ཁེ་ན་ཌའི་གྲོས་ཚོགས་ནང་བོད་དོན་རྒྱབ་སྐྱོར་ཤུགས་ཆེན་བྱས་ཡོད་འདུག

སྲིད་སྐྱོང་མཆོག་གིས་ཁེ་ན་ཌའི་བློན་ཆེན་དང་གྲོས་ཚོགས་འཐུས་མི་རྣམས་ལ་མཇལ་འཕྲད་གནང་ཡོད་པ་མ་ཟད། བོད་དོན་ཐོག་མུ་མཐུད་རྒྱབ་སྐྱོར་བརྟན་པོ་གནང་རྒྱུ་ཡིན་སྐོར་གསུངས་འདུག

ཟླ་འདིའི་ཕྱི་ཚེས་ ༡༥ ནས་ཕྱི་ཟླ་ ༡༢ ཚེས་ ༣ བར་དུ་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ཁེ་ན་ཌ་དང་། ཨ་རི། ཡུ་རོབ་ཁུལ་དུ་གཞུང་འབྲེལ་ཕྱོགས་ཕེབས་གནང་བཞིན་ཡོད་པ་ལྟར། ཟླ་འདིའི་ཕྱི་ཚེས ༢༢ ཉིན་ཁེ་ན་ཌའི་གྲོས་ཚོགས་ཚོགས་ཁང་དུ། གྲོས་ཚོགས་ཀྱི་ཚོགས་གཙོ་གྷེ་རེག་ཕར་གུ་སི་(Greg Fergus)མཆོག་དབུ་བཞུགས་ཐོག བོད་མིའི་སྒྲིག་འཛུགས་ཀྱི་སྐྱོང་སྤེན་པ་ཚེ་རིང་མཆོག་ཕེབས་བསུ་ཞུས་ཡོད་ཅིང་།  སྐབས་དེར་གྲོས་ཚོགས་འཐུས་མི་ཀེམ་མེ་སི་མཱ་ལོ་ནི་ལགས་ཀྱིས། སྲིད་སྐྱོང་མཆོག་ནི་འཛམ་གླིང་ཁྱོན་ཡོངས་ཀྱི་བོད་མིའི་སྐུ་ཚབ་ཡིན་ཞེས་ནན་བརྗོད་དང་། ཁེ་ན་ཌའི་ནང་གི་བོད་མིའི་ཆོས་དང་རིག་གཞུང་སྐོར། ས་གནས་ཨི་ཌོ་བྷི་ཁོ་ཀེ་(Etobicoke Lakeshore) ཏུ་ཡོད་པའི་གངས་ལྗོངས་ཆོས་ལྡན་གླིང་གིས་བོད་ཀྱི་ཆོས་དང་རིག་གཞུང་རྒྱུན་འཛིན་གནང་བཞིན་ཡིན་པའི་སྐོར། དེ་བཞིན་སྲིད་སྐྱོང་སྤེན་པ་ཚེ་རིང་མཆོག་གི་བོད་དོན་འཐབ་རྩོད་ཆེད་སྐུ་ལས་སྐྱོན་བཞིན་ཡོད་པར་བསྔགས་བརྗོད་དང་།བོད་དོན་ཐོག་མུ་མཐུད་དུ་རྒྱབ་སྐྱོར་གནང་རྒྱུ་ཡིན་སྐོར་སོགས་བརྗོད་འདུག

