རྒྱལ་སྤྱིའི་ཞང་བོད་རིག་གནས་བགྲོ་གླེང་ཐོག་༧སྐྱབས་རྗེ་སྨན་རིའི་ཁྲི་འཛིན་རིན་པོ་ཆེ་མཆོག་ནས་བོད་ཀྱི་རིག་གཞུང་ཡང་དག་པ་ཞིག་འཚོལ་བར་ཞང་ཞུང་རིག་གནས་དང་ལོ་རྒྱུས་ཀྱི་མགོ་ཁུངས་ལ་ཞིབ་འཇུག་བྱེད་གལ་ཆེན་པོ་ཡིན་སྐོར་བཀའ་གནང་།
དེ་རིང་ཕྱི་ཟླ་ ༤ ཚེས་ ༡༨ ནས་ཉིན་གྲངས་གཉིས་རིང་དཔལ་གཤེན་བསྟན་སྨན་རི་གླིང་གི་གཡུང་དྲུང་བོན་གྱི་དཔེ་མཛོད་ཁང་དུ། རྒྱལ་སྤྱིའི་ཞང་བོད་རིག་གནས་བགྲོ་གླེང་ཚོགས་འདུ་འཚོག་བཞིན་འདུག་ལ། བགྲོ་གླེང་དབུ་འབྱེད་ཀྱི་མཛད་སྒོའི་ཐོག་༧སྐྱབས་རྗེ་སྨན་རིའི་ཁྲི་འཛིན་ལུང་རྟོགས་ཟླ་བ་དར་རྒྱས་རིན་པོ་ཆེ་མཆོག་དབུ་བཞུགས་ཐོག རྒྱ་གར་དང་ཕྱི་རྒྱལ་ཡུལ་གྲུ་ཁག་ནས་ཕེབས་པའི་ཉམས་ཞིབ་པ་དང་། སློབ་གཉེར་བ། གྲྭ་བཙུན་སོགས་མི་གྲངས་ ༡༥༠ ལྷག་མཉམ་ཞུགས་གནང་འདུག་ལ། བགྲོ་གླེང་གི་ཉིན་དང་པོར་སྨན་རིའི་ཁྲི་འཛིན་མཆོག་གིས་བོན་སྒོ་དཔྱད་རྩོམ་ཕྱོགས་བསྒྲིགས་དང་། མཁས་དབང་དཔལ་ལྡན་ཚུལ་ཁྲིམས་ཀྱི་གསུང་རྩོམ་དབུ་འབྱེད་གནང་སོང་།
རྒྱལ་སྤྱིའི་ཞང་བོད་རིག་གནས་བགྲོ་གླེང་ཚོགས་འདུའི་དགོས་དམིགས་སྐོར་ལ་དགེ་བཤེས་ཁྲི་གཡུང་དྲུང་ལགས་ཀྱིས། སྤྱིར་རྒྱལ་སྤྱིའི་ཐོག་བོན་པོའི་རིག་གནས་སྐོར་ལ་ཞིབ་འཇུག་བྱེད་མཁན་གྱི་མཁས་པ་མང་པོ་ཞིག་ཡོད་ཅིང་། ཁོང་རྣམས་ནི་སྨན་རིའི་ཁྲི་འཛིན་སོ་གསུམ་པ་མཆོག་དང་ཧ་ཅང་ཐུགས་ཉེ་བོ་ཡོད་པ་མ་ཟད། སྨན་རི་གླིང་དུ་ཕེབས་ཏེ་བོན་གྱི་སྐོར་ཞིབ་འཇུག་བྱས་ཏེ་རྒྱལ་སྤྱིའི་ཐོག་འབྲེལ་ལམ་ཡོད་བསྡད་པ་ཞིག་རེད། སྨན་རིའི་ཁྲི་འཛིན་སོ་གསུམ་པ་མཆོག་ཀྱང་ཞིབ་འཇུག་སྐོར་ལ་ཐུགས་སྣང་ཡོད་མཁན་ཞིག་ཡིན་པས། རྒྱལ་སྤྱིའི་ཐོག་གི་བོན་པོའི་ཞིབ་འཇུག་པའི་འབྲེལ་ལམ་དང་དྲན་གསོའི་ཆེད་གདན་འདྲེན་ཞུས་པ་ཞིག་རེད། མ་འོངས་པར་བོན་པོའི་རིག་གནས་ལ་ཞིབ་འཇུག་བྱེད་མཁན་གྱི་གཞོན་སྐྱེས་མང་པོ་འཚར་ལོངས་བྱུང་ཆེད་དུ་ཡིན། ལོ་གཅིག་གི་སྔོན་ནས་བོན་པོའི་ཞིབ་འཇུག་པ་རྒན་པ་ཁག་ཅིག་ལ་འབྲེལ་བ་ཞུས་ཡོད་ཀྱང་། དགུང་ལོའི་བབ་དང་བསྟུན་ནས་ཕེབས་ཐུབ་མི་འདུག ཅེས་འགྲེལ་བརྗོད་གནང་བྱུང་།
