སྲིད་སྐྱོང་སྤེན་པ་ཚེ་རིང་མཆོག་ནས་ཨ་རིའི་ནང་གཞུང་འབྲེལ་སྐོར་སྐྱོད་གནང་བཞིན་པ།

དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ནས་ཟླ་འདིའི་ཕྱི་ཚེས་ ༤ ཉིན་ནས་ཁེ་ན་ཌའི་ནང་དུ་གཞུང་འབྲེལ་ཕྱོགས་ཕེབས་གནང་སྟེ་ལེགས་པར་གྲུབ་ཡོད་པ་ལྟར།  ཟླ་འདིའི་ཕྱི་ཚེས་ ༡༢  ཉིན་ནས་བཟུང་ཨ་རིའི་ཁུལ་དུ་གཞུང་འབྲེལ་ཕྱོགས་ཕེབས་གནང་མགོ་བཙུགས་ཡོད་པ་རེད།

ཟླ་འདིའི་ཕྱི་ཚེས་ ༡༣ ཉིན་སྲིད་སྐྱོང་མཆོག་གིས་བྷོ་སི་ཌོན་ཁུལ་གྱི་བོད་མི་རྣམས་ལ་བཀའ་སློབ་གནང་སྐབས། སྐབས་ ༡༦ པའི་བཀའ་ཤག་གིས་བོད་ཀྱི་ལོ་རྒྱུས་ཀྱི་གནས་བབ་ལ་ངོས་འཛིན་ཐོབ་ཐབས་སུ། རྒྱ་ནག་གཞུང་ལ་བརྡ་ལན་དང་རྒྱལ་སྤྱིའི་སྤྱི་ཚོགས་ཐོག་བོད་དོན་སྐོར་ལ་གོ་རྟོགས་སྤེལ་ཐབས་བྱེད་ཀྱི་ཡོད་པས། བོད་མི་རྣམས་ཀྱིས་ལོ་རྒྱུས་རང་བཞིན་ལྡན་པའི་འདས་སོང་གི་བོད་ཀྱི་ལོ་རྒྱུས་ལ་ལྟ་ཀློག དབུ་མ་དང་རང་བཙན་གྱི་རྩོད་གླེང་མི་བྱེད་པར་རྒྱལ་སྤྱིའི་སྤྱི་ཚོགས་སུ་བོད་ཀྱི་ལོ་རྒྱུས་ཀྱི་གནས་བབ་བསྐྲུན་ཐབས་བྱ་དགོས་སྐོར་དང་། ད་ལྟ་ཨ་རིའི་གྲོས་ཚོགས་འོག་མར་གཏན་འབེབ་བྱས་པའི་བོད་རྒྱའི་དཀའ་རྙོག་སེལ་ཐབས་ཀྱི་ཁྲིམས་འཆར་དེ་གྲོས་ཚོགས་གོང་མར་གཏན་འབེབ་བྱུང་ཐུབ་ཚེ། ཨ་རིའི་གཞུང་གིས་བོད་དང་རྒྱ་ནག་གི་དཀའ་རྙོག་དེ་དག་སེལ་ཐུབ་མེད་པར་ངོས་འཛིན་བྱེད་ཀྱི་ཡོད་སྟབས། ཁྲིམས་འཆར་དེ་ཧ་ཅང་གལ་ཆེན་ཡིན་པས། ད་ལན་ཨ་རིའི་གྲོས་ཚོགས་གོང་མས་ཁྲིམས་འཆར་དེ་ངོས་ལེན་བྱ་རྒྱུའི་ཐད་ལ་ཧུར་ཐག་བྱ་རྒྱུ་ཡིན་སྐོར་སོགས་གསུངས་འདུག

ཡང་སྲིད་སྐྱོང་མཆོག་གིས། ད་ལྟ་རྒྱ་ནག་གཞུང་གི་མགོ་ཁྲིད་ཞི་ཅིན་ཕིན་གྱི་འོག་ནས་བོད་དང་། ཤར་ཏུ་ཀི་སི་ཐན། ཧོང་ཀོང་། དེ་བཞིན་ནང་སོག་སོགས་སུ་དམ་དྲག་དང་དྲག་གནོན་ཇེ་ཆེར་གཏོང་གིན་ཡོད་པ་མ་ཟད། རྒྱ་ནག་གཞུང་གིས་བོད་ནང་དུ་མི་རིགས་སྡེབ་གསོད་ཀྱི་སྲིད་ཇུས་ལག་བསྟར་དང་། བོད་ནང་གི་བོད་ཕྲུག་མང་པོ་ཞིག་གི་ཆེད་དུ་རྒྱ་ནག་གཞུང་གིས་གཉེར་བའི་སྒེར་བཙུགས་སློབ་གྲྭ་སོགས་སུ་མངག་གཏོང་བྱེད་ཀྱི་ཡོད་པའི་སྐོར་དང་། བོད་མི་རིགས་ཀྱི་རྨང་གཞི་གཙོ་བོ་ནི་སྐད་དང་ཡི་གེ་ཡིན་པས་བོད་མི་ཚོས་ནང་ཁུལ་རྩོད་རེས་བྱས་ནས་མ་བསྡད་པར་བོད་ཀྱི་སྐད་ཡིག་གིས་མཚོན་པའི་རིག་གནས་ལ་སྦྱང་བརྩོན་དང་བདག་ཉར་བྱ་རྒྱུ་དེ་ཧ་ཅང་གལ་ཆེན་ཡིན་སྐོར་སོགས་གསུངས་འདུག ཡང་ཕྱི་ཚེས་ ༡༤ ཉིན་སྲིད་སྐྱོང་མཆོག་གིས་བོད་རིགས་གཞོན་སྐྱེས་ཚོ་ལ་ཟུར་མཇལ་གནང་ནས། བོད་ཀྱི་སྣོད་བཅུད་ཆགས་ཚུལ་དང་བོད་དེ་ས་བབ་ཆགས་ཚུལ་གྱི་ཐད་ནས་རྒྱལ་ཁབ་གཞན་ལ་ཇི་ལྟར་གལ་ཆེན་དུ་གྱུར་ཡོད་མེད་སོགས་ཀྱི་ཐད་ལ་གསུང་བཤད་སོགས་གནང་འདུག

ཟླ་འདིའི་ཕྱི་ཚེས ༡༢ ཉིན་སྲིད་སྐྱོང་མཆོག་ཨ་རིའི་ཝིན་མོ་ཌི་ (Vermont) མངའ་ཁུལ་དུ་ཕེབས་ནས་ཨ་རིའི་གྲོས་ཚོགས་འཐུས་མི་པི་ཌིར་(Peter Welch) ལགས་གཙོས་མངའ་སྡེ་དེའི་གྲོས་ཚོགས་འཐུས་མི་དང་གནད་ཡོད་མི་སྣ་སོགས་དང་མཇལ་འཕྲད་གནང་ཡོད་པ་རེད།

ཟླ་འདིའི་ཚེས་ ༡༦ ཉིན་སྲིད་སྐྱོང་མཆོག་གིས་ཨ་རིའི་གྲོས་ཚོགས་གོང་མའི་ནང་བོད་རྒྱའི་དཀའ་རྙོག་སེལ་བར་སྐུལ་འདེད་གཏོང་བའི་ཁྲིམས་འཆར་(Promoting a Resolution to the Tibet-China Dispute Act H.R. 533) གཏན་འབེབ་ཡོང་ཐབས་སུ་སྐུལ་འདེད་གནང་རྒྱུ་དང་། དེ་བཞིན་ཨ་རིའི་གྲོས་ཚོགས་འཐུས་མི་དང་། ཕྱི་སྲིད་ལས་ཁུངས་ཀྱི་བོད་དོན་དམིགས་བསལ་འབྲེལ་འཐུད་པ་གཙོས་བོད་དོན་ཐོག་རོགས་རམ་གནང་མཁན་ཨ་རིའི་གཞུང་གི་སྡེ་ཚན་ཁག་མང་པོ་ཞིག་དང་མཇལ་མོལ་གནང་རྒྱུ་ཡིན་འདུག

གསར་འགོད་པ་དཔལ་ལྡན་གྱིས་ཕྱོགས་སྒྲིག་བྱས།

རྩོམ་སྒྲིག་པ། པདྨ་མཚོ།