་འཇུག་པ་སོགས་བསླུ་བྲིད་གཏོང་བའི་བྱེད་ཐབས་སྣ་ཚོགས་བེད་སྤྱོད་གཏོང་བཞིན་ཡོད་པ་རེད།
གསར་འགོད་པ། བྱམས་པ་ཚེ་རིང་།
རྩོམ་སྒྲིག་པ། པདྨ་མཚོ།
