སྲིད་སྐྱོང་སྤེན་པ་ཚེ་རིང་མཆོག་ནས་རྒྱ་ནག་གཞུང་གིས་བོད་མིའི་སྒྲིག་འཛུགས་ཀྱིས་འདི་བྱེད་ཀྱི་འདུག་འདི་བྱེད་ཀྱི་མི་འདུག་ཅེས་བཤད་པ་དེ་ཚོར་བདག་པོ་བརྒྱག་དགོས་ན་བོད་ནང་བཟང་ཕྱོགས་ཀྱི་འགྱུར་བ་གཏོང་དགོས་སྐོར་གསུངས་འདུག
བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་རྒྱ་ནག་དམར་གཞུང་གི་མགྲིན་ཚབ་པ་ཝང་ཝིན་པིན། པར་དུས་བབ་ཀྱིས་བསྒྲིགས།
ཟླ་འདིའི་ཕྱི་ཚེས་ ༢༦ ནས་ཟླ་ ༥ ཚེས ༢༡ བར་དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་ཧི་མ་ཅལ་མངའ་སྡེའི་སོ་ལན་དང་ལྡི་ལི། དེ་ནས་སུད་སི་དང་ཧྥ་རན་སི། ཨི་ཊ་ལི། ཨོ་སི་ཊི་རི་ཡ། འཇར་མན་ནི་སོགས་སུ་གཞུང་འབྲེལ་ཕྱོགས་སྐྱོད་གནང་ཡོད་པ་ལྟར། ཁ་སང་ཕྱི་ཚེས་ ༢༨ ཉིན་སྲིད་སྐྱོང་མཆོག་སུད་སི་གྲོང་ཁྱེར་རྫུ་རིག་ཏུ་འབྱོར་ཏེ་ཁུལ་དེའི་བོད་མི་རྣམས་ལ་གསུང་བཤད་གནང་འདུག
མི་མང་ལ་གསུང་བཤད་གནང་སྐབས་ཟླ་འདིའི་ཕྱི་ཚེས ༢༦ ཉིན་རྒྱ་ནག་ཕྱི་སྲིད་ལས་ཁུངས་ཀྱི་མགྲིན་ཚབ་པ་ཝང་ཝིན་པིན་( Wang Wenbin) ཟེར་བ་ཞིག་གིས་རྒྱུན་ལྡན་གྱི་གསར་འགོད་གསལ་བསྒྲགས་ཤིག་གི་སྟེང་། རྒྱ་ནག་གཞུང་གིས་༧གོང་ས་རྒྱལ་བ་རིན་པོ་ཆེ་མཆོག་སྐུ་སྒེར་གྱི་སྐུ་ཚབ་མཉམ་དུ་འབྲེལ་མོལ་བྱ་རྒྱུ་ལས། བོད་མིའི་སྒྲིག་འཛུགས་ལ་ངོས་ལེན་གཏན་ནས་མེད་སྐོར་བཤད་པ་དེའི་ཐད་སྲིད་སྐྱོང་མཆོག་གིས། རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པས་རྒྱ་ནག་གཞུང་གིས་༧གོང་ས་རྒྱལ་བ་རིན་་པོ་ཆེ་མཆོག་དང་ལྷན་དུ་༧མགོན་པོ་གང་ཉིད་ཀྱི་མ་འོངས་པའི་གནད་དོན་སྐོར་གྲོས་མོལ་བྱ་རྒྱུ་ལས་བོད་མིའི་སྒྲིག་འཛུགས་ལྷན་དུ་གྲོས་མོལ་བྱ་རྒྱུ་མིན་ཚུལ་བཤད་པ་ནི་སྐད་ཆ་གསར་པ་གང་ཡང་མ་རེད། རྒྱ་གཞུང་གིས་རྒྱུན་ལྡན་ནས་ཤོད་བཞིན་པའི་གནས་ཚུལ་ཞིག་ཡིན་སྐོར་དང་། བོད་རྒྱ་གཉིས་ཀྱི་དཀའ་རྙོག་སེལ་དགོས་ན་རྒྱ་ནག་གཞུང་དང་ལྷན་དུ་གྲོས་མོལ་བྱ་དགོས་པས། བོད་མིའི་སྒྲིག་འཛུགས་ཀྱིས་རྒྱལ་སྤྱིའི་སྲིད་གཞུང་དང་སྤྱི་ཚོགས་ལ་གོ་རྟོགས་དང་ཞུ་གཏུགས་ཀྱི་ལས་འགུལ་སྤེལ་ནས། རྒྱ་ནག་གཞུང་གིས་བོད་རྒྱ་གྲོས་མོལ་བྱ་རྒྱུར་སྐུལ་མ་གནང་དགོས་པའི་འབོད་སྐུལ་གནང་གི་ཡོད་སྐོར་གསུངས་འདུག
