རྫ་ཚེ་རིང་བཀྲ་ཤིས།
ད་ལྟ་རང་དྲ་ལམ་ནས་རྗེ་རྫོང་སར་མཁྱེན་བརྩེ་དང་འབྲེལ་ཏེ་རྫ་ཚེ་སོགས་ཀྱི་ངན་ཇུས་གཏོར་བའི་གཏམ་ཞེས་པ་ཞིག་གཙུག་ལག་སྨྲ་སེང་ཞེས་པའི་མིང་ཐོག་ནས་བྲིས་པ་མཐོང་བས་གསལ་བཤད་ཕྲན་བུ་ཞིག་ཞུ་འདོད་བྱུང་། ལར་གསལ་བཤད་འགའ་ཞིག་ནི་རང་ངོས་ནས་འགན་ཁུར་སྟངས་ཤིག་ལས་ཕ་རོལ་པོས་ངོས་ལེན་དང་ཡིད་ཆེས་ཡོང་བ་ཁོ་ནའི་ཆེད་མིན་མོད། ད་ཐེངས་གི་གླེང་གཞི་འདི་ལ་དོ་སྣང་ཡོད་མཁན་ཚོར་དོགས་སློང་དང་། དཔྱད་གཞིའི་ས་བོན་ཙམ་དུ་དམིགས་པ་ནི་ཡིན་ཆོག །
གཅིག །༽ ངས་སྔ་འགྱུར་རྙིང་མའི་དྲ་ཚོམས་སུ་སྔ་འགྱུར་རྙིང་མའི་ཁྲི་འཛིན་དང་འབྲེལ་བའི་བསམ་ཚུལ་དེ་མ་བཤད་སྔོན་ལ་བོད་གཞིས་བྱེས་ཀྱི་བླ་ཆེན་སུ་གཅིག་ལའང་ངའི་ངོས་ནས་དེའི་སྐོར་བསམ་ཚུལ་ཙམ་ཡང་བཤད་མེད།
གཉིས། ༽ མཁྱེན་བརྩེ་རིན་པོ་ཆེའི་གསུང་ཕྱི་ལ་ཁྱབ་བཞིན་པ་དེ་ངས་ཞུས་པ་ཞིག་མིན་པར་མ་ཟད། ང་སྒེར་ལ་གནང་བ་ཞིག་ཀྱང་མིན། ཁོང་གིས་སུ་ལ་གནང་བ་ཡིན་ད་ལྟའང་ངའི་ངོས་ནས་ཤེས་རྟོགས་གཏན་ནས་མེད།
གསུམ། ༽ ལར་ངས་རིན་པོ་ཆེར་བློ་ཕུད་པའམ་སྐུལ་མ་ཞུས་ནས་རིན་པོ་ཆེར་དགོངས་པ་འཁྲུངས་པ་ཞིག་མིན་པར། སྤྱི་ལོ་ ༢༠༢༠ ལོར་རིན་པོ་ཆེ་རང་གིས་དེའི་ཐད་དགོངས་ཚུལ་གཏིང་ཚུགས་པ་འཁྲུངས་ཡོད་པ་དེ་དབྱིན་ཇིའི་རྩོམ་ཡིག་དེར་གསལ་བས། དེ་རིང་ཆེད་དུ་བོད་བསྒྱུར་གྱིས་སྤྱན་འབུལ་ཞུས་ཡོད། འདིས་རྣམ་པ་ཚོས་མཁྱེན་བརྩེ་རིན་པོ་ཆེའི་དགོངས་གཞི་དངོས་དེ་རྟོགས་ཐུབ་པའི་ཡིད་ཆེས་ཡོད།
བཞི། ༽ ལར་རིན་པོ་ཆེ་ནི་འཁོར་དང་གང་ཟག་གཞན་གྱིས་དབང་བསྒྱུར་འོག་འགྲོ་ཐུབ་མཁན་ཞིག་མ་རེད་ལ། གལ་ཏེ་འགྲོ་སྲིད་པའི་དབང་དུ་བཏང་ཡང་ང་ལྟ་བུ་ཞིག་གི་ཇུས་འོག་ཏུ་འགྲོ་མཁན་ཞིག་ཡིད་མི་སྲིད་པས། དོན་ལ་མཁྱེན་བརྩེ་རིན་པོ་ཆེར་མཚན་སྨོད་ཆེན་པོ་ཞིག་དང་། ངའི་འཇོན་ཐང་ལ་བསྔགས་པ་ཆེན་པོ་ཞིག་བྱས་པ་ལྟར་ཕྱིན་པ་ནི། བསྟོད་མི་ཤེས་པས་བསྟོད་པ་དང་སྨོད་མི་ཤེས་པས་སྨད་པ་ཞེས་པའི་དཔེར་སོང་འདུག་མོད། སྐབས་དོན་མིན་པས་བཞག །
