བོད་དོན་ལས་འགུལ་བ་ཚེ་རིང་དབང་
ཁ་སང་ཕྱི་ཚེས་ ༡ ནས་ ༡༠ བར་ཉིན་གྲངས་བཅུའི་རིང་སུད་སི་གྲོང་ཁྱེར་ཛུ་རིག་ (Zürich) ནས་ཇི་ནི་ཝ་ (Geneva) བར་ཀི་ལོ་མི་ཊར་ ༢༨༠ ཙམ་གྱི་ལམ་ཐག་བརྒྱུད་བོད་དོན་ཞི་བའི་གོམ་བགྲོད་ཀྱི་ལས་འགུལ་ཞིག་སྤེལ་བཞིན་འདུག
དེ་རིང་འདི་གའི་གསར་འགོད་པར་ཁ་པར་བརྒྱུད་བོད་དོན་ལས་འགུལ་བ་ཚེ་རིང་དབང་འདུས་ལགས་སུ་ལས་འགུལ་འདི་སྤེལ་བའི་དགོས་དམིགས་གང་ཡིན་སྐོར་དྲིས་པར། ཁོང་གིས། ངས་ཉིན་གྲངས་བཅུའི་རིང་བོད་དོན་ཞུ་གཏུག་གི་ཞི་བའི་གོམ་བགྲོད་ལས་འགུལ་སྤེལ་བཞིན་ཡོད་པ་མ་ཟད། ཐེངས་འདིའི་ལས་འགུལ་གྱི་དགོས་དམིགས་གཙོ་བོ་ནི། ༧གོང་ས་རྒྱལ་བ་རིན་པོ་ཆེ་མཆོག་གང་མགྱོགས་བོད་ལ་གདན་འདྲེན་ཞུ་རྒྱུ་དང་། གཉིས་པ། ༧པཎ་ཆེན་རིན་པོ་ཆེ་མཆོག་དང་ཁོང་གི་ནང་མི་རྣམས་གང་མགྱོགས་ཀློད་གྲོལ་གཏོང་དགོས་པ། གསུམ་པ། བོད་ནང་གི་བོད་མིའི་འགྲོ་བ་མིའི་ཐོབ་ཐང་གི་གནས་སྟངས་ཛ་དྲག་ཏུ་གྱུར་ཡོད་པས། བོད་ནང་དུ་འགྲོ་བ་མིའི་ཐོབ་ཐང་སྤྲོད་དགོས་པ། བཞི་པ། རྒྱ་ནག་གི་བཟོ་སྐྲུན་བྱས་པའི་ཅ་དངོས་རིགས་ཉོ་འཚོང་མཚམས་འཇོག་བྱ་དགོས་པ། ལྔ་པ། ཏོག་དབྱིབས་གཉན་རིམས་ཀྱི་འབྱུང་ཁུངས་རྒྱ་ནག་ཡིན་པས་རྒྱ་ནག་གིས་འགན་འཁུར་དགོས་པ། དྲུག་པ། བོད་ནང་གི་བོད་མི་རྣམས་ལ་བཙོན་འཇུག་དང་དམ་དྲག་ཤུགས་ཆེན་བྱེད་བཞིན་པའི་གནས་སྟངས་སོགས་མང་ཚོགས་ལ་གོ་རྟོགས་སྤེལ་རྒྱུ་ཡིན། ཞེས་བརྗོད་བྱུང་།
ད་དུང་ཁོང་གིས། ད་ལན་གྱི་ལས་འགུལ་ནང་ཇི་ནི་ཝར་བསྐྱོད་པའི་དམིགས་ཡུལ་གཙོ་བོ་ནི། དེ་སྔ་ངས་བོད་དོན་ལས་འགུལ་མ་སྤེལ་གོང་། ངས་བོད་མི་ཡོངས་ཀྱི་ཚབ་བྱས་ཏེ་སུད་སི་དོན་གཅོད་ལས་ཁུངས་ལ་ཁ་པར་བརྒྱུད་འབྲེལ་བ་བྱེད་སྐབས། ཁོང་ཚོས་འཛམ་གླིང་མཉམ་འབྲེལ་རྒྱལ་ཚོགས་ལ་བོད་དོན་སྐོར་གླེང་སློང་དང་རྒྱབ་སྐྱོར་གནང་གི་ཡིན་སྐོར་གསུངས་བར་བརྟེན། ང་རང་སེམས་པ་ཧ་ཅང་གི་དགའ་པོ་བྱུང་། ད་དུང་བོད་ནང་གི་གནས་སྟངས་དང་འབྲེལ་བའི་པར་དང་ཡི་གེ་སོགས་འགྲེམ་སྤེལ་བྱེད་དེ་མི་མང་ལ་གོ་རྟོགས་གང་མང་སྤེལ་གྱི་ཡིན། ཞེས་བརྗོད་བྱུང་།
