བོད་འབྱོར་ཆབ་སྲིད་བཙོན་ཟུར་རྣམ་སྐྱིད་ལགས་ཀྱིས་མིག་ཆུ་འཐོར་ཞོར་བོད་ནང་གི་བོད་མི་ཚོའི་རེ་འབོད་བཞིན་བཙན་བྱོལ་བོད་མི་རྣམས་ཀྱིས་ཆོལ་ཁ་ཆོས་ལུགས་བར་གྱི་འཐེན་འཁྱེར་མེད་པར་རྡོག་རྩ་གཅིག་སྒྲིལ་བྱ་དགོས་པའི་རེ་སྐུལ་གནང་སོང་།
དེ་རིང་རེས་གཟའ་པ་སངས་ཉིན་དབུས་བོད་མིའི་སྒྲིག་འཛུགས་ཕྱི་དྲིལ་ལྷག་པ་ཚེ་རིང་ཚོགས་ཁང་དུ། བོད་ནས་བཞུགས་སྒར་དུ་འབྱོར་བའི་ཆབ་སྲིད་བཙོན་ཟུར་རྣམ་སྐྱིད་ལགས་ཀྱིས་བོད་ནང་གི་ཛ་དྲག་གནས་སྟངས་དང་རྒྱ་ནག་གཞུང་གིས་བཙོན་འོག་ཏུ་དཀའ་སྡུག་མནར་གཅོད་ཇི་ལྟར་བཏང་ཡོད་མེད་ཐད་ཀྱི་གསར་འགོད་གསལ་བསྒྲགས་བྱས་སོང་ལ། སྐབས་དེར་ཁོང་མོས་མི་ལོ་གསུམ་གྱི་བཙོན་འཇུག་དུས་ཡུན་རིང་བོད་མི་ཞིག་དང་ཆབ་སྲིད་བཙོན་པ་ཞིག་ཡིན་པའི་ཆ་ནས་བཙོན་པ་གཞན་དང་མི་འདྲ་བར་དབྱེ་འབྱེད་དང་སྡུག་སྦྱོང་མནར་གཅོད་ཚད་མེད་མྱངས་ཡོད་སྐོར་སོགས་བརྗོད་སོང་།
གསར་འགོད་གསལ་བསྒྲགས་ཐོག་ཁོང་མོས། ཆུང་དུས་ནས་ཕ་མ་གཉིས་གཙོ་བོར་གྱུར་བའི་རྒན་པ་རྣམས་ཀྱི་ཞལ་ནས་རྒྱ་ནག་དམར་གཞུང་གིས་དམར་གསོད་འཕྲོག་བཅོམ་བྱས་ཏེ་བོད་བཙན་བཟུང་བྱས་པ་དང་། ༧གོང་ས་རྒྱལ་བ་རིན་པོ་ཆེ་མཆོག་དང་། ༧སྐྱབས་རྗེ་ཀིརྟི་རིན་པོ་ཆེ་མཆོག་སོགས་སྐྱེས་ཆེན་དམ་པ་མང་པོ་རྒྱ་གར་ནང་བཙན་བྱོལ་དུ་བཞུགས་དགོས་བྱུང་ཡོད་པ་སོགས་གོ་ཐོས་བྱུང་སྐབས་སེམས་པ་སྐྱོ་ཡོད་སྐོར་དང་། གཅེན་མོ་བསྟན་འཛིན་སྒྲོལ་མ་ལགས་དང་ལྷན་བོད་ནང་དུ་ཞི་བོའི་ངོ་རྒོལ་བྱས་པའི་སྐོར་ལ་ཁོང་མོས། ཕྱི་ལོ་ ༢༠༡༥ ལོ་ཟླ་ ༩ པའི་ཟླ་མཇུག་ཏུ་ཁོང་མོ་དང་ཕ་མ་སྤུན་གྱི་སྤུན་མཆེད་བསྟན་འཛིན་སྒྲོལ་མ་ལགས་གཉིས་ཀྱིས་གསང་གྲོས་ཡང་ཡང་བྱས་པ་བརྒྱུད། ཕྱི་ལོ་ ༢༠༡༥ ཟླ་ ༡༠ ཚེས་ ༢༡ ཉིན་དཔའ་བོའི་སྲང་ལམ་དུ་༧གོང་ས་རྒྱལ་བ་རིན་པོ་ཆེ་མཆོག་གི་སྐུ་པར་འཕྱར་ནས་ངོ་རྒོལ་སྐད་འབོད་བྱས་རྗེས། རྒྱ་ནག་གཞུང་གི་ཉེན་རྟོག་པས་འཛིན་བཟུང་བྱས་ནས། འདྲི་བརྩད་དང་གཅར་རྡུང་ཚད་མེད་བཏང་མཐར། བཀྲ་ཤིས་རྒྱལ་ཁ་གླིང་རྫོང་གི་བཀག་ཉར་ཁང་དུ་ཟླ་བདུན་ལྷག་བཅུག་པ་བཅས་ལོ་གཅིག་དང་ཟླ་གཅིག་ཙམ་བཀག་ཉར་བྱས་ཏེ། ཕྱི་ལོ་ ༢༠༡༦ ཟླ་ ༡༡ ཚེས་ ༢༣ ཉིན། ཁྲོ་ཆུ་རྫོང་ཁྲིམས་ཁང་གིས། རྒྱལ་ཁབ་ལ་ངོ་ལོག་བྱས་ཏེ་ཁ་བྲལ་བའི་བྱ་ངན་བསྒྲུབས་པའི་ཉེས་མིང་འོག་ལོ་ ༣ རེའི་བཙོན་འཇུག་ཁྲིམས་ཐག་བཅད་སྐོར་སོགས་བརྗོད་བྱུང་།
ཡང་ཁོང་མོས། ལོ་གསུམ་གྱི་ཁྲིམས་ཐག་བཅད་རྗེས་བཙོན་ཁང་དུ་རྒྱ་ནག་གཞུང་གི་རྩ་ཁྲིམས་དང་བཅའ་ཁྲིམས་སོགས་ཚུད་པའི་དམར་ཤོག་གི་ཆབ་སྲིད་སློབ་གསོའི་སྐོར་གྱི་ཡིག་རིགས་དག་བཙན་གྱིས་བློ་འཛིན་བྱེད་དུ་བཅུག་པ་དང་། ཟངས་སྐུད་དང་འཕྲུལ་རིགས་སོགས་བཟོ་བའི་ངལ་རྩོལ་གྱི་ལས་ཀ་བྱེད་དུ་བཅུག་པ། དེ་བཞིན་དམག་སྦྱོང་སོགས་བྱེད་དུ་འཇུག་གི་ཡོད་ཅིང་། བཙོན་ཁང་ནས་ཁོང་ཉིད་ལ་རྒྱལ་ཁབ་ཁ་བྲལ་བ་རེད་ཟེར་ནས་མིག་ཟུང་བགྲད་ཀྱི་ཡོད་པ་མ་ཟད། རྣམ་འགྱུར་མི་ལེགས་ལུགས་སོགས་བཤད་ནས་གཅར་རྡུང་ཚད་མེད་བཏང་ནས་མི་རིགས་དབྱེ་འབྱེད་ཀྱི་དཀའ་ངལ་ཆེན་པོ་འཕྲད་ཡོད་སྐོར་དང་། དེ་བཞིན་ཟས་གོས་མལ་གསུམ་གྱི་གནས་སྟངས་ཧ་ཅང་སྐྱོ་བོ་ཡིན་པའི་སྐོར་སོགས་བརྗོད་བྱུང་ལ། བཙོན་འཇུག་དུས་ཡུན་ཚང་ནས་ཀློད་གྲོལ་བཏང་རྗེས་ཀྱང་། དངོས་ཤུགས་བརྒྱུད་གསུམ་ནས་སོ་ཉུལ་དང་ལྟ་རྟོག་བྱས་རྐྱེན་ལུས་སེམས་གཉིས་ནས་དཀའ་ངལ་མང་དག་ཅིག་འཕྲད་ཡོད་སྟབས། ཕྱི་ལོ་ ༢༠༢༣ ཟླ་ ༥ ཚེས་ ༡༣ ཉིན་ཨ་ནེ་ཚེ་རིང་སྐྱིད་དང་ལྷན་རྒྱ་གར་ནང་བཙན་བྱོལ་དུ་ཡོང་ཡོད་སྐོར་སོགས་བརྗོད་སོང་།