ལྔ། ༽ དེ་ཡང་མཆོག་སྤྲུལ་རྙིང་མའི་ཁྲི་འཛིན་མངའ་གསོལ་གྱི་ཁྱབ་བསྒྲགས་དེ་ཐའེ་ཝན་གྱི་ཁོང་སྒེར་གྱི་ཆོས་ཚོགས་ཀྱི་རང་འཚམ་གྱིས་བྱས་པ་ཞིག་རེད། ཡིན་ན་ཡང་། རྒྱ་ཡིག་གི་ཁྱབ་བསྒྲགས་སུ་མ་དགོན་དྲུག་ཡན་ལག་དང་བཅས་པ་དེ་ལས་གཞན་པ་མང་པོའི་རེ་བ་དང་གསོལ་འདེབས་བྱས་ནས་ཁས་ལེན་བྱས་པ་ཡིན་པར་འཁོད་ཡོད། དོན་དངོས་ཐོག་ད་བར་ཁོང་ལ་ཁྲི་པ་གནང་རྒྱུའི་གསོལ་འདེབས་ཞུས་པའི་ཡི་གེ་སྣ་ཁ་གཅིག་ཀྱང་སྟོན་རྒྱུ་བྱུང་མེད།
དྲུག །༽ མ་དགོན་དྲུག་མ་ཟད། གཞིས་བྱེས་ཀྱི་དཔལ་ཡུལ་མ་དགོན་དང་། རྣམ་གྲོལ་གླིང་དར་ཐང་དགོན་པ་བཅས་ཀྱིས་གཞུང་དང་བསྟན་བདག་རྣམ་པས་གཞུང་འབྲེལ་གྱིས་གསོལ་འདེབས་དང་ངོས་ལེན་ཡོད་པའི་འཚམས་འདྲིའི་ཡི་གེ་གཅིག་ཀྱང་ད་བར་སྟོན་རྒྱུ་མེད།
བདུན། ༽ འཚམས་འདྲི་དང་འབྲེལ་བའི་ཡི་གེ་གསུམ་བཞི་ཞིག་ཡོད་པ་དེའང་། ཁོང་གིས་རྙིང་མའི་དབུ་འཛིན་བྱེད་རྒྱུའི་ཐག་གཅོད་ཁྱབ་བསྒྲགས་དེ་སྤྱི་ཟླ་༡༠ ཚེས་༢༤ ལ་ངོ་དེབ་བརྒྱུད་རྗེས་ཀྱི་ཉིན་ལྔ་ནས་བཅུའི་ནང་གཞི་ནས་བྲིས་པ་ཡིན་པ་ཡི་གེ་སོ་སོའི་འོག་ཏུ་ཡོད།
བདུན། ༽ མཆོག་སྤྲུལ་གྱིས་དྲ་ཚོམས་ནང་གསལ་བཤད་སྐབས། སྔ་འགྱུར་རྙིང་མའི་རྡོར་གདན་སྨོན་ལམ་གྱི་ཐག་གཅོད་ཡག་པོ་མིན་པ་དང་། ཁོང་ཚོ་ཁྲི་ལ་མ་བསྡད་པ་འཆི་རྒྱུར་ཞེད་ནས་ཡིན་པ་སོགས་ཀྱིས་ཁ་གཏད་དུ་ལངས་པ་ཡིན་ཚུལ་བཤད་ཀྱི་ཡོད།
