ཡུ་རོབ་གྲོས་ཚོགས་སུ་བོད་ནང་གི་གཏན་འཇགས་སློབ་གྲྭ་དང་འབྲེལ་བའི་གྲོས་ཆོད་ཅིག་གཏན་འབེབ་གནང་།

ཡུ་རོབ་གྲོས་ཚོགས་སུ་བོད་ནང་གི་གཏན་འཇགས་སློབ་གྲྭའི་སྲིད་ཇུས་ལག་བསྟར་དང་འབྲེལ་བའི་གྲོས་ཆོད་ཅིག་གཏན་འབེབ་གནང་འདུག

ཁ་སང་ཕྱི་ཚེས་ ༡༤ ཉིན་ཧྥ་རན་སིའི་གྲོང་ཁྱེར་སི་ཊར་སི་སྦག་ (Strasbourg) ཏུ་ཚོགས་པའི་ཡུ་རོབ་གྲོས་ཚོགས་སྟེང་། རྒྱ་ནག་གཞུང་གིས་བོད་ནང་གི་བྱིས་པ་ས་ཡ་ ༡ ཙམ་རང་གི་ཕ་མ་དང་ཁ་བྲལ་དུ་བཏང་ནས་བཅའ་སྡོད་སློབ་གྲྭར་བཅུག་སྟེ། རྒྱ་སྒྱུར་སློབ་གསོ་སྤེལ་བའི་སྲིད་ཇུས་ལག་བསྟར་འཕྲལ་དུ་མཚམས་འཇོག་དགོས་པའི་གྲོས་ཆོད་ཅིག་གཏན་འབེབ་བྱུང་འདུག

ཟླ་འདིའི་ཕྱི་ཚེས་ ༡༣ ཉིན་གྱི་དགོང་མོར་ཡུ་རོབ་གྲོས་ཚོགས་སུ་གྲོས་ཚོགས་འཐུས་མི་ཁག་ཅིག་གིས། རྒྱ་ནག་གཞུང་གིས་བོད་ནང་གི་བྱིས་པ་ས་ཡ་ ༡ ཙམ་བཅའ་སྡོད་སློབ་གྲྭར་བཅུག་སྟེ་རྒྱ་སྒྱུར་སློབ་གསོ་སྤྲོད་བཞིན་པར་སྐྱོན་འཛུགས་དང་། རྒྱ་ནག་གཞུང་གིས་སྲིད་ཇུས་དེ་འཕྲལ་དུ་མཚམས་འཇོག་དགོས་པའི་གྲོས་གཞི་གྲོས་འཆར་ཞིག་གི་ཐད་གླེང་སློང་ཤུགས་ཆེན་གནང་སྟེ། ཁ་སང་ཕྱི་ཚེས་ ༡༤ ཉིན་གྲོས་གཞི་བཏོན་པ་དེར་གྲོས་ཚོགས་འཐུས་མི་ ༤༧༧ གྱིས་རྒྱབ་སྐྱོར་དང་། འཐུས་མི་ ༡༤ ཡི་དགག་བྱ། གཞན་འཐུས་མི་ ༤༥ ཡིས་བར་ཞུགས་གནང་སྟེ། མང་མོས་ཀྱིས་རྒྱབ་སྐྱོར་གཏན་འབེབ་བྱུང་ཡོད་འདུག

དེ་འབྲེལ་རྒྱལ་སྤྱིའི་བོད་དོན་ལས་འགུལ་ཁང་གིས། ཡུ་རོབ་གྲོས་ཚོགས་ནས་བོད་ནང་གི་གཏན་འཇགས་སློབ་གྲྭའི་སྲིད་ཇུས་ལག་བསྟར་འོག བོད་ཕྲུག་དང་ཕ་མ་གཉིས་ཁ་བྲལ་དུ་བཅུག་པ་དང་། བོད་མིའི་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་བའི་ཛ་དྲག་གི་གནས་སྟངས་གསལ་སྟོན་ཐོག་བོད་དོན་ལངས་ཕྱོགས་བརྟན་པོ་བཟུང་བར་དགའ་བསུ་དང་། ཡུ་རོབ་མཐུན་ཚོགས་ནས་སྲིད་ཇུས་དེ་དང་འབྲེལ་ནས་རྒྱ་ནག་གཞུང་གིས་སྲིད་ཇུས་ངན་པ་ལག་བསྟར་བྱེད་པའི་རྐྱེན་གྱིས་རྒྱ་གཞུང་ལ་སྲིད་དོན་གྱི་བཀའ་བཅད་གཏོང་བ་སོགས་གནོན་ཤུགས་ངེས་པར་དུ་སྤྲོད་དགོས་པའི་འབོད་སྐུལ་ཞུས་ཡོད་འདུག

