འདས་པོ་པདྨ་ཚེ་བརྟན་ལགས་ཀྱི་གློག་བརྙན་གསའ་ལ་བྱ་དགའ་ཐོབ་འདུག 

འདི་ལོའི་ཊོག་ཡོའི་གློག་བརྙན་དུས་སྟོན་སྟེང་བོད་ཀྱི་གློག་བརྙན་འཁྲབ་ཁྲིད་པ་གྲགས་ཅན་འདས་པོ་པདྨ་ཚེ་བརྟན་ལགས་ཀྱི་གློག་བརྙན་གསའ་ལ་གློག་བརྙན་རྩེ་གྲས་ཀྱི་བྱ་དགའ་ཐོབ་ཡོད་འདུག

ཁ་སང་ཕྱི་ཚེས་ ༡ ཉིན་ཕྱི་ལོ་ ༢༠༢༣ ལོའི་ཊོག་ཡོའི་གློག་བརྙན་དུས་སྟོན་ཐེངས་༣༦ པའི་(The 36th Tokyo International Film Festival) སྟེང་བོད་ཀྱི་གློག་བརྙན་འཁྲབ་ཁྲིད་པ་གྲགས་ཅན་འདས་པོ་པདྨ་ཚེ་བརྟན་ལགས་ཀྱི་གློག་བརྙན་གསའ་ལ་གློག་བརྙན་རྩེ་གྲས་ཀྱི་བྱ་དགའ་ཐོབ་ཡོད་ཅིང་། དེ་ནི་ཁོང་གི་འཁྲབ་ཁྲིད་བྱས་པའི་གློག་བརྙན་མཐའ་མ་དེ་ཡིན་པ་རེད།

ཊོག་ཡོ་གློག་བརྙན་དུས་སྟོན་གྱི་བྱ་དགའ་གནང་བའི་མཛད་སྒོ་དེར། བོད་ཀྱི་གློག་བརྙན་གསའ་ཡི་གཙོ་འཁྲབ་མི་སྣ་དང་འཁྲབ་སྟོན་པ་གྲགས་ཅན་སྦྱིན་པ་རྒྱ་མཚོ་ལགས་དང་། ཚེ་བརྟན་བཀྲིས་སོགས་ཕེབས་ཡོད་ཅིང་། སྐབས་དེར་འཁྲབ་སྟོན་པ་སྦྱིན་པ་ལགས་ཀྱིས། གཟེངས་རྟགས་འདི་ནི་དག་པའི་ཞིང་གི་འཁྲབ་ཁྲིད་པ་ཁོང་གི་ཐུགས་བདེ་ཞུ་ཐབས་ཡག་ཤོས་ཤིག་རེད། ཅེས་དང་། དེ་བཞིན་གློག་བརྙན་གསའ་ཡི་ཕབ་སྐྲུན་མཁན་ཀྲིག་ཧའོ་ཡིས། པདྨ་ཚེ་བརྟན་ནི་གཞན་ལ་ངོ་གནོང་མི་དགོས་པའི་རྒྱལ་སྤྱིའི་བོད་ཀྱི་གློག་བརྙན་སྣེ་ཁྲིད་པ་དང་། བོད་ཀྱི་ཡུལ་སྐད་གློག་བརྙན་གྱི་སྲོལ་འབྱེད་མཁན་ཡིན་པ་མ་ཟད། འཁྲབ་ཁྲིད་པ་ཁོང་གིས་སྒྲུང་གཏམ་གསར་རྩོམ་གྱི་ཉམས་མྱོང་དང་། རྩོམ་རིག་ལ་བྱང་ཆ་ཡོད་པའི་ཐོག་ནས་གློག་བརྙན་གསར་རྩོམ་ལ་འཚོ་བཅུད་བྱིན་ཡོད་ལ། ཁོང་གི་ལྷིང་འཇགས་ཀྱི་མ་ཎི་རྡོ་འབུམ། འཚོལ། ཁྱི་རྒན། དེ་ནས་གསའ་ཡི་བར་དུ། གློག་བརྙན་སྐད་བརྡ་དང་རྣམ་པའི་སྟེང་ཐོག་མཐའ་བར་གསུམ་ནས་ཐོད་བརྒལ་བྱས་ཡོད་ལ། གསའ་ནི་འཁྲབ་ཁྲིད་པ་པདྨ་ཚེ་བརྟན་ཁོང་གི་གསར་རྩོམ་ལམ་ཁའི་ཐོད་བརྒལ་ཆེན་པོ་ཞིག་རེད། ཅེས་བརྗོད་ཡོད་འདུག

