ཟླ་འདིའི་ཕྱི་ཚེས་ ༡༥ ཉིན་ནས་བོད་མིའི་སྒྲིག་འཛུགས་ཀྱི་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་ཅེཀ་སྤྱི་མཐུན་རྒྱལ་ཁབ་ཀྱི་རྒྱལ་ས་པ་རག་ (Prague) ཏུ་གཞུང་འབྲེལ་ཕྱོགས་ཕེབས་གནང་སྟེ་ཧྥ་རན་སིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སོགས་སུ་མཇལ་འཕྲད་གནང་འདུག
ཟླ་འདིའི་ཕྱི་ཚེས་ ༡༤ ཉིན་གྱི་སྔ་དྲོར་ཧྥ་རན་སིའི་གྲོས་ཚོགས་གོང་མའི་ཚོགས་ཁང་དུ། ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་གིས་ཧྥ་རན་སིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་ (Jacqueline Eustache) མཆོག་དང་། གྲོས་ཚོགས་གོང་མའི་འཐུས་མི་བྷི་རི་ནིའོ་ཨེ་ནིཀ་ (Brinio Annick Billon) ལགས། གྲོས་ཚོགས་གོང་མའི་འཐུས་མི་མཱེ་རི་ (Marie Mercier) ལགས་དང་འཐུས་མི་ས་མན་ཐཱ་ (Samantha Cazebonne) ལགས། དྲུང་ཆེ་ཐཱེ་རི་མུ་ནཱིར་ (Thierry Munier) ལགས་བཅས་དང་ལྷན་དུ་ཞོགས་ཟས་མཉམ་རོལ་གྱིས་བོད་དོན་ཐོག་ལ་གླེང་མོལ་གནང་ཡོད་འདུག
དེ་ནས་བཀའ་བློན་མཆོག་ནས་ཧྥ་རན་སིའི་གྲོས་ཚོགས་གོང་མའི་ནང་གཟིགས་སྐོར་གནང་གྲུབ་མཚམས་ཧྥ་རན་སི་གཞུང་གི་གནད་ཡོད་དཔོན་རིགས་ཁག་ཅིག་དང་ཐུག་འཕྲད་གནང་སྟེ། བོད་དོན་སྐོར་བཀའ་མོལ་གནང་ཡོད་པ་མ་ཟད། བཀའ་བློན་མཆོག་གིས། པེ་རི་སིའི་གྲོང་སྡེའི་སྤྱི་ཁྱབ་གཞོན་པ་ཇིན་ལུཀ་རོ་མེ་རོ་ (Jean-Luc Romero) ལགས་དང་ཐུག་འཕྲད་ཀྱིས། བོད་དོན་སྤྱི་དང་། ཧྥ་རན་སིར་གནས་སྡོད་བོད་མིའི་གནས་སྟངས། བོད་མིའི་གཟའ་མཇུག་སློབ་གྲྭ་ཚོགས་ཡུལ་སྐོར་སོགས་ཀྱི་ཐོག་ལ་བཀའ་མོལ་གནང་ཡོད་འདུག དེའི་རྗེས་ཧྥ་རན་སིའི་རྒྱལ་སྤྱིའི་རླུང་འཕྲིན་ཁང་ (France Radio International) ཞེས་པའི་གསར་ཁང་གི་བཅའ་འདྲི་དང་ལེན་གནང་ཡོད་འདུག་ལ། པེ་རི་སི་རྫོང་ཨང་ ༡༡ གི་སྤྱི་ཁྱབ་ཧྥ་རན་ཁོའེ་སི་ (Francois Vauglin) ལགས་དང་ཐུག་འཕྲད་གནང་སྟེ། བོད་དོན་དང་བོད་མིར་མུ་མཐུད་དུ་རྒྱབ་སྐྱོར་གནང་རྒྱུའི་འབོད་སྐུལ་ཞུས་ཡོད་འདུག
ཕྱི་ཚེས་ ༡༤ ཉིན་གྱི་ཕྱི་དྲོར་བཀའ་བློན་ནོར་འཛིན་སྒྲོལ་མ་མཆོག་གིས་ཐའེ་ཝན་གཞུང་ཚབ་ཧྥ་རན་ཁོའེ་སི་ཝུ་ (Francois Wu) ལགས་དང་ལས་རོགས་རྣམ་པ། བོད་དོན་རྒྱབ་སྐྱོར་བ། ཧྥ་རན་སིའི་གསར་འགོད་པ་དང་རྩོམ་པ་པོ་པེ་རི་ (Pierre Antoine Donnet) ལགས་དང་ཐུག་འཕྲད་གནང་ཡོད་འདུག་ལ། ཟླ་འདིའི་ཕྱི་ཚེས་ ༡༨ ཉིན་བཀའ་བློན་མཆོག་ཕྱིར་རྒྱ་གར་དུ་ཕེབས་འཆར་ཡོད་འདུག