ཡུ་རོབ་གྲོས་ཚོགས་ཀྱི་གྲོས་ཆོད་དེའི་ནང་དོན་ཚན་གསུམ་ཡོད་པ་ནི། རྒྱ་ནག་གི་མགོ་ཁྲིད་ཞི་ཅིན་ཕིང་གི་སྣེ་ཁྲིད་འོག་རྒྱ་གཞུང་གིས་བོད་ནང་དྲག་གནོན་དང་དམ་དྲག་ཤུགས་ཆེན་གྱི་ལམ་ལུགས་དང་སྲིད་ཇུས་ལག་བསྟར་འོག བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཇེ་སྡུག་ཏུ་འགྲོ་བཞིན་ཡོད་པས། ཡུ་རོབ་མཐུན་ཚོགས་དང་རྒྱ་ནག་བར་གྱི་འབྲེལ་ལམ་ནང་འགྲོ་བ་མིའི་ཐོབ་ཐང་ལ་བརྩི་འཇོག་དང་། དམངས་གཙོ་དང་དེའི་ཁྲིམས་ལུགས་གཙོ་གནད་ངེས་པར་དུ་དགོས་པ་དང་། རྒྱ་ནག་གི་དཔོན་རིགས་ཀྱིས་དབང་ཆ་བེད་སྤྱད་དེ་བོད་ནང་གི་བྱིས་པ་ལོ་ན་ ༤ ནས་ ༡༨ བར་གྱི་ཕྲུ་གུ་རྣམས་ལ་བོད་ཀྱི་སྐད་ཡིག་དང་རིག་གཞུང་སོགས་གཞི་རྩའི་སློབ་སྦྱོང་མི་སྤྲོད་པར་བཙན་གྱིས་གཏན་འཇགས་སློབ་གྲྭར་བཅུག་སྟེ་རྒྱ་སྒྱུར་སློབ་གསོ་སྤེལ་བཞིན་པའི་ལམ་ལུགས་ལག་བསྟར་དང་། ལམ་ལུགས་དེའི་འོག་ནས་བོད་ཀྱི་སྐད་ཡིག་དང་རིག་གཞུང་། ལོ་རྒྱུས་སོགས་རྩ་མེད་གཏོང་སླད་བོད་ཕྲུག་བརྒྱ་ཆ་ ༨༠ ཙམ་དང་། ཡང་ན་བོད་ཕྲུག་ས་ཡ་ ༡ ཙམ་ཕ་མ་དང་ཁ་བྲལ་དུ་བཏང་ནས་རྒྱ་སྒྱུར་སློབ་གསོ་སྤྲོད་པའི་ཐོག རང་གི་སྐད་ཡིག་དང་རིག་གཞུང་སྲུང་སྐྱོབ་སླད་གཞུང་སྒེར་གཉིས་ཀྱི་སློབ་གྲྭ་འཛུགས་མི་ཆོག་པ་སོགས་དམ་དྲག་སྔར་ལྷག་བྱེད་པའི་སྐོར་དང་། དེ་སྔ་འཛམ་གླིང་མཉམ་འབྲེལ་རྒྱལ་ཚོགས་ཀྱི་ཆེད་ལས་པ་རྣམས་ཀྱིས་བོད་ནང་གི་བཅའ་སྡོད་སློབ་གྲྭའི་སྲིད་ཇུས་དང་། བོད་ཕྲུག་རྣམས་ཕ་མ་དང་ཁ་བྲལ་དུ་བཅུག་པ་སོགས་རང་གི་སྐད་ཡིག་དང་རིག་གཞུང་བཀོལ་སྤྱོད་བྱེད་མི་བཅུག་པ་སོགས་ལ་བློ་འཚབ་ཡོད་པ་དང་། གཏན་འཇགས་སློབ་གྲྭ་བཙུགས་པའི་སྲིད་ཇུས་དེ་ནི་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཁྲིམས་ལུགས་དང་འགལ་གྱི་ཡོད་པ་དང་། བོད་ཀྱི་སྐད་ཡིག་དང་རིག་གཞུང་སོགས་རྩ་མེད་གཏོང་ཐབས་ཀྱི་སྲིད་ཇུས་སྐོར་སོགས་བཀོད་འདུག