བགྲོ་གླེང་མཛད་སྒོའི་ཐོག་༧སྐྱབས་རྗེ་སྨན་རིའི་ཁྲི་འཛིན་རིན་པོ་ཆེ་མཆོག་གིས། རྒྱལ་སྤྱིའི་ཐོག་བོན་པོའི་སྐོར་ལ་ཞིབ་འཇུག་བྱེད་མཁན་གྱི་མཁས་པ་མང་པོ་ཞིག་དགུང་ལོ་བགྲེས་པོ་ཆགས་ཀྱི་ཡོད་པ་དང་། མ་འོངས་པར་གཞོན་སྐྱེས་མང་པོ་ཞིག་སྐྱེད་སྲིང་བྱེད་དགོས་པ་གལ་ཆེན་པོ་ཆགས་ཀྱི་ཡོད་པར་བརྟེན། ང་ཚོ་ཕན་ཚུན་བར་འབྲེལ་ལམ་ཡག་པོ་ཡོང་བའི་ཆེད་དུ་བགྲོ་གླེང་འདི་སྐོང་འཚོག་བྱེད་ཀྱི་ཡོད་པ་ཞིག་རེད། རྩ་བའི་བླ་མ་སྨན་རིའི་ཁྲི་འཛིན་སོ་གསུམ་པ་མཆོག་ནི་རྒྱལ་སྤྱིའི་ཐོག་གི་དེང་དུས་བོན་གྱི་རིག་གནས་སྐོར་ལ་ཞིབ་འཇུག་བྱེད་མཁན་གྱི་མཁས་པ་མང་པོ་དང་འབྲེལ་འདྲེས་བྱུང་ཡོད་པ་དང་། ངས་ཀྱང་སྨན་རིའི་ཁྲི་འཛིན་འཁུར་ནས་ལོ་དྲུག་འཁོར་ཡོད་པས་ཞིབ་འཇུག་པ་རྣམས་དང་འབྲེལ་ལམ་རྒྱུན་སྐྱོང་ཐུབ་པའི་བསམ་བློའི་ཐོག་ནས་བྱུང་བ་ཞིག་ཡིན། མཁས་པ་ཁག་ཅིག་དགུང་ལོའི་བབ་དང་བསྟུན་ནས་ཕེབས་ཐུབ་མེད་ཀྱང་། གང་འཚམ་ཕེབས་ཡོད་པར་དགའ་བོ་བྱུང་ལ་བཀའ་དྲིན་ཆེ་ཞུ། ང་ཚོ་བོད་ཀྱི་རིག་གཞུང་ཡང་དག་པ་ཞིག་འཚོལ་བར་ཞང་ཞུང་རིག་གནས་དང་ལོ་རྒྱུས་ཀྱི་མགོ་ཁུངས་ལ་ཞིབ་འཇུག་བྱེད་དགོས་པ་གལ་ཆེན་པོ་རེད། སྤྱིར་ཆོས་ནང་ནས་བཤད་པའི་ལོ་རྒྱུས་དང་། དེང་རབས་ཀྱི་ཚན་རིག་དང་མཐུན་པའི་ཐོག་ནས་ཞིབ་འཇུག་བྱེད་སྟངས་གཉིས་ཅུང་ཙམ་ཁ་ཕྱོགས་མ་འདྲ་བ་ཡོང་གི་ཡོད། གཅིག་ནི་དངོས་དོན་རིག་པའི་ཐོག་ནས་བསམ་བློ་གཏོང་སྟངས་དང་། གཅིག་ནི་ཡིད་ཆེས་ཀྱི་བསམ་བློ་གཏོང་སྟངས་ཀྱི་ཁྱད་པར་ཞིག་ཡོང་གི་ཡོད། ལྟ་གྲུབ་ལའང་དངོས་དོན་རིག་པའི་ཐོག་བསྒྲུབ་རྒྱུ་ཡོད་པ་ཞིག་རེད། ང་ཚོས་བཤད་སྟངས་ལ་བོན་གྱི་ལོ་རྒྱུས་ལོ་ངོ་ཆིག་ཁྲི་བརྒྱད་སྟོང་བཤད་ཀྱི་ཡོད་ཀྱང་། ཞིབ་འཇུག་གི་ཐོག་ལོ་དེ་འདྲའི་མང་པོ་འགྲོ་རྒྱུ་ཁག་པོ་ཆགས་ཡོད། ཐེངས་འདིར་བགྲོ་གླེང་ཡག་པོ་ཡོང་རྒྱུ་དང་། ཚང་མར་ལུས་བདེ་སེམས་བདེ་ཆགས་པའི་བཀྲ་ཤིས་སྨོན་འདུན་ཞུ་རྒྱུ་ཡིན། ཞེས་གསུངས་སོང་།
