འདི་ལོའི་རྒྱ་གར་རྒྱལ་ཡོངས་ཡིག་རྒྱུགས་ཆེན་མོའི་ནང་བོད་སློབ་ཁག་གིས་ཆ་སྙོམས་ཨང་དང་པོ་བླངས་ཤིང་། བོད་ཕྲུག་ཁྱིམ་སྡེའི་འཛིན་རིམ་བཅུ་གཉིས་དང་བཅུ་བའི་རྩེ་ཕུད་ལེན་མཁན་སི་ལ་ཀུ་བོད་ཁྱིམ་རེད་འདུག
ཉེ་ལམ་རྒྱ་གར་རྒྱལ་ཡོངས་འཛིན་རིམ་བཅུ་གཉིས་དང་བཅུ་བའི་ཡིག་རྒྱུགས་གྲུབ་འབྲས་ཡོངས་བསྒྲགས་བྱས་ཡོད་པ་ལྟར། དེ་རིང་འདི་གའི་གསར་འགོད་པས་བོད་ཁྱིམ་དང་སམ་བྷོ་ཊ། མ་སི་གཏན་སློབ་བཅས་ཀྱི་འབྲེལ་ཡོད་ལ་བཀའ་འདྲི་ཞུ་ཐབས་བྱས་པ་ཡིན་མོད། བོད་ཕྲུག་ཁྱིམ་སྡེའི་འབྲེལ་ཡོད་མ་གཏོགས་བོད་སློབ་གཞན་ལ་འབྲེལ་བ་བྱེད་ཐུབ་མ་སོང་ལ། གསར་འགོད་པས་རྒྱུས་ལོན་བྱས་ཏེ་ཤེས་རྟོགས་བྱུང་བའི་གནས་ཚུལ་ལྟར་ན། བོད་ཁྱིམ་སློབ་གྲྭ་ཁག་གི་འཛིན་རིམ་བཅུ་གཉིས་པའི་ཡིག་རྒྱུགས་ཁྲོད་སི་ལ་ཀུ་བོད་ཁྱིམ་གྱིས་ཕྱོགས་བསྡོམས་ཆ་སྙོམས་བརྒྱ་ཆ་ ༨༠།༧ བླངས་ཏེ་བོད་ཁྱིམ་སློབ་གྲྭ་ཚང་མའི་ནང་ནས་ཨང་དང་པོ་དང་། གྷོ་པལ་པོར་བོད་ཁྱིམ་གྱིས་ཆ་སྙོམས་བརྒྱ་ཆ་ ༧༥ བླངས་ཏེ་ཨང་གཉིས་པ། དྷ་སྟེང་བོད་ཁྱིམ་གྱིས་ཆ་སྙོམས་བརྒྱ་ཆ་ ༧༡།༦ བླངས་ཏེ་ཨང་གསུམ་པ་བཅས་ཆགས་ཡོད། དེ་བཞིན། བོད་ཁྱིམ་གྱི་འཛིན་རིམ་བཅུ་བའི་ཡིག་རྒྱུགས་ཁྲོད། སི་ལ་ཀུ་བོད་ཁྱིམ་གྱིས་ཕྱོགས་བསྡོམས་ཆ་སྙོམས་བརྒྱ་ཆ་ ༧༨།༦ བླངས་ནས་ཨང་དང་པོ་དང་། ཇོ་ཏ་ར་བོད་ཁྱིམ་གྱིས་ཆ་སྙོམས་བརྒྱ་ཆ་ ༦༤།༢ བླངས་ནས་ཨང་གཉིས་པ། དྷ་སྟེང་བོད་ཁྱིམ་གྱིས་ཆ་སྙོམས་བརྒྱ་ཆ་ ༦༢།༨ བླངས་ནས་ཨང་གསུམ་པ་སོ་སོར་ཆགས་ཡོད།
འདི་ལོའི་རྒྱ་གར་རྒྱལ་ཡིངས་འཛིན་རིམ་བཅུ་གཉིས་པའི་ཡིག་རྒྱུགས་ལས་རྩེ་ཕུད་སློབ་མ་མི་སྒེར་གྱི་གྲུབ་འབྲས་ནི། གྷོ་པལ་པོར་བོད་ཁྱིམ་གྱི་སློབ་མ་སྐལ་ལྡན་ཚེ་རིང་གིས་སྒྱུ་རྩལ་སྡེ་ཚན་གྱི་ཁོངས་ནས་བརྒྱ་ཆ་ ༩༥།༢ བླངས་ནས་ཨང་དང་པོ་དང་། གྷོ་པལ་པོར་བོད་ཁྱིམ་གྱི་སློབ་མ་རིན་ཆེན་སྐར་མ་མཚོ་མོ་ཡིས་སྒྱུ་རྩལ་སྡེ་ཁོངས་ནས་བརྒྱ་ཆ་ ༩༥ བླངས་ནས་ཨང་གཉིས་པ། གྷོ་པལ་པོར་བོད་ཁྱིམ་གྱི་སློབ་མ་ (Pinjir Medo) ཡིས་བརྒྱ་ཆ་ ༩༤།༩ བླངས་ཏེ་སྒྱུ་རྩལ་སྡེ་ཁོངས་ནས་ཨང་གསུམ་པ་ཆགས་འདུག་ལ། འདི་ལོར་བོད་ཕྲུག་ཁྱིམ་སྡེ་སློབ་གྲྭ་ཁག་རྒྱལ་ཡོངས་ཡིག་རྒྱུགས་ནང་ཞུགས་ཏེ་བརྒྱ་ཆ་ ༩༠ ཡན་ལོན་མཁན་སློབ་མ་ཁྱོན་ ༡༧ འདུག