ལས་འགུལ་དང་འབྲེལ་ནས་ཚེ་རིང་དབང་འདུས་ལགས་ཀྱིས་མུ་མཐུད་དུ། ཁ་སང་ཕྱི་ཚེས་ ༡ ཉིན་ང་དངརྫ་ཆུ་བཀྲ་ཤིས་ལགས་གཉིས་མཉམ་དུ་སུད་སི་གྲོང་ཁྱེར་ཛུ་རིག་ནས་ཨ་རོའོ་ (Aarau) གྲོང་སྡེ་བར་དུ་བོད་དོན་ཞུ་གཏུག་གི་ཞི་བའི་གོམ་བགྲོད་ལས་འགུལ་སྤེལ་བ་ཡིན། དེ་རིང་སུད་སིའི་གྲོང་སྡེ་ཨ་རོའོ་ནས་གྲོང་ཁྱེར་བྷར་ (Bern) བར་དུ་འགྲོ་བཞིན་ཡོད། ཅེས་དང་། ལས་འགུལ་འདིའི་བརྒྱུད་བོད་མི་རྣམས་རྡོག་རྩ་གཅིག་སྒྲིལ་བྱ་རྒྱུའི་དུས་ལ་བསླེབས་ཡོད་པ་དང་། བོད་མི་རྣམས་ཀྱིས་བོད་དོན་ཞུ་གཏུག་གི་ལས་འགུལ་གང་མང་སྤེལ་དགོས་པའི་ཐོག ངོ་རྒོལ་དང་སྐད་འབོད་ཀྱི་ལས་འགུལ་ཇི་འདྲ་ཞིག་སྤེལ་རུང་བོད་མི་གང་མང་མང་འཛོམས་དགོས་ཀྱི་ཡོད་པའི་རེ་སྐུལ་ཞུ་ཡི་ཡོད་སྐོར་སོགས་བརྗོད་བྱུང་།
ཚེ་རིང་དབང་འདུས་ལགས་ཀྱིས་མ་སྐུལ་དང་བླངས་ཀྱིས་བོད་དོན་ལས་འགུལ་མང་པོ་སྤེལ་མྱོང་འདུག་ལ། དེ་སྔ་ཕྱི་ལོ་ ༢༠༢༡ ཟླ་ ༥ ཚེས་ ༨ ཉིན་སུད་སི་གྲོང་ཁྱེར་ཝིན་ཊར་ཐུར་ (Winterthur) ནས་བོད་དོན་ཆེད་རྐང་འཁོར་སྐོར་སྐྱོད་ཀྱི་ལས་འགུལ་སྤེལ་ཏེ། ༧གོང་ས་རྒྱལ་བ་རིན་པོ་ཆེ་མཆོག་བོད་དུ་གང་མགྱོགས་གདན་འདྲེན་ཞུ་དགོས་པ་དང། རྒྱ་གཞུང་ནས་བཙན་འཁྲིད་བྱས་པའི་༧པཎ་ཆེན་དགེ་འདུན་ཆོས་ཀྱི་ཉི་མ་མཆོག་གང་མགྱོགས་ཀློད་གྲོལ་གཏོང་དགོས་པ། རྒྱ་གཞུང་གིས་བོད་ནང་འགྲོ་བ་མིའི་ཐོབ་ཐང་དང་ཆོས་དད་རང་དབང་རྡོག་རོལ་མཚམས་འཇོག་དགོས་པ། ཕྱི་ལོ་ ༢༠༢༢ ལོའི་དགུན་དུས་པེ་ཅིང་ཨོ་རྩལ་འགྲན་རྩོད་ཕྱིར་འཐེན་དགོས་པ་སོགས་དགོས་འདུན་དོན་ཚན་ལྔ་ཆེད་བཏོན་གནང་ཡོད་པ་རེད། ད་དུང་ཕྱི་ལོ་ ༢༠༠༠ ལོར་ཝིན་ཊར་ཐུར་ (Winterthur) ནས་ཇི་ནི་ཝ་ (Geneva) བར་དུ་ཞི་བའི་གོམ་བགྲོད་ཀྱིས་བོད་དོན་ལས་འགུལ་སྤེལ་ཡོད་འདུག
གསར་འགོད་པ། བསྟན་འཛིན་ཕུར་བུ།
རྩོམ་སྒྲིག་པ། པདྨ་མཚོ།