བོད་ཀྱི་གློག་བརྙན་གསའ་ནི་འདས་པོ་པདྨ་ཚེ་བརྟན་ལགས་ཀྱི་གློག་བརྙན་བརྒྱད་པ་དེ་ཆགས་འདུག་ལ། ཁོང་གིས་སྒྲུང་གཏམ་དེ་ཕྱི་ལོ་ ༢༠༢༠ ལོའི་རིམས་ནད་ཀྱི་སྐབས་སུ་འབྲི་མགོ་བཙུགས་ཤིང་། ཕྱི་ལོ་ ༢༠༢༡ ལོའི་ཟླ་ ༡༠ ནས་བཟུང་ཕབ་སྐྲུན་བྱེད་མགོ་ཚུགས་པ་ཞིག་ཡིན་འདུག་ལ། གློག་བརྙན་འདིའི་ནང་དུ་མི་དང་སྲོག་ཆགས་གཉིས་ཇི་ལྟར་མཉམ་དུ་འཚོ་སྡོད་བྱེད་པའི་སྐོར་གྱི་གཏམ་རྒྱུད་བཤད་ཡོད་པ་དང་། གློག་བརྙན་གྱི་ཕབ་སྐྲུན་བྱ་ཡུལ་ནི་མགོ་ལོག་རྨ་སྟོད་ཀྱི་སྟོང་རི་མཚོ་རྒན་ཉེ་འདབས་ཀྱི་རི་དྭགས་གསའ་རྒྱུན་དུ་འཚོ་སྡོད་བྱ་སའི་ཡུལ་དངོས་སུ་ཕབ་སྐྲུན་བྱས་པ་ཞིག་ཡིན་འདུག  གློག་བརྙན་འདིའི་ནང་དུ་བོད་ཀྱི་གློག་བརྙན་འཁྲབ་སྟོན་པ་སྦྱིན་པ་ལགས་དང་ཚེ་བརྟན་བཀྲ་ཤིས། ཞོང་ཙི་ཆིས་བཅས་ཀྱིས་གཙོ་འཁྲབ་གནང་ཡོད་པ་དང་།  གཞན་བོད་ཀྱི་གློག་བརྙན་འཁྲབ་སྟོན་པ་བློ་བཟང་ཆོས་འཕེལ་དང་། དབང་ཕྱུག་མཚོ། དགེ་འདུན་ཕུན་ཚོགས། ཀུན་བདེ། འཇིགས་བྷ། དཀའ་ཐུབ་ཚེ་རིང་། བདེ་ཆེན་གཡང་འཛོམས། འཇུ་ཁྱུང་ཆེན། ཏང་ཧའོ་ཡོས་སོགས་ཀྱིས་འཁྲབ་སྟོན་ནང་དུ་མཉམ་ཞུགས་གནང་ཡོད་འདུག གློག་བརྙན་དེ་འདི་ལོའི་ཕྱི་ཟླ་ ༧ ཚེས་ ༢༥ ཉིན་ཨེ་ཊ་ལི་རྒྱལ་ཁབ་ཀྱི་ལི་ཌོ་(Lido)གླིང་ཕྲན་དུ། རྒྱལ་སྤྱིའི་གློག་བརྙན་བཟོ་སྐྲུན་མཐུན་ཚོགས་(International Federation of Film Producers Association)ཀྱིས་གོ་སྒྲིག་བྱས་པའི་སྐབས་ ༨༠ པའི་ཝེ་ནི་སི་རྒྱལ་སྤྱིའི་གློག་བརྙན་དུས་སྟོན་( 80th  Venice International Film Festival ) སྟེང་གཟིགས་འབུལ་བྱས་ཡོད་འདུག

གཞན་ཡང་། དེ་སྔོན་འདས་པོ་ཁོང་སྐུ་མ་གྲོངས་པའི་གོང་དུ། མི་ཆ་མེད་(陌生人) ཅེས་པའི་གློག་བརྙན་དེ་བོད་འབའ་ཐང་རྫོང་ཁོངས་ནས་ལེགས་པར་གྲུབ་ཡོད་ཅིང་། དེ་ནི་རྒྱ་ནག་ཧང་ཀྲུའུ་ཆིན་ཙའི་ཙའི་ཟེར་བའི་གློག་བརྙན་བཟོ་སྐྲུན་ཁང་ཞིག་གིས་ཕབ་སྐྲུན་བྱས་འདུག གློག་བརྙན་དེ་པདྨ་ཚེ་བརྟན་ལགས་ཀྱིས་འཁྲབ་ཁྲིད་གནང་སྟེ། བོད་ཀྱི་གླུ་མ་དབང་སྒྲོན་མཚོ་དང་སྦྱིན་པ། དགེ་འདུན་སོགས་ཀྱིས་གཙོ་འཁྲབ་བྱས་པ་ཞིག་ཡིན་འདུག གློག་བརྙན་དེའི་ནང་དུ་སྐྱེས་པ་ཆ་མེད་ཅིག་སྒྲོལ་མ་ཉེར་གཅིག་གི་ཕ་ས་ཡིན་པར་བརྗོད་པའི་བོད་ཀྱི་གྲོང་ཚོ་ཆུང་ཆུང་ཞིག་གི་ནང་དུ་བསླེབས་ཏེ། ཁོང་གིས་སྒྲོལ་མ་འཚོལ་སྐབས་སྒྲོལ་མ་ཞེས་པའི་བུ་མོ་འདྲ་མི་འདྲ་མང་པོར་ཐུག་ཡོད་ཀྱང་། ཁོང་གི་སེམས་གཏིང་དུ་ཡོད་པའི་སྒྲོལ་མ་རྙེད་མ་ཐུབ་པའི་བོད་ཀྱི་དམངས་ཁྲོད་ཀྱི་བཤད་རྒྱུན་དང་འབྲེལ་བ་ཡོད་པའི་གློག་བརྙན་ཞིག་ཡིན་འདུག་ཀྱང་། པདྨ་ཚེ་བརྟན་སྐུ་གྲོངས་རྗེས་ད་བར་གློག་བརྙན་དེའི་སྐོར་ནས་གོ་ཐོས་གང་ཡང་མེད་པར་གྱུར་འདུག