དེ་བཞིན་ཕྱི་ཚེས་ ༢༢ ཉིན་ཁེ་ན་ཌའི་རྒྱལ་ས་ཨོ་ཌ་ཝ་རུ། ཁེ་ན་ཌ་གྲོས་ཚོགས་འཐུས་མི་བོད་དོན་རྒྱབ་སྐྱོར་ཚོགས་པའི་གོ་སྒྲིག་འོག སྲིད་སྐྱོང་སྤེན་པ་ཚེ་རིང་མཆོག་ལ་ཕེབས་བསུ་སྣེ་ལེན་མཛད་སྒོ་ཞིག་འཚོགས་ཡོད་ཅིང་། ཚོགས་ཐོག་ཏུ་ཁེ་ན་ཌ་ཡུལ་མིའི་ལས་དོན་བློན་ཆེན་གྷ་རེ་ནན་ངྷ་སཱན་གྷ་རེ་(Gary Anandasangaree)མཆོག་དང་། དམིགས་བསལ་དགོས་མཁོ་ལྟ་རྟོག་བློན་ཆེན་ཀཱ་མཱལ་ཁེ་རཱ་(Kamal Khera)མཆོག་དང་། ཁྲིམས་དོན་བློན་ཆེན་ཨ་རི་ཧྥི་ཝི་རཱ་ནི་(Arif Virani ) མཆོག མི་མང་བདེ་འཇགས་བློན་ཆེན་ཌོ་མི་ནི་ཁི་ལེ་བྷེ་ལཱན་ཁི་(Dominic LeBlanc) མཆོག གྲོས་ཚོགས་ཀྱི་ཚོགས་གཙོ་གྷེ་རེ་ཁི་ཧྥེར་གུ་སི་(Greg Fergus) མཆོག གྲོས་ཚོགས་འཐུས་མི་ཇེམ་སི་མཱ་ལོ་ནི་(James Maloney) ལགས་དང་ཡུ་ཝན་བྷ་ཀེར་(Yvan Baker)ལགས། བྷེ་རན་མེ་(Bryan May) ལགས། ཧྥི་རེན་སེ་སི་ཀོ་སོར་བྷ་རཱ་(Francesco Sorbara) ལགས་སོགས་བློན་ཆེན་དང་གྲོས་ཚོགས་འཐུས་མི་ཁྱོན་ ༢༦ གིས་མཉམ་ཞུགས་གནང་ཡོད་འདུག

སྐབས་དེར་ཁེ་ན་ཌའི་ཁྲིམས་དོན་བློན་ཆེན་ཨ་རི་ཧྥི་ཝི་རཱ་ནི་མཆོག་གིས། བཙན་བྱོལ་བོད་མིའི་སྒྲིག་འཛུགས་ཀྱི་དམངས་གཙོ་སྐོར་དང་། བོད་ནང་གི་འགྲོ་བའི་མིའི་ཐོབ་ཐང་གི་གནས་སྟངས་སྐོར་ནན་བརྗོད་བྱས་ཡོད་ཅིང་། ཁེ་ན་ཌའི་གཞུང་ངོས་ནས་བོད་མིའི་སྐད་ཡིག་དང་རིག་གཞུང་གི་ཐོབ་ཐང་ལ་རྒྱབ་སྐྱོར་བརྟན་པོ་བྱ་རྒྱུ་ཡིན་པ་མ་ཟད། རྒྱ་གར་དང་ཞི་བདེ་རྒྱ་མཚོ་སྲུང་སྐྱོབ་ས་ཁུལ་དུ་བོད་ཀྱང་ཚུད་དགོས་པའི་སྐོར་གསུང་བཤད་གནང་ཡོད་འདུག

སྲིད་སྐྱོང་སྤེན་པ་ཚེ་རིང་མཆོག་གིས། ཁེ་ན་ཌས་བོད་དོན་ཐོག་རྒྱབ་སྐྱོར་བརྟན་པོ་གནང་བར་ཐུགས་རྗེ་ཆེ་ཞུས་ཡོད་པ་དང་། ༸གོང་ས་རྒྱལ་བ་རིན་པོ་མཆོག་གི་སྐུའི་འཕྲོད་བཞེས་སྐོར། བོད་དོན་ཐོག་ཁེ་ན་ཌ་དང་རྒྱལ་ཁབ་མང་པོས་རྒྱབ་སྐྱོར་བྱེད་མུས་ཡིན་པའི་སྐོར། ༸གོང་ས་མཆོག་གི་སྐུའི་ཡང་སྲིད་སྐོར་ལ་རྒྱ་ནག་གཞུང་གིས་ཐེ་གཏོགས་བྱེད་པར་རྒྱལ་སྤྱིའི་ཐོག་ནས་འགོག་དགོས་པའི་སྐོར། ༧གོང་ས་མཆོག་གི་དགོངས་དོན་བཞིན་དབུ་མའི་ལམ་གྱི་ལངས་ཕྱོགས་ལས་བོད་ཀྱི་བདེན་མཐའ་གསལ་དགོས་པའི་སྐོར་སོགས་གསུངས་ཡོད་འདུག