དེ་བཞིན། འཛིན་རིམ་བཅུ་གཉིས་པའི་ཡིག་རྒྱུགས་ནང་ཞུགས་ཏེ་ཚན་རིག་སྡེ་ཚན་ཁོངས་ནས། སི་ལ་ཀུ་བོད་ཁྱིམ་གྱི་སློབ་མ་བསྟན་འཛིན་རང་གྲོལ་གྱིས་བརྒྱ་ཆ་ ༩༤།༨ བླངས་ནས་ཨང་དང་པོ་དང་། སི་ལ་ཀུའི་སློབ་མ་ཚེ་རིང་ཆོས་འཕེལ་གྱིས་བརྒྱ་ཆ་ ༩༤།༢ བླངས་ནས་གཉིས་པ། སི་ལ་ཀུའི་སློབ་མ་བསོད་ནམས་བཟང་པོས་བརྒྱ་ཆ་ ༩༤ བླངས་ནས་ཨང་གསུམ་པ་བཅས་ཆགས་འདུག་ལ། ཚོང་རིགས་སྡེ་ཚན་གྱི་ཁོངས་ནས། སྦེལ་ཀོབ་བོད་ཁྱིམ་གྱི་སློབ་མ་ཀུན་དགའ་ཆོས་སྒྲོན་གྱིས་བརྒྱ་ཆ་ ༩༡།༢ བླངས་ནས་ཨང་དང་པོ་བླངས་འདུག འཛིན་རིམ་བཅུ་གཉིས་པའི་རྒྱལ་ཡོངས་ཡིག་རྒྱུགས་ནང་ཞུགས་མཁན་བོད་པའི་སློབ་མ་ཁྱོན་ ༤༥༠ བྱུང་བའི་ཁྲོད། བུ་མོ་ ༢༤༧ དང་བུ་ ༢༠༣ འདུག་ལ། བུ་མོའི་ཆ་སྙོམས་བརྒྱ་ཆ་ ༧༤ དང་བུའི་བརྒྱ་ཆ་ ༧༠ ཡིན་པ་མ་ཟད། ཡིག་རྒྱུགས་མ་འཕྲོད་པ་དང་བསྐྱར་རྒྱུགས་གཏོང་དགོས་པའི་སློབ་མ་གཅིག་ཀྱང་མེད་པ་རེད།
རྒྱ་གར་རྒྱལ་ཡོངས་འཛིན་རིམ་བཅུ་བའི་ཡིག་རྒྱུགས་ཁྲོད། དྷ་སྟེང་བོད་ཁྱིམ་གྱི་སློབ་མ་བསྟན་འཛིན་ཉི་སྒྲོན་གྱིས་བརྒྱ་ཆ་ ༩༥།༨ བླངས་ནས་ཨང་དང་པོ་དང་། སི་ལ་ཀུ་བོད་ཁྱིམ་གྱི་བསྟན་འཛིན་ཆོས་དབྱིངས་ཀྱིས་བརྒྱ་ཆ་ ༩༥ བླངས་ནས་ཨང་གཉིས་པ། སུ་ཇཱ་བོད་ཁྱིམ་གྱི་བསྟན་འཛིན་ཆོས་ཉིད་དཔལ་སི་ཡིས་བརྒྱ་ཆ་ ༩༤ བླངས་ནས་ཨང་གསུམ་པ་བཅས་ཆགས་ཡོད་ལ། འཛིན་རིམ་བཅུ་བའི་རྒྱལ་ཡོངས་ཡིག་རྒྱུགས་ཁྲོད། བོད་པའི་སློབ་མ་བུ་ ༢༤༩ དང་བུ་མོ་ ༢༦༣ བཅས་སློབ་མ་ཁྱོན་ ༥༡༢ ཡོད་ཅིང་། བུ་མོའི་ཆ་སྙོམས་བརྒྱ་ཆ་ ༦༥ དང་བུའི་བརྒྱ་ཆ་ ༦༠ ། དེ་བཞིན་བསྐྱར་རྒྱུགས་གཏོང་དགོས་པའི་སློབ་མ་ ༥ བྱུང་འདུག་ལ། འཛིན་རིམ་བཅུ་གཉིས་དང་བཅུ་བ་གཉིས་ཀྱི་ཡིག་རྒྱུགས་གྲུབ་འབྲས་ལས་བུ་དང་བུ་མོ་བསྡུར་ན་བུ་མོའི་གྲུབ་འབྲས་མཐོ་བ་འདུག
གཞན་ཡང་། དེ་རིང་རྒྱ་གར་གྱི་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། འདི་ལོའི་རྒྱ་གར་རྒྱལ་ཡོངས་འཛིན་རིམ་བཅུ་གཉིས་པའི་ཡིག་རྒྱུགས་ཁྲོད། བོད་སློབ་འཛིན་ཚོགས་ཀྱི་སློབ་གྲྭ་ཁག་གིས་ཆ་སྙོམས་བརྒྱ་ཆ་ ༩༩།༢༣ བླངས་ཏེ། རྒྱ་གར་རྒྱལ་ཡོངས་ཀྱི་ཡིག་རྒྱུགས་ལ་ཞུགས་མཁན་སློབ་གྲྭ་ཡོངས་ཀྱི་ནང་ནས་ཨང་དང་པོ་བླངས་ཡོད་ཅིང་། རྒྱ་གར་གྱི་ (JNVs) སློབ་གྲྭ་ཁག་གིས་བརྒྱ་ཆ་ ༩༨།༩༠ བླངས་པ་དང་། རྒྱ་གར་གྱི་ (KVs) སློབ་གྲྭ་ཁག་གིས་བརྒྱ་ཆ་ ༩༨།༨༡ བཅས་བླངས་ཡོད་འདུག
གསར་འགོད་པ། སྐལ་བཟང་སྦྱིན་པ།
