དེ་རིང་༧གོང་ས་རྒྱལ་བ་རིན་པོ་ཆེ་མཆོག་ལ་སྟོད་པ་གཞིས་བྱེས་གཉིས་དང་སྤུ་ཧྲེང་མི་མང་གིས་བརྟན་བཞུགས་བསྟར་འབུལ་ཞུས།
དེ་རིང་སྔ་དྲོ་ཆུ་ཚོད་ ༨ སྟེང་བཞུགས་སྒར་ཐེག་ཆེན་གཙུག་ལག་ཁང་དུ་༧གོང་ས་རྒྱལ་བ་རིན་པོ་ཆེ་མཆོག་ལ་སྟོད་པ་གཞིས་བྱེས་དང་སྤུ་ཧྲེང་མི་མང་གིས་བརྟན་བཞུགས་བསྟར་འབུལ་ཞུས་པ་དང་། སྐབས་དེར་༧མགོན་པོ་གང་ཉིད་མཆོག་གིས་སྐུ་ཉིད་དགུང་གྲངས་བརྒྱ་ཕྲག་ལྷག་བཞུགས་རྒྱུ་ཡིན་པའི་བཀའ་བཞེས་བསྐྱངས་གནང་སོང་།
༧གོང་ས་རྒྱལ་བ་རིན་པོ་ཆེ་མཆོག་གིས། དེ་རིང་ཁྱེད་རང་ཚོས་སེམས་པ་རྣམ་དག་གི་ཐོག་ནས་བརྟན་བཞུགས་འབུལ་བར་དངོས་གནས་ཡག་པོ་ཞེ་དྲགས་བྱུང་སོང་། ངོས་རང་ལ་ཆ་བཞག་ན་ལོ་བརྒྱ་ཕྲག་ལྷག་སྡོད་ཐུབ་པར་སྨོན་ལམ་དང་སེམས་ཤུགས་སྐྱེས་ནས་ཡོད། འཛམ་གླིང་ནང་སངས་རྒྱས་ཀྱི་བསྟན་པ་མར་རྒུད་བཞིན་པའི་དུས་སྐབས་འདིར། ངོས་ནས་སངས་རྒྱས་ཀྱི་བསྟན་པར་ཞབས་འདེགས་ཕྲན་བུ་སྒྲུབ་ཐུབ་པར་ཕྱི་ནང་གི་རྐྱེན་མང་པོ་ཞིག་འདུག དེ་སྔ་ནང་པའི་ཆོས་དར་ཁྱབ་མེད་པའི་ས་ཁུལ་དུའང་ཁ་སང་དེ་རིང་དོ་སྣང་གསར་པ་ཡོང་གི་འདུག ལྷག་པར་དུ་ཆོས་ཁས་མི་ལེན་པའི་ངོས་ཀྱི་གྲོགས་པོ་ཚན་རིག་པ་མང་པོས་ནང་ཆོས་ལ་དགའ་པོ་ཞེ་དྲགས་བྱེད་ཀྱིན་འདུག དེར་བརྟེན། ང་ཚོ་ཆོས་ཁས་ལེན་མཁན་དང་མི་ལེན་མཁན་ཚང་མས་སེམས་ཀྱི་ཞི་བདེ་བརྒྱུད་འཛམ་གླིང་ཞི་བདེ་ཡོང་བར་དམིགས་བསལ་དོ་སྣང་བྱེད་བཞིན་ཡོད་ལ། ངོས་ཀྱི་ངོ་ཤེས་ཚན་རིག་པ་མང་པོས་ཀྱང་དམིགས་བསལ་གྱིས་དོ་སྣང་དང་དགའ་པོ་ཞེ་དྲགས་བྱེད་ཀྱིན་འདུག
ངོས་ནས། བསྟན་པ་རིན་ཆེན་མཆོག་གིས་མ་ཁྱབ་པའམ།། ཁྱབ་ཀྱང་ཉམས་པར་གྱུར་པའི་ཕྱོགས་དེར་ནི།། སྙིང་རྗེ་ཆེན་པོས་ཡིད་རབ་བསྐྱོད་པ་ཡིས།། ཕན་བདེའི་གཏེར་དེ་གསལ་བར་བྱེད་པར་ཤོག། ཅེས་སྨོན་ལམ་འདེབས་བཞིན་ཡོད། ངོས་ཀྱི་མི་ཚེར་ཆ་བཞག་ན། ཉེ་ཆར་རང་ཨམ་རྗེ་ལ་བསྟེན་སྐབས། གཟུགས་པོ་ཡག་པོ་ཞེ་དྲགས་འདུག་ཟེར་གི དེར་བརྟེན། ངོས་ད་དུང་ལོ་བཅོ་ལྔ་ཉི་ཤུ་ཞིག་ཕལ་ཆེ་སྡོད་ཀྱི་རེད། ངོས་ནས་སྤྱིར་མིའི་ཡ་རབས་སྤྱོད་བཟང་དང་བྱེ་བྲག་ཏུ་སངས་རྒྱས་ཀྱི་ཆོས་དང་འབྲེལ་སེམས་ཁམས་རིག་པ་དང་འབྲེལ་བའི་ཐོག་ནས་འཛམ་གླིང་ཞི་བདེ་ཡོང་བར་ཞབས་འདེགས་གང་འཚམ་བསྒྲུབ་ཐུབ་པ་འདུག དེར་བརྟེན། ཆོས་ལུགས་སོ་སོ་གཙོ་བོར་གྱུར་བའི་བསྟན་པའི་འཁུར་བཞེས་མཁན་ཚང་མས་ངོས་ལ་བསྟན་པའི་ཞབས་འདེགས་སྒྲུབ་པའི་ཆ་རྐྱེན་ཞིག་གཟིགས་ཀྱི་ཡོད་དུས། ཚང་མས་ངོས་ལ་ཆར་བ་གྲོགས་ཤར་གནང་བཞིན་པ་ཞིག་ཏན་ཏན་ཡོད། དེ་བས་ངོས་ཀྱིས་ཀྱང་སེམས་པ་རྣམ་དག་གི་ཐོག་ནས་བསྟན་པའི་ཞབས་འདེབས་སྒྲུབ་བཞིན་ཡོད། ཅེས་གསུངས།
དཔལ་ལྡན་དགའ་ལྡན་ཕོ་བྲང་གི་དྲ་རྒྱའི་སྟེང་གི་མཛད་འཆར་ལྟར་ན། ཟླ་འདིའི་ཕྱི་ཚེས་ ༡༩ དང་ ༢༠ ཉིན་གཉིས་རིང་གི་༧གོང་ས་རྒྱལ་བ་རིན་པོ་ཆེ་མཆོག་ལ་སོག་པོའི་བླ་མའི་དགེ་རྒན་གྱི་གསུང་ཆོས་གོ་སྒྲིག་ཚོགས་པས་ཇི་ལྟར་གསོལ་བ་བཏབ་པ་ལྟར་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་དགའ་ལྡན་ལྷ་བརྒྱ་མའི་ཆོས་འབྲེལ་བཀའ་དྲིན་སྩལ་གཏན་ཁེལ་འདུག
གསར་འགོད་པ། དོན་གྲུབ་བཀྲ་ཤིས། སྐལ་བཟང་སྦྱིན་པ།