ཕྱི་ཚེས་ ༢༠ ཉིན་སྲིད་སྐྱོང་མཆོག་གིས་ཁེ་ན་ཌའི་སྲིད་དོན་ཚོགས་པ་(Bloc Québécois) མགོ་ཁྲིད་ཝ་ཡི་སི་ཧྥི་རན་ཀོ་སི་( Yves-François ) ལགས་དང་། གྲོས་ཚོགས་འཐུས་མི་ཨེ་ལེ་སི་བྷི་རུ་ནེ་ལེ་(Alexis Brunelle) ལགས། གྲོས་ཚོགས་འཐུས་མི་ཇུ་ལི་ཝི་གྷ་ནོ་ལཱ་ (Julie Vignola )ལགས་བཅས་དང་མཇལ་འཕྲད་གནང་སྟེ། བོད་ཀྱི་ཆབ་སྲིད་དང་འགྲོ་བ་མིའི་ཐོབ་ཐང་གི་གནས་སྟངས་སྐོར་གྲོས་མོལ་གནང་ཡོད་འདུག  དེ་བཞིན་སྲིད་སྐྱོང་མཆོག་གིས་ཁེ་ན་ཌའི་སི་བྷི་སི་གསར་ཁང་གི་བཅར་འདྲི་དང་ལེན་བྱས་ཏེ། གསར་འགོད་པ་ཌི་ཝི་དི་ཁོ་ཁ་རཱ་ནེ་ལགས་དང་ལྷན་དུ་བོད་ནང་གི་འགྲོ་བ་མིའི་གནས་སྟངས་སྐོར་ལ་གླེང་མོལ་གནང་ཡོད་འདུག

ཟླ་འདིའི་ཕྱི་ཚེས་ ༡༩ ཉིན་སྲིད་སྐྱོང་སྤེན་པ་ཚེ་རིང་མཆོག་ཁེ་ན་ཌའི་རྒྱལ་ས་ཨོ་ཌ་ཝར་ཕེབས་འབྱོར་བྱུང་ཡོད་ཅིང་། སྐབས་དེར་ཁེ་ན་ཌའི་བོད་དོན་ལྷན་ཚོགས་ཀྱི་ངེས་སྟོན་པ་ཤེས་རབ་མཐར་ཕྱིན་ལགས། ས་གནས་བོད་རིགས་ཚོགས་པ་བཅས་ཀྱིས་ཕེབས་བསུ་ཞུས་འདུག དེ་བཞིན་ཟླ་འདིའི་ཕྱི་ཚེས་ ༡༧  ནས་ཉིན་གསུམ་རིང་ཁེ་ན་ཌའི་ཧཱ་ལི་ཧྥ་སི་གྲོང་ཁྱེར་དུ། སྲིད་སྐྱོང་སྤེན་པ་ཚེ་རིང་མཆོག་ཧཱ་ལི་ཧྥ་ཁི་སི་རྒྱལ་སྤྱིའི་བདེ་འཇགས་གླེང་སྟེགས་ནང་ (Halifax International Security Forum) མཉམ་ཞུགས་གནང་ཡོད་འདུག

གསར་འགོད་པ། བྱམས་པ་ཚེ་རིང་།

རྩོམ་སྒྲིག་པ། སྐལ་བཟང་སྦྱིན་པ།