ཨོ་གླིང་སྐུ་ཚབ་དོན་གཅོད་ཀྱིས་ཨོ་གླིང་གཞུང་ནས་རྒྱ་ནག་གི་ཕྱི་སྲིད་བློན་ཆེན་དང་ལྷན་དུ་བོད་ནང་གི་ཛ་དྲག་གི་གནས་སྟངས་གླེང་སློང་དགོས་པའི་རེ་སྐུལ་ཞུས་འདུག
སང་ཉིན་ཕྱི་ཚེས་ ༢༠ ཉིན་རྒྱ་ནག་གི་ཕྱི་སྲིད་བློན་ཆེན་ཝང་ཡེ་དང་ཨོ་གླིང་གི་ཕྱི་སྲིད་བློན་ཆེན་པེ་ནི་ཝོང་ (Penny Wong) གཉིས་ཚོང་འབྲེལ་དང་བདེ་སྲུང་སླད་ཐུག་འཕྲད་བྱ་འཆར་ཡོད་པར་བརྟེན། ཨོ་གླིང་གི་རྒྱལ་ས་ཁེན་བྷེ་ར་ (Canberra) རུ་བོད་མི་དང་ཧོང་ཀོང་བ་སོགས་མཉམ་འབྲེལ་གྱིས་ཞི་བའི་ངོ་རྒོལ་ལས་འགུལ་སྤེལ་བཞིན་འདུག
དེ་འབྲེལ་ཐད་ཨོ་གླིང་སྐུ་ཚབ་དོན་གཅོད་ལས་ཁུངས་ཀྱིས། ཨོ་གླིང་གི་ཕྱི་སྲིད་བློན་ཆེན་པེ་ནི་ཝོང་ (Penny Wong) ལགས་སུ་ཕྱག་བྲིས་ཤིག་ཕུལ་ཏེ། ཨོ་རྒྱ་གཉིས་ཀྱི་མགོ་ཁྲིད་ཐུག་འཕྲད་སྐབས་བོད་ནང་གི་ཛ་དྲག་གི་གནས་སྟངས་སྐོར་གླེང་སློང་དང་གྲོས་མོལ་གནང་དགོས་པའི་རེ་སྐུལ་ཞུས་ཡོད་འདུག་ལ། ཞུ་ཡིག་དེའི་ནང་། ད་ལན་རྒྱ་ནག་གི་ཕྱི་སྲིད་བློན་ཆེན་ཨོ་གླིང་དུ་ཡོང་གི་ཡོད་པར་བརྟེན། བོད་ནང་གི་ཛ་དྲག་གནས་སྟངས་ཐོག་གླེང་སློང་བྱ་རྒྱུའི་གོ་སྐབས་བཟང་པོ་ཞིག་ཡིན་པ་གསལ་སྟོན་དང་། བོད་ནང་དུ་རྒྱ་ནག་གཞུང་གི་སྟངས་འཛིན་འོག་ཡོད་པའི་མི་སེར་སྤེལ་ཡུལ་དང་གཏན་འཇགས་སློབ་གྲྭ་ཁག་ཏུ་བོད་ཕྲུག་ས་ཡ་ ༡ ལྷག་བཙན་གྱིས་རྒྱ་སྒྱུར་སློབ་གསོ་སྤྲོད་ཀྱི་ཡོད་སྐོར་དང་། བོད་མིའི་ཆོས་དད་རང་དབང་ལ་དམ་དྲག བོད་མི་རྣམས་ནག་ཉེས་མེད་པར་འཛིན་བཟུང་དང་། ཉེ་ལམ་ཁམས་སྡེ་དགེའི་ཁུལ་དུ་བོད་མི་ཞི་རྒོལ་བ་རྣམས་ལ་དྲག་གནོན་བྱས་དང་བྱེད་མུས་ཡིན་པ་སོགས་བོད་ནང་གི་ཛ་དྲག་གནས་སྟངས་གསལ་བཤད་དང་། ཨོ་གླིང་གཞུང་གིས་རྒྱ་ནག་དང་ལྷན་དུ་ཚོང་འབྲེལ་བྱེད་སྐབས། འགྲོ་བ་མིའི་ཐོབ་ཐང་གི་གནས་བབ་དེ་ཚོང་འབྲེལ་ལས་ཀྱང་གལ་ཆེ་བ་བརྩི་གནང་ཡོང་བའི་འབོད་སྐུལ་ཞུས་འདུག་ལ། ཨོ་གླིང་གཞུང་གི་ངོས་ནས་ཕྱི་འབྲེལ་ཐབས་ཇུས་བེད་སྤྱོད་བྱས་ཏེ་བོད་ནང་གི་ཛ་དྲག་གནས་སྟངས་སེལ་ཐབས་གནང་དགོས་པའི་འབོད་སྐུལ་ཞུས་ཡོད་འདུག
ཞུ་ཡིག་ནང་དོན་ཚན་བཞི་ཅན་གྱི་འབོད་སྐུལ་ཞུས་པའི་ནང་། གཅིག བོད་ནང་དུ་ཆོས་དང་རིག་གཞུང་། ཁོར་ཡུག་གཏོར་བཤིག་གཏོང་བཞིན་པ་ཐེར་འདོན་གྱིས་འགྲོ་བ་མིའི་ཐོབ་ཐང་གི་གནས་བབ་སྐོར་གླེང་སློང་གནང་རྒྱུ་དང་། གཉིས། རྒྱ་ནག་གཞུང་ནས་ཁམས་སྡེ་དགེའི་ཞི་རྒོལ་བ་བཙོན་འཇུག་བྱས་པ་རྣམས་སྔོན་འགྲོའི་ཆ་རྐྱེན་གང་ཡང་མེད་པའི་ཐོག་ནས་འཕྲལ་དུ་ཀློད་གྲོལ་དང་། ཁོང་ཚོར་དུས་ཐོག་སྨན་བཅོས་མཐུན་རྐྱེན་སྦྱར་རྒྱུའི་འབོད་སྐུལ་གནང་དགོས། གསུམ། རྒྱ་ནག་གཞུང་ལ་བོད་ནང་རྒྱལ་སྤྱིའི་ལྟ་ཞིབ་དང་། གསར་འགོད་པ་སོགས་བསྐྱོད་རྒྱུར་དམ་དྲག་བྱེད་མཚམས་འཇོག་རྒྱུར་སྐུལ་འདེད་གཏོང་རྒྱུ། བཞི། རྒྱ་ནག་གཞུང་ལ་བོད་རྒྱའི་དཀའ་རྙོག་སེལ་ཐབས་སུ་བོད་རྒྱའི་གྲོས་མོལ་སླར་གསོ་ཡོང་ཐབས་ལ་སྐུལ་འདེད་གཏོང་དགོས་བཅས་པ་རེད་འདུག
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་པ། སྐལ་བཟང་སྦྱིན་པ།
