ཟླ་འདིའི་ཕྱི་ཚེས་ ༥ ཉིན་གྱི་བོད་ནང་གི་དགོང་མོའི་ཆུ་ཚོད་ ༥ ཡོལ་ཙམ་ལ་ཕ་ཡུལ་གཞིས་ཀ་རྩེ་རྣམ་གླིང་རྫོང་རྒྱ་མཚོ་ཡུལ་ཚོ་ནས་ཡིན་པའི་དབྱངས་མཚོ་ལགས་ཀློད་གྲོལ་བཏང་ཡོད་པ་དང་། དབྱངས་མཚོ་ལགས་ཕྱི་ལོ་ ༢༠༢༣ ཟླ་ ༣ ཚེས་ ༤ ཉིན་ཕྱི་ཕྱོགས་སུ་པར་རིས་བརྒྱུད་སྐུར་བྱས་པའི་ཉེས་མིང་འོག་འཛིན་བཟུང་བྱས་ཡོད་པ་རེད།
འདི་གའི་གསར་འགོད་པར་གནས་ཚུལ་མཁོ་སྤྲོད་པས། ཟླ་འདིའི་ཕྱི་ཚེས་ ༥ ཉིན་དབྱངས་མཚོ་ལགས་ཀྱི་ནང་མིར་ཁ་པར་བསླེབས་ནས། ས་གནས་ཉེན་རྟོག་ཁང་དུ་ཁོང་མོ་ལེན་གི་ཤོག མོ་རང་གི་ཨ་མ་དང་སྡེ་དཔོན་སོགས་ཁྲིད་ནས་ཤོག་ལབ་བྱུང་བས། ས་གནས་ཉེན་རྟོག་ཁང་དུ་སོང་བའི་སྐབས་སུ་རྗེས་མ་ནས་གནས་ཚུལ་ག་རེ་བྱུང་བ་ཡིན་ན་འགན་ཁུར་ཐོག་ས་རྟགས་འགོད་བཅུག་སོང་། ཞེས་བརྗོད་བྱུང་བ་དང་། ད་ལྟ་དབྱངས་མཚོ་ལགས་ཀློག་གྲོལ་བཏང་ཡོད་ཀྱང་། ལྟ་རྟོག་འོག་བཞག་སྟེ་མི་གཞན་ལ་ཐུག་འཕྲད་སོགས་བྱེད་ཆོག་གི་མེད་པ་མ་ཟད། ཁོང་མོའི་གཟུགས་གཞིའི་གནས་སྟངས་སོགས་ཤེས་རྟོགས་ཐུབ་ཀྱི་མེད་པ་རེད།
རྒྱ་ནག་གཞུང་གིས་༢༠༢༣ ལོའི་ཟླ་ ༣ ཚེས་ ༤ ཉིན་ཁ་པར་ནང་དུ་སྔོག་བཤེར་བྱེད་སྐབས་ཕྱི་ཕྱོགས་སུ་པར་རིས་སོགས་བརྒྱུད་སྐུར་བྱས་ཡོད་པའི་ཉེས་མིང་གཡོགས་ནས་བོད་གཞིས་ཀ་རྩེ་གྲོང་ཁྱེར་གྱི་གངས་རི་ཟ་ཁང་ཞེས་པའི་ནང་ལས་ཀ་བྱེད་བཞིན་པའི་རང་ལོ་༢༣ཅན་གྱི་དབྱངས་མཚོ་ལགས་འཛིན་བཟུང་བཙན་འཁྲིད་བྱས་ཡོད་འདུག སྐབས་དེར་བོད་ཀྱི་ལོ་སར་དང་གསུམ་བཅུའི་དུས་དྲན་སོགས་སུ་རྒྱ་ནག་གཞུང་གིས་བོད་ཁུལ་དུ་སྔར་ལས་དམ་དྲག་དང་ཞིབ་བཤེར་བྱེད་བཞིན་ཡོད་འདུག
དབྱངས་མཚོ་ལགས་རང་ལོ་ ༢༤ ཡིན་ཞིང་། ཆུང་དུས་ནས་པ་ལགས་འདས་གྲོངས་སུ་ཕྱིན་ཡོད་པས་སློབ་གྲྭར་འགྲོ་མྱོང་མེད་པ་དང་། ཁྱིམ་དུ་ཨ་མ་དང་སློབ་གྲྭར་འགྲོ་བཞིན་པའི་ལོ་ ༧ ཅན་ཀྱི་གཅུང་པོ་ཞིག་ཡོད་འདུག
