སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་བཙན་བྱོལ་བོད་མིའི་མང་གཙོའི་འཕེལ་རིམ་དང་བོད་ནང་གི་གནས་སྟངས་ཐོག་གསུང་བཤད་གནང་འདུག
འདི་ལོའི་ཕྱི་ཟླ་ ༡༡ ཚེས་ ༣༠ ཉིན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་རྒྱ་གར་གྱི་རྒྱལ་ས་ལྡི་ལིར་རྟེན་གཞི་བྱས་པའི་རྒྱ་གར་ཉམས་ཞིབ་བསྟི་གནས་ཁང་(India Foundation) གིས་གོ་སྒྲིག་བྱས་པའི་བོད་དོན་གསུང་བཤད་ཀྱི་ལས་རིམ་ཞིག་གི་ཐོག བོད་མི་མང་སྤྱི་འཐུས་ལྷན་ཚོགས་དང་། བཙན་བྱོལ་བོད་མིའི་འོས་བསྡུ་གནང་ཕྱོགས་ཀྱི་སྐོར་དང་འབྲེལ། བོད་ནང་གི་ཛ་དྲག་གནས་སྟངས་དང་རྒྱ་ནག་གཞུང་གིས་བོད་མིའི་གཞི་རྩའི་ཐོབ་ཐང་ལ་རྡོག་རོལ་གཏོང་མུས་ཡིན་པ་སོགས་ཀྱི་སྐོར་ལ་གསུང་བཤད་གནང་འདུག
སྐབས་དེར་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས། རྒྱ་གར་ནི་ཆོས་ལུགས་སྣ་མང་ལྷན་གཅིག་ཏུ་འཛོམས་པའི་འཛམ་གླིང་གི་མང་གཙོའི་རྒྱལ་ཁབ་ཆེ་ཤོས་དེ་ཡིན་པ་མ་ཟད། ལྷག་པར་༧གོང་ས་རྒྱལ་བ་རིན་པོ་ཆེ་མཆོག་རྒྱ་གར་ལ་ཕེབས་སྐབས། རྒྱ་གར་གྱི་ཡང་དག་པའི་མང་གཙོའི་ལམ་ལུགས་ལ་ཐུགས་ཞིབ་མཛད་ནས། བོད་ནང་དུའང་མང་གཙོ་ལེགས་བཅོས་གནང་མགོ་བཙུགས་ཡོད་ཀྱང་། རྒྱ་ནག་གཞུང་གི་བཙན་འཛུལ་གྱི་དབང་གིས་བོད་ནང་མང་གཙོ་ལེགས་བཅོས་དེ་ཐུགས་དགོངས་ཇི་བཞིན་གནང་ཐུབ་མེད་ཀྱང་། ༧གོང་ས་རྒྱལ་བ་རིན་པོ་ཆེ་མཆོག་རྒྱ་གར་ལ་ཕེབས་རྗེས། ཕྱི་ལོ་ ༡༩༦༠ ཟླ་ ༩ ཚེས་ ༢ ཉིན་བཙན་བྱོལ་བོད་མིའི་མང་གཙོ་དབུ་བརྙེས་པ་ཡིན་སྐོར་དང་། དེ་བཞིན་བོད་མི་མང་སྤྱི་འཐུས་ལྷན་ཚོགས་དང་། འཛིན་སྐྱོང་བཀའ་ཤག རང་དབང་ལྡན་པའི་ལྷན་ཁང་ཁག་སོགས་ཀྱི་ལས་ཀ་བྱེད་ཕྱོགས་དང་། བོད་མི་མང་སྤྱི་འཐུས་ལྷན་ཚོགས་ཀྱིས་རྒྱ་གར་དང་། རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་སོགས་གོ་སྒྲིག་གནང་ཡོད་སྐོར་སོགས་གསུངས་ཡོད་འདུག
ཡང་སྤྱི་འཐུས་ཚོགས་གཙོ་མཆོག་གིས། རྒྱ་ནག་གཞུང་གིས་བོད་ནང་དུ་བོད་མིའི་སྨྲ་བརྗོད་དང་། ཆོས་ལུགས། རིག་གཞུང་གཙོས་བོད་ཀྱི་རང་བྱུང་ཁོར་ཡུག་དང་ལྷག་པར་བོད་ནང་གི་བོད་མིའི་གཞི་རྩའི་འགྲོ་བ་མིའི་ཐོབ་ཐང་ལ་རྡོག་རོལ་བཏང་དང་གཏོང་མུས་ཡིན་པའི་ཁར། བོད་ནང་གི་བོད་མིའི་འགྲོ་འདུག་སྤྱོད་གསུམ་གྱི་གནད་དོན་ཚུད་པའི་བོད་མིའི་གནས་སྟངས་ཛ་དྲག་ཏུ་གྱུར་ཡོད་པའི་སྐོར་དང་། ༧གོང་ས་རྒྱལ་བ་རིན་པོ་ཆེ་མཆོག་གི་ཕྱག་སྟོན་བཟང་པོའི་མཐུ་འོག་ནས། དབུས་བོད་མིའི་སྒྲིག་འཛུགས་ཀྱིས་འཚེ་མེད་ཞི་བའི་ཐབས་ལམ་ལ་བརྟེན་ནས་གྲོས་མོལ་བརྒྱུད་བོད་རྒྱའི་དཀའ་རྙོག་སེལ་ཐབས་བྱེད་མུས་ཡིན་ཡང་། རྒྱ་ནག་གཞུང་གིས་བོད་རྒྱའི་གྲོས་མོལ་ཐད་ཡ་ལན་གཏན་ནས་མེད་སྐོར་སོགས་གསུངས་ཡོད་འདུག
དེ་ཡང་ཚོགས་གཙོ་མཆོག་གི་མཛད་འཆར་ལྟར་ན། ཕྱི་ཟླ་ ༡༡ ཚེས་ ༢༩ ཉིན་བོད་མི་མང་སྤྱི་འཐུས་མཁན་པོ་བསོད་ནམས་བསྟན་འཕེལ་མཆོག་བཞུགས་སྒར་དྷ་ས་ནས་ལྡི་ལིར་ཕེབས་ཐོན་གནང་སྟེ། ཕྱི་ཚེས་ ༣༠ ཉིན་བོད་མི་མང་སྤྱི་འཐུས་ལྷན་ཚོགས་དང་། བཙན་བྱོལ་བོད་མིའི་འོས་བསྡུ་གནང་ཕྱོགས་དང་འབྲེལ་གསུང་བཤད་གནང་ནས། དེ་རིང་ཕྱི་ཚེས་ ༡ ཉིན་བཞུགས་སྒར་དྷ་སར་ཕེབས་ཐོན་གནང་གི་ཡོད་འདུག
གསར་འགོད་པ། དཔལ་ལྡན།
རྩོམ་སྒྲིག་པ། སྐལ་བཟང་སྦྱིན་པ།