འདི་གའི་གསར་འགོད་པས་ཐེངས་འདིའི་བགྲོ་གླེང་ཐོག་གཏམ་བཤད་གནང་མཁན་གྱི་ཉམས་ཞིབ་པ་ཁག་ཅིག་གི་བརྗོད་གཞི་སྐོར་ལ་བཅར་འདྲི་བྱས་པར། ཝཱ་ཎ་དབུས་བོད་ཀྱི་གཙུག་ལག་སློབ་གཉེར་ཁང་གི་སློབ་དཔོན་བེ་རི་འཇིགས་མེད་དབང་རྒྱལ་ལགས་ཀྱིས། ད་ལན་གྱི་ཞང་བོད་རིག་གནས་བགྲོ་གླེང་ཐོག་བེ་རི་རྒྱལ་པོ་དང་བོན་པོའི་འབྲེལ་བའི་སྐོར་གྱི་བརྗོད་གཞི་ཐོག་བཤད་ཀྱི་ཡོད། དུས་རབས་བཅུ་བདུན་པའི་ནང་བེ་རི་རྒྱལ་པོ་སྟོབས་འབྱོར་ཆེ་བའི་སྐབས་ཀྱི་དུས་ཚོད་ཐུང་ཐུང་ཞིག་གི་ནང་དུ་བོན་ཀྱི་བསྟན་པ་ཧ་ཅང་རྒྱ་ཆེན་པོ་དར་བ་དང་། དེ་ནས་རིམ་པ་བཞིན་ཆག་འཇིག་བྱུང་བ་ཞིག་རེད། ཅེས་འགྲེལ་བརྗོད་གནང་བྱུང་།
ཝཱ་ཎ་དབུས་བོད་ཀྱི་གཙུག་ལག་སློབ་གཉེར་ཁང་གི་ལོ་རྒྱུས་སློབ་དཔོན་ཤ་བོ་རྟ་མགྲིན་ལགས་ཀྱིས། ཐེངས་འདིའི་བགྲོ་གླེང་ཐོག་ངས་ཏུན་ཧོང་ཡིག་ཆའི་ནང་ཡོད་པའི་ཞང་ཞུང་རྒྱལ་མོ་སད་མ་ཀར་གྱི་ཤོག་དྲིལ་སྐོར་ཡིན། དང་པོ་ཤོག་དྲིལ་གྱི་ངོ་སྤྲོད་དང་། གཉིས་པ་ཞང་ཞུང་དང་བོད་གྱི་འབྲེལ་ལམ་སྐོར། གསུམ་པ་དུས་སྐབས་ཀྱི་ཡུལ་སྲོལ་གོམས་གཤིས་དང་། སེམས་ཁམས་སོགས་ཀྱི་སྐོར། གསུམ་པ་ཡིག་ཆ་དེའི་སྐོར་དུས་རབས་བདུན་པ་དང་བརྒྱད་པ་གང་དུ་འཁེལ་མིན་ཞིབ་བསྡུར་བྱས་པའི་སྐོར་ཡིན། ཅེས་འགྲེལ་བརྗོད་གནང་སོང་།
བི་ཤྭ་བྷཱ་ར་ཏཱི་འཕགས་བོད་རིག་གནས་སློབ་གཉེར་ཁང་གི་འབུམ་རམས་སློབ་གཉེར་བ་པ་སངས་སྒྲོལ་དཀར་ལགས་ཀྱིས། ཐེངས་འདིའི་བགྲོ་གླེང་ཐོག་བལ་ཡུལ་གློ་ཕྱོགས་ཀྱི་བོན་པོའི་བྱུང་རིམ་སྐོར་ལ་བཤད་ཀྱི་ཡོད། དུས་རབས་བཅོ་བརྒྱད་དང་བཅུ་དགུ་བའི་ནང་གློ་དང་དོལ་པོའི་ཕྱོགས་སུ་བོན་པོ་མང་པོ་བྱུང་བའི་ཡིག་ཆ་རག་གི་ཡོད་པར་བརྟེན། ས་གནས་ས་ཐོག་ཏུ་ཕྱིན་ཏེ་སྔོན་ཆད་ཀྱི་བྱུང་རབས་དང་། ད་ལྟའི་གནས་སྟངས་ལ་ཞིབ་བསྡུར་བྱས་པའི་སྐོར་ཡིན། ཞེས་འགྲེལ་བརྗོད་གནང་བྱུང་།