ཡང་བོད་མིའི་སྒྲིག་འཛུགས་ཀྱི་དྲ་རྒྱའི་ནང་དེ་འབྲེལ་གནས་ཚུལ་སྤེལ་བ་ལྟར་ན། སྲིད་སྐྱོང་མཆོག་གིས། མཚམས་རེར་རྒྱ་ནག་ནས་ང་ལ་ཁྱོད་ཀྱིས་འདི་བྱེད་ཀྱི་འདུག འདི་བྱེད་ཀྱི་མི་འདུག་ལྟ་བུའི་ལན་སྐུར་གྱི་འདུག ངས་འདི་ང་ལ་མ་ཤོད་ཅེས་བརྗོད་ཀྱི་ཡོད། ཁོ་ཚོས་བཤད་པ་དེ་ང་ཚོས་བདག་པོ་རྒྱག་དགོས་ན། དང་པོ་བོད་ནང་བཟང་ཕྱོགས་ཀྱི་འགྱུར་བ་ཞིག་ཐོངས་དང་། དེ་ནས་ང་ཚོས་བསམ་བློ་གཏང་རྒྱུ་ཡོད་པ་རེད། བོད་ནང་བཟང་ཕྱོགས་ཀྱི་འགྱུར་བ་གཏང་རྒྱུ་མེད་པར་ཁ་སང་ཕྱི་སྲིད་ལྷན་ཁང་གི་མགྲིན་ཚབ་པས་སྐད་ཆ་ཤོད་སྟངས་ལ་བལྟས་པ་ཡིན་ན། ང་ཚོའི་ལུང་པར་ཁོ་ཚོས་བཙན་གནོན་དབང་ཡོད་ཀྱིས་བཟུང་བསྡད་ཡོད་བཞིན་དུ། ད་དུང་༸རྒྱལ་བ་རིན་པོ་ཆེས་འདི་གནང་དགོས། འདི་གནང་ཆོག་གི་མ་རེད་ཅེས་བཤད་པ་དེ་ག་རེ་ཟེར་གྱི་ཡོད་པ་རེད། ཧམ་པའི་སྐད་ཆ་རེད། འདི་རིགས་ང་ཚོས་ཁས་ལེན་ཐུབ་རྒྱུ་མེད་ཅེས་སོགས་གསུངས་འདུག
གསར་འགོད་གསལ་བསྒྲགས་དེའི་ཐོག་ཝང་ཝིན་པིན་( Wang Wenbin) ཟེར་བ་དེས། བཙན་བྱོལ་བོད་མིའི་གཞུང་ཟེར་བ་ནི་ཕྱི་ལོགས་སུ་གནས་སྡོད་བྱེད་མཁན་གྱི་བོད་མི་ཁ་བྲལ་བས་བཙུགས་པའི་བོད་རང་བཙན་འདོད་པའི་ཆབ་སྲིད་ཀྱི་གར་སྟེགས་ཤིག་ཡིན་ལུགས་དང་། ཁྲིམས་མཐུན་མིན་པའི་ཚོགས་པ་དེས་རྒྱ་ནག་གི་བཅའ་ཁྲིམས་ལ་གནོད་འཚེ་གཏོང་གིན་ཡོད་པས་འཛམ་གླིང་གི་རྒྱལ་ཁབ་སུས་ཀྱང་ངོས་ལེན་བྱེད་ཀྱི་མེད་ཚུལ་དང་། དེ་བཞིན་རྒྱ་ནག་གཞུང་གིས་འབྲེལ་མོལ་སླད་ཆ་རྐྱེན་གཙོ་བོ་གཉིས་བཏོན་ཡོད་ཅིང་། གཅིག ༸གོང་ས་རྒྱལ་བ་རིན་པོ་ཆེ་མཆོག་གི་སྐུ་ཚབ་དང་ལྷན་དུ་འབྲེལ་ལམ་དང་གྲོས་མོལ་བྱ་རྒྱུ་ཡིན་པ་ལས་བཙན་བྱོལ་བོད་གཞུང་ངམ་བོད་མིའི་སྒྲིག་འཛུགས་ལ་འབྲེལ་མོལ་བྱ་རྒྱུ་མིན་ལུགས། གཉིས་པ། འབྲེལ་མོལ་དེ་༸གོང་ས་རིན་པོ་ཆེ་མཆོག་དང་སྐུ་འཁོར་ཁག་གཅིག་གི་མ་འོངས་པའི་སྐུ་སྒེར་གྱི་གནད་དོན་ཡིན་པ་ལས་མིང་དོན་མཚུངས་བའི་རང་སྲིད་རང་སྐྱོང་ཟེར་བའི་སྐོར་མིན་ལུགས་སོགས་བཤད་ཡོད་པ་རེད།
གསར་འགོད་པ། དཔལ་ལྡན།
རྩོམ་སྒྲིག་པ། པདྨ་མཚོ།