སྐུ་ཞབས་པདྨ་ཚེ་བརྟན་ལགས་ནི་ཕྱི་ལོ་ ༡༩༦༩ ལོར་མཚོ་ལྷོ་ཁྲི་ཀའི་འབྲོག་པའི་ཁྱིམ་ཚང་ཞིག་ཏུ་སྐྱེས་ཤིང་། གློག་བརྙན་འཁྲབ་ཁྲིད་པ་དང་། རྩོམ་པ་པོ། ལོ་ཙཱ་བ་བཅས་ཡིན་ལ། ཕྱི་ལོ་ ༢༠༠༢ ལོར་པེ་ཅིན་གློག་བརྙན་སློབ་གླིང་དུ་གློག་བརྙན་སྐོར་ལ་ཆེད་སྦྱོང་གནང་རྗེས། འཁྲབ་གཞུང་རྩོམ་པ་པོ་དང་འཁྲབ་ཁྲིད་པ་བཅས་ཀྱི་ལས་ཀ་གཅིག་ལྕོགས་སུ་གནང་།   ཁོང་གིས་ད་བར་ལྷིང་འཇགས་ཀྱི་མ་ཎི་རྡོ་འབུམ་དང་འཚོལ། ཁྱི་རྒན་དང་གཡང་མདའ། ཐར་ལོ་སོགས་གློག་བརྙན་རིགས་ ༡༤ ལྷག་འཁྲབ་འཁྲིད་གནང་སྟེ་བོད་ཕྱི་ནང་གཉིས་ནས་དགའ་བསུ་ཆེན་པོ་ཐོབ་ཡོད་པ་མ་ཟད། རྒྱལ་སྤྱིའི་གློག་བརྙན་དུས་སྟོན་ཆེ་ཁག་ནས་གཟེངས་རྟགས་ཁག་ཅིག་ཀྱང་ཐོབ་སྟེ། བོད་པ་རང་གིས་བཟོས་པའི་གློག་བརྙན་གྱིས་རྒྱལ་སྤྱིའི་སྐད་གྲགས་ཅན་གྱི་གློག་བརྙན་ཁྲོམ་རའི་ནང་གོམ་པ་དང་པོ་སྤོས་ཡོད་པ་རེད། དེ་བཞིན་ཁོང་གི་གློག་བརྙན་ཐར་ལོ་དང་ཁྱི་རྒན། ལག་དམར།  དབུགས་ལྒང་བཅས་ལ་རྒྱལ་སྤྱིའི་ཝཱ་ནེ་སི་(Venice) དང་། ཨ་རིའི་བྷིར་ཀི་ལིན་(Brooklyn)། ཐའེ་ཝན་དང་རྒྱ་ནག་གི་གློག་བརྙན་དུས་སྟོན་སོགས་ཀྱི་ཐོག་གཟེངས་རྟགས་བྱ་དགའ་ཐོབ་སྟེ། རྒྱལ་སྤྱིའི་སྟེང་པདྨ་ཚེ་བརྟན་ལགས་ནི་བོད་ཀྱི་གློག་བརྙན་འཁྲབ་འཁྲིད་པའི་ཚབ་མཚོན་མི་སྣ་ལྟ་བུར་གྱུར་ཡོད་ལ། ཁོང་གི་གློག་བརྙན་གྲགས་ཅན་ཐར་ལོ་ལ་རྒྱ་ནག་དང་རྒྱལ་སྤྱིའི་གཟེངས་རྟགས་མི་འདྲ་བ་ ༡༢ ཐོབ་ཡོད་འདུག

གསར་འགོད་པ། དཔལ་ལྡན།

རྩོམ་སྒྲིག་པ། སྐལ་བཟང་སྦྱིན་པ།