དོན་ཚན་གསུམ་པའི་ནང་གསེས་དོན་གནད་བདུན་བཏོན་པའི་ནང་། དང་པོ། རྒྱ་ནག་གིས་བོད་ནང་གི་གཏན་འཇགས་སློབ་གྲྭའི་སྲིད་ཇུས་དང་མི་སེར་སྤེལ་ཡུལ་གྱི་སྲིད་ཇུས་སོགས་ལག་བསྟར་གྱིས་བོད་མི་དང་གྲངས་ཉུང་མི་རིགས་ཀྱི་སྐད་ཡིག་དང་རིག་གཞུང་སོགས་རྩ་མེད་གཏོང་ཐབས་ཀྱི་ལམ་ལུགས་ལ་སྐྱོན་བརྗོད་ཤུགས་ཆེན་གནང་བ་དང་། གཉིས་པ། འདི་ལོའི་ཕྱི་ཟླ་ ༢ པའི་ནང་འཛམ་གླིང་མཉམ་འབྲེལ་རྒྱལ་ཚོགས་ཀྱི་ཆེད་ལས་པས་ལམ་སྟོན་ལྟར། བོད་ནང་གི་བཅའ་སྡོད་སློབ་གྲྭའི་སྲིད་ཇུས་ལག་བསྟར་འཕྲལ་དུ་མཚམས་འཇོག་དགོས་པ་མ་ཟད། རྒྱ་ནག་དཔོན་རིགས་ཀྱིས་བོད་ཀྱི་སྒེར་གཉེར་སློབ་གྲྭ་འཛུགས་འཇུག་དགོས་པ་དང་། གསུམ་པ། བོད་ནང་གཏན་འཇགས་སློབ་གྲྭའི་སྲིད་ཇུས་ལག་བསྟར་དང་ཐད་ཀར་འབྲེལ་བ་ཡོད་པའི་རྒྱ་ནག་གི་དཔོན་རིགས་དེ་དག་ལ་ཨ་རིའི་གཞུང་གིས་ཐོངས་མཆན་ལག་ཁྱེར་མི་སྤྲོད་རྒྱུའི་ཉེས་ཆད་བཏང་བ་ལྟར། ཡུ་རོབ་ངོས་ནས་ཀྱང་དེ་ལྟར་ལག་བསྟར་གནང་དགོས་པའི་འབོད་སྐུལ་དང་། བཞི་པ། རྒྱ་ནག་གཞུང་གིས་ཡུ་རོབ་ཀྱི་ཕྱི་འབྲེལ་མི་སྣ་དང་། རྒྱལ་སྤྱིའི་ཉམས་ཞིབ་པ་དང་རང་དབང་ཅན་གྱི་གསར་འགོད་པ་རྣམས་ལ་བོད་ནང་གི་གཏན་འཇགས་སློབ་གྲྭའི་ནང་འགྲོ་སྐྱོད་ཆོག་པའི་ཐོངས་མཆན་ལག་ཁྱེར་སྤྲོད་དགོས་པ། ལྔ་པ། ཡུ་རོབ་མཐུན་ཚོགས་ནས་རྒྱ་ནག་ནང་དང་དམིགས་བསལ་གྱིས་བོད་ནང་གི་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་བཞིན་པའི་གནད་དོན་ཐད་ལ་གླེང་སློང་ངེས་པར་དུ་དགོས་པ། དྲུག་པ། རྒྱ་ནག་གཞུང་གིས་༧གོང་ས་རྒྱལ་བ་རིན་པོ་ཆེ་མཆོག་དང་། ཁོང་ཉིད་ཀྱི་སྐུ་ཚབ་བམ། བོད་མིའི་སྒྲིག་འཛུགས་ཀྱི་སྐུ་ཚབ་མཉམ་དུ་གྲོལ་མོལ་བསྐྱར་གསོ་བྱེད་དགོས་པ་དང་། རྒྱ་ནག་དཔོན་རིགས་ཀྱིས་༧པཎ་ཆེན་རིན་པོ་ཆེ་མཆོག་ཀློད་གྲོལ་དང་། ༧སྐུའི་ཡང་སྲིད་ངོས་འཛིན་གནང་ཕྱོགས་ཐད་ཐེ་གཏོགས་བྱེད་མཚམས་འཇོག་དགོས་པའི་ནན་སྐུལ་ཞུས་པ་དང་། བདུན་པ། ཡུ་རོབ་ཀྱི་སྲིད་འཛིན་གྱི་ངོས་ནས་གཏན་འཇགས་སློབ་གྲྭ་དང་འབྲེལ་བའི་གྲོས་ཆོད་འདི་ཡུ་རོབ་མཐུན་ཚོགས་ཀྱི་སྒྲིག་འཛུགས་དང་། འཛམ་གླིང་མཉམ་འབྲེལ་རྒྱལ་ཚོགས། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་སྲིད་གཞུང་སོགས་ལ་ངོ་སྤྲོད་བྱ་རྒྱུ་བཅས་འཁོད་འདུག

གསར་འགོད་པ། བསྟན་འཛིན་ཕུར་བུ།

རྩོམ་སྒྲིག་པ། པདྨ་མཚོ།