ཕྱི་ཕྱོགས་ཀྱི་དཔེ་དེབ་པར་བསྐྲུན་བྱས་པ་སོགས་ཀྱི་ཉེས་མིང་གཡོགས་ཏེ་རྔ་བ་ཀིརྟི་དགོན་གྱི་དཔེ་མཛོད་འགན་འཛིན་འཛིན་བཟུང་བྱས་ནས་ཟླ་༨ ལྷག་ཕྱིན་འདུག
ཀིརྟི་དགོན་གྱི་དཔེ་མཛོད་འགན་འཛིན་དགེ་འདུན་པ་བློ་བཟང་ཐབས་མཁས་ལགས་ཀྱིས་བོད་ཕྱི་ལོག་གི་དཔེ་ཆ་དཔར་བསྐྲུན་དང་། ཕྱི་ལོག་ལ་འབྲེལ་བ་བྱས་པའི་ཉེས་མིང་འོག་འཛིན་བཟུང་བཀག་ཉར་བྱས་ཏེ་ཟླ་༨ ལྷག་ཕྱིན་ཡོད་ཀྱང་། ད་ལྟའང་ཁྲིམས་ཐག་བཅད་ཡོད་མེད་དང་གང་དུ་གང་ཡོད་མེད་སོགས་གང་ཡང་ཤེས་རྟོགས་མ་ཐུབ་པར་ལྷག་ཡོད་འདུག
འདི་ག་བོད་ཀྱི་དུས་བབ་གསར་ཁང་ལ་འབྲེལ་ཡོད་ནས་ཁུངས་ལྡན་གནས་ཚུལ་མཁོ་སྤྲོད་གནང་བ་ལྟར་ན། ཕྱི་ལོ་ ༢༠༢༣ ཟླ་ ༦ པའི་ནང་དུ། རྒྱ་གཞུང་ཉེན་རྟོག་པས་རྔ་བ་ཀིརྟི་དགོན་གྱི་དཔེ་མཛོད་འགན་འཛིན་གནང་མྱོང་མཁན། དགེ་འདུན་་པ་བློ་བཟང་ཐབས་མཁས་ལགས་ཀྱིས། རྒྱ་གར་ལྷོ་ཕྱོགས་ཀྱི་གདན་ས་ཁག་ནས་བཏོན་པའི་དཔེ་ཆ་བོད་ནང་དཔར་བསྐྲུན་དང་། ཕྱི་ལོག་ལ་འབྲེལ་བ་བྱས་པའི་ཉེས་མིང་གཡོགས་ཏེ་འཛིན་བཟུང་བྱས་ཡོད་འདུག ཁོང་འཛིན་བཟུང་བྱས་ཏེ་ཟླ་ ༨ ལྷག་ཕྱིན་ཡོད་ནའང་། ཁྲིམས་ཐག་བཅད་ཡོད་མེད་སོགས་ཀྱི་གནས་ཚུལ་གང་ཡང་ཤེས་རྟོགས་ཐུབ་ཀྱི་མེད་པ་རེད།
དགུང་ལོ་ ༥༤ ཡིན་པའི་དགེ་འདུན་པ་བློ་བཟང་ཐབས་མཁས་ལགས་ནི་རྨེའུ་རུ་མ་རུ་ཆེན་གསུམ་པ་ནས་ཡིན་ཞིང་། ཕ་མིང་ལ་ཁ་བརྩོན་དང་མ་མིང་ལ་ཞོ་ཀ་ཞུ་ཡི་ཡོད་འདུག
གསར་འགོད་པ། ཉི་མ་ཚེ་རིང་།
རྩོམ་སྒྲིག་པ། པདྨ་མཚོ།