བརྒྱད། ༽ སྤྱི་ལོ་༢༠༢༠ ལོའི་ ༢ ཚེས་ ༣ ཉིན་༼སྔ་འགྱུར་རྡོར་གདན་སྨོན་ལམ་ཚོགས་ཆེན་༽གྱིས་གཞུང་འབྲེལ་གྱིས་༧ཞེ་ཆེན་རབ་འབྱམས་རིན་པོ་ཆེའི་དགོངས་པ་ལྟར་སྨོན་ལམ་ཆེན་མོའི་རྒྱུན་ལས་ལྷན་ཚོགས་ཀྱིས་སྤྱི་མོས་ཐག་གཅོད་ཐོག་དབུ་འཛིན་བསྐོ་མི་དགོས་པ་བྱས་ཡོད། ཡིག་ཆ་དེ་ད་ལྟའང་ཁྲིམས་མཐུན་དུ་གནས་མུས་ཡིན།
དགུ །༽ སྔར་གྱི་༧སྐྱབས་རྗེ་སྟག་ལུང་རྩེ་སྤྲུལ་དང་། ༧འཁྲུལ་ཞིག་རིན་པོ་ཆེ། ༧དགེ་རྩེ་རིན་པོ་ཆེ་སོགས་ཚང་མ་དངོས་ཤུགས་བརྒྱུད་གསུམ་ནས་ཚོགས་པ་འདི་བརྒྱུད་ནས་གསོལ་འདེབས་དང་བསྐོ་བཞག་ཞུས་པ་དང་། ཞལ་བཞེས་གནང་མིན་ལ་མ་ལྟོས་པར་༧རྡོ་གྲུབ་རིན་པོ་ཆེ་དང་། ༧རྫོགས་ཆེན་རིན་པོ་ཆེ་སོགས་ཀྱི་མདུན་དུ་བཅར་མཁན་ཡང་གཙོ་བོ་ཁོང་རྣམ་པ་ཡིན། དེས་ན་ཁོང་རྣམ་པ་ནི་ལམ་ལུགས་འདིའི་ཁྲིམས་མཐུན་གྱི་མགྲིན་ཚབ་པ་ཉག་གཅིག་ཡིན།
བཅུ། ༽ གལ་ཏེ་ཅིས་ཀྱང་བསྐོ་དགོས་པའི་དབང་དུ་བཏང་ཡང་། མ་མཐའ་ཡང་རྒྱ་བལ་འབྲུག་གསུམ་གྱི་མ་དགོན་དྲུག་སོགས་ཀྱི་གནད་ཡོད་སྐུ་ཚབ་ཀྱིས་གསོལ་འདེབས་ཞུས་པ་ཞིག་དང་། ས་གནས་ཀྱང་རྒྱ་བལ་འབྲུག་གསུམ་སོགས་སྔ་འགྱུར་གྱི་རྗེས་འཇུག་པ་མང་པོ་ཡོད་པའི་ས་གནས་ཤིག་ནས་ཁྲི་འདོན་དགོས་པ་ལས། མཆོག་སྤྲུལ་གྱི་གྲོགས་པོ་གླིང་ཚང་རྒྱལ་སྲས་ཀྱིས་འཚམས་འདྲིའི་ཡི་གེར་དངོས་སུ་བྲིས་པ་ལྟར། དཔལ་ཡུལ་དར་ཐང་ཆོས་ཚོགས་ནས་མཆོག་སྤྲུལ་རིན་པོ་ཆེ་སྔ་འགྱུར་རྙིང་མའི་དབུ་འཛིན་དུ་བསྐོས་པ་ཞེས་པ་ནི་ཡེ་ཤེས་འཁོར་ལོའི་ཆོས་ཚོགས་ཀྱིས་རྫ་ཚེ་རིང་བཀྲ་ཤིས་ནང་པ་སྤྱིའི་དབུ་ཁྲིད་དུ་བསྐོས་པ་ཞེས་པ་དང་གཅིག་པ་གཅིག་རྐྱང་ཡིན་པས་ཕྲུ་གུའི་རྩེད་མོ་འབའ་ཞིག་ལས་མ་འདས།
བཅུ་གཅིག །ད་དུང་ཁོང་ལ་ད་བར་རག་ཡོད་པའི་ཡི་གེ་དག་རག་པའི་བརྒྱུད་རིམ་རྒྱབ་ལྗོངས། འབྲེལ་ལམ་སོགས་མང་ཙམ་བཤད་དུ་ཡོད་མོད། རེ་ཞིག་དེ་ཙམ་གྱིས་ཆོག །