ཕྱི་ཚེས་ ༡༢ ཉིན་བཀའ་བློན་ནོར་འཛིན་སྒྲོལ་མ་མཆོག་སྦེལ་ཇེམ་དུ་ཕེབས་འབྱོར་བྱུང་བ་དང་། ཕྱི་ཚེས་ ༡༣ ཉིན་བཀའ་བློན་ནོར་འཛིན་སྒྲོལ་མ་མཆོག་སྦེལ་ཇེམ་གྲོས་ཚོགས་ཀྱི་ཕྱི་འབྲེལ་ལས་དོན་ཚོགས་ཆུང་གི་ཚོགས་གཙོ་ཨེལ་སི་ཝན་ཧུ་ཧྥི་ (Els Van Hoof) མཆོག་དང་འབྲེལ་ཡོད་ལས་བྱེད་ལྷན་དུ་ཐུག་འཕྲད་གནང་སྟེ། བཀའ་བློན་མཆོག་གིས། བོད་ནང་གི་ཛ་དྲག་གནས་སྟངས་དང་། རྒྱ་ནག་གཞུང་གིས་བོད་ནང་གི་བྱིས་པ་ས་ཡ་ ༡ ཙམ་བཙན་གྱིས་གཏན་འཇགས་སློབ་གྲྭར་བཅུག་སྟེ་རྒྱ་སྒྱུར་སློབ་གསོ་སྤེལ་བཞིན་པའི་སྐོར། དེ་བཞིན་བོད་མིའི་སྒྲིག་འཛུགས་ཀྱི་ད་ལྟའི་གནས་བབ། ༧གོང་ས་རྒྱལ་བ་རིན་པོ་ཆེ་མཆོག་གི་བཀའ་སློབ་ལམ་སྟོན་དང་གཞིས་ལུས་རྒྱ་ཆེའི་མི་མང་གི་སེམས་ཤུགས། དེ་བཞིན་རྒྱལ་སྤྱིའི་ཚོགས་སྡེ་ཁག་གི་རྒྱབ་སྐྱོར་སོགས་ལ་བརྟེན་ནས་བོད་དོན་འཐབ་རྩོད་མུ་མཐུད་དུ་གནས་ཐུབ་སྐོར་དང་། བོད་རྒྱའི་དཀའ་རྙོག་སེལ་ཐབས་སུ་དབུ་མའི་ལམ་གྱི་སྲིད་ཇུས་ཐོག་ལ་ཤར་སྐྱོད་བྱེད་བཞིན་པའི་སྐོར་སོགས་མ་འོངས་ལས་འཆར་ཁག་གི་སྐོར་ལ་གླེང་མོལ་གནང་ཡོད་འདུག སྐབས་དེར་ཚོགས་གཙོ་ཨེལ་སི་ཝན་ཧུ་ཧྥི་མཆོག་གིས། རྒྱ་ནག་དང་འབྲེལ་བའི་གྲོས་ཚོགས་འཐུས་མིའི་མཉམ་འབྲེལ་ཚོགས་ཆུང་ (Inter Parliamentary Alliance on China) ཐོག་བོད་དོན་གླེང་སློང་གནང་རྒྱུའི་ཞལ་བཞེས་དང་། རྒྱ་ནག་གཞུང་གིས་དབྱིན་ཡིག་ཐོག་བོད་ཀྱི་མིང་བརྗེ་སྒྱུར་བཏང་བ་དང་། བོད་ཀྱི་རིག་གཞུང་རྩ་མེད་གཏོང་སླད་བོད་ཕྲུག་རྣམས་བཅའ་སྡོད་སློབ་གྲྭར་བཅུག་པའི་གནད་དོན་སོགས་ཀྱི་ཐད་ལ་བློ་འཚབ་ཡོད་སྐོར་སོགས་གསུངས་འདུག
ཉིན་དེའི་ཉིན་རྒྱབ་ཏུ་བཀའ་བློན་མཆོག་སྦེལ་ཇེམ་གཞུང་གི་གནད་ཡོད་མི་སྣ་ཁག་ཅིག་དང་ལས་བྱེད་ལྷན་དུ་ཐུག་འཕྲད་གནང་སྟེ། བོད་དོན་སྐོར་གྱི་གནད་དོན་མང་པོའི་ཐོག་ལ་གྲོས་བསྡུར་གནང་བ་དང་། སྐབས་དེར་ཕྱི་དྲིལ་བཀའ་བློན་མཆོག་གིས། བོད་མིའི་སྒྲིག་འཛུགས་ཀྱིས་བོད་རྒྱའི་དཀའ་རྙོག་སེལ་ཐབས་སུ་རྒྱ་ནག་སྲིད་གཞུང་དང་གྲོས་མོལ་བྱ་རྒྱུའི་དམ་བཅའ་བརྟན་པོ་ཡོད་ཀྱང་། ད་ལྟའི་ཆར་རྒྱ་གཞུང་གིས་བོད་ནང་དུ་དྲག་གནོན་སྲིད་ཇུས་ལག་བསྟར་བྱེད་བཞིན་པར་སྐྱོན་བརྗོད་དང་རྒྱ་གཞུང་གིས་འཛེམ་ཟོན་མེད་པར་མུ་མཐུད་དུ་ལག་བསྟར་བྱ་རྒྱུ་རེད་ཅེས་ནན་བརྗོད་གནང་བ་མ་ཟད། སྦེལ་ཇེམ་ཁུལ་གྱི་བོད་མིའི་གཟའ་མཇུག་སློབ་གྲྭའི་འཛིན་ཁང་གི་དཀའ་ངལ་སྐོར་སྙན་སེང་དང་རྒྱབ་སྐྱོར་ཡོང་བའི་འབོད་སྐུལ་ཞུས་ཡོད་འདུག་ལ། སྦེལ་ཇེམ་གཞུང་ནས་བོད་ཀྱི་ཐུན་མོང་མ་ཡིན་པའི་ཆོས་དང་རིག་གཞུང་རྒྱུན་གནས་སླད། ཡུ་རོབ་མཐུན་ཚོགས་ཀྱིས་བོད་དོན་དམིགས་བསལ་འབྲེལ་མཐུད་པ་བསྐོ་བཞག་གནང་རྒྱུའི་ཐུགས་འགན་བཞེས་པའི་རེ་སྐུལ་ཞུས་ཡོད་འདུག
གསར་འགོད་པ། བསྟན་འཛིན་ཕུར་བུ།
རྩོམ་སྒྲིག་པ། པདྨ་མཚོ།