དགེ་བཤེས་ཚུལ་ཁྲིམས་རབ་བརྟན་ལགས་ཀྱིས། བོད་ཀྱི་དུར་སའི་ནང་དུ་གསེར་དང་གཡུ་སོགས་ཀྱི་དུར་རྫས་འདྲ་མིན་མང་པོ་ཡོད། དེ་སྔ་བོད་ཀྱི་བང་སོ་ཞིབ་འཇུག་བྱེད་མཁན་གྱི་ཁྲོད་དུར་རྫས་དེ་དག་དགོས་པའི་རྒྱུ་མཚན་སོགས་ཞིབ་འཇུག་གསལ་ཁ་གང་ཡང་མེད་པ་རེད། ངས་བོན་གྱི་དཔེ་ཆ་རྙིང་པ་ཁག་ལ་ལྟ་དུས་དེ་དག་འགྲེལ་བཤད་ཆ་ཚང་ཡོང་གི་འདུག དེ་ཡང་དུར་རྫས་དེ་དག་གི་མཚོན་དོན་གྱི་སྒོ་ནས་ཤེས་རྟོགས་ཐུབ་པ་ཞིག་ཡིན་པས། དེའི་སྐོར་བོན་གྱི་ཡིག་རྙིང་ཐོག་འགྲེལ་བཤད་རྒྱག་གི་ཡོད་པ་ཞིག་ཡིན། ཞེས་འགྲེལ་བརྗོད་གནང་བྱུང་།
དེ་བཞིན་འབུམ་རམས་པ་གཅན་བཟོད་རྒྱམ་ལགས་ཀྱིས། སྤྱིར་ལོ་རྒྱུས་ཐོག་ཞང་ཞུང་དང་གུ་གེའི་ཐ་སྙད་དུས་ཚོད་ག་ཚོད་ཅིག་ལ་བྱུང་བ་དང་། ཡིག་ཐོག་དུ་ག་དུས་བྱུང་ཡོད་པའི་སྐོར། དེ་ནས་ཞང་ཞུང་དང་གུ་གེ་ཐ་སྙད་ཀྱི་གོ་དོན་གྱི་བཞེད་པ་མི་འདྲ་བ་གང་དག་ཡོད་པའི་སྐོར་ལ་བཤད་ཀྱི་ཡོད། ཁ་ཤས་ཀྱིས་ཞང་ཞུང་ཞེས་པ་དེ་རུས་ཤིག་དང་ཁྱུང་། ལུང་པ་ཁ་ཞེང་ཆེན་པོ་སོགས་དོན་ལ་འགྲེལ་བའི་བཞེད་པ་མ་འདྲ་བ་དང་། གུ་གེ་ཡང་ཡི་གེ་དང་། སྐྱིད་སྡེ་ཉི་མ་མགོན་གྱི་རྒྱལ་ཁོངས་བགོ་འགྲེམས་བྱེད་སྐབས་སྤྲིན་གུག་གུག་ལྟར་འགྲོ་བཞིན་ཡོད་པས་གུག་གུག་གི་དོན་ཡིན་པ་འགྲེལ་བཤད་རྒྱག་མཁན་སོགས་མང་པོ་ཡོད་པའི་སྐོར་ལ་བཤད་ཀྱི་ཡོད། ཅེས་འགྲེལ་བཤད་གནང་བྱུང་།
ཐེངས་འདིའི་རྒྱལ་སྤྱིའི་ཞང་བོད་རིག་གནས་བགྲོ་གླེང་ཚོགས་འདུའི་སྟེང་ཕྱི་རྒྱལ་ཁག་དང་རྒྱ་གར་ནས་ཕེབས་པའི་ཉམས་ཞིབ་པ་ ༢༠ ལྷག་གིས་བརྗོད་གཞི་མི་འདྲ་བ་བཅུ་གཉིས་ཐོག་བགྲོ་གླེང་གནང་གི་ཡོད་ཅིང་། དེ་རིང་བོད་ཀྱི་དུར་རྫས་མཚོན་དོན་སྐོར་དང་། བོན་གྱི་སྨན་སྒྲུབ་སྐོར། གདན་ས་སྨན་རིའི་སྨན་གྱི་སྒྲུབ་ཆེན་དང་འབྲེལ་ནས་གཡུང་དྲུང་བོན་ལུགས་ཀྱི་བདུད་རྩི་སྨན་སྒྲུབ་ཀྱི་བྱུང་རབས་སྐོར། ཁྱུང་སྤྲུལ་འཇིགས་མེད་ནམ་མཁའ་རྡོ་རྗེས་མཛད་པའི་རིན་ཆེན་རིལ་བུའི་ལག་ལེན་སྐོར་སོགས་ལ་བགྲོ་གླེང་གནང་སོང་།
གསར་འགོད་པ་བྱམས་པ་ཚེ་རིང་གིས་སྨན་རི་གླིང་ནས་སྤེལ།
རྩོམ་སྒྲིག་པ། པདྨ་མཚོ།