བཅུ་གཉིས། གཞན་གྲྭ་པ་ལོག་མིན། སྡུག་ཐུག་སྔགས་པ་ཡིན་མིན། ཁ་སོས་མིན། སྤྱི་ཆུས་ལ་ཁུར་ཐང་ཡོད་མིན་སོགས་ཀྱི་ཐད་ལ་སྐབས་དོན་དང་མ་འབྲེལ་བའི་བཀའ་བཀྱོན་མང་ཙམ་གནང་འདུག་པ་དག་ལ་ལན་མེད།
མཇུག་ཏུ། གོང་གི་གསལ་བཤད་འདི་དག་ཀྱང་ད་ཐེངས་ཀྱི་གླེང་གཞི་འདི་དང་འབྲེལ་བའི་བསམ་གཞིག་གི་རྒྱུ་ཆ་གལ་ཆེན་ཡིན་པས་ཚང་མས་དཔྱད་གཞིར་འཛིན་པར་ཞུ།
རྫ་ཚེ་རིང་བཀྲ་ཤིས་ཀྱིས་རི་སྔོན་པོའི་རང་གནས་ནས་སྤྱི་ལོ་༢༠༢༣ ཟླ་ ༡༡ ཚེས་ ༡༣ གྱི་ཕྱི་དྲོ། འཐེན་ཐུག་སྔུན་དུ་བསླེབས་པས་འཐུང་འདོད་ཀྱིས་འགྲམ་ཆུ་ལྡང་ཞོར་མགྱོགས་སྟབས་སུ་བྲིས་སོ། །
སྔ་མོ་བོད་རང་དབང་རང་བཙན་ཡིན་པའི་སྐབས་ལ་དམིགས་བསལ་ཆོས་རིགས་ཁག་གི་དབུ་ཁྲིད་ཀྱི་གོ་གནས་ཆེད་དུ་མེད་པ་འདྲ་ཡིན་པ་རེད། འོན་ཀྱང་ ༡༩༥༩ ནང་༧རྒྱལ་བ་རིན་པོ་ཆེ་བོད་ནས་རྒྱ་གར་དུ་བཙན་བྱོལ་དུ་ཕེབས་དགོས་བྱུང་དུས་བོད་མི་འབུམ་མིན་ཙམ་ཡང་རྒྱ་གར་དུ་བཙན་བྱོལ་ལ་ཡོང་བའི་ནང་ལ་ཆོས་རིགས་ཚང་མའི་བོད་རིགས་སེར་སྐྱ་མང་ཙམ་ཡོད་པར་སྟངས་འཛིན་དང་མི་ཉམས་གོང་འཕེལ་ཡོང་བའི་ཆེད་དུ་རྒྱལ་བ་རིན་པོ་ཆེས་དེ་སྐབས་ཀྱི་ཆོས་རིགས་སོ་སོའི་བླ་ཆེན་རྣམ་པ་ཚོ་དང་མཉམ་དུ་བཀའ་མོལ་གནང་སྟེ་ཆོས་རིགས་སོ་སོའི་དབུ་འཛིན་རེ་དགོས་དོན་གོང་དུ་ཞུས་པ་བཞིན་ཆོས་རིགས་ཚང་མ་མི་ཉམས་གོང་འཕེལ་ཡོང་བར་སྟངས་འཛིན་གནང་མཁན་རེ་དགོས་ངེས་དགོངས་བཞེད་གནང་བར་དེ་འདུས་ཚང་མས་ཞལ་བཞེས་གནང་བ་ལྟར་ཕྱག་བཞེས་གནང་ཡོད་རེད། ལས་ཀ་གང་དང་གང་ཡིན་ན་ཡང་དཀའ་རྙོགས་མེད་པ་མི་སྲིད་པ་རེད། ད་ལྟའི་ཆར་ང་ཚོ་བོད་རིགས་སྐྱབས་བྱོལ་བ་ཚོ་དམིགས་བསལ་ཉུང་ཤས་ལ་མ་གཏོགས་འཚོ་གོས་གཏམ་གསུམ་རང་འདོད་ཚང་བ་ཞིག་ཡོད་པ་མངོན་གསལ་རེད། དེ་འདྲ་བྱུང་བ་དེ་ཡང་སོ་སོ་རང་གིས་གྲུབ་པ་ཞིག་རེད་དམ། རྒྱུ་དང་རྐྱེན་གང་ལ་བརྟེན་ནས་བྱུང་བ་རེད་དམ། ༧རྒྱལ་བ་རིན་པོ་ཆེ་བོད་ཆོས་སྲིད་གཉིས་ཀའི་དོན་ལ་བཙན་བྱོལ་དུ་ཕེབས་ནས་ང་ཚོ་བོད་མི་མང་དག་ཁོང་གི་རྗེས་ལ་ཡོང་ནས་རྒྱ་གར་གྱིས་བཙན་བྱོལ་གནང་བ་ཚང་མས་མཁྱེན་དགོས་རེད། དེ་མིན་རྒྱ་གར་གཞུང་ནས་དེ་སྔོན་རྒྱ་གར་དུ་ཡོད་པའི་བོད་པ་ཚོ་བོད་ལ་ལོག་དགོས་རེད་ཅེས་བཀའ་བཏང་ཡོད་རེད། དེ་འདྲ་ཡིན་དུས་ང་ཚོ་བཙན་བྱོལ་ལ་འགྲོ་ས་གང་ཡང་མེད་པ་རེད། ཡིན་ན་ཡང་༧རྒྱལ་བ་རིན་པོ་རྒྱ་གར་ས་ཐོག་ལ་ཞབས་ཕེབས་ཟིན་པ་དང་རྒྱ་གར་གཞུང་གི་བཀའ་དེ་སྣང་མེད་ཀྱིས་བོད་རིགས་མང་དག་རྒྱ་གར་དུ་བསྡད་ཐུབ་པ་བྱུང་བ་དང་། དེ་བཞིན་༧རྒྱལ་བ་རིན་པོ་ཆེས་བོད་མི་ཚོར་གཞིས་ཆགས་དང་། བོད་ཕྲུག་ཚོར་སློབ་གྲྭ་དང་། དགེ་འདུན་པ་ཚོར་དགོན་པ་གྲྭ་ཚང་སོགས་རྒྱ་གར་དུ་འཛུགས་སྐྲུན་གནང་བ་དང་། དེ་དག་གི་འཛིན་སྐྱོང་གི་ཕྱག་ལས་གནང་མཁན་གྱི་ལས་བྱེད་བསྐོ་བཞག་གནང་དགོས་སོགས་ཀྱི་ཆེད་བཙན་བྱོལ་བོད་གཞུང་གི་བཀའ་བློན་བཀའ་བཞག་དང་སྤྱི་འཐུས་ལྷན་ཁང་སོགས་བོད་ཀྱི་ཆོས་སྲིད་དང་། བོད་མི་ཚོའི་འཚོ་གོས་གང་གང་ཅིའི་ཐད་ལ་དགོངས་བཞེས་ལྷོད་མེད་གནང་ནས་ད་ལྟ་ང་ཚོ་བཙན་བྱོལ་བ་ཚོ་གང་ཙམ་སྲ་བརྟན་ཡོད་པ་དེ་དག་༧རྒྱ་བ་རིན་པོ་ཆེའི་བཀྲིན་ཁོ་ན་ལས་བྱུང་བ་རེད། དེ་བཞིན་༧རྒྱལ་བ་རིན་ཆེས་ཕྱི་རྒྱལ་ཡུལ་གྲུ་ཁག་ལ་བོད་ཀྱི་ཆོས་དགེ་ཁག་བཏང་གནང་ནས་ད་ཆ་ནང་ཆོས་དར་ཁྱབ་ཀྱིས་གཉིས་ཕན་གྱི་བྱ་བ་ཡང་དག་པ་ཡང་༧རྒྱལ་བ་རིན་པོ་ཆེ་དང་དེ་སྐབས་ཀྱི་ཆོས་ལུགས་ཀྱི་དབུ་འཛིན་རྣམ་པས་བཀའ་དགོངས་ཇི་བཞིན་ཕྱག་བཞེས་གནང་བ་ལ་བརྟེན་ནས་བྱུང་བ་དེ་ཡང་ང་ཚོས་ནམ་ཡང་བརྗེད་པ་གནང་རྒྱུ་མེད་པ་རེད། ད་ལྟའང་དེ་བཞིན་བཀའ་དགོངས་ཉམས་སུ་ལེན་ཐུབ་པ་གནང་ན་རྗེས་སུ་ཡིད་རངས་ཞུ་རྒྱུ་ཡིན་ཞེས་རྨོངས་འཆར་ཡིན།། །།