ཁྲི་ཆེན་གུང་ཐང་འཇམ་པའི་དབྱངས་སྐུ་ཕྲེང་དྲུག་པ་མཆོག་གི་མཛད་རྣམ་ཞིག་དབུ་འབྱེད་གནང་།

འབུམ་རམས་པ་ལྡོང་ཕྱིང་གུར་བ་རྒྱལ་ལོ་ལགས་ཀྱིས་བརྩམས་གནང་བའི་ཁྲི་ཆེན་གུང་ཐང་འཇམ་པའི་དབྱངས་སྐུ་ཕྲེང་དྲུག་པ་རྗེ་བཙུན་འཇིགས་མེད་བསྟན་པའི་དབང་ཕྱུག་དཔལ་བཟང་པོའི་མཛད་རྣམ་༼སྲིད་པ་མགུ་བའི་མཆོད་ཕྲེང་།༽ ཞེས་པའི་དཔེ་དེབ་ཅིག་དབུ་འབྱེད་གནང་འདུག

ཁ་སང་ཕྱི་ཟླ་༢ པའི་ཚེས་༢༥ ཉིན། སྤེལ་ལྗམ་དུ་ཡོད་པའི་བླ་བྲང་ཤིང་སློང་གོ་སྒྲིག་ཚོགས་ཆུང་གིས་གོ་སྒྲིག་འོག་ནུབ་བྱང་མི་རིགས་སློབ་གྲྭ་ཆེན་མོའི་སློབ་དཔོན་ཟུར་བ་དང་། ཁ་ན་ཌའི་ཌོ་རོན་ཌོ་སློབ་ཆེན་གྱི་སྤྱི་ཚོགས་རིག་པའི་འབུམ་རམས་པ་ལྡོང་ཕྱིང་གུར་བ་རྒྱལ་ལོ་ལགས་ཀྱིས་བརྩམས་གནང་བའི་ཁྲི་ཆེན་གུང་ཐང་འཇམ་པའི་དབྱངས་སྐུ་ཕྲེང་དྲུག་པ་རྗེ་བཙུན་འཇིགས་མེད་བསྟན་པའི་དབང་ཕྱུག་དཔལ་བཟང་པོའི་མཛད་རྣམ་ ༼སྲིད་པ་མགུ་བའི་མཆོད་ཕྲེང་།༽ ཞེས་བྱ་བའི་དཔེ་དེབ་དབུ་འབྱེད་མཛད་སྒོ་ཚོགས་གནང་འདུག་ལ། མཛད་སྒོའི་སྟེང་སྐུ་མགྲོན་གཙོ་བོ་དཔལ་ལྡན་སྐུ་ངོ་སྲིད་སྐྱོང་སྤེན་པ་ཚེ་རིང་མཆོག་གཙོས་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག གཞན་ཡང་སྦེལ་ལྗམ་དང་སུད་སི། དབྱིན་ལན། ཐེ་ཝན་བཅས་ཀྱི་སྐུ་ཚབ་དོན་གཅོད་རྣམ་པ། ཡོ་རོབ་ཕྱོགས་བཞུགས་སྤྱི་འཐུས་རྣམ་རྣམ་གཉིས་གཙོས་སྤྱི་འཐུས་ཁག་ཅིག་དང་། བོད་ཀྱི་གཞོན་ནུ་ལྷན་ཚོགས་སོགས་རྒྱ་གར་དང་ཨ་རི། ཡོ་རོབ། ཐེ་ཝན་བཅས་སུ་ཡོད་པའི་གཞུང་ཁོངས་མ་ཡིན་པའི་ཚོགས་པ་ཁག་གི་ཚོགས་གཙོ་དང་རྒྱུན་ལས་བཅས་ཁྱོན་སྐུ་མགྲོན་བཅོ་ལྔ་ལྷག་ཕེབས་འདུག

མཛད་སྒོའི་ཐོག་སྐུ་མགྲོན་གཙོ་བོ་དཔལ་ལྡན་སྐུ་ངོ་སྲིད་སྐྱོང་སྤེན་པ་ཚེ རིང་མཆོག་གིས་དཔེ་དེབ་དངོས་སུ་དབུ་འབྱེད་གནང་རྗེས་སྤྱི་འཐུས་ཚོགས་གཙོ་མཆོག་དང་དཔལ་ལྡན་སྲིད་སྐྱོང་གཉིས་ཀྱིས་མཛད་སྒོ་དང་འབྲེལ་བའི་གསུང་བཤད་གནང་བ་དང་། མཛད་རྣམ་རྩོམ་པ་པོ་ལྡོང་ཕྱིང་གུར་བ་རྒྱལ་ལོ་ལགས་ཀྱིས་ཁྲི་ཆེན་གུང་ཐང་སྐུ་ཕྲེང་དྲུག་པ་མཆོག་གི་མཛད་རྣམ་༼སྲིད་པ་མགུ་བའི་མཆོད་ཕྲེང་།༽ ཞེས་བ་འདི་ཁོ་རང་བོད་ནང་བཞུགས་སྐབས་མགོ་བརྩམས་ཏེ་མཇུག་བཙན་བྱོལ་ནས་བསྡུས་བ་དང་། ༧ གོང་ས་མཆོག་ལ་དཔེ་དེབ་ཀྱི་མ་ཡིག་སྤྱན་འབུལ་ཞུས་བར་ཐུགས་དགྱེས་ཚོར་ཆེན་པོས་གླེང་བརྗོད་བསྩལ་གནང་བ་བཅས་དཔེ་དེབ་རྩོམ་པའི་བརྒྱུད་རིམ་ངོ་སྤྲོད་དང་། ལྷག་པར་དུ་ཁྲི་ཆེན་གུང་ཐང་སྐུ་ཕྲེང་དྲུག་པ་མཆོག་གིས་གཉན་འཕྲང་ཆེ་བའི་དུས་སྐབས་སུ་བོད་མི་རིགས་ཀྱི་བསྟན་སྲིད་སླར་གསོ་ཆེད་དཀའ་ངལ་གྲངས་མེད་ལ་གདོང་ལེན་གནང་སྟེ་སྐུ་ལས་རྒྱ་ཆེ་བསྐྱོན་ཡོད་པ། ༧པཎ་ཆེན་སྐུ་ཕྲེང་བཅུ་བའི་ཕྱག་གཡས་བ་ལྟ་བུ་གནང་སྟེ་རིག་གནས་གསར་བརྗེ་ཆེན་མོའི་རྗེས་བོད་ཀྱི་རིག་གཞུང་སླར་གསོ་ཆེད་སྐུ་ལས་ག་ཚད་བསྐྱོན་ཡོད་པ། ལྷག་པར་དུ་༧ པཎ་ཆེན་སྐུ་ཕྲེང་བཅུ་བ་ཞིང་གཞན་དུ་གཤེགས་རྗེས་བོད་བསྟན་སྲིད་ཀྱི་ལས་འགན་ཁོང་གི་ཕྲག་ཏུ་ལྷུང་རྗེས་སྐུ་ལས་ག་ཚད་བསྐྱོན་ཡོད་པ། ༧པཎ་ཆེན་རིན་པོ་ཆེ་ཡི་ཡང་སྲིད་ཐུགས་ཐག་གཅོད་སྐབས་སྐུ་ངལ་ག་ཚད་མྱངས་ཡོད་པ་བཅས་མཛད་རྣམ་ངོ་སྤྲོད་གནང་བ་དང་། བོད་མི་རིགས་ལ་བྱས་རྗེས་ཆེ་བའི་བླ་མ་འདི་ཉིད་ཀྱི་མཛད་རྗེས་གཞིས་བྱེས་གཉིས་ཀྱི་གཞོན་སྐྱེས་ཚོར་ངོ་སྤྲོད་གནང་བ་བརྒྱུད་བོད་གཞིས་བྱེས་གཉིས་ཀྱི་འབྲེལ་ལམ་ཐག་ཉེ་རུ་འགྲོ་བར་ཕན་ཐོགས་ཡོད་པར་དགོངས་ཏེ་མཛད་རྣམ་འདི་བརྩམས་པའི་དམིགས་ཡུལ་སྐོར་ངོ་སྤྲོད་གནང་།

མཐར་སྤེལ་ལྗམ་བླ་བྲང་ཤིང་སློང་གོ་སྒྲིག་ཚོགས་ཆུང་ངོས་ནས་སྤེལ་ལྗམ་གནས་སྡོད་བྱང་ཉི་མ་བླ་བྲང་ལྷ་སྡེ་མི་སྡེ་ཡོངས་ཀྱི་ཚབ་བྱས་ཏེ་དཔལ་ལྡན་སྲིད་སྐྱོང་མཆོག་དང་སྤྱི་འཐུས་ཚོགས་གཙོ་མཆོག་རྣམ་གཉིས་གཙོས་སྐུ་མགྲོན་རྣམ་པར་ཐུགས་རྗེ་ཆེ་ཞུས་བ་དང་སྦྲགས་ཐུགས་རྗེ་ལེགས་འབུལ་དང་མཛད་རྣམ་དེབ་རེ་ཚོགས་བཅར་བ་ཡོངས་ལ་ཕུལ་ཡོད་འདུག

སྤེལ་ལྗམ་ནས་ས་དཀར་བཀྲ་ཤིས་ཀྱིས་གནས་ཚུལ་མཁོ་གཏོང་གནང་།