ཨ་རིའི་བོད་དོན་དམིགས་བསལ་འབྲེལ་མཐུད་པ་ལྕམ་ཨུ་ཛི་ར་ཛེ་ཡ་མཆོག་གིས་རྒྱ་ནག་གིས་བོད་སྡེ་དགེ་རྫོང་གི་དབོན་པོ་སྟོད་ནས་སེར་སྐྱ་མང་པོ་འཛིན་བཟུང་བཙན་འཁྲིད་བྱས་པར་བློ་འཚབ་ཆེན་པོ་ཡོད་སྐོར་གསུངས་འདུག
ཁ་སང་ཕྱི་ཚེས་ ༢༥ ཉིན་ཨ་རིའི་བོད་དོན་དམིགས་བསལ་འབྲེལ་མཐུད་པ་ལྕམ་ཨུ་ཛི་ར་ཛེ་ཡ་ (Uzra Zeya) མཆོག་གིས་སྤྱི་ཚོགས་དྲ་ལམ་ཨེག་སི་ (X) སྟེང་། དུས་རབས་མང་པོའི་ལོ་རྒྱུས་ལྡན་པའི་དགོན་རྙིང་དེ་དག་ནི་བོད་ཀྱི་དགེ་འདུན་པ་བརྒྱ་ཕྲག་མང་པོའི་བཞུགས་གནས་ཡིན་ཞིང་། དེའི་ནང་དུ་རྟེན་དང་བརྟེན་པའི་ཤུལ་བཞག་རིག་དངོས་རྩ་ཆེན་ཡོད་པ་རེད། ཨ་རིའི་གཞུང་གི་ངོས་ནས་བོད་མིའི་ཐུན་མོང་མ་ཡིན་པའི་རིག་གཞུང་དང་ཆོས་ལུགས། བོད་མིའི་ངོ་བོ་དང་བོད་ཀྱི་སྐད་ཡིག་སོགས་མི་ཉམས་རྒྱུན་འཛིན་བྱེད་པར་རྒྱབ་སྐྱོར་ཡོད། ཅེས་གསུངས་འདུག
ད་དུང་ཁོང་མོས། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱིས་བོད་ནང་དུ་ཆུ་རགས་གསར་རྒྱག་གི་ལས་གཞི་དང་། ཁུལ་དེའི་དགོན་སྡེ་ཁག་དང་གྲོང་ཚོ་ཁག་ཅིག་གནས་སྤོར་དགོས་པའི་བཙན་བཀའ་བཏང་བར་བོད་མི་མང་པོ་ཞིག་གིས་ངོ་རྒོལ་གྱི་ལས་འགུལ་སྤེལ་བར་བརྟེན། རྒྱ་ནག་གིས་བོད་མི་སེར་སྐྱ་མང་པོ་འཛིན་བཟུང་བྱས་པའི་གནད་དོན་ཐད་བློ་འཚབ་ཆེན་པོ་བྱུང་། རྒྱ་ནག་གིས་བོད་མིའི་འགྲོ་བ་མིའི་ཐོབ་ཐང་དང་སྨྲ་བརྗོད་རང་དབང་ལ་བརྩི་བཀུར་བྱེད་དགོས་པ་དང་། བོད་ཀྱི་གཙང་པོ་དང་ས་ཞིང་བདག་གཉེར་གྱི་སྲིད་ཇུས་ལག་བསྟར་ནང་དུ་བོད་མི་རྣམས་ངེས་པར་དུ་བཅུག་དགོས་ཀྱི་ཡོད་པ་རེད། ཅེས་གསུངས་འདུག
རྒྱ་ནག་གཞུང་གིས་སྐམ་ཐོག་ཆུ་གློག་ཁང་ཟེར་བ་འཛུགས་སྐྲུན་བྱེད་པར་ཁ་གཡར་ཏེ། བོད་སྡེ་དགེ་རྫོང་དབོན་པོ་སྟོད་ཀྱི་དབོན་སྟོད་དགོན་དང་ཡེ་ན་དགོན་སོགས་དགོན་པ་དྲུག་དང་གྲོང་ཚོ་གཉིས་ལྷག་གནས་སྤོར་དགོས་པའི་བཙན་བཀའ་གཏོང་གི་ཡོད་པ་ལྟར། ཕྱི་ཚེས་ ༢༡ དང་ ༢༢ ཉིན་སོགས་སུ་ས་གནས་སེར་སྐྱ་མང་པོ་འཛིན་བཟུང་བཙན་འཁྲིད་བྱས་ཡོད་པ་དང་། ཁོང་ཚོར་གོང་རིམ་གྱི་བཀའ་བཀོད་ལ་ངོ་རྒོལ་དང་འགོག་རྐྱེན་བཟོས་པའི་ཉེས་མིང་གཡོགས་ཏེ་བཀག་ཉར་བྱས་ནས་འདྲི་བརྩད་བྱེད་བཞིན་ཡོད་པ་རེད། ཡིན་ནའང་། རྒྱ་ནག་གཞུང་གིས་ས་གནས་སུ་འགྲོ་འོང་དང་དྲ་ལམ་སོགས་ལ་བཀག་སྡོམ་ཤུགས་ཆེན་བྱེད་བཞིན་ཡོད་པས་མི་ག་ཚོད་ཅིག་འཛིན་བཟུང་བྱས་ཡོད་མེད་དང་། ཁོང་ཚོའི་གནས་སྟངས་ཅི་ཆགས་སོགས་ཀྱི་གནས་ཚུལ་ཤེས་རྟོགས་ཐུབ་ཁག་པོ་ཆགས་འདུག
གསར་འགོད་པ། བསྟན་འཛིན་ཕུར་བུ།
རྩོམ་སྒྲིག་པ། པདྨ་མཚོ།
