རྒྱ་ནག་གིས་༧གོང་ས་མཆོག་ལ་གསོལ་འདེབས་ཞུ་བ་དང་རང་ལུས་མེ་སྲེག་གནང་མཁན་གྱི་རྗེས་སུ་བསང་དང་མཆོད་འབུལ་བྱེད་པ། ད་དུང་བོད་རང་བཙན་དང་འབྲེལ་བའི་བརྡ་འཕྲིན་དང་རི་མོ། བརྙན་ཟློས། སྒྲ་ཟློས་ཕབ་ལེན་བྱས་ཏེ་ཉན་པ་དང་བལྟ་བ། བརྒྱུད་སྤེལ་བྱེད་པ་སོགས་གཏན་འགོག་དང་རྩ་རྫོགས་བྱེད་པའི་སྲིད་ཇུས་འདིང་གི་འདུག
ད་ལྟའི་ཆར་རྒྱ་ནག་གཞུང་གིས་བོད་ཀྱི་སྐད་ཡིག་རིག་གཞུང་དང་བཅས་པ་རྩ་མེད་གཏོང་ཐབས་ཀྱི་སྲིད་ཇུས་འདྲ་མིན་ལག་བསྟར་བྱས་དང་བྱེད་བཞིན་ཡོད་པ་ལྟར། ཐུན་རིན་རྫོང་དྲིལ་བསྒྲགས་ལས་ཁུངས་ཀྱིས། བོད་རང་བཙན་དང་འབྲེལ་བའི་ཁྲིམས་འགལ་གྱི་བྱ་སྤྱོད་ཉི་ཤུའི་དྲིལ་སྒྲོག་བརྙན་དེབ་ཟེར་བ་ཞིག་འདོན་སྤེལ་བྱས་ཏེ། ༧གོང་ས་མཆོག་གི་སྐུ་པར་སྒྲིག་གཤོམ་མི་ཆོག་པ་དང་། རང་ལུས་མེ་སྲེག་དང་བོད་རང་བཙན། ཕ་སྐད་སྲུང་སྐྱོབ་སོགས་ཀྱི་ལས་འགུལ་སྤེལ་མཁན་གཏན་འགོག་དང་རྩ་རྫོགས་དགོས་པའི་ངན་ཇུས་ཤིག་འདིང་གི་ཡོད་པ་རེད།
དེ་འབྲེལ་འདི་གའི་གསར་འགོད་པར་འབྱོར་བའི་ཁུངས་ལྡན་གནས་ཚུལ་ལྟར་ན། རང་ལུས་མེ་སྲེག་གཏོང་མཁན་དང་དེ་ལ་ངན་སྐུལ་དང་འུད་སྒྲོག་བྱེད་མཁན། བོད་རང་བཙན་གྱི་བསམ་ཚུལ་བརྒྱུད་སྐུལ་དང་སྦྱར་ཡིག་སྦྱོར་བ། བསྒྲགས་ཡིག་འགྲེམ་པ་དང་གཏམ་བཤད་སྤེལ་བ་སོགས་གཏན་འགོག་དང་རྩ་རྫོགས་དགོས་པ། ཕ་སྐད་སྲུང་སྐྱོབ་དང་སྐྱེ་ཁམས་སྲུང་སྐྱོབ་སོགས་ཀྱི་ཚོགས་པ་འཛུགས་པ་དང་། སྐད་ཡིག་འདྲ་མཉམ་དང་སྲོག་ཆགས་སྲུང་སྐྱོབ་དང་འབྲེལ་བའི་འདུ་འཛོམས་རིགས་རྩ་རྫོགས་བྱ་རྒྱུ་ཡིན་སྐོར་བསྒྲགས་འདུག
དེ་འབྲེལ་བོད་རང་བཙན་དང་འབྲེལ་བའི་ཁྲིམས་འགལ་གྱི་བྱ་སྤྱོད་ཉི་ཤུའི་དྲིལ་སྒྲོག་བརྙན་དེབ་ཟེར་བའི་ནང་། བོད་དེ་རང་བཙན་གཙང་མའི་རྒྱལ་ཁབ་ཡིན་པའི་ངོས་འཛིན་འདུ་ཤེས་ལྡན་ཞིང་བོད་མི་རིགས་ཀྱི་བསམ་བློ་མཚོན་པའི་དཔེ་དེབ་དང་རི་མོ། སྒྲ་བརྙན་ཐོན་རྫས་བཅས་གསར་རྩོམ་སྒྲིག་བཟོ་དང་ཕྱིར་འཚོང་། སྒྲོག་སྤེལ་བཅས་གཏན་འགོག་བྱ་རྒྱུ། དྲ་ལམ་ནས་བོད་རང་བཙན་དང་འབྲེལ་བའི་བརྡ་འཕྲིན་དང་རི་མོ། བརྙན་ཟློས། སྒྲ་ཟློས་ཕབ་ལེན་བྱས་ཏེ་ཉན་པ་དང་བལྟ་བ། བརྒྱུད་སྤེལ་བཅས་བྱེད་པ། ད་དུང་མི་རིགས་མཐུན་སྒྲིལ་ལ་གནོད་པའི་བརྡ་ཁྱབ་གང་རུང་སྤེལ་བ་དང་དཀྲོག་གཏམ་བཟོས་ཏེ། སྤྱི་ཚོགས་ཀྱི་སྒྲིག་ལམ་ལ་གཏོར་བརླག་བཟོ་བ་དང་མི་རིགས་བར་འགལ་ཟླ་སློང་བ། ཕྱིའི་ཁ་བྲལ་སྟོབས་ཤུགས་ཟེར་བ་དང་ངན་འབྲེལ་བྱས་ཏེ། ཕྱིའི་དགྲ་འཛིན་སྟོབས་ཤུགས་ལ་བརྡ་འཕྲིན་ཅི་རིགས་འདོན་སྤྲོད་བྱེད་པ། ཕྱིའི་དགྲ་འཛིན་སྟོབས་ཤུགས་ཀྱིས་བོད་རང་བཙན་འུད་སྒྲོག་བྱེད་པའི་རླུང་འཕྲིན་དང་བརྙན་འཕྲིན་གྱི་ལེ་ཚན་ཨ་རིའི་རླུང་འཕྲིན་ལ་ཉན་པ་དང་བལྟ་བ་སོགས་རྩར་རྫོགས་དགོས་པ།
དེ་བཞིན། ཁྲིམས་འགལ་གྱིས་རྒྱལ་ཁབ་གཞན་དུ་སོང་ནས་ཆོས་ལུགས་ཀྱི་བྱེད་སྒོ་གང་རུང་ལ་ཞུགས་པ་དང་། མི་ཚོགས་འཛོམས་ས་སོགས་ནས་༧གོང་ས་རྒྱལ་བ་རིན་པོ་ཆེ་མཆོག་གི་སྐུ་པར་དང་བོད་རང་བཙན་པའི་འདྲ་པར་འགེལ་བ་འགོག་སྲུང་ནན་མོ་བྱ་རྒྱུ། རླངས་འཁོར་སོགས་འགྲིལ་འགྲུལ་ཡོད་བྱད་ཀྱི་ནང་དུ་བོད་རང་བཙན་གྱི་ནང་དོན་འདུས་པའི་རི་མོ་སྦྱོར་བ་དང་སྒྲ་ཟློས་གཏོང་བ་གཏན་འགོག རང་སྲེག་རྒྱག་མཁན་གྱི་རྗེས་སུ་བསང་ཕུད་པ་དང་། ཆོས་འདོན་པ། ཚེ་ཐར་གཏོང་བ་དང་། མཆོད་མེ་འཇོག་པ་སོགས་རང་སྲེག་རྒྱག་མཁན་ལ་སྨོན་ལམ་ཞུ་བ་དང་། ཡང་ན་དེའི་ཁྱིམ་མི་ལ་འཚམས་འདྲི་བྱེད་པར་འགོག་སྲུང་བྱ་རྒྱུ་སྐོར་བརྗོད་འདུག
ད་དུང་། མངའ་ཁོངས་ཕྱིའི་མི་རིགས་ཁ་བྲལ་གྱི་སྟོབས་ཤུགས་དང་མི་སྒེར་གྱི་དོན་དུ་ཞལ་འདེབས་བསྡུ་བ་དང་། ཞལ་འདེབས་བསྡུ་བར་རྩ་འཛུགས་བྱེད་པ། སློབ་གྲྭའི་ནང་དུ་བོད་རང་བཙན་གྱི་གཏམ་གླེང་སྤེལ་བ་དང་མི་རིགས་ཐལ་དྲགས་ཟེར་བའི་རིང་ལུགས་ཀྱི་བསམ་བློ་སྒྲོག་སྤེལ་བྱེད་པ། མངའ་ཁོངས་ཕྱིའི་མི་རིགས་ཁ་བྲལ་སྟོབས་ཤུགས་དང་འབྲེལ་བ་རྒྱུན་འཁྱོངས་བྱེད་པ་དང་། བོད་རང་བཙན་དང་འབྲེལ་བའི་སྤྱི་ཚོགས་བརྟན་འཇགས་སྲུང་སྐྱོབ་ཀྱི་བྱ་བའི་ཐག་གཅོད་ལ་མི་བསྟུན་པ་དང་། མི་གཞན་ལ་བཙན་སྐུལ་དང་རྩ་འཛུགས་བྱས་ནས་ངོ་རྒོལ་བྱེད་པ། དུས་ཆེན་དང་ཡང་ན་ཚོར་སྐྱེན་གྱི་དུས་སུ་དགོན་པ་དང་ཡང་ན་སྤྱི་སྤྱོད་ར་བ་ནས་མངོན་གསལ་སྒོས་མི་གཞན་ལ་ངན་སྐུལ་དང་རྩ་འཛུགས་བྱས་ཏེ་འདུ་ཚོགས་བརྒྱབ་ནས་༧གོང་ས་མཆོག་གི་གསོལ་འདེབས་སྨོན་ལམ་གྱི་བྱ་འགུལ་སྤེལ་བ། ཆོས་ལུགས་དང་དམངས་སྲོལ་བྱ་འགུལ་བེད་སྤྱད་ནས་མི་གཞན་ལ་ངན་སྐུལ་དང་། རྩ་འཛུགས་བྱས་ནས་འདུ་ཚོགས་བརྒྱབ་ནས་༧གོང་ས་མཆོག་ལ་བསང་ཕུད་པ་དང་མཆོད་མེ་སྒྲོན་པ། གསོལ་འདེབས་སྨོན་ལམ་ཞུ་བ་འགོག་སྲུང་ནན་མོ་བྱ་རྒྱུ་ཡིན་སྐོར་སོགས་གཏན་འགོག་དང་རྩ་རྫོགས་བྱེད་པའི་དོན་ཚན་ཉི་ཤུ་བསྒྲགས་འདུག
གསར་འགོད་པ། སྐལ་བཟང་སྦྱིན་པ།