ཆབ་སྲིད་བཙོན་ཟུར་རྣམ་སྐྱིད་ལགས་ཀྱིས། སྤྱིར་བོད་ནང་ལ་ཆོལ་ཁ་དང་ཆོས་ལུགས་ཀྱི་དབྱེ་བ་ཞིག་གཏན་ནས་མེད་ཀྱང་། ང་རང་འདིར་ཐོན་དུས་ཨ་མདོ་དང་། དབུས་གཙང་སོགས་ཟེར་ནས་དབྱེ་བ་བཀར་གྱི་འདུག་པས། ཧ་ཅང་གི་ཐབས་སྐྱོ་བོ་དང་། སེམས་ཕམ། ཡིད་ལ་སྐྱོ་སྣང་ཤུགས་ཆེན་བྱུང་། བོད་ནང་དུ་སྐར་མ་དང་། ཆུ་ཚོད། ལོ་ཟླའི་ཁྲོད་ནས་བོད་མི་རྣམས་ཀྱིས་རྒྱ་ནག་གཞུང་གི་འོག་ཏུ་དཀའ་སྡུག་མྱོང་གིན་ཡོད་པ་མ་ཟད། བོད་ཀྱི་ཆབ་སྲིད་བཙོན་པ་མང་དག་ཅིག་མུན་ནག་གི་བཙོན་དུ་བཅུག་ནས་གཅར་རྡུང་མྱོང་གིན་ཡོད་ཅིང་། དེ་ནི་བོད་ཆོལ་ཁ་གསུམ་གྱི་ཆེད་དུ་ཡིན་པ་རེད། རྒྱ་ནག་གཞུང་གིས་འདི་ཨ་མདོ་བ་རེད། འདི་དབུས་གཙང་བ་རེད་ཟེར་ནས་དབྱེ་བ་གཏན་ནས་མི་ཕྱེ་བར། བོད་མི་ཚང་མར་གཅར་རྡུང་བྱེད་ཀྱི་ཡོད་པས། བཙན་བྱོལ་བོད་མི་ཚོས་ཆོལ་ཁ་ཡི་ཕྱོགས་རིས་མེད་པར་མཐུན་སྒྲིལ་རྡོག་རྩ་གཅིག་སྒྲིལ་བྱ་རྒྱུ་དེ་གལ་ཆེན་པོ་རེད་བསམས་སོང་། བཙན་བྱོལ་ནང་ཆོལ་ཁ་ཡི་དབྱེ་མཚམས་ཧ་ཅང་ཆེ་བས་ང་རང་བཙན་བྱོལ་དུ་འབྱོར་རྗེས་སེམས་པ་དངོས་གནས་དྲང་གནས་སྐྱོ་བྱུང་། ཞེས་དང་། བོད་ནང་གི་བོད་མི་རྣམས་ཀྱིས་བློ་སྤོབས་ཆེན་པོས་ང་བོད་པ་ཡིན་ཞེས་བརྗོད་ཀྱིན། ༧གོང་ས་རྒྱལ་བ་རིན་པོ་ཆེ་མཆོག་བོད་ལ་ཕེབས་དགོས། ༧ཀིརྟི་རིན་པོ་ཆེ་བོད་དུ་ཕེབས་དགོས་ཟེར་ནས་ངོ་རྒོལ་སྐད་འབོད་བྱས་ནས་དཀའ་སྡུག་མྱོང་གིན་ཡོད་པས། འུ་ཚོས་ཆོལ་ཁ་ཡི་ཕྱོགས་རིས་རྩོད་དུས་ཤིག་ཡིན་ནམ། ཚང་མས་བོད་ཀྱི་སྐད་ཡིག་རིག་གཞུང་ལ་སྦྱང་བརྩོན་གྱིས་ཆོལ་ཁ་དང་ཆོས་ལུགས་མི་རྩོད་རྒྱུ་དེ་ངའི་རེ་བ་ཡིན། ཞེས་སེམས་ཚོར་དྲག་པོས་བརྗོད་བྱུང་།
མཇུག་ཏུ་དྲི་བ་དྲིས་ལན་སྐབས་ཁོང་མོས། བོད་ནང་དུ་རྒྱལ་གཅེས་ལྷག་བསམ་ཅན་ཕོ་མོ་རྒན་གཞོན་མང་པོ་ཞིག་གིས། རྒྱ་ནག་དམར་གཞུང་གིས་བོད་ཀྱི་དགོན་པ་གྲྭ་ཚང་དང་། སློབ་གྲྭ། མང་ཚོགས་བཅས་ལ་བོད་ཀྱི་ཆོས་དང་རིག་གཞུང་། སྐད་ཡིག་བཅས་འཛིན་སྐྱོང་སྤེལ་གསུམ་བྱེད་པར་དངོས་ཤུགས་བརྒྱུད་གསུམ་ནས་བཀག་འགོག་དང་། འགྲོ་འདུག་གི་རང་དབང་ལ་བཙན་གནོན་ཤུགས་ཆེན་བྱེད་བཞིན་ཡོད་པས། བཙན་བྱོལ་ནང་དུ་ཡོད་པའི་བོད་མི་རྣམས་ཀྱིས་བོད་ཀྱི་སྐད་ཡིག་སྦྱང་བརྩོན་སོགས་བྱ་རྒྱུ་དེ་ཧ་ཅང་གལ་ཆེན་པོ་ཡིན་སྐོར་དང་། བཙན་བྱོལ་བོད་མི་རྣམས་ཀྱིས་བོད་ནང་གི་བོད་མི་ཚོར་གདུང་སེམས་མཉམ་སྐྱེད་དང་བོད་ཕྱི་ནང་གཉིས་ཀྱི་བོད་མི་རྣམས་རྡོག་རྩ་གཅིག་སྒྲིལ་བྱ་རྒྱུ་ཧ་ཅང་གལ་ཆེན་པོ་ཡིན་སྐོར་སོགས་བརྗོད་བྱུང་།
ཆབ་སྲིད་བཙོན་ཟུར་རྣམ་སྐྱིད་ལགས་ནི་བོད་མདོ་སྨད་རྔ་བ་རྫོང་གཅའ་རོ་ཡུལ་ཚོ་པདྨ་ལྷ་ཐང་གི་འབྲོག་ཁྱིམ་ཕལ་བ་ཞིག་ཏུ་སྐྱེས་ཤིང་། ཕྱི་ལོ་ ༢༠༡༥ ཟླ་ ༡༠ ཚེས་ ༢༡ ཉིན་རྔ་བ་རྫོང་གི་དཔའ་བོའི་ཁྲོམ་གཞུང་དུ་ངོ་རྒོལ་བྱས་རྐྱེན། རྒྱ་ནག་གཞུང་གིས་རྒྱལ་ཁབ་ཁ་བྲལ་གྱི་ཉེས་མིང་གཡོགས་ནས་ལོ་གསུམ་གྱི་ཁྲིམས་ཐག་བཅད་དེ། ཕྱི་ལོ་ ༢༠༡༨ ཟླ་ ༡༠ ཚེས་ ༢༡ ཉིན་བཙོན་འཇུག་དུས་ཡུན་ཚང་ནས་ཀློད་གྲོལ་བྱས། ཕྱི་ལོ་ ༢༠༢༣ ཟླ་ ༥ ཚེས་ ༢༧ ཉིན་བལ་ཡུལ་སྣེ་ལེན་ཁང་དུ་འབྱོར། ཕྱི་ལོ་ ༢༠༢༣ ཟླ་ ༦ ཚེས་ ༢༨ ཉིན་བཞུགས་སྒར་དྷ་རམ་ས་ལའི་དབུས་སྣེ་ལེན་ཁང་དུ་འབྱོར། ད་ཆ་ཤེས་རབ་དགའ་ཚལ་སློབ་གླིང་དུ་སློབ་གཉེར་གནང་བཞིན་ཡོད་པ་རེད།
གསར་འགོད་པ། དཔལ་ལྡན།
རྩོམ་སྒྲིག་པ། པདྨ་མཚོ།
