རྒྱ་ནག་གཞུང་གིས་བོད་ལྷུན་འགྲུབ་རྫོང་ནས་ཡིན་པའི་ཕུན་ཚོགས་ཞེས་པ་ཞིག་ལ་གསང་བའི་ཡིག་ཆ་ཕྱི་ལ་བཀྲམ་པའི་ཉེས་མིང་འོག་བཙན་འཁྲིད་བྱས་ཡོད་འདུག
ཟླ་འདིའི་ཕྱི་ཚེས ༥ ཉིན། རྒྱ་ནག་གཞུང་གིས་བོད་རང་སྐྱོང་ལྗོངས་ཟེར་བའི་ལྷུན་འགྲུབ་རྫོང་མཚོ་སྟོད་གྲོང་ཚོ་ནས་ཡིན་པའི་བོད་མི་ཕུན་ཚོགས་ཞེས་པ་ཞིག་ལྷུན་འགྲུབ་རྫོང་ཐོག་ཏུ་ཕྱིན་སྐབས། གློ་བུར་དུ་ཉེན་རྟོག་པ་གསུམ་གྱིས་ཁོང་བཙན་འཁྲིད་བྱས་ཡོད་པ་དང་། ཁོང་གི་ནང་མི་ཚོས་འབྲེལ་ཡོད་ལས་ཁུངས་ལ་ཁོང་གང་དུ་ཡོད་མེད་དང་། ག་རེ་བྱས་ནས་བཙན་འཁྲིད་བྱས་པ་སོགས་སྐད་ཆ་དྲིས་ཏེ་ཐུག་ཏུ་འཇུག་དགོས་པའི་རེ་བ་བཏོན་ཡོད་ཀྱང་། ད་ལྟའང་གང་དུ་ཡོད་མེད་སོགས་ཤེས་རྟོགས་མ་ཐུབ་པར་ལྷག་ཡོད་འདུག
འདི་ག་བོད་ཀྱི་དུས་བབ་གསར་ཁང་ལ་འབྲེལ་ཡོད་ཅིག་གིས། རྒྱ་ནག་གཞུང་གིས་ཕུན་ཚོགས་ལགས་ལ་ཕྱིར་བསྒྲགས་མི་ཆོག་པའི་ཡིག་ཆ་འགའ་ཕྱི་ལ་བཀྲམ་ཡོད་ལུགས་ཀྱི་ཉེས་མིང་གཡོག་གི་ཡོད་སྐོར་དང་། དེ་སྔོན་ཕུན་ཚོགས་ལགས་ཀྱིས་ས་གནས་མགོ་འཁྲིད་ཚོས་མི་མང་གི་བདེ་སྡུག་ལ་ལྟ་སྐྱོང་ཚུལ་བཞིན་བྱེད་ཀྱི་མི་འདུག་ཅེས་ཐེར་འདོན་བྱས་པའི་རྐྱེན་གྱིས་ཁོང་ལ་ཉེས་མེད་ཉེས་འགེལ་བྱས་ཡོད་སྐོར་བརྗོད་གནང་བྱུང་།
ཕུན་ཚོགས་ལགས་རང་ལོ་ ༤༧ ཙམ་ཡིན་ཞིང་། བོད་རང་སྐྱོང་ལྗོངས་ཟེར་བའི་ལྷུན་གྲུབ་རྫོང་མཚོ་སྟོད་གྲོང་ཚོ་ནས་ཡིན་ཞིང་། ཁོང་དང་བཟའ་ཟླ་གཉིས་ལ་ལོ་ན་ ༡༥ ཅན་གྱི་བུ་མོ་ཞིག་དང་ལོ་ ༡༡ ཅན་གྱི་བུ་གཅིག་ཡོད་འདུག
