འཛམ་གླིང་གི་གཞི་རྒྱ་ཆེ་ཤོས་ཀྱི་འོས་བསྡུ་ཆེན་མོ་སྟེ་རྒྱ་གར་གྱི་ཕྱི་ལོ ༢༠༢༤ ལོའི་འོས་བསྡུར་མི་གྲངས་ས་ཡ་ ༩༦༠ ཙམ་གྱིས་ཐོ་འགོད་བྱས་ཏེ་ཉིན་གྲངས་ ༤༤ རིང་འོས་བསྡུ་བྱེད་མུས་ཡིན་པ་རེད།
Lok Sabha 2024 elections will be held between April 19 and June 1, across seven phases.
འདི་ལོའི་ཕྱི་ཟླ་ ༤ ཚེས ༡༩ ནས་ཟླ་ ༦ ཚེས་ ༡ བར་གྱི་ཉིན་གྲངས་ ༤༤ རིང་རྒྱ་གར་གྱི་འོས་བསྡུ་ཆེན་མོ་གནང་གི་ཡོད་ལ། འདི་ལོའི་འོས་བསྡུའི་ཆེད་མི་གྲངས་ས་ཡ་ ༩༦༠ ཙམ་གྱིས་ཐོ་འགོད་བྱས་ཡོད་པས། ཕྱི་ལོ ༢༠༡༩ ལོའི་རྒྱལ་ཡོངས་འོས་བསྡུ་དང་བསྡུར་ན་འདི་ལོའི་འོས་བསྡུའི་ཁྲོད་ཐོ་འགོད་བྱེད་མཁན་མི་གྲངས་ཡ་ས་ ༦༠ ལྷག་མང་བ་ཡོད་པས་འཛམ་གླིང་གི་ཆེས་གཞི་རྒྱ་ཆེ་ཤོས་ཀྱི་འོས་བསྡུ་ཞིག་ཆགས་ཡོད་པ་མ་ཟད། རྒྱ་གར་གྱི་ལོ་རྒྱུས་ནང་གི་འོས་བསྡུའི་དུས་ཡུན་རིང་ཤོས་གཉིས་པ་དེའང་རེད་འདུག
རྒྱ་གར་གྱི་མངའ་སྡེ་ ༢༨ དང་། དབུས་ཐད་སྐྱོང་དང་རང་སྐྱོང་ཁུལ་ ༨ ནང་རྒྱ་གར་གྲོས་ཚོགས་འོག་མའི་འཐུས་མི་ ༥༤༣ འོས་འདེམས་བྱས་པ་བརྒྱུད། ལས་ཐོག་གཞུང་འཛིན་ཚོགས་པ་བྷི་ཇེ་ཕིའི་དབུ་འཁྲིད་སྲིད་བློན་མུ་དྷི་མཆོག་དང་། ཁ་གཏད་ཀོང་རི་སི་སྲིད་དོན་ཚོགས་པའི་དབུ་འཁྲིད་མ་ལི་ཀར་གྷ་(Mallikarjun Kharge) གཉིས་ལས་སུ་ཞིག་སྲིད་བློན་ཆགས་མིན་ནི་སྲིད་དོན་ཚོགས་པ་གང་ལ་རྒྱལ་ཁ་འཐོབ་མིན་ལ་ཐུག་ཡོད་པ་རེད།
འདས་པའི་མི་ལོ་ ༡༠ རིང་རྒྱ་གར་སྲིད་བློན་མུ་དྷི་མཆོག་གི་ལས་ཡུན་རིང་། རྒྱ་གར་གྱི་དཔལ་འབྱོར་ཕྱོགས་ཡོངས་ནས་འཕེལ་རྒྱས་ཤུགས་ཆེན་ཕྱིན་ཏེ་འདས་པའི་ལོ་ཤས་རིང་རྒྱ་གར་འཛམ་གླིང་གི་ཚོང་གི་ལྟེ་གནས་ཆེ་ཤོས་ལྔ་པར་གྱུར་ཡོད་ཅིང་། རྒྱ་གར་གྱི་ཤེས་རིག་དང་། འཕྲོད་བསྟེན། འཛུགས་སྐྲུན། དེང་རབས་འཕྲུལ་རིག་སོགས་ཀྱི་ཐད་ནས་འཕེལ་རྒྱས་ཕྱིན་ཡོད་པ་དང་། ལྷག་པར་དུ་རྒྱ་གར་གྱི་གྲོང་གསེབ་ཁག་ཏུ་སློབ་གྲྭ་ ༢༣༡ ལྷག་གསར་འཛུགས་ཀྱིས་སློབ་མ་གྲངས ༡༤༠༠༠༠ ལྷག་ལ་སློབ་སྦྱོང་གི་གོ་སྐབས་བསྐྲུན་པ། པཱ་ཀི་སི་ཐན་ནང་ཐེངས་འགར་དྲག་པོའི་རྒོལ་རྡུལ་བཏང་བ། ལྐོག་ཟ་རུལ་སུངས་འགོག་རྒོལ་ཆེད་དངུལ་ལོར་བརྗེ་བསྒྱུར་དང་འཕྲུལ་ལས་ཅན་དུ་བསྒྱུར་བ་སོགས་ཀྱི་གྲུབ་འབྲས་ཐོན་ཡོད་འདུག གནད་དོན་དབྱེ་ཞིབ་པ་ཚོས། འདི་ལོའི་འོས་བསྡུའི་ཁྲོད། སྲིད་བློན་མུ་དྷི་མཆོག་གི་སྲིད་དོན་ཚོགས་པར་བསྐྱར་དུ་རྒྱལ་ཁ་ཐོབ་རེ་ཆེ་བ་ཡོད་སྐོར་བརྗོད་ཀྱི་འདུག་ལ། ད་ལན་ཡང་བསྐྱར་རྒྱལ་ཁ་འཐོབ་ཚེ་ཁོང་གིས་སྲིད་བློན་གྱི་ཐུགས་འགན་ཐེངས་གསུམ་པ་དེ་འཁུར་གྱི་ཡོད་པ་རེད།
ཕྱི་ལོ་ ༢༠༢༠ ཟླ་ ༩ ཙམ་ནས་མུ་དྷི་གཞུང་གིས། རྒྱ་གར་གྱི་ཞིང་ལས་ཁྲིམས་སྒྲིག་གསུམ་གྱི་ཐད་ལ་བསྐྱར་བཅོས་བྱས་པར་བརྟེན། རྒྱ་གར་གྱི་པན་ཇབ་དང་། ཧར་ཡ་ན་སོགས་ཞིང་ལས་ཤུགས་ཆེ་བའི་མངའ་སྡེ་མང་པོའི་ནང་ཞིང་པའི་ངོ་རྒོལ་ལས་འགུལ་ཤུགས་ཆེན་བྱས་ཏེ། ད་བར་ཞིང་པ་ལས་འགུལ་བ་མང་པོར་ཤི་རྨས་བྱུང་བ་དང་། རང་ཤི་བརྒྱབ་པའི་གནས་ཚུལ་བྱུང་ཡོད་འདུག ཀོང་རི་སི་ཁ་གཏད་ཚོགས་པས་རྒྱུན་དུ་སྲིད་བློན་མུ་དྷི་དང་བྷི་ཇེ་ཕི་ཡིས། ཧིན་དྷུ་དང་ཁ་ཆེ་ཞེས་དུམ་བུ་གཉིས་ལ་བཅད་ཡོད་པ་མ་ཟད། སྤྱི་དམངས་ཀྱི་བདེ་སྡུག་ལ་བསམ་ཞིབ་མ་བྱས་པར་དངོས་ཟོག་གི་ཁྲལ་སྤར་བ་སོགས་བྱས་ཏེ། རྒྱལ་ཁབ་ཕུ་དཀྲུག་མདའ་དཀྲུག་བཏང་ཡོད་སྐོར་དང་། ཆོས་ལུགས་དབྱེ་འབྱེད་བྱེད་ཀྱི་ཡོད་སྐོར་སྐྱོན་བརྗོད་བྱེད་བཞིན་ཡོད་ལ། ཁ་གཏད་ཚོགས་པས་མུ་དྷི་ལ་སླར་ཡང་སྲིད་བློན་གྱི་རྒྱལ་ཁ་ཐོབ་པ་ཡིན་ན། རྒྱ་གར་མི་མང་གིས་གཞི་རྩའི་ཐོབ་ཐང་མང་པོ་ཞིག་མི་རག་པའི་དཀའ་ངལ་འཕྲད་ཉེན་ཡོད་སྐོར་བརྗོད་ཀྱི་ཡོད་པ་རེད།
People Wait In Queues At A Polling Station To Cast Their Votes For Karnataka Assembly Elections, In Bengaluru On May 10
ཕྱི་ལོ་ ༢༠༡༩ ལོའི་འོས་བསྡུའི་སྐབས་མུ་དྷི་གཞུང་གིས་མི་ལོ་ལྔ་ཡི་ནང་ཚུད་ལ་རྒྱ་གར་གྱི་རྒྱལ་སྲུང་དང་། ཞིང་པའི་ཚོང་དོན་ཡོང་འབབ་གོང་མཐོར་གཏང་རྒྱུ་ཡིན་པ་སོགས་ཁས་ལེན་ཆེན་པོ་བཅུ་ཙམ་བྱས་ཡོད་ཀྱང་ལག་བསྟར་མ་ཐུབ་པ་དང་དཀའ་རྙོག་བཟོས་པའི་སྐྱོན་བརྗོད་འོག