རྒྱ་ནག་གཞུང་གིས་བོད་རང་སྐྱོང་ལྗོངས་ཟེར་བ་དང་མདོ་སྟོད་སྨད་གཉིས་ཀྱི་ས་གནས་ཁག་གི་བོད་ཡིག་གི་དཔར་སྐྲུན་མང་དག་ཅིག་ལ་དམ་དྲག་ཤུགས་ཆེན་བྱེད་མུས་ཡིན་པ་མ་ཟད་ལྷག་པར་མི་སྒེར་གྱི་དཔེ་དེབ་པར་སྐྲུན་བྱེད་པར་དམ་དྲག་ཤུགས་ཆེན་བྱེད་མུས་ཡིན་འདུག
ཟླ་འདིའི་ཕྱི་ཚེས་ ༡༠ ཉིན་རྒྱ་ནག་གཞུང་གིས་བོད་སྐོར་གྱི་རྒྱབ་ཤ་དཀར་པོའི་དེབ་ཅིག་བཏོན་ཏེ། བོད་ལྗོངས་སུ་བོད་ཡིག་དེབ་གྲངས་ཁྲི་ ༤ དང་ཕྱེད་ཀ་ལྷག་བཏོན་དུ་བཅུག་ཡོད་པ་དང་། བོད་ཡིག་དུས་དེབ་དང་བོད་ཡིག་ཚགས་པར་མི་འདྲ་བ་ ༣༠ མ་ཟིན་ཙམ་ཡོངས་ཁྱབ་ཏུ་འདོན་གྱི་ཡོད་སྐོར་བསྒྲགས་ཡོད་ཀྱང་། ཉེ་བའི་ལོ་ཤས་ནང་བོད་ནང་གི་པར་བསྐྲུན་ཁང་དག་ལ་སྔར་ལྷག་སྟངས་འཛིན་དང་ཞིབ་བཤེར་ནན་པོ་བྱེད་ཀྱི་ཡོད་པ་མ་ཟད། མི་སྒེར་གྱི་དཔེ་དེབ་དང་ལྷག་པར་དུ་སྐད་གྲགས་ཅན་གྱི་བོད་རིགས་རྩོམ་པ་པོ་རྣམས་ཀྱི་དེབ་ཀྱི་ནང་དོན་ཐད་ཧ་ཅང་དམ་དྲག་དང་དོགས་ཟོན་ཆེན་པོ་བྱེད་བཞིན་འདུག
དེའི་ཐད་བོད་ནང་གི་རྩོམ་པ་པོ་གྲགས་ཅན་ཞིག་གིས་འདི་གའི་གསར་འགོད་པར། ཉེ་ལམ་བོད་ནང་གི་རྩོམ་པ་པོ་གྲགས་ཆེན་དང་ལྷག་པར་དུ་རྒྱ་ནག་གཞུང་གིས་འཛིན་བཟུང་བྱས་མྱོང་བའི་རྩོམ་པ་པོ་དག་ལ་འབྲེལ་བ་ཡོད་པའི་དཔེ་སྐྲུན་ཁང་དག་ལ་དམ་དྲག་ཧ་ཅང་ཆེན་པོ་བྱེད་མུས་ཡིན་པ་མ་ཟད། རྒྱ་ནག་གཞུང་གི་བཀའ་འཁྲོལ་མེད་པར་དཔེ་དེབ་པར་སྐྲུན་གཏན་ནས་བྱ་མི་ཆོག་པའི་ཁར། དཔེ་དེབ་ཀྱི་ནང་དོན་ལ་བཀག་རྒྱ་ཆེན་པོ་ཡོད་སྐོར་དང་། དེ་བཞིན་པར་སྐྲུན་ཁང་དེ་དག་གིས་མི་སྒེར་གྱི་དཔེ་དེབ་པར་སྐྲུན་དང་འགྲེམས་སྤེལ་སོགས་བྱེད་པར་དམ་དྲག་ཆེན་པོ་ཡོད་སྐོར་སོགས་བརྗོད་བྱུང་།
བོད་རང་སྐྱོང་ལྗོངས་ཟེར་བའི་ནང་བོད་ཡིག་དཔེ་དེབ་པར་སྐྲུན་ཁང་དག་ལ་དམ་དྲག་ཡོད་པའི་ཐད་འབྲེལ་ཡོད་བོད་མི་གཞན་ཞིག་གིས་འདི་གའི་གསར་འགོད་པར། དེང་གི་ཆར་རྒྱ་ནག་གཞུང་གིས་བོད་རང་སྐྱོང་ལྗོངས་ཟེར་བའི་ནང་གི་དཔེ་སྐྲུན་ཁང་མང་དག་ཅིག་ལ་གཞུང་གིས་མ་དངུལ་ཉུང་དུ་བཏང་ཡོད་པ་མ་ཟད། བོད་ཀྱི་སྐད་ཡིག་དང་ལོ་རྒྱུས་སོགས་དང་འབྲེལ་བའི་དཔེ་དེབ་རིགས་པར་སྐྲུན་བྱེད་པར་དམ་དྲག་དང་། བོད་བསྒྱུར་བྱས་ཡོད་པའི་རྒྱ་ནག་དམར་ཤོག་གི་ལོ་རྒྱུས་དང་རྒྱ་ནག་གི་མགོ་ཁྲིད་ཚོས་འཇོན་ཡོད་ལུགས་ཀྱི་ལོ་རྒྱུས་སོགས་པར་སྐྲུན་བྱེད་བཅུག་གི་ཡོད་སྐོར་དང་། བོད་ཀྱི་སྐད་ཡིག་གཙོས་དམིགས་བསལ་ནང་ཆོས་དང་འབྲེལ་བའི་དཔེ་དེབ་པར་སྐྲུན་བྱེད་པར་དམ་དྲག་ཤུགས་ཆེན་བྱེད་ཀྱི་ཡོད་སྐོར་བརྗོད་བྱུང་།
ཡང་ཁོང་གིས། རྒྱ་ནག་གཞུང་གིས་བོད་རང་སྐྱོང་ལྗོངས་ཟེར་བའི་ནང་བོད་ཀྱི་སྐད་ཡིག་དང་འབྲེལ་བའི་དཔེ་དེབ་མང་པོ་ཞིག་འགྲེམས་སྤེལ་བྱེད་ཀྱི་ཡོད་ལུགས་བཤད་ཀྱི་ཡོད་ཀྱང་། དོན་དངོས་ཐོག་དཔེ་དེབ་དེ་དག་རྒྱ་ནག་གི་ལྟ་བ་དང་ལངས་ཕྱོགས་སོགས་དང་མཐུན་པ་ཤ་སྟག་ཅིག་ཡིན་པ་ལས། བོད་ཀྱི་ཆོས་རིག་དང་འབྲེལ་བ་ཡོད་པ་ཁག་པོ་རེད། དཔེར་ན། “རྒྱ་ནག་གཞུང་ལ་བསྟོད་གླུ་” དང་”གུང་ཁྲན་ཏང་མེད་ན་ཀྲུང་ཀོ་གསར་པ་མེད་པ། “ མི་མང་གིས་རྒྱ་ནག་གི་ཁྲིམས་ལ་བརྩི་བཀུར་བྱ་དགོས་པ་”ཡིན་སྐོར་སོགས་བརྗོད་བྱུང་།
རྒྱབ་ཤ་དཀར་པོའི་ནང་དུ་བཀོད་པའི་བོད་ཡིག་གི་ཚགས་པར་དང་དཔེ་དེབ་དེ་དག་གི་བརྗོད་བྱ་ནི། ཞི་ཅིན་ཕིན་གྱི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་བསམ་བློ་དང་ཚོགས་ཆེན་བཅོ་བརྒྱད་བཅུ་དགུ། ཉི་ཤུ་བཅས་ཀྱི་དགོངས་དོན་ཟེར་བ། དེ་བཞིན་རྒྱལ་གཅེས་ཆོས་གཅེས་ཀྱི་བསམ་བློ་ཡར་སྐུལ་ཟེར་བ་སོགས་ཆབ་སྲིད་ཀྱི་ལྟ་བ་ལངས་ཕྱོགས་དྲིལ་བསྒྲགས་ཁོ་ན་ཡི་དུས་དེབ་དང་ཚགས་པར་རྐྱང་རྐྱང་ཡིན་ལ། བོད་ཡིག་གི་གསར་འགྱུར་དྲ་བ་རྣམས་ཀྱང་ཆབ་སྲིད་དྲིལ་བསྒྲགས་དང་ཡུལ་སྐོར་བའི་དང་བ་འདྲེན་པའི་མཐོ་སྒང་གི་མཛེས་ལྗོངས་དང་དྭངས་གཙང་གི་ཞིང་འབྲོག་ཐོན་རྫས་དྲིལ་བསྒྲགས་སོགས་ཀྱིས་ཁེངས་བསྡད་ཡོད་པ་རེད་ལ། མང་ཚོགས་རང་བཞིན་གྱི་ཐོག་ནས་ལྟ་ཉན་བྱེད་མཁན་དང་བེད་སྤྱོད་བྱེད་མཁན་ཆེས་མང་བའི་མགྱོགས་འཕྲིན་སོགས་ཀྱི་ནང་དུའང་བོད་ཡིག་བོད་སྐད་བེད་སྤྱོད་བཏང་བ་ཡིན་ན་སྒོ་བརྒྱབ་འགྲོ་བ་སོགས་ཀྱི་དཀའ་ངལ་འཕྲད་མུས་ཡིན་པ་རེད།