རྒྱ་གར་གྱི་མངའ་སྡེ་ཆེན་པོ་ཡུ་པི་དང་། པན་ཇབ། ཧ་རི་ཡ་ན། དེ་བཞིན་ཁ་ཆེ་ཆོས་ལུགས་མང་བའི་ཇ་མུ་དང་ཀ་ཤི་མིར་སོགས་ནས་འོས་ཤོག་ལྡུག་མཁན་ཉུང་ཉུང་ཡིན་པའི་ཚོད་དཔག་བྱེད་ཀྱི་ཡོད་ཀྱང་། རྒྱ་གར་དབུས་དང་། ལྷོ་ཕྱོགས་ཁུལ་གྱི་ས་གནས་མང་པོ་ནས་གཞུང་འཛིན་ཚོགས་པར་འོས་ཤོག་ལྡུག་མུས་ཡིན་འདུག
འདི་ལོའི་འོས་བསྡུ་ཆེན་མོ་དེ་ཕྱི་ཟླ་ ༤ ཚེས་ ༡༩ དང་། ཚེས་ ༢༦། ཕྱི་ཟླ་ ༥ ཚེས་ ༧ དང་༡༣། ༢༠། དེ་བཞིན་ ༢༥ སོགས་སུ་མངའ་སྡེ་ཁག་གི་ནང་འོས་བསྡུས་བྱས་རྗེས། འདི་ལོའི་ཕྱི་ཟླ་ ༦ ཚེས་ ༤ ཉིན་འོས་བསྡུའི་གྲུབ་འབྲས་གསལ་བསྒྲགས་བྱ་རྒྱུ་ཡིན་འདུག་ཀྱང་། འདི་ལོར་རྒྱ་གར་ལྷོ་ཕྱོགས་ཁུལ་གྱི་མངའ་སྡེ་མང་པོ་ཞིག་ཏུ་ཚ་བ་ཤུགས་ཆེན་རྒྱས་ཀྱི་ཡོད་པ་མ་ཟད། ལྷག་པར་དུ་རྒྱ་གར་མངའ་སྡེ་ཆེ་གྲས་མ་ཧ་ར་ཤི་ཌ་(Maharashtra) སོགས་སུ་ཚ་རླབས་ཆེན་པོ་རྒྱས་ཀྱི་ཡོད་སྟབས། གནད་དོན་དབྱེ་ཞིབ་པ་ཚོས། འདི་ལོར་ཚ་རླབས་ཀྱི་རྐྱེན་གྱིས་རྒྱ་གར་ལྷོ་ཕྱོགས་ཁུལ་གྱི་མངའ་སྡེ་མང་པོའི་ནང་འོས་ཤོག་ལྡུག་མཁན་ཇེ་ཉུང་དུ་འགྲོ་སྲིད་པའི་ཚོད་དཔག་བྱེད་ཀྱི་འདུག
རྒྱ་གར་གྱི་རྒྱལ་ཡོངས་འོས་བསྡུ་ཆེན་མོ་དེ་རྒྱ་གར་རང་བཙན་ཐོབ་རྗེས། ཕྱི་ལོ་ ༡༩༤༩ ལོར་གཏན་འབེབ་བྱས་པའི་རྩ་ཁྲིམས་ཀྱི་འབྲུ་དོན་གཞིར་བཟུང་ཐོག་མར་ཕྱི་ལོ་ ༡༩༥༡ ལོར་འོས་བསྡུ་བྱས་ཏེ། གྲོས་ཚོགས་འོག་མའི་འོས་བསྡུ་སྐབས་དང་པོ་དེ་ཟླ་བ་ ༣ ལྷག་འགོར་ཡོད་པ་དང་། ཐོག་མའི་རྒྱལ་ཁ་དེ་རྒྱ་གར་གྱི་སྲིད་བློན་ཟུར་པ་ནེ་རུ་མཆོག་གིས་སྣེ་འཁྲིད་པའི་ཀོང་རི་སི་ཚོགས་པ་ལ་ཐོབ་ཡོད། ཕྱི་ལོ་ ༡༩༦༢ ནས་ ༡༩༨༩ བར་གྱི་རྒྱལ་ཡོངས་འོས་བསྡུ་ཉིན་གྲངས་ ༤ ནས་ ༡༠ བར་གྱི་དུས་ཡུན་ནང་མཇུག་སྒྲིལ་ཡོད་པ་དང་། ལྷག་པར་དུ་ཕྱི་ལོ་ ༡༩༨༠ ལོའི་རྒྱལ་ཡོངས་འོས་བསྡུ་དེ་ཉིན་གྲངས་ ༤ ནང་མཇུག་སྒྲིལ་ཡོད་སྟབས། ལོ་རྒྱུས་ཁྲོད་ཀྱི་འོས་བསྡུ་དུས་ཡུན་ཐུང་ཤོས་དེ་ཆགས་ཡོད་འདུག ཡིན་ནའང་། འདི་ལོའི་འོས་བསྡུར་ཉིན་གྲངས་ ༤༤ ཙམ་འགོར་གྱི་ཡོད་འདུག
གསར་འགོད་པ། དཔལ་ལྡན།
རྩོམ་སྒྲིག་པ། པདྨ་མཚོ།