འདི་གའི་གསར་འགོད་པས་རྒྱ་ནག་གཞུང་གི་འབྲེལ་ཡོད་ལས་ཁུངས་ནས་གསང་བའི་ཐོག་ནས་བོད་ཡིག་དཔེ་དེབ་ལ་ཆབ་སྲིད་ཀྱི་གནད་དོན་ཡོད་མེད་ལྟ་ཞིབ་བྱེད་དུ་བཅུག་མྱོང་བའི་རྩོམ་པ་པོ་ཞིག་ལ་སྐད་ཆ་དྲིས་ཏེ་རྒྱུས་ལོན་བྱུང་བ་ལྟར་ན། སྒེར་གྱི་དཔེ་དེབ་སོགས་གང་ཡིན་ཡང་ཐོག་མར་རྩོམ་པ་པོས་དཔེ་སྐྲུན་ཁང་ལ་དེབ་ཀྱི་ནང་དོན་དང་འགྲོ་གྲོན། ཚོང་འགྲེམས་བྱ་ཡུལ་སོགས་ཞིབ་ཕྲའི་གནས་ཚུལ་སྤྲད་རྗེས། དཔེ་སྐྲུན་ཁང་གིས་ཞིང་ཆེན་གསར་འགྱུར་འགོད་སྤེལ་རླུང་བརྙན་འཕྲིན་ལྟེ་གནས་ཁང་དུ་དཔེ་དེབ་དེ་པར་སྐྲུན་བྱེད་ཆོག་པའི་སྙན་ཞུ་འབུལ་དགོས་པ་དང་། ལྟེ་གནས་དེས་གསང་བའི་ཐོག་ནས་བོད་ཡིག་ཡག་པོ་ཡོད་མཁན་ཞིག་ལ་དེབ་དེའི་ནང་དོན་ཐད་ཆབ་སྲིད་ཀྱི་གནད་དོན་ཡོད་མེད་ལྟ་ཞིབ་བྱ་དགོས་པའི་བཀོད་མངག་གཏོང་བ་མ་ཟད། ཆབ་སྲིད་ཀྱི་གནད་དོན་ཡོད་ཚེ་རྟགས་བརྒྱབ་ནས་ཡར་སྤྲོད་པ་མ་གཏོགས་བཟོ་བཅོས་སོགས་བྱེད་པའི་ཐོབ་ཐང་མེད་པ་རེད། ལས་དོན་དེའི་མགོ་མཇུག་བར་གསུམ་ཚང་མ་གསང་བ་ཡིན་པར་བརྟེན། ལྟ་ཞིབ་ཀྱི་ལས་འགན་དེ་མི་གཅིག་ལ་སྤྲོད་ཀྱི་ཡོད་དང་ཡང་ན་མི་ཁ་ཤས་ཤིག་ལ་སྤྲོད་ཀྱི་ཡོད་གསལ་ཆ་མེད་ཀྱང་། གང་ལྟར་ལྟ་ཞིབ་བྱས་ཏེ་ཆབ་སྲིད་ཀྱི་གནད་དོན་མེད་པ་ཞིག་ཏུ་ངོས་འཛིན་བྱུང་ཚེ་གཞི་ནས་པར་སྐྲུན་གྱི་ཆོག་མཆན་ཐོབ་ཀྱི་ཡོད་པ་ཞིག་ཡིན་འདུག
རྒྱ་ནག་རྒྱལ་ཁབ་གསར་འགྱུར་འགོད་སྤེལ་རླུང་བརྙན་འཕྲིན་སྤྱི་གཉེར་ཁང་གིས་པར་སྐྲུན་དངོས་པོའི་ཁྲོམ་ར་དོ་དམ་གྱི་སྲོལ་ཡིག་ཟེར་བ་ཞིག་ཕྱི་ལོ་ ༢༠༡༦ ཟླ་ ༦ ཚེས་ ༡ ནས་བཟུང་ལག་བསྟར་བྱས་ཏེ། ལས་ཁུངས་དང་མི་སྒེར་སུ་ཞིག་ཡིན་ཡང་ཞིང་ཆེན་དང་རྫོང་། ས་གནས་བཅས་ཀྱི་འབྲེལ་ཡོད་ལས་ཁུངས་ནས་པར་སྐྲུན་དངོས་པོ་ག་རེ་ཡིན་ནའང་ཆོག་མཆན་ངེས་པར་དུ་ཐོབ་དགོས་ལ། རྒྱལ་ཁབ་ཀྱིས་བཀག་སྡོམ་བྱས་པའི་ནང་དོན་ཅན་དང་། ནང་ཁུལ་གྱི་གསང་བའི་ཡིག་ཆ། ཆོག་མཆན་མེད་པའི་ཕྱི་ཕྱོགས་ཀྱི་ཡིག་ཆ་སོགས་ལ་ཆོག་མཆན་གཏན་ནས་སྤྲད་རྒྱུ་མིན་པ་སོགས་གསལ་འདུག
གསར་འགོད་པ། དཔལ་ལྡན།
རྩོམ་སྒྲིག་པ། པདྨ་མཚོ།